........................................
اي بالله اخطوا والخطا الي جابهم عين الصواب
مبطي وانا اشوف الطمع يكشف رداهم واستره
مايملي عيون الحسود بهالزمن غير التراب
ومن لايتوب من الخطا تحرم عليه المعذره
اللي من أولها خراب اكيد تاليها خراب
والبندق الي ما تثـّــوّر في هدفها تذعره
ودك ليا من جاتك الغلطه من الناس القراب
الصاحب الي ماكسبت بمحبته ماتخسره
مشكلتي اني ماعرفت احسب لصدتهم حساب
قلطتهم صدري على ذكري قصيد وحنجره
صوت يصول بمنظره وخطاب مابعده خطاب
والطيبه اللي زعزعت صوت الخطيب ومنظره
مافيه دمع صوبوه أحبابي بوجهي وخاب
ولازرق حزني على غالي ولا فج نحره
كل الذهاب اللي معي ذكرى من أصحاب الذهاب
والي بقالي من عذاب أشرف طريقي وأخطره
لأني تجنبت الغرق عديت من فوق السحاب
لأن أكثر أصحابي ورق ماشفت للطيب ثمر
والله ماحطيت بين الحقد والخـّــوه حجاب
حتى غدوا ربعي يحدّوني على الضيق أشكره
البارحه ثارت على أرقاب وآوتني أرقاب
البارحه يا ثقل دم البارح ويا محقره
أهبّ يا وجه الحسد وشلون جمعهم وغاب
كيف السنين الى عطتني بعثرتهم بعثره
أثر المصايب ماتجيك الا من الناس القراب
وبهالزمن حتى الخوي اللي تثق فيه احذره
لابارك الله في رفيق تزعله كلمة عتاب
ولا جمع الله الرجال اللي تفرقهم مَرَه
عودت نفسي كل ما شددت لليمّه ركاب
ماصد وجهي عن طريق الا ليا جبت خبره
الصاحب اللي مايجي من صحبته غير العذاب
نذر على ان ماهجرني والا انا اللي بهجره
من يفتح لفرقاي باب أفك له عشرين باب
وإذا خويي ما يقدّر خوتي ما اقـــدّره
ان روّحوا فأنا بري منهم ليوم الحساب
وان جرحوا قولولهم ماحركوا فيّ شعره
شفهم لهم حول السنه ولا خذوا مني جواب
أحسن دوا للي يحاول يستفزك تحقره
أنا جمعت أوراقهم بكتاب وأغلقت الكتاب
ياوقت لم الي تلمّـه وانثر الي تنثره
ماكنت احاتيهم صغيّر عاد أحاتيهم شباب
أما ذخرني صاحبي لليوم الأسود ما أذخره
عقب اكتئاب البارحه ماعاد انا حمل اكتئاب
الطيب جرجرني وأنا مانيب ناقص جرجره
اللي يخاف من الظما يترك لنا طرد السراب
واللي مب قد الظلام ووحشته لايسهره
أنا تجرعت الظما لين احترق وجهي وذاب
أنا كسرت بخاطري قبل الصداقه تكسره
أنا خسرت اللي غيابه غير عن كل الغياب
أنا غفرت لعالم ما تستحق المغفره
أنا أكثر انسان تعلم من كثر ما أخطى وصاب
أنا آخر انسان يتكلم في زمان الثرثره
أنا القصيد اللي نزع من دفتره مليون ناب
وأنا الوحيد الي جمع مليون ناب بدفتره
جفني وجرحّـه السهر حيلي وهدتـّه الصعاب
دمعي هدر ضحكي ندر عمري وضيعت أكثره
شيـّـبت بعقول العرب هيّـبت روس ماتهاب
جمهرت ناس ماعمرهم مايعرفون الجَمهَره
ماصرت ذيب الا لأن اللي حواليني ذياب
ماكنت اغيب الا لأن العفو عند المقدره
وترى حلاتك لاحملت لصاحبك كلمة عتاب
أما نطقت بها بوجهه ماتذمه بظهره
في هالزمن ما يملي عيون الحسود الا التراب
ولا الحظيظ الطلقه الي ماتصيبه تذعره
ودك ليا من جاتك الغلطه من الناس القراب
الصاحب الي ماكسبت بمحبته ما تخسره
..............


منقوووووووول للفائده .

منتديات مدرسة المشاغبين - الشعر و الشعراء منتدى للقصيد و القصائد النبطي و الفصيح البوح بالخافي

ابيات رائعه نالت كل الاعجاب
تسلم يمينك على مانقلت
وصح لسان شاعرها
بانتظار جديدك
والى الامام دائما
شكرا لك