هذا الله يسلمكم باالصيفيه رحنا لمكة تعرفووون نحن من المؤيدين للتجول في ربوع بلادي <<<يقالها يعنينني يقربله وزير السياحة والإعلام <<وش تحسين فيه
المهم وأنا قاعده باالشقه طلعت ريحتي من يوم جينا ماغير مانروح إلا من الحرم للشقه والعكس صحيح<<متاثره بالابلوات>المدرسات<
قلت لامي الكريمة شوفي ترى بنزل تحت للمحلات حقات أبو ريالين بقشقش خرابيط ولعابيب لعيال إخواني <<امحق أصلا إذا شافون هجوا<<نقصد بهذه الجملة أي إذا ناظروا لي هرولوا بعيدا عني لمااااذا؟؟؟لست ادري
قالت لي اهجدي لاتتفلتين طلعه لحالتس لو تنطين مافيييه منهبله أنتي ماغير تسعسقين<<يعني بس تدوجين أي تتمشين
قلت إيه هين الله لايعوقن بشر والله ماانثبر ابنقلع ابنقلع لابو ريالين بأي وسيله من يوم سافرنا وأنا عيني مالكحته <<أي منذ زمن بعيد ماكحلت عيني بشوفته والله ولهتن عليه قالت أمي والله ياعليتس لسان لويوزع على طرمان الديره <<أي الأبناء الذين لايتكلمون إن يكفيهم وزيادة لا ويصيرون أحسن معلقين لأكبر مباريات<<معليش أمي تهورت لاتاخذون بكلامها تراني مثااااليه
المهم المصيبة الكبرى لازم محرم ومامعي احد قلت ياسحليه ازهليه المسألة سهله كفخي اختس تراها بزر لاوالعقده قصدي القعده
المهم كفخته قلتله صيحي قولي أبي عروسه<<شهوة عنز يقالها دلووووعه أصلا إذا قالت الأخت أبي لعبه وجلست تتدلع نحتريها تقول باربي وإلا فله ع الأقل سيكل تدرون وشتقول <<أبي مصاقيل وإلا كيرم>>
المهم صاحت وصارت وسيلة دفاع وهجوم لي للخروج لابو ريالين ونزلنا وقعدنا نقشقش
المهم بدت أختي تحوس بالمحل تراها حلفت قالت لاتقولين اسمي قولي إن اسمي لميس<<متاثره بسنوات الضياع
أما الأسباب التي أدت بأختي عشان تسمي نفسها لميس اقرأوا وستجدون الجواب من بين السطور <قاعده اشخبط خواطر وأنا مادري
المهم ياشباب شغلوا عقولكم شوي هذي مسألة يبيلها تركيز<<عليها خطمات ماتدري وش تبي
تعرفون المروحه إلي تدور إلي طاحوا به الناس والبزران أيام الحر والصيف
الوصف:فيها عصى ثم مروحه تضغط الزر تشتغل وتطلع هواء <<انشاءالله عرفتوها تعبت من اليوم وأنا اشرح الدرس
المهم أختي لميس راحت تتحرش بالمروحه هاذي وشغلتها تعرفون لميس شوشتها ناعمة<<امحق ثقة
مادريت إلا المروحه متمعقطه ومتشعبطه أي المروحه ملتوية ومتعقده بكشتها اقصد أختي ياساتر والله يالنشبه بصراحة فاتكم متعانقين تحسون من زمان ماشافوا بعض ولهانيين على بعض <<متاثره بمسلسل نور
لاوالمشكله عند قصتها الله يستر واجهية أختي تشوهت يعني الجبهه بحد ذاته ارض فضاء <<نفكر نصلح فيها مشروع مخطط أراضي والله استثمار ناجح
المهم رحت أنا وهندي المحل لأختي وأختي عايشه أحلامه تناظرني وتقول شوفي شعراتي الملساء الناعمه تطير بالهواء <<الأخت مصدقه انه تقدم دعاية صانسيلك
قلت لاوالله شكلك تحسبينه استشوار العبي ع غيري
المهم تمصعت ايديني وكشتها متعلقه بالمروحه <<شكل المروحه تقول رجلي على رجلينكم علي الطلاق ماتطلعون إلا وانتم ماخذيني
واقعد افكك وأصلح فصل للتوأم >شوشه&مروحه<الله يحفظهم باستخدام المعدات من بنس وشباصات ومشط
والحمدلله تكللت العملية بالنجاح بعد ماكان راس أختي يغطيه نباتات الصبار <<اقصد شعيرااات ناااعمات أصبح منطقه صلعاء قليلا أي ارض جدباء صحراء خاليه من العشب بس الحمدلله أبشركم أختي طلعلها شعر<< أخاف أطيح نصيبه وأنا مااادري إيه لازم أحسن صورته
لا ولاشعر زينب العسكري قولوا مشاء الله
أما أبو هنود راعي المحل قاااااهرني قال ماتطلعين إلا وأنتي دافعه ضريييبه>>ياكافي وشمسويه<< قال الأضرار إلي سببتيها للمروحه <إيه هين افلقني إن دفعت!!!!
ولله الحمد انتهت الانتفاضه من دون تدخل الإسعاف بشوشة أختي