...اللقاء الرابع من " عناق القوافي " بين { ابحر في قلمي و دانة الروح } ...

قال الذي حـــده على بدع الالحان = واشرف على بنات فكر وندبها
يذب صوته بين سجــات واذعـــان = على طواريق المعاني سحبـــها
ويتل قلـــبه بالمعاليـــــق شريـــان= تلة يمين تلهــــــــا في كربـها
في ساعة فيها غفت كل الاذهان=ماحس فيها كود منهو حسبها
شوارد المعــنى ثقيـــلات الاوزان = يشدها هاجـــوس فكر سكبها
شاب الورق من ما قلبه ولا لان= ارهى على الجزلات حتى كتـبها
بـسُولــته قل مافــيه ســـلوان = باسباب من قل السبب في سببها
الي تسبب لي بهجر هالاعيان = جعله وقود الـــنار واول حطبــها
ترف الصبا عذب اللما مطرق البان = ميــاس قد وكم قلـــوب عطــبها
سبحان من صور جماله وسبحان =ان اشهد ان الي عطـــاها وهبها
لاجيت اقارنها مع البيض شتان = شتان مابين النـــحاس وذهبها
واليا وقف رمح على راس مابان = واليامشى درج القطى ماعجبها
ارواه ربه والبهـــى فيه ريـــــان = قام يتغطرس بالعـــيون وهدبها
فريد جنسه مانخلق مثله انسان = كبر حـــظ الي ولاه وكســــبــها
تبقى لها ذكرى على مر الازمان= بنت الرجـــال الي رفيع نسبــها
ادمنت حبه لين عديت الادمـــان =والارض ضاقت لو وســــــيع رحبها
قم يانديمي بالملازيم والشان = حملك ورق وانا علـــــيه تعــــبها
اركب على نتق مواريث الالمان = بالكاش مشتراها مارجي طلبـــها
من وارد الناغي بهن حوش عمان = ياكم عيون لياتحلت رهبها
ان قلت صانعها ماهو باانس من جان=فوق المواتر صاغها ثم غصبها
كنها عذراء تماري بالاوجــان = بالملعبه ماحولها من هزمها
من فوق فل اوبشــــــن ميلان = الرابح اللي جابــــها من نجبـــها
تنزع من الباطن وتسري مسيّان = وتطوي الليل مسافه للي ركبها
بي ام سبعميه وخمسين حصان=بين المواتر ماذكـــــر من غلبـــها
من شيشة ابن سرور والا عبيلان = فول وقود النار واوزن حدبها
ثم تلها تلة شفوق وحدمـــــان = باللي هوا بـــــاله تنحى جنبــــــها
لكنها داعج هوت بين عقبان = شيهانة من جـــا عشـــها مارعبها
اسرح مساريح القطى يم نجران= ديرة رجال فعلها ماحجــــبها
واضح محله مايبي وصف عنوان = تلفي علــــى اللي ماتغره رتبها
قله ترا ذا الخط من يم سلطان = وانتم تحلون البلش مع نشـــــبها
لا ياعوض ياصاحبي ياكحيلان = انته عوض نفس تزايد غضــبها
انته شبيه الذيب والذيب سرحان = عدى على روس الطوال ورقبها
تبذل يمينك ماتغاليت الاثمان= يمنى على فعل المــــرآجل طربها
يمناك عدت بك ولك كم برهــان = مأجور ياعــــــود جذبك وجذبها
روسان ياجاهل عن افعال روسان = حمولةٍ ماغــاب عنها شـببها
اشكي عليك الحال من كاين كان = مسروجة واشيب قلب رغبها
مانساه لو تنسى بني يام شيبان = ولو ينقل الباطن وعوجاه بابها
ولو ينتقل لدبي سنجار وأبان = وبرج العرب والعين عندي عزبها
ولو تنكر المطران عرضهآ وعوجان=والصلب والصمان واقصى هضبها
والشمري يزهق بحايل وبرزان = ويترك معاميله عقب ماحضبها
ولو يطردون الضيف مطلقين الايمان= والضيف مايلقى القره في عربها
ولو تنتقل وايل ورى ضلع شمران= ولو تنزل بعرعر ناس ماهي بشعبها
ولو يقطنون السيف صبيان قحطان = وتترك تهلآهـــــا وتنزع ودبها
ولو يتركون اهل الحسا كل بستان =ويجنـــــبون نخيلها مع رطبها
واهل البحر تنزح من السّيف بدوان = وتارد على لينه وتملى قربها
مانساه دام الروح في وسط الابدان = ودام روحي ربها ماســـــلبها
اخيلها ماخـايلوا غر الامـــزان =واون ونـــــات تكــــسر عتبها
هذا ولك من تحيه وعرفاااان = يامن فناااجيل المراجل شربهااااا