••{..عندمآ أصبحت جربوعة وومن‎..‎}••

تبدأ قصتي الخياليه في مره من المراريت..

يوم كنت طالعه مع أهلي نكشت في الصمان..

ويازين الصمان ويامحلا كشتتها<<شلاخه ماقد رحتيلها..

الموهم جهزنا قشنا والزاد والرز والخيام وقدور الذبايح..

يعني على قولت المصريين متجهزين من مجاميعو <<أوخص والله تعرف لغات..

ويجي الصبح موعد انطلاقتنا..

والله مايذكروني أهلي إلا برحلات طاش ماطاش يدبلون تسبدك لين يحركون..

وهون الله علينا ومشينا وطول الطريق وحنا حاسين انه ناقصنا شي..

ونفنكر ونفنكر وتعبنا وحنا نفنكر مير بالنهايه تذكرنا ان حنا
ناسين أمي<<خوش عايله ماأقول إلا الله يخلف على جيرانهم..

ونرجع على متم أثرنا عشان نجيب أمي..

ويوم وصلنا البيت الا نلقى وحده قاعده على عتبه الباب وحاطه يدها على خدها..

ومامدانا وقفنا الموتر إلا تقوم ذا المره وتمشي جايه باتجاهنا..

عاد قلت لابوي:يبا هاذي شكلها شحاذه عطها المقسوم عشان ربي ييسر لنا برحلتنا<البنت حكيمه..

ويقوم ابوي ويطلع بوكه و توهق مالقى صرف لأن بوكه كان مليان امهات خمسميه<عاش مصرف الا مالقى بالبوك شي..

ونتسلف من اخوي الصغير بعد حب خشوم وتوقيع معاهدات وشهاده
عدلين اللي هم أخوي وهندي البقاله..

حتى أمريكا بغت تتدخل بالموضوع عشان تحل قضيتنا مير
ماعطيناها وجه<ياحبها للسياسه..

المهم بعد كل ذا سلفنا ريال مقرفط وحالته حاله ومشقوق بعد..

رضينابه وش نسوي محتدين عليه..

وخذاه ابوي ونزل الجامه على اساس يعطيها الريال..

ومامداه منزل الجامه الا المره تطالب وتهاوش وتلعن الحي والميت..

انا جت عندي رده فعل الصوت مهوب غريب علي حتى البودي قد شفته بس ماعرفت الايوم
قالت:وين مسلوله الحال وينها<طلعت أمي و للأسف كانت تقصدني..

وكملت كلامها ..انا ماقلت لتس بروح اجيب الملح لأني نسيت أحطه مع أغراضنا ماقلت قولي لأبوتس يستناني يامال مانيب قايله..

عاد انا هنا كن احد كفخني على وجهي..

واتلاحق عمري وأقولها:إلا قلت لأبوي بس هو قال انها
بتلحقنا<تسمع بالتصريف..

الموهم جاني ذاك اليوم دعاوي وتكفيخ مالله به عليم..

حتى أذكر فيه هندي مار من شارعنا مدري وش يبي وقف ورا أمي وكل ماقالت شي هي رد وراها

ويقول: صه كلام ماما كبير صه<يعني على اساس يأكد كلامها..

وفالأخير مثل أي عايله سعوديه مشينا..

وصلنا الصمان وضبطنا كل شي ويوم جا العصر..

إلا اركب غماره الددسن واقول ميد اخوي:يلا نضبب ونجربع<<مامدى توكم موقعين..

ويجي أخوي ويشغل السياره ويحط لنا شريط كسرات يقالك يبي يدخلنا جو..

ونمشي وحنا نمشي وأشوف لي ذاك الجربوع وأضرب الددسن من فوق وانا اصارخ جربوع جربوع..

ويوقف أخوي وانزل بسرعه..

و طردي ورا الجربوع ووراه ووراه ووراه<ياليل البعارين ماهيب ناويه تزبدها البنت..

المهم يوم جيت امسكه الا و يقرطني مع اصبعي..

وانا انقز واصايح..لسعني لسعني ملعون الوالدين<<تسمع باللسع ولاتعرف معناه..

ومن قرطني ذا الجربوع وانا حاسه بشي غريب يسري بجسمي..

و يجيني اخوي مختلع ويوم شاف انها قرطة جربوع ويقوم يرفسني رفستين ويقول سالمه سالمه<<عايله عليها السلام..

ونمت ذاك اليوم وانا ماني بطيبه من ذا اللي لسعني<مصره انه لسعها..

وأقوم الصباح وابي اروح اغسل خشتي الا وانا اناقز كني جربوع..

وانا مستغربه عمري شبلاني!!

وصايره سريعه حتى يوم رحنا مره ثانيه نجربع صدت تقريبا 50جربوع..

وأخواني الدلوخ مانتبهوا <<انا قايله من اول عايله مفهيه..


ومن تلك اللحظه اصبحت جربوعه وومن أختك ياسبايدر مان..

اصلا يوم سوو فيلمه كان اقتباس من قصتي

بس خبركم امريكا مابها جرابيع عشان كذا غيروها حطوها على العناكب..

•..وسلامتكم..•