كثر الحتسي في الآونة الأخيرة عن شباب الماضي == > شيبان الحاضر == > ذكريات المستقبل !! .. و كما جرت عليه أم حسين فأنه لابد لي من أن أدلو بدلوي و صطلي و مغرفتي في هذا الموضوع عن قولة ماهوب متضامن مع جمعية الرفق بالشواكيش !!

جدّي !!
الله يحفظه و يبقيه و يطول عمره و يقصر حسه شوي .. طايح .. لكن مازال يقاوم عوامل الشيخوخة بسلاح تكذيب الواقع .. ماهوب مقتـنع إنه قاضي .. مايبي يعترف إنه "عجوز" !!

أبوي !!
شهبندر تجار الغفلة !! .. على باله خاشقجي تمير !! ليله و نهاره لاهي بأعماله .. يحب جدّي لكن ما أشوفه يجلس معه واجد .. ماهوب مقصر معه بشي لكن مايسولف معه غير سالفة رميزان و الشريف بركات!! .. عادها عليه جدّي يمكن تسعين مرة .. و شرط إن جت مناسبة و إلتفينا على جدّي .. أقول شرط إن يرفع أبوي عيونه يطالع الغما و يقول "إلا وش سالفة رميزان يبه !!؟؟" .. و جدّي بعد الله يهديه ما يمل .. ولا يخطي !! .. تقل عايد الشريط ماشاء الله عليه .. صام السالفة صم !!

أنا !!
و الله و ما قالت !! البلياردو ماخذن كل وقتي (( نسأل الله الإخلاص )) منب أشوف جدّي إلا إذا صدفت و طلعنا سوى من المسجد و اقعد أتناه إلين ياصل للدرجة عشان يتـعـنّـز على يدي مع إنه ماكد مرة عطاني وجه .. دايم يقول "لا يغرك .. ما بعد صرت عجوز و أنا أبوك " و يدز يدي و ينـزل لحاله !! .. و إلا إذا دخلت البيت أشوفه جالس في السور متسند على الجدار و رافعن رجليه على المركى و جنبه ترمس ماء بارد!!

أول كنت أحسبه ما يحب يحاكينا و يسولف معنا على باله إن جيلنا جيل ماصلين .. كنت أحسبه يحب العزلة .. لكن بعدين لاحظت إنه لو كان فعلاً يبي العزلة كان جلس في غرفته و لا طلع .. بالعكس .. شكله ما طلع من حجرته إلا عشان يناشب الدقرش و يتهاوش معهم .. منحاش من العزلة .. هم الوحيدين إللي معطينه وجه الظاهر !!
يوم ورى يوم و الحال على ماهو عليه .. إلين جاء ذاك اليوم إللي أهلي كلهم معزومين على عشاء عائلي عند رجل أختي (( و لد عمي بعد )) .. عاد جدّي ماهوب يدانيه .. ماراح .. بالذات إن جدّي ماهوب يحرص على العشاء !!

عاد أنا ذاك اليوم مدري وش طرى علي مابغيت عشاهم .. نطلت أهلي و قعدت افكر وين أروح ؟؟ من الشلة سعيدة الحظ إللي بتصبر على غثاي هالليلة .. لكن مدري كيف طرى على بالي جدّي و طلبت لنا بروست و رحت له .. قومته من مطرحته و فرشت السماط .. طبعاً بدون تفاهم .. سحب جدّي الزرف و شقه و بدا يعفط في البروست .. و أنا بديت آكل بشراهة .. تخبرون البروست مع بطاطس و كتشب و ببس .. الله .. يا زينه زيناه .. عاد بغيت أسولف مع جدّي لكن مدري وش نسولف فيه أنا و إياه .. أقول له "وش سالفة رميزان يبه" .. نهي هي .. ما فيه أمل حامت تسبدي من كثر ما سمعتها.. بتلنا ساكتين و أنحن ناكل تقل في مطعم فرنسي !! .. و في لحظة دف جدّي الصحن و قال و هو يطالع في يديه ويفركها بمنديل " ياولدي .. عشاك هذا ما تاكله إلا التالية من الغنم " .. طن آن آن آآآآ .. رفعت عيني في عينه و أنا عارط فخذ .. "التالية من الغنم!!" !! هوني ما أصفخه بالصحن ألحين !! .. يا حلم الله على خلقه!!

المهم .. خلص جدّي و جاء بيقوم يغسل و اشوف آثار الصعوبة و الجهد في قومته على وجهه .. " اليوم و أنا أبوك حطيت السلّـم على النخلة وجيت ابرقاه و لا قويت!!" ((قلت في نفسي و أنا راحمه .. وش تبي بهالنخلة يا جدّي ي ي ي .. يا حرصك طول الله عمرك ))

شلت العشاء ورحت للبخشة إللي بين الشارعين و حطيته عشان تاكله القطاوة .. عاد قطوة حارتـنا .. على طول قلطت .. فرشت السماط و أنا مبتسم إبتسامة كرم و حنية ماكني قبل أمس شايتها بالزبيرية من عند الباب!!
و أنا راجع للبيت تذكرت شي!! .. هذي أول مرة يشتكي فيها جدّي من عجزه .. أول مرة يعترف إنه " عجووووووووووز"!! و من يشتكي له؟؟ ..لي أنا !! .. وين أبوي؟؟

رقيت لغرفتي و أنا أهوجس بوضع جدّي .. إستعرضت شريط التقصير إللي أنحن مقصرين فيه مع جدّي .. بقى ربع ساعة على الفجر و الشريط عيّـا لا يخلص!! عرفت إنه باقي ربع ساعة على الفجر لأن جدّي الله يحفظه إعتزل شي إسمه رقية درج عشان يقومنا للصلاة .. صار يطفي طبلون المكيفات!!

بعد الغداء إنفردت بأبوي و تكلمت له عن حالنا مع جدّي و قلت له كل إللي في قلبي .. يوم خلصت و جاء دور أبوي يتكلم .. حمد الله و أثنى عليه لما هو اهله و قال "ورى ياولدي ما تروح تمثل مع كريمة مختار أحسلك !! " .. (( أمسكه مسكة منومة ذا ألحين و إلا شلون !!)) أنا أتكلم بحرقة و هو ابرد ما عنده !! .. يوم شفت الدعوى كذا .. قلت مابدهاش .. "يبه .. ما يحتاج أقول لك كما تدين تدان .. و لابد بيجيك الدور و تمر بنفس المرحلة .. بروا آبائكم تبركم أبنائكم .. إذا أنت ما أهتميت في ابوك ليش عيالك يهتمون فيك!! " .. يوم شاف أبوي إني جاد و إنتبه إن الوضع هذا له نتايج مستقبلية أطرق قليلا إلى الأرض ثم رفع رأسه و على محياه علامات خشوع و إدراك و قال لي " إسمع يا ولدي !! " .. قلت "يا لبيه يابوي" .. قال " إنقلع أنت ألحين و ما يكون إلا كل خير " !!

بعد صلاة المغرب .. دخلت البيت و اشوف أبوي عند جدّي و تمر و فناجيل و دلة قهوة .. و أوقف مكاني و أقعد أصارخ " مانيب معرس .. بتعرس أنت و إياه إعرس أنا لا " .. و يناديني أبوي و هو يشر لي أجي " منتب كفو عرس .. تعال بس تعال " .. فصخت كنادر الزلاجات

< == جاي من المسجد أجل!!

قال أبوي " تزهب باتسر بنروح لأبها أنا وأبوك و نبيك تخاوينا " .. قلت موافق بس على شرط ما تقولون سالفة رميزان و أنحن على الخط .. ضحك أبوي بقوة " أها هاه اااه .. كل تبن ورح ضف عفشك يالله" .. (( قرارات إرتجالية حتى في سعة الصدر )) .. زهبت كلش و دحيت الموتر بأغراض يمكن نحتاجها و يمكن لا .. و آخر شي قلت لازم ناخذ معنا عصير عنب .. جدّي يموت في عصير العنب .. و أخذ ترمس جدّي و أروح لماريز و أعبي الترمس عصير .. و أنا طالع إلا وحدة مع رجلها تهقهق و تقول " ياربيه وش هالطحلب " !! .. طحلب في عينـتس يا قروية مسوين لها أب قريد !!

و انطل الترمس في شنطة الموتر و أخمد بدري عشان مسكة الخط !! .. و صلنا أبها .. إستاجرنا شقة ببلاش (( بعذر ابوي موفر فلوس التذاكر )) .. و تمشينا في ربوع أبها البهية و شرينا عسل أصلي و قحنا منه .. و طلعت سواليف جدّي الرايقة .. هو إستانس من هنا و شرشرح خلق الله من هنا .. طلعت عيارات و نكبات شيبان جماعتـنا كلهم .. وين هالسوالف من زمان عنها يا جدّي .. بس من جد وضحت سعة الصدر على حال جدّي .. أنور وجهه و شتر حيله وردت حالة !!

آخر يوم قلنا خل نروح للسودة و نشوي لنا كم سيخ أوصال و من السودة للرياض سيدة .. طبعاً كل الكرف علي أنا لحالي .. عادي لكن المشكلة إني متـشطر عنهم و أنا اشوي .. و أبوي قام يزقلب في عفشنا عشان رحلة العودة .. و يفتح الشنطة و يلقى ترمس العصير !! و أنا أشوي .. و يذوقه و يجوز له .. و أنا اشوي .. و يروح به لجدّي و قعدوا يقعبون منه قـعب .. و أنا أشوي .. يوم إلتفت عليهم و اشوف جدّي واقف و أبوي فاك الزرة و يحك في صدره بقوة .. قمت لهم و قلت لأبوي وش بلاكم .. و يزعق علي ابوي " وش هالحر !! .. من إللي مسكر الدرايش !!؟؟ " .. أي درايش ؟؟ قال "أقول لك إفتح الدرايش يا طووووط" .. و ألتفت علي جدّي .. "جدّي .. وش بلاه أبوي ؟؟ " و يناظرني جدّي و يدق رقبه ثلاث مرات ثم قام يقامز "آووووووووو .. وه وه .. آوووووووووو وه وه سن كولالالالالا .. آوووووووو .. وه وه .. آووووووو وه وه سن كولالالالالالالا

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه