[align=left]موب تقعد تناظر من برى
أدخل وإلا وخر الماوس [/CENTER]











السلامو عليكم



هذا موضوعي الأول بهالمنتدى

أرجو إني ما أزعجكم


يعني الي عنده شغل والا دراسة والا يبي ينام

أنا انصحه يروح بدل ما يقعد يقرا هالخرابيط الي ما هي ورا سنع


الموضوع يتعلق بما شاهدته أمس بعد خروجي من آخر إختبار لي في هذه السنه


كان فيه شلة من أصدقائي الحلوين جالسين يستنوني بالمواقف.



طبعا أنا مريت بجنبهم ولا كأني شايفهم


ورايح لسيارتي على طووول


لكنهم إعترضوا طريقي


ودار بيننا هذا النقاش:

أنا:
وش تبون يا شلة السمرمدي <=(كنت أسمع جدي يقولها و تمنيت إنه يجي يوم و أستخدمها)


الخال:
وش عنده العاقل؟؟

أنا:
إيييه عاقل ونص.. أنا قررت مع نهاية السنه هذي إني أسحب عليكم سيفون و أفتح صفحة جديدة..


نفس الخال إلى فوق:
أقول أطلع السوبر لا الحين أفتح وجهك بكف.. قال أفتح صفحة جديده قال..


أبو وجه <=(عربجي الشله): سيفون؟؟؟ والله وصرت تفهم في المعدات الطبيه <== (ما قد شاف السيفون إلا بالمستشفى)


أنا:
يا شبااااب خلاص انا ما عادني بداشر من اليوم ورايح أنا إنسان مستقل لا أنتمي إلى أية أحزاب وأمقت الطائفية والعرقية وأرفض الطبقية واللا وسطية وأناشد بتطبيق الديمقراطيه ودحر الرأس ماليه والشيوعية...


مقاطعة من الشنب <=(زعيم شلة السمرمد):
يا شباب أنا كم مرة قلت لكم شيلو قنوات ( العربية والجزيرة وسبيستون) من الرسيفر؟؟
على العموم يا أخ مدحدر حنا كنا رايحين نتفرج على التفحيط ..

لكن بما أنه مالك خلق تجي معا ... فبإمكانك تضف وجهك.

ولا عاد أشوفك تمشي معنا.


أنا:
الله وأكبر يا (برتني البطحا) وش شايفني متعلق فيك وأنت شبه (صامويل جاكسون)؟؟

من اليوم ورايح بالبس نظارة وأمشي مع الدوافير وأبيع المكسيما وأشتري باسات..


ورجعت لسيارتي وأنا أمسح سعابيلي من كثر الصياح....


لكن ....




تذكرت....



بتسألون نفسكم...



وش يا ترى تذكر هالدرج؟؟



صح؟؟



تذكرت إن السيناريو الي فوق كنت مخطط أسويه نهاية السنه مش نهاية الأختبارات..

يعني كنت أبي أسحب السيفون بعد ما تنتهي الإجازة..

بالله أحد يفتح صفحة جديده بداية الإجازه؟؟

أجل لا جت الدراسة وش يسوي؟؟؟

وأرجع للشباب وهم بيركبون السيارة..


أنا:
يا أحلى شلة خرفان بالجامعة.. معليش أنا غلطت وجاي أصحح غلطتي وبروح معكم..


أبو وجه:
أنقلع وأنت شبه فيصل القاسم..


أنا:
يا شباب تكفون أبي أشوف التفحيط.. يابو شنب ترى كل الكلام الى تو من تأثير الأختبارات


الشنب:
أمممممممممممممم <= (يا زعط يفكر هو وخشته)

ممكن تجي بس بشرط...


أنا:
راح أنفذ أي شرط غيرإني أشم أصابع رجل الخال.


الشنب:
تركب على الكبوت لين نوصل للبراميل <== (حي الصحافة ، الياسمين)

أنا:
أوكيييييي


وركبت عالكبوت
ويمشي اللحجي <=(سواق الشلة) بالسوبر مليون

لين وصلنا للبراميل..

إلا ما بوه أحد..


الشنب:
وين التفحيط يا أبو لستك <=(ماجلان التفحيط) ؟؟

أبو لستك:
خلني أدق على العيال.....

وأنا أنتظر فوق الكبوت..

أبو لستك:
كلمت الكنج ويقول إنه بشارع المواصير <== جنوب الرياض

أنا:
يا شباب طبعا أنا كذا كفيت ووفيت الحين صار لازم أنزل وأركب معكم... صح :smils183:

الشنب:
مالك لوا....

أطلع للمواصير ياللحجي.




وهكذا... إنطلق اللحجي في رحلة البحث عن التفحيط إلى شارع المواصير ثم شارع المصانع ثم الباصات ثم الحمراني ثم المليون ولم نجد شيأ...


كل ذلك وأنا أتربع الكبوت


وفي هذه الأثناء نزل الشنب يشترى العشاء وسأل الأفغاني عن مكان التفحيط .

ثم عاد مسرعا إلى السيارة السيارة وهو يصرخ:
ساسكو ياللحجي ساسكو


فذهبنا إلى شارع ساسكو ووجدنا بأن التفحيط قد خلص وما فيه غير الدوريات...

فسأل صديقي اللحجي أحد الدوريات:
ياخي أين أركب أقحص يعني أنتا أمسك أين؟؟ <= (الترجمة: وين التفحيط؟؟)

العسكري:
ياخي نايم مالك أنتا راقد يعني وقتك أين؟؟ <=(خلص من زمان)


فقال لي الشنب بعد أن كسرت خاطرة:
أنزل يا مدحدر إركب معنا

أنا:
:smils115: لا عادي الجو حلو <== عيونه ما صارت ترمش من قوة الهوا

الشنب:
على راحتك

وودوني لسيارتي

و رحت الشقه و أخذت أغراضي ورجعت لديرتي الجبيل....


وسلامتكم..

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه