السلام عليكم ورحمة الله وبركاته


صباحكم / مسآكم ورد وعطر


كيفكم ؟؟ ان شاء الله بأفضل حال ..~


عندي موضوع حايس مخي من فتره..!


الموضوع واضح من العنوان..!


اللي يخالط اطفال هالجيل..!


او بس يقطع من وقته شوي ويجلس معاهم..!


يشوف ويسمع العجب العجاب ..!


في زمن طفولتنا اللي ماكان بعيد عن هالوقت..!


تغيرت أشياء وأشياء في براءة الأطفال..!


تقولون لي شلون ..؟؟!!



أنا بقولكم عينات من مواقف صارت مع أبطال هالموضوع ..!



*~


مرة كنت جالسه وأشوف اثنين من عيالنا الواحد منهم ماتجاوز عمره 8 سنوات


معهم اوراق وفيها رموز وخرابيط طبعا انا استغربت وش هالأوراق ؟؟!


فهموني بعدها انها كلمات سر لعبه الـpsp ‎‏ و الـplay station ‎


قلت لهم طيب مايصلح تلعبون بدونها؟؟


قالوا إلا بس هذي نقدر نلعب بدون ماتلحقنا الشرطه ونلعب بوقت مطر<<كل هذا تمام


الصاعقه لما قالوا وتزيد الاسلحه عشان نقتل الناس وبعد ندخل مراقص وبارات !!!


**~


موقف صار مع وحده أم عيال


بنتها في ثاني متوسط ومره من المرات دخلت ع ماسنجر بنتها..!


وهالبنت ضايفه وحده من البنات بالمدرسه في رابع ابتدائي يعني 10 سنوات


وكانت اون لاين تقول اول ماشافتني دخلت نطت علي تحسبني بنتي


وقامت تهذر والام ساكته آخر شي قالت شفيك ساكته يافلانة


قالت أنا مو فلانه انا امها وكانت الصغيره حاطه صورة واحد نص صدره


طالع قالت لها الام من هذا قالت يؤ فيه أحد مايعرف زاهر-ع ماظن اسمه كذا-


قلت انا ماعرفه..! قالت اوف هذا واحد في ستار اكاديمي البنات كلهم منهبلين عليه!!!



***~


مره جتني وحده من بنات العايله الصغار بالتمهيدي - 5 سنوات -


قالت شفتي مهند يقتل طارق - او شي زي كذا - قلت من هم هذولي ؟؟!


قالت يووه ماتعرفين مهند مين قلت لا علميني قالت مهند حبيب نور اللي بالمسلسل التركي اللي يجي ع mbc4


قلت ما اشوفه قالت ههه اول مره بحياتي اشوف احد مايتابع نور<<باسلوب استهزاء طبعا



. . / . .


هذه الحوارات من الاف الحوارات اللي تحصل بين أطفالنا ..!


براءة الأطفال في طريقها إلى الإنقراض ..!


مو الحل أننا نحرمهم أو نضيق عليهم ونقول كذا نرتاح..!!


ليه مانكون حولهم بالأشرطه اللي يشترونها، بالمواقع اللي يدخلونها بالنت حتى لو ألعاب ، بالبرامج اللي يطالعونها ..!


مهما كانت القنوات اللي يطالعونها مهتمه ببرامج الأطفال..!


فيه قنوات ورسوم كلها دس وهذا غرضها..! وغرض الرئيسي للقناه اللي تعرضها [mbc3‎] ..!


من اللي سبق وعرضته هالقناة


توم وجيري في مشهد تنصت على السماء وان توم يموت ويجي قط ابيض معه كتاب


كأنه يحاسب توم وبعدها يبين له الاشياء اللي سواها مع جيري وترتفع روح توم وانتشرت هالحلقه بالنت ..!


فيه مشهد انا شفته بنفسي من مشاهد فيلم كرتون اسمه يوغي وجايبين صلاته النصرانية وكان لابس سلسال صليب ..!


لازم نحاول أقل شي أننا نفهمهم أنه غلط وأنهم ضد الإسلام..!


وصدقوني هم بيكرهونه وبيطلبون منكم إلغاء القناة كلها..!


. . / . .


احنا مسؤلين عنهم ..!


لاتقولون ماراح نقدر نوقف في وجيههم أو الزمان والوقت يربيهم غصب عن رغبتنا..!


هذولي اطفال واحنا نقدر نصنع منهم اللي نبي..!


ونطلع منهم الجيل اللي يرضينا..!


لانهم زي العجينة نشكلها زي مايعجبنا ..!


شاركونا بأرائكم و مواقفكم ..!


وتذكروا كلكم راع وكلكم مسؤول عن رعيته..!


سواء كنتوا أُم أو أب مسؤولين عن اطفالكم..!


او كنتوا أخوان كبار أو أعمام أو خوال فأطفال العايله من ضمن مسؤولياتكم..!


كونوا قدوة حسنة ،، كونوا بخير ..

منتديات مدرسة المشاغبين - اهدائات ترحيب تبريكات تهاني افراح مناسبات سعيدة