السلام عليكم ورحمة الله وبركاته

نستكمل معكم الحلقه الثانية من حمود المتيح وشباب الحارة في سوريا
كنا وقفنا في الحلقة الاولى يوم طلب حمود بان ياخذ دورة بالباص المهم لااطول عليكم اقنعنا حمود ان هذا باص ماهو سيكل وفيه ركاب مايبون يبيعون روحهم عشان خاطرك انت ..المهم انه جلس على كرسيه ونام وقبل وصولنا الى عرعر تفاجانا بان الاخ سعد ابو اذن (( نقز ) وراح ركب جنب السواق وجلس يسولف معه وياليت يسولف سوالف عدله عشان السواق يرتاح له .. الاخ كان يساله متى صار لك حادث واخر حادث صار لك وتعرف تسوق او لا وترى سواقتك ماهي زينه ومن هالكلام السواق تنرفز ووقف وقال ماني مكمل المشوارلين ينزل هذا ( كان ياشر على سعد ابو اذن) المهم السواق نزل سعد غصبا عنه في عرعر وسط احتجاج منا وقلنا وين بتخليه لحاله هنا المهم السواق مشى شوي وبعدين وقف ورجع لسعد ابو اذن وقاله اركب وهذا انذار لك المهم ابو اذن سمع الكلام وصار عاقل

وبعد هدوء تام وصلنا الى الحدود السعوديه الاردنيه نزلنا عشان نختم الجوازات ختمنا جوازاتنا كلها الا الاخ سعدابو اذن رفضوا ختم جوازه لان الاخ كاتب ذكرياته على الصفحه قبل الاخيره من الجواز !!
المهم ترجيت الضابط ان يعديها هالمره وانا اتحلطم ( اقول ويش سفرني وياهم بس ) المهم يوم ركبنا الباص كان ناقصنا واحد هو حمود المتيح طبعا نزلت انا والسواق ندوره وبعد نص ساعه بلغنا شرطة الحدود عنه وصرنا ندوره واخرتها حصلناه ورا مبنى الجوازات اللي على الحدود يسولف مع راعي غنم قلت له ويش تسوي هنا وحنا ننتظرك قال ابد جالس اقنع هذا الراعي يبيع لي خروفين بخمسين ريال وماهو موافق قلت له خروفين وين بتوديهم معك الباص وايش بتسوي فيهم وثانيا انت متاكد بتشتري خروفين ولا دجاجتين عشان تقول بخمسين ريال قال ابد كنت بخليهم عنده اذا رجعت من سوريا باخذهم معي قلت له امش بس وبنشتري اللي تبي من سوريا المهم مشينا والسواق ورانا واشوفه يرفع ايده للسماء بس مادري ويش كان يقول

ركبنا الباص ودخلنا الاردن ووصلنا سوريا

الحلقه الثالثه


دخلنا سوريا واخذنا تاكسي وطلبنا منه يودينا شقه سكنيه محترمه المهم وصلنا الشقه والحمد الله مافي مشاكل ولا فضايح في التاكسي لان الشعب نايمين مافي الا انا صاحي وراكب قدام جنب سواق التاكسي
يعني اني مهم

وصلنا الشقه ودخلناها طبعا الشباب اللي معي متخدرين مره ناموا كل واحد في المكان اللي يشوفه قدامه صحينا الساعه تسعه بالليل وكنا واصلين الساعه خمسه العصر حمود المتيح اول مافكر فيه الاكل طبعا رشود المفهي كان طول الطريق يقول لازم يتعلم سوري وقام وفتح التلفزيون وحط على المسلسلات السوريه ومن وصلنا سوريا ورجعنا السعوديه ماقال كلمة سوريه عدله

سعد ابوذن طلع يدور في العماره يقول يبي يتعرف على الجيران اللي يسمعه الحين انه جالس للابد في سوريا مايدري ان الرحله كلها سبعة ايام اما خوينا طلالوه الدنيا في جهه وهو في جهه ثانيه حاط الهتفون على اذنه ويسمع اغنيه مادري من وين جايبها بس مقطعها الاول يقول (ياراعي المزده خذني لليمن حبي شفت سبع بنات والثامنه قصدي ) والحقيقه الاغنيه ممله جدا لان طوال السبعه الايام نسمعها اجباري لان الاخ يشغلها على طول

الساعه خمسه الفجر نشم ريحة دخان غريبه طلعت استطلع الامر في الغرفه الثانيه الا رشود المفهي وسعد ابو اذن يبون يعسلون ( يعني يشيشون ) رشود المفهي حاط الفحم على السجاد ومولع فيه عشان يصير جمر سالته ليه هنا عاد قال عشان مافي مكان اولع فيه الجمر

طبعا انا اسب واتحلطم واراكض انا وحمود المتيح عشان نطفي النار المشتعله في الغرفه والحمد الله انها مو كثيره بس شفنا شكل الارض لان السجاده احترق منها قطعه كبيره

بعد الراحه يعني في الخامسه مساء كنا جالسين نتغدا وأصر حمود المتيح انه يجيب بصل من جيرانا ودق عليهم الباب وفتحت له امهم وقال لها بكل ادب جم (اختي لو سمحتي ماتقصرين ممكن بصله وحده !!) عطته الام بصله وجاء يركض وقال حبيتها حبيتها وشرح لنا الموقف وهو يدور عذر علشان يروح لهم ثانيه قال اوووه وين الملاعق وراح للبيت مره ثانيه وانا وراه ابي اشوف البنت اللي يقول عليها حبيتها حبيتها دق عليهم الجرس وطلعت له مره ثانيه الا هي عجوز عمرها (طن سنه) قلت له هذي اللي حيتها قال ايه قلت له زين تعرف تختار يالمتين
الولد مصخها كل شوي رايح يطلب شيء منهم مره قدر ومره ملاس ومره الفرن بكبرة ومره فواكه شوي الا الحرمه عصبت عليه وعطته كف خلت راسه يلف اسبوع وبعدها هون يدق اي جرس في حياته

مشت الايام كما هي طبعا مابي اخوض في التفاصيل اكثر ورجعنا السعوديه لكن كانت رحلة العودةهاديه شوي والشباب زعلانيين مايبون يرجعون وصلنا بالسلامه وكلن راح لبيته

لكن رشود المفهي جاني اخر الليل وسال سؤال هام جدا فجر فيه الدنيا قالي لو سمحت ابي اسالك سؤال مهم بس لازم تجاوبني الحين واشوف دموعه تنهمر قلت له خير ويش فيك قالي بسالك سؤال قلت له قوله .. قالي ( اي اسرع الباص او الطياره لو ابي اروح سوريا .........!! وربي حسيت بمغص وغثا على سؤاله الغريب جدا قلت له لو تسافر مشي اسرع لك



اسف على الاطاله واتمنى ان الحلقات تكون اعجبتكم


مع السلامه الى اللقاء في قصص اخرى

خخخخخخخخخخخخخخخخخخخخخخخخخخخخخخخخ

الله يرجك

والله تسلملي يالغالي على الحلقات الفله هذي

_________________

يسلمووووووووووووو

_________________

هههههههههههههههههههههههه
يسلموا
مستقبل فني
يعني ينفع تصير مؤلف




تحياتي

ههههههههههههههههههههههه


يعطيك العافية أخوي على هالحلقااااااااااااااااات وهالأسلوب الحلووووووووو