احم احم

يقول لكم ((( هذي قصة ))

ايوه احم احم

يقول لكم هاك السنة من هاكالسنين الغابرة سنين مضت كان فيه امير من امراء هاكالديرة امير على قومه طلع مرة من المرات للصيد وكان عنده هاكالصقر حر من الصقور الطيبة اللي الا منه طار ما وقع الا وفي رجله اليمنى هاكالارنب اللي وش كثر لحمة ولا بيده اليسرى هاكالحبارى اللي ماهنا ازين منها ومعلقن الحجل بذيله من طيبة ماهو مثل طيور هاوقت اللي تخكرت وما عاد تنفع بسبع المذاهب بس للكشخة والمهايط المهم يوم ان الامير طلع راكب الجواد اللي ماهنا اسرع منه ولا ازين من ركوبه ولا تقل راكبن شبح في وقتنا هذا المهم وهو بالصيد والا هو يلمح هاكالحجل ((نوع من انواع الحمام والله يا ما هقا بالي ان مافيكم واحد صياد وكل واحد فيكم بينطلتس حجاجه من يوم يقرا هالأسم ))) المهم يشوفة اقصد الامير يشوف الحجل ((( نوع من انواع اقول انا ما شرحتها فوق ولا متنحين انتم ))) المهم يشوفه اخن السماء ملعب يتمخطر ويتمشى ويغازل هاكالحمامات ويتميلح قدامهن والله و مير الامير يفك الطير وينخاه ويطير الطير وهو حاط في راسه يجيب الحجل لو على جثته من شد النخوه فيه طيور من اول ابد يدورون النخوة المهم وينقض عليه انقضاضى الزير سالم على البكارية بنو بكر يعني المهم الا هو له منا مناك هاتك ردك والامير يطمر على حصانه الاشهب او هاتك يا تربك تربك تربك تربك تربااااااااااااااااك والا يوم الطير لط الحجل بيمناه الا هو طايح او مير ما يمديه يطيح الا وهو له بيده اليسرى وهو يلقطة ((( والله الفن ولا تقول يلعب فيه كرة طايرة ((( لا تقولون ما تعرفون كرة الطايرة هذي العابكم يالجيل هذا انتم عيال النيدو وكليم وجاي ولا حليب المعزا والمغاتير منتم هل له ))) المهم والطير يلقف الحجل ولا هو موقع فوق هاكالبيت ...... ولا فيه راعي كان يرعى الغنم وكان بالمدرج يتفرج على هاطردي ويشوف الطير يوم انه وقع فوق بيته ولا يمديه يلتفت الا الامير له الله ومير يطبح الامير من ظهر الفرس وينقز الراعي يهلي ويرحب وياهلا وياغلا ومير الامير يقوله :
الامير: يا ولد الطير وقع فوق بيتك او ودي انك تجيبه ((( عجزان يروح هو يجيب طيره ))) المهم الراعي سوى فيها من الحميا وابشر يا طويل العمر ولا يهمك يوم انه عطاه ظهره الا وهو يتذكر الغنم مير ينكس ((( يرجع بلغتكم )) ويقول
الراعي: يا طويل العمر الغنيمات ماعندهن من يراقبهن اخاف يجفلن ويتفرقن
الامير: ازهل عمرك الغنم عندي براقبهن
الراعي: تسلم يا طويل العمر الحين انقز واجيب الطير لك
المهم وهو يروح الا على روحته والامير يراقب الغنم الا يوم انها جفلت وتفرقت وبلش الامير فيها وغدت الغنم ((( فيما معناه تفرقت في اماكن شاسعة )))
نرجع للراعي الخطير طلع الحبيب فوق واذا به يشوف الطير واقف على هاكالزاوية ويقرب يمه وهو مندنتسن ((( منزل )) راسه علشان ما يطير الطير الا يوم انه قرب وهو يخثع برجله ((( زلت قدمه يعني )) وتجي يده اليمنى مهوية الا هو صامخن (( ضارب)) الطير على رويسه ويطيح الطير
وقبل ان تكتمل انفاس الطير وقبل ان يوقع على الاىض الا الراعي له بيده اليسرى من الخوف وهو يلطه الا هو كاسر ظهره (((( ول صار خبز قران ولا مرقوق مو طير ))) المهم مسكه وجاك مروح ومستحي من الامير ما يدري وش يقول له
يوم انه وصل ولا الامير مندنتسن ((( منزل ))) رويسه مستحي من الراعي علشان الغنم هجت ((( تفرقت ))) ويقول للراعي السموحة الغنم ما قدرت ..... وهو ينقز الراعي انتهز الفرصة وقال ((( وحدة بوحدة )) يا طويل العمر انا مسكت الطير ونا نازل شفت عيونه تبالص ((( يعني طايرة ))) وقلت انه غاص في شي ومير اهبده على ظهره علشان يطلع اللي في حلقة الا ومير ينكسر ظهره
الامير سكت بلااه خابر انه مسوي له سواه مخزية ما حرس الغنم الا ومير يقول ما قصرت وياخذ الطير ويعود دربه والراعي الآخر راح يجمع الغنم وكل يقول انا وش اللي ملقفني ويستاهل الامير وليش يوم انه يتعنطز (( يتكبر))) ورا ما راح هو او جاب طيره ويدري ان الراعي ماله بالطيور خبره ولا يوم انه تكفل بالغنم وماله خبره معهن لكن الشكوى لله والراعي وش ملقفه كان قال انا مالي في الطيور بدل ما يكسر ظهر الطير

اعزائي اتمنى انكم عرفتم المغزى من القصة
المغزى هو حال وكارثة من الكوارث السائدة في عالمنا الثالث الا وهو النلقف على شي لا علم لنا به
وكثير ما نرى ناس يقولون حنا نعرف ونعرف وهم ما يعرفون شي
يا ناس ترى كلمة (((( لا اعلم ))) تساوي نصف العلم ليش نتفلسف ونسوي فيها حبة ونص

والله ما ادري كيف نتطور وحنا على هالحالة

اعتذر منكم للأطالة

جاسي

منتديات مدرسة المشاغبين - المنتدى الاسلامى