 |
| |||||||
 |  |  |
 | |  |
 |
| | LinkBack | أدوات الموضوع | طريقة عرض الموضوع |
|
#1
02-05-2009
| ||||
| ||||
 لآضآقت الدنيآ عليك وآنتي رخمه وين تروحين السلام عليكم وصباحكم ومسائكم مزرعة كيوي في ولاية الحوطه خلف ديرة تكساس>> الله يشفيك الزبده اليوم حبيت اكتب لكم قصه صارت يوم كان عمري 3 ريال << لآتدققو بس لازم ولابد بعد ماتقرون القصه لازم تعلقون مو تقرون وتمشون..هو دخول الحمام زي خروجة << لحد يفهم غلط بس قبل لاتقرو القصه من الحين تراها طويله يعني اذا كنت فاضي كمل مشوارك واذا كنت مشغول حط انتظار << دارية بايخه وردود التسليك مانبيها وردود مافهمت يرم مخك وانت تقرء موضوعي جيب معك قآموس ولا معجمٍ المهم نبداء القصه 1 2 3 آنطلق >> وش عندهآ نشأت آذكى ريومه في حي من احياءالمعروفه والمرموقه وكانت آذكى صبيه ممشوقة القصر آقصد القوآم مملوحة وحبوبة وطيوبة واذا شفتها ودك تاكلها << بس لقمه لآتزودوهآ وكانت تتمتع بالدهاء والحنكه والحكمه والفطنه حتى انها كانت معروفة في شّتا بقاع الارض ووصل صيتها إلى حدود صحرآء آلدهنآء << هذي صدز المهم مالكم بالطويله يوم من الايام دخلت المدرسة وانا مجبوره لاني كنت ماحب المدارس وماحب السيطره والحجره ومتعوده على السهر على السعودية القنآه الآولى وفلونه وإذآ شطحت هآيدي >> يآحليلي وحتى كان ابوي يتحايل علي عشان اروح للمدرسة وانا اقول لا ويجي مره ثانيه يقول روحي واناأبوك وانا اقول لا والثالثه بالنعله مع خشتي ويربط الشنطه برقبتي ويحط الفسحه غصب ويشوتني للمدرسه >> ويحطني فآول فقلت يآبنت مالك معاذ ومال المرمطه والتسطير خليك عاقلة وروحي بدون جلد وجليد كل صبح وفعلا تعودت على المدرسة وكان ذيك الايام تدرسنآ مادة الريآضيآت نآنسي وهبي << مشّوها من اول اقول لاحد يدقق ومن خلال هالمدرسة القبيحه كان معي بنآت حارتنا شلة بنآت الجهنآن الي سبق وقد عرفتكم على هاذه الشلة التي لانعلم لحد الآن لماذا عايشون >> جآز لها الفصحى نوير >> كآئن دلخ مستدلخ مدري وش تبي من الدنيا لو آني منها كان حرقة جسمي بموية نآر >> بتآكل كف من نوير يوم السبت ٍ المهم هاذه الصبيه التي وسبق التعريف عنها صارت احلى صدآقة مع ان نوير كآنت آمي تحذرني منهآ >> ابتنجلد^^ لانه ساقطة سنه << بس .. لكن ماش ماقدرت اخليها لا هي ولآبآقي دفعة الجهنآن وصرنا كل يوم نجتمع يوميا من الصبح الى ان يدق الجرس حق الصرفه وحنآ في هياته وتعرفون البنآت البزران انواع الزحف نطق الجرس وننحاش ونقطع فواتير الكهرب واذا خربناها قعدنا نهبق من الحصص<< يقالهم زاحفين ويوم من الايام تفاجات انا والشله ان نوير غايبة قلنا اكيد البنت صار لها شي يامصدومة ولا فيها عنقز لانه مافيه امل تغيب ولا تقدر تغيب عشان اخوها الكبير العربجي. يتوطا ببطنها >> آحس هي الي بتتوطى ببطني طلعنا من المدرسه ونشوف نوير رآكبة سكوتر سكوتر>> آلة زلجآت تضع رجلك فيهآ ثمن تآخذ عزيز التمسآح طرف ثوبك في فمك وآنتبه لاتسعبل وحط رجلك وآنطلق وآنتي عزيزتي السحليه اذا كنتي تلعبين سكوترر فآنتي يبغالك تربطين تنوررتك بطرف شبآصتك عشان تكونين لنفسك الآمآن الآزم المهم السكوترر ذا الي كمآن وسبق عرفنآه جتنا فيه نوير مزبرقة ومركبة بوري هوا>> ضيعت وقاعدة تدورعند المدرسه فرحانة وتدور حولين الحجآت عشآن تقهر الكويحآت بنآت الحجآت على طول وقفناها انا والشله قلنا لها من وين لك يآنوير ذا السيكل (( السكوتر)) قالت ابوي حالف ان اول راتب يستلمه يشتري هالسيكل السنع>> تسلبه وقصم ونجلس نسولف معها خاقين وعيونا على هالسيكل وكل ما شطحت بسالفه نقاطعها انا ولا الشله بسؤال / بكم شريتيه / عطينا دوره / >> وآنوآع آلسلتحه والصراحه انا في نفسي اقول باقول لبوي يشتري لي سيكل مثل حق نوير وحتى الشله احسهم انهم مثل تفكيري >> تفكير منعدم المهم بعد مارحت انا للبيت وحطيت الشنطه باقرب زاويه ورحت لامي عشان اقولها وابدا برحلة بالاقناع والتحايل من بدري ،، قلت يمه ابي سيكل قالت وشو قلت ابي سيكل زي سيكل سبويلتٍ قالت وشو نوير انتي ووجهك ثمن قالت تعالي بس تغدي وانثبري قلت مابي غدا ابي سيكل وفي اثناء الصراع القوي الحاد بيني وبين الماما دخل ابوي توه جاي من الدوام قال خير خير وش فيتس انتي وياها وش تبي ذا العله معتس قالت تبي زي سيكل نوير بنت جآرنآ ونزل راسه ابوي وخزني بعين مثل خزت عين ذاك عرفتوه ايه>> آلفقوهآ قلت بكل ادب واحترام قسم ،، ابي سيكل ابي سيكل, وما مداني اقول المره الثالثه ابي سيكل الا واشوف ذيك اليد اللي اللهم ياكافي جايه تمشي مليون واسمع ذاك الصوت اللي تقل صوت زنوبا بجدار وبعدها بدقيقه حسيت اني انمحطت بكف عنيف مؤلم حاد بارد شتاء على خشتي ، وقال بعد ماباقي الا تركبين سيكل قومي ضفي وجهك قبل اخليكي حادثة وعبره لمن آعتبرهنا واقوم انا اصيح وحالة ام ام ام امي صعبه وقررت اني اضرب عن الطعام وسوي رجيم ورحت انزويت بزاوية المقلط ونمت وبينما انا نايمة ومفهية واحلم اني رآكبة السيكل سرعة 16 اسود ومكحل بذهبي << والله من زين الذوق المهم انتبهت واشوف ذيك الرجل اللي ارتفعت فوق وجهي ورجعت بسرعه جنونيه خطره مؤديه للتهلكه واستقرت بين خدي الايسر والبرطم الفوقي شطفآ بفتحة خشمي الوسطى جدتيٍ: انتي هنا يالتسلبة وحنا ندورك قومي يالله وعينك ماتشوف الا كفوف وتتفيل وصرت مهزله صراحه ،، بعدها طحت من عين نفسي صراحه وبعدها رحت لامي قلت لها جدتي ما تحبني قالت لا هي تحبك بس معصبة شوي عشآن تآخرت عليها بالقرصآن قلت طيب مابي بهاجر مابي اصير بنتكم ابروح ادور لي اهل جديدين يحبون بنتهم ويشترون لها سيكل << فاهمة سيكل غلط ولا اقولك يايمة عطيني 5 ريال بصير اجمع لين اطق لي سيكل وكاله عاد اميمتي حنونه قالت تعالي بس تعشي << عطتها مخرج وانا اقول لابوك يشتري لك سيكل جديدة ومن بكرا سبحان الله رجعت من المدرسه ولا اشوف يوم دخلت البيت ذاك المزيون اللي اللهم ياكافي يهبل من زينه واقف بهيبة ملك وكبرياء وشموخ جنب الجدار واوقفة اناظره وتتغير ملامح خشتي واجي جنبه وامسك السيكل وكني ماسكة قلبي يوم مسكته وترجع الابتسامه الى محياي << حلوه محياي هاه واتشقق من الوناسه ذاك اليوم واجي عند ابوي عشان اقدم له اسمى ايات الشكر والتقدير وبخربها بوقع له من الفرحه ، قالي اسمعي طلعه من البيت بالسيكل مافيه سمعتي ولا لا ، قلت سم تامر امر ياعسل انت << يوم راح ابوي قلت والله تبطي هو راح بس من هنا وانا اطلع من البيت من هنا المهم قابلت نوير والشله الموقرين وقالو حركات وش ذا السيكل قلت احسن من سيكلك << ياشين البزران المهم وحنا نتمشى بالحاره وانا استقبل التهاني والتبريكات من ورآعين وبنآت الحاره الباقين السيكل الجديدة وانا ماغير اوزع ابتسامات يمين ويسار وخدودي حمرا ومانيب دارية عن اللي قدامي وبينما كنت مشغولة بتوزيع الابتسامات طاح كفر الزلآجآت اللي قدام بحفره من حفريات شركة الكهرب وتشقلبت وصار الحادث الشنيع << بس جت سليمه اللي اذكره بس صورة سفلت بعيوني ونوير تقول سلامات سلامات ويشيلوني الورآعين والبنآت ونرفع السيكل واثره منعفط جنطه اللي قدام والمرتبة مكسوره والرفرف راح فيها والجلاس متفكك يعني السيكل راح تشليح وصار كوم حديد>> قلبتها سياره قلت في نفسي يآبنت ابلغ انه مسروقة بعدين هونت قلت لا اخاف ماتمشي عليهم واروح للبيت مخربتها وقلت الي يصير يصير وانا اجر احلى دباشه في عالم قيادة السياكل وادخل للبيت وانا ماسكة السيكل المتعفط ،،،، واقابل ابوي هو شافني آبوي بس وبدا يطلع شرار من عيونه واخواني وراه  يناظرون وش يبي يصير بس يقولون آذكى خلاص الله يرحمها وانا يوم شفت الوضع كذا وذب وآفك رجلي وآنحاش وابوي واخواني والبيت كلهم وراي >> صرنا في البيت طريدي وابوي يصوت امسكووووووووووها هالتسلبة ويقول لاخوي الكبير رح بلغ بلغ وآنآ إلي آلتفت ورا القى جيش وراي موب اهل لين ماحجروني بالحوش وصار ابوي امامي واخوان الغفله اللي مابهم فزعه ونخوه من يميني ويساري ويمسكني ابوي ويبطحني بالارض ويقول بسم الله والله اكبر قلت انا >>بس قلبني خروف ويطب علي شويات كفوف منّآ ومن أومٍ ركب منّآ ودبل كيك على خفيف لين عضيت الارض وصرت اكبر حادث وعبره بالبيت لاخواني لدرجة الحين اقول لخوي الصغير تبي سيكل يقول لا لا لا لا لا لا وبعدها كرهت شي اسمه سيكل واكتشفت بذكائي وبعد ماشغلت بلوتوث مخي ان السيكل وسيله لابو هنود وطقته لتخليص مشاويرهم موب للترزز والتكشخ والتسكع بالشوراع - ارجو اني ماطولت عليكم بس حبيت انكم تتعضون من قصتي خصوصآ البنآت لاتتبعون الموضة الهابطة بذآت لآعآد معكم خويآت زي خويتي نوير>> لا نآوية آتكفخ وشكرآ عفوآ على وقتكم الضايع في قرائة القصه << ولاعاد تتعودوها تحياتي  |
|
#2
02-05-2009
| ||||
| ||||
 رد: لآضآقت الدنيآ عليك وآنتي رخمه وين تروحين اقول من بضعي وقتي بس عشان افكفك الزموز والون والله فى ديره والخط اللي انت حطتها فى ديره<<<<<< لا بيتصفق من ريومه تقبلي مروري
_________________ |
|
| مواقع النشر (المفضلة) |
| أدوات الموضوع | |
| طريقة عرض الموضوع | |
| |
-الدورات
التدريبية بجامعة نجران-
العرض العادي
