لايطــوّل سكوتك ولا يطــول سكاتي= تـــــــرى الدعـــــاوي بسيطه ...لاتكبرها
خلك على خبــري وظنــي وهقواتي= خابــــــــــرني الضيق والضيقات خابرها
وسع لي البـــال يـــا سيد طموحــاتي = ولا تغيـــــــر النظره اللـــي كنت ناظرها
تقول حب البشر طوق مســــــاراتي= أبكـ. أنت حبك مســــــاراتـــــــي يسيرها
إن غبت عــانت عيوني من معاناتي =ذكرك يصبـــرني... وطيفك يصــــــبرها
لا يـــابعد شهرتي وأعظـم نجاحاتي=وكل القصـــــــايد من أبسطها ليا أشهرها
ولا يـــابعد من يـــدور لانكساراتي =شعــــــــار سبب وجودي ضيق خاطرها
أنت أجمل اللي تسجـل في سجلاتي =إن جيت وين البشر.وإن رحت ما أكثرها
يا أول وآخر قصيدي وأروع أبياتي=محد يحب القصــــــــايد كثر شـــــاعرها
ما فـــاق حبي لك إلا حبي لــــــذاتي =يعني أحبك محبه مـــــــــا تصـــــــورها
يـــــــا أصدق من النشوه في بداياتي= لاقلت لــــــي كم بيت وقالــــــــوا إنشرها
و أغلى من الدمعه اللي كل صدماتي= تطلب إيديــــــــها وأحجـــرها ولا أنثرها
وأحن منـــي علــــي إن شفت زلاتي =ألقاك بررتهـــــــا... وصعب أبــــــررها
و أطهر حكايـــــة محبه في حكاياتي = من قبل أعيشـــــــها حسيتك أطهـــــرها
لا تلومني لابديت أخــــاف وأحــاتي =كل حـــــاجة غــــاليــه ما ودي أخسرها
ولا تضــايق إذا كثرت جيــــــــــاتي=ضيعت فيك الســـــنيـــن وجيت أدورها
تعـــال رتبنــــــي ورتب حســــاباتي = أو تـــــــدري... رتبنــــــي وبعــــثرهـا
مو مشكله لو تصير أطول مســافاتي =المشكلـــــه لا بديت أحســــــك أقصرها
أكبر عيوبــــي بديتك من نهـــــاياتي = وأكـبر عيــــــــوبك لقيت أولك بآخرها
يا مكتشف عالـــمي وأقدم حضاراتي=حــــــــرام كسر الــخواطر بيد جابرها
مادام تقدر على اللـــــي فوق قدراتي = لا تذخر الــفزعه اللــــــي قلت ذاخرها
رجعني لوقـتي أو رجــــع لي أوقاتي=عــــــامين تنطرني وعــــامين ناطرها
وتقبل الـــــود والشـــكر وتحيــــاتي = يـــــا ساكن الروح والروح ومشاعرها
و روّق. وركّز. وحـــاول تفهم الآتي =فكره وتـــــأكد قليل اللــــــــــي يفكرها
"لو إن غيري معك يســـــوي سواتي =قلت أنت نعمه وهو عـــــــاجز يقدرها"