عــذآب آلمـــــفآرق

بسم الله الرحمن الرحيم
السلام عليكم ورحمه الله وبركاته

يالله انـك تفـرج الهـم يـارب العبـاد
هم من روحه عـذاب المفـارق هدهـا
من ثلاث ايام عيني جفـت حلـو الرقـاد
تنثـر العبـرات والدمـع جـرح خدهـا
والمصيبه كـل مازيـد صبـر الهـم زاد
والهمـوم اردتنـي الله يـردي جـدهـا
وجد حالي وجد من زل عن درب الرشـاد
حدتـه سـود اليالـي وهـو ماحـدهـا
او وجود اللي وقع من على وسق الشداد
فوق عظم الساق حتـى لقـت ماسدهـا
بارض قفرا خاليـه كـل مافيهـا جمـاد
ون لـه تسعيـن ونـه ولامـن ردهـا
او وجود اللي هجد قوم في الليل الهجـاد
وطاح برجال السيوف الرهـاف تحدهـا
واسلبو سيفه واعـاود وياشيـن المعـاد
وده العليـا وحظـه رمــاه بضـدهـا
او وجود اللي زرع له بصبخا ولااستفـاد
طـش حبـه بالصباخـي وقـام يكدهـا
وكل يوم يقول بكره يجي يـوم الحصـاد
ليـن ماطالـت والايـام ضيـع عدهـا
او وجود اللي غزا جنته سـرب الجـراد
واغتشاها السرب مـن حدهـا لاحدهـا
واصبحت في نصف ساعه مثل كومة رماد
وعين راعيهـا عجـز ناحيتهـا يلدهـا
او وجود اللي على ساحة قصاصه يقـاد
و امه تنوح وعلى الصدر حطـت يدهـا
الحزن قبل امـس لبسنـي ثيـاب جـداد
والحقيقـه جتنـي همـوم مانـي قدهـا
ومن هذاك اليوم وانا حـداد فـي حـداد
روحـت فرحـة خفوقـي والا الله ردهـا
وصرت تايـه واصـل بـلاد وودع بـلاد
والهموم اقـول للنـاس واقـف ضدهـا
والحقيقـه ودي اعطيكـم العلـم الوكـاد
الهمـوم اللـي لفتنـي ولانـي نـدهـا
لكن محبوبي وروحـي وغايـات المـراد
لوتجي من يمه همـوم ماابغـى اصدهـا
من وليـف الـروح والله ياحلـو النكـاد
لالفانـي همهـا قلـت كـفـك مـدهـا
والله اني من رجاجيـل تعـرف فالشـداد
مـن نشامـا ماتبيـح الليالـي سدهـا
لجل هذا قلت والنـار مـن راس الزنـاد
ياخفوقي قـوم عـش الهمـوم وغدهـا


لشاعر الرائع ناصر عليثه الميحاوي