والله من الشين انا ابعرس

علن شركة الإتصالات السعودية... عن عدم مسؤليتها عن أيي شخص ترتفع قيمه فاتوره هاتفه الى ألف ريال بعد قراءة هذه القصه..... لذلك فضلا قفل الإتصال أصرف لك ....






جلست على الأريكة ذات عقب عصر أرتشف كوبا من الشاهي... شاهي الشغالات اللي نصفه سكر...

وجلست أفكر في أشياء كثيرة ... يعني قعدت افكر في كل شي ماخليت شي مافكرت فيه....(القواعد بجهه وهو بهه).

جاني صوت الوالد من تحت ...... وكان يدلعني وهو يناديني....

الوالد عزوووووووووووز حول ابيك تعال مو بس منطق مقابل هالانترنت

أنا : سم يبه .... هذا انا جاي...

الوالد: عجل جعلك للماحي لي ساعة اناديك (( مكنا كويسين))

المهم نزلت له وبعد حبة الرأس وحبة اليد وحبة بندول (وش دخل البندول انا مادري ) .... وسلمت على الوالدة وبعد حبة الرأس وحبة اليد... وسلمت على أخواني كلهم... ومن زود الحماس بغيت أسلم على الشغالة وهي تحط الشاهي على الطاولة (ايه هين طاوله).... بعدين تراجعت.. قلت وشلون أسلم على شغالة ... أستغفر الله بس ..يالله لا تعاقبنا بس ... شغالة....

واهلي كلهم قاعدين يناظرون هل أنا أبسلم عليها ولا لأ... واشوى أني ماخيبت أمالهم .. وماسلمت عليها ...بالعكس هاوشتها بدون سبب بس عشان اصير قوي قدامهم.....

المهم يوم جلست واعتدلت في جلستي وخذت لي كاسة ( فنجال قصيمىبس كيفي ) شاهي وتوني أبشرب...

إلا وابوي يتنحنح.... ارتعت انا وأنكب الشاهي على ثوبي...

ناظرني ابوي بنظرات ازدراء.... وأخواني كلهم يناظرون ويتهامسون ويضحكون علي....

وطولت نظرة ابوي .... وأخيرا تكلم وقال..

الوالد: أقول والله من الطفاقه بس...هذا وحنا نبي نزوجك .... شكلنا نبي نهون..

أنا : تزوجوني؟؟؟

الوالد : الظاهر مافيه نصيب ...

أنا : اي مافيه نصيب الله يرحم والديك.. وش دعوه.. يعني ترانا نعجبك طال عمرك... قدها وقدود....(( انا ماصدقت يقول نبي نزوجك عشان يقول هونت))

الوالد : الحين تنثر(( تكب )) الشاهي على ثوبك وتبينا نزوجك... اقول فارق بس ...

أنا : طال عمرك هذي غلطة مطبعية يعني .... ماقصدناها ... بس من هيبتك طال عمرك الواحد مايعرف يتصرف وانت قدامه طال عمرك ...

الوالد : وشو.... وش انت شايفني؟...

أنا : لا والله مهو فصدي.... بس أنا أقصد اني سمعتك تنحنح... قلت أكيد محتاج شي ... ومع الربشة كبيت بعض القطيرات على الثوب بدون قصد طال عمرك...(كنه مثقف)

وهنا تتدخل الوالدة المنقذ الرئيسي في كل المواقف والأزمات.....

الوالدة : الله يهديك با ابو عزيز ... وش دعوه عاد الولد أرتبك مافيها شي ... والله وليدي وابزوجه وافرح فيه ..يالله لا تخليني منه ولا من أخوانه...

أنا : الله مير يسلمك يا يوه (( يمه بس مسوي حركات انا ووجهي ))

أمي فهمت يوه غلط وتحسبني اقولها على سبيل التململ من كلامها... يوم بغت تتوطى ببطني ...

بس تدخلت جمعية الرفق بالانسان والهلال الاحمر الياباني وأنهوا الموضوع ..

ورجعنا للجلسة الأسرية.....

الوالد: يالله ياعيال.... قوموا لايقعد احد الا عزيز وأمه....

أنا (( بعد ماحسيت ان الدعوة فيها ريحه غدر )): والله انا ودي تسمح لي عندي شغيلات أبخلصهن...

الوالد: أقول انثبر بس...

أنا : أبشر طال عمرك وقصر عمر غيرك إلا أمي .... (( ياشيني اذا خفت ماعاد أعرف اتكلم ))

الوالد : المهم لايكثر بس... انا وامك قررنا نخطب لك....


اانا يوم قالوها ماقدرت اتحكم في مشاعري وقمت أناقز وفرحت فرحة أقرب مالها فرحة مصطفى إدريس اذا كسر له لاعب .....

بس جاني هاجس وضيق صدري.... إيه ضيق صدري.... مر علي شريط الذكريات بسرعة رهيبة...

تذكرت يوم أنهم يقولون لي يوم كان صالح...يمتر سيب غرفه العمليات رايح جاي وجاي رايح.... وو انواع الانهيار.... وكل شوي يطقها بتسوه ( يبكي)... ومسكين شوي يشقق ثيابه ويزاعق.... أنا السبب ...انا السبب.....

أم سعاد - ياوليدي هذي الولادة تسذا ماهنا شي غريب....

صالح - لأ. أنا اللي قلت لها نبي نجيب عيال .... هي ماكان ودها... بس انا ألحيت عليها.... اهئ اهئ اهئ انا السبب... سامحني يارب......

أم سعاد - أقول أنثبر عاد... هذا وانت رجال تبكي وشوي تموت .. وشلون هي .... انت لو يجيك بس ربع الوجع اللي يجيها من الطلق.. كان تودع الدنيا ..... بس احمد ربك بس....

صالح - طيب طيب .. ( خاف ).... خلاص خلاص ..... الحمد لله.....


واستمر صالح وأم زوجته على هالحال ساعه هو يصيح وهي تخفف عنه وساعه هي تصيح وهو يخفف عنها.

لين أنطلقت صرخة دوت في أرجاء المستشفى تعلن عن قدوم مولوده الأول مولوده البكر...

أم سعاد - كلولولولولولولولولولولولولولولولولولولولولولولولو ليييييييييييييييييييييييش
مبروك مبروك جالك ولد

صالح - ولد ؟؟؟؟ ..... ولد ؟؟؟؟..... ولد ياخاله.... ولد ..ولد... الحمد لله الحمد لله يارب... جا الولد...

وهنا تدخل أبو محمد .. اللي هو أبو سعاد ..

أبومحمد - وأبشرك بعد ترا سعاد بخير وعافيه.. وماتعبت من ذا الولادة أبد....يالله لك الحمد...

صالح - سعاد؟؟... وينها ..وينها حبيبة القلب وينها؟؟...

أبومحمد - بغرفتها تقدر تروح تشوفها... بس ماودك تشوف ولدك أول...

صالح - لأ .... اقلعوه عني أنا أبي أشوف سعاد....

أبومحمد - أقول انطم بس ورح شوف ولدك ... وادعي له ربي انشاء الله يكبره على الصلاح والتقى...

صالح - أبشر ... أبشر ...

أبومحمد - بس ماقلت لي وش تبي تسميه ؟؟؟ ......

صالح - والله ما أدري ياخالي ... أبشوف سعاد وش تقول ..

أبو محمد - أقول... تراني من أمس و أنا ودي اجلدك ....وش اللي كل ماقلنا لك شي قلت سعاد وسعاد.... منهو الرجال أنت ولا سعاد ؟؟؟ .... يالله أهوووووه فكر لك في أسم ....

صالح - أمممممممممممم .... أنا ودي بأسم عماد.. بس يشدني أكثر إسم لؤي ... المشكلة أني من زمان وأنا ودي أسمي ولدي فارس ....

أبو محمد - أقول لا يكثر بس ... من وين جبتا لنا ها الاسامي.... دور لك اسم من الاسماء الفضيله. يعني أفضل الاسماء واحبها الى الله ماحمد وعبد.... وإن كانك ماتبي من ذا الاسماء ... دور لك إسم مايفشل الولد بكره اذا كبر ولا يسبب له عقدة نفسية...وترا الإسم وانا خالك.... في الغالب يتأثر به الولد ويأخذ من صفات هالاسم ويتصف فيها....

صالح - والله ما أدري وش اسميه خلنا اللحين نتطمن على سعاد وبعدين يحلها ألف حلال....

أبو محمد - على خير أنشاء الله ......


كانت هذي حاله صالح يوم جاه مولوده الأول .... اللي أطلق عليه بعد مداخلات وأقتراحات ماتخلص ... أطلق عليه أسم ( عبدالعزيز ) مع أنه انقهر من أقاربه كل واحد يعطيه اسم شكل... ويبيزعل لو مااخترت اسمه ..

وفي غرفه سعاد بالستشفى ... جاء صالح يمشي مليون ودخل الغرفه :

- سعاد ... وشلونتس طيبه...؟؟
- هلا صالح انا بخير ..
- وين ولدي وينه؟؟
- بالحضانه..

طلع ابو صلوح بسرعه واجحد شي اسمه سعاد... ونقز لولده وشافه ... وشاله بين إيدينه... وبدأ يبوسه وشوي يعضه من زود التبويس...

بس الولد خربها وووو رجع ( استفرغ ) على أبوه.... قام الأب وسطره بطراااق ميًل خشته وأستمر هالميلان لين صار عمره 15 سنه وماتعدل إلا بعد طراق ثاني يوم درى أبوه أنه يماشي ناس يتتنون ( يدخنون)....

هكذا بدأ عزيز اللي هو (انا ) حياته بس مو مشكله ...لأن الطراااق جاء من أعز الناس ( عاش مصرف )....

بعد ما طلعت أمي سعاد من المستشفى واصلت جدتي مرحلة العلاج الطبيعي او مايسمى بالنفاس .. وهو بحدود الأربعين يوم وإحتمال تزيد عن أربعين يوم يعني على حسب مزاج الزوجه ....

وكنت محبوب من صغري وكل من شافني يلقى أني اشده ويبدأ بالتبويس والتقبيص... والسبب في هالشي خشتي المايله ... لأنها كانت تشكل عامل جذب سياحي .... حتى انهم طلبوني في عسير ( أقول الله من المصاله بس )..

كانت جدتي قالبه بيتهم فوق تحت بزعم أنها بتنفس أميمتي وترعاها...كانت تفتح مقلط الحريم وتحط فيه سرير... وجنب السرير سرير المولود....

والقهاوي والشواهي .. على مدار الساعة.... وكل عقب عصر تلقون ام نويصر وام سعيدان وام فهد وام عبدالله هذولي دايم كل عقب عصر يجون القصد الظاهر للناس انهم ينفسون البنت .... والحقيقي إنهم جايين يتقهوون ويسولفون ويحشون بخلق الله....... ولو تقول لوحده منهم قومي زيني هذا ولا عدلي هذا بدأت تظهر الأوجاع.. وعلى موال.. أااااه ياظهري.... إيييييييه ......... والله يا عظامي اليوم مهيب على اللي انا خابرة.. الظاهر ان الهوا لافحني ( يعني داخلها برد ) وخذ ياتشكي......

وإذا جوا الزوار الصدقيين وجابوا معهم الحامل والمحمول.... بالعادة ( صندوق ببسي وسفن اب – ترمس قهوة – شوكلاطه – فطاير.....الخ ) وإذا سلموا على سعاد... كل وحده تلفز ( تعطيها بحركه انسيابيه) كل وحده تلفز لها ميه ولا ميتين .......يعني المهم شي ينفسون به..... والظاهر ان المقصود بهالدراهم أنهن للمولود اللي هو عزيز.... ولكن ماعمره شاف منهن شي أبد ......

وكل ماجاءها شي دعسته تحت ذا السرير.... وإذا طلعوا ذا العالم.... بدأت عملية جني الأرباح.... وفلانه جابت. وفلانه جابت..... وفلانه الله يخسها .... ماحابت الا تسذا.... وفلانه ماجت خايفة ينقص من دراهمها شي بس هين أوريتس فيها إذا ولدت والله مااأزورها.....

وكنت أتأم وانا في المهاد ... وأصيح أحيانا وجدتي تحسبني أصيح من الجوع. وتقول لأمي زاد الله يهديتس رضعيه مجوعته... مادرت اني مليت من كثر ذا اللي يحبوني ويبوسوني ووريحه افواههم كراث وحلبه ووبقدونس .....الخ.

وامي كانت ترد وتقول ... لا توه راضع بس يتدلع ... وأنا أصيح وأصيح ... ومازالوا فاهمين غلط يحسبون أني اصيح من الجوع.... بس أنا أصيح لأنهم مهوب يعطوني وجه وكل من جاهم جدعوني في حجره..وكل من جدعوني في حجره بدأ يلعب فيني ويقبصني.... وكان فيه واحد قاهرني اللي هو خالي... كان يمسكني لمده ساعه كل يوم ويسوي لي تمارين لتعديل الخشه المايله ....وياليتها تمارين... ماغير طراقااات ويمسك الفك السفلي .. ويعد يحرحر فيه أغديه يزين.... ولكن ماهنا فايده....

بإختصار كنت أحس اني مانيب ولدهم.. وأني مولود في شارع

كان أبوي ذا جاء يزورنا يجيب لي أشياء واجد وخرابيط مدري من وشلون يفكر فيهن ...يعني مره جايب لي سيكل 16 ..... مدري وشلون أبركبه وانا ابو أقل من شهر...

ومره جايب لي اسهم ولوحه عشان اصوب عليها..... ومره جايب لي مسبح مطاطي .. ومره جايب لي حصان خشبي.... يزعمه يبي يطبق الأثر ( علموا اولادكم السباحة والرمايه وركوب الخيل).....

. وكالعاده ذا الأشياء تروح لخالي على طول.....

وبعد بلوغي السنة الأولى... قالوا يبون يسوون لي عيد ميلاد ... الظاهر اني جورج وانا مدري...جابوا كيكتين وعلبه بيبسي وبيالات.... وصبوا الببسي في البيالات عشان يكفي ناس واجد.....
وانا يوم شفت الدعوه تسذا وانا أللي اعطيهم ظهري واجر المشايه وأرجع لغرفتي ضايق صدري...
بس صقعت بالباب.... لأن خشتي المايله بدأت بالميلان أكثر مع تقدمي بالعمر وبسبب ازدياد ميلانها صقعت بالباب....

كانت طفولتي مليانه مطاقات وكنت دايم انجلد من سرور ولد جيراننا السودانيين..... وكنت اروح اصيح عند أبوي ويجلدني زود .. ويقول ...ساد هذا جزاك .. أكيد أنك محارشهم وإلا قايل لهم شي .. مهوب طاقينك تسذا من الباب للطاقه....

كنت أتشفق للطلعة من البيت .... وانبسط اذا قال ابوي تعال معي ... حتى لو انه يبي ياخذ غرض من السياره ويرجع ...بس اهم شي اطلع معه...

وإذا حمت معه ووداني معه للمسجد .... وحنا في الطريق أنواع التحذيرات... لاتتلفت ... سو مثلي اي شي اسويه قلدني .... الخ....
واول ماندخل المسجد .. ويكبر الإمام... أبدأ بالتلفت واناظر اللي جنبي.... واحيانا ادخل يدي بجيوب اللي جنبي واحوس .. أن لقيت شي يستاهل زرفته وإن مالقيت شي دعست لي منديل في مخباته وخليته .... وكنت انبسط إذا جاء الركوع ..يصيرون كنهم يطلون علي وانا أرفع رأسي وانا ظر بوجيه العالم... وأحيانا أذا شفت لي واحد فتحات خشمه وسيعه .. لاشعوريا أدخل اصبعي فيه ....

وكنت أتحرى للكف وانا اصلي مع ابوي بأي لحظة.. وكان يكتفي بانه يصقعني مع راسي صقعه تنشبني بمقفى اللي قدامي...

وإذا طلعنا من المسجد جاني أنواع الجلد...


ويوم صار عمري ... ست سنوات... بدينا بالقلق والدراسة.... كان أبوي يلح علي من قبل لا أدخل المدرسه وكانت كلمته اللي تعودت عليها من ذيك الأيام ... ( ذاكر) وإلا ( وين المذاكرة) وكانت كل كلمه تنقال في وضع معين... يعني ذاكر مع لشطه بالعقال .... اذا كان مبسوط ذاك اليوم.... و( ووين المذاكرة ) مع زبيريه بخشتي اذا كان ذاك اليوم وده يتهاوش ولا مديره بالعمل مضيق صدره...

وتعودت أني كل ماضاق صدر أبوي حط حرته فيني... لدرجه أنه أحيانا اذا بغى يطلع من البيت يمر على غرفتي ان لقاني فيها زين فهو يتفل على وجهي ويمشي وان مالقاني...ياويليييي وياسواد ليلي اذا رجع من الدوام ..

وبالمدرسة مابقى مدرس ماطبع بصمته على يدي أو ظهري .... أو وجهي..... من عرفت عمري وأنا أنجلد...

وما أذكر أني جلدت أحد أبد...

ومن المواقف اللي أذكرها وكانت تحسب لأبوي ... أنه مره ولد استقصدني كل ماطلعت من المدرسه يقعد يحتريني. ويجلدني .. وفي يوم من الأيام انحشت من طريق ثاني.... ورحت لأبوي اعلمه.. قام أبوي وراح يشوف وفعلا لقى ذا الولد قاعدن يحتريني... ويقوم عليه أبوي ويجلده ....

ويوم رجعنا للبيت ....اهئ اهئ اهئ .... ويكمل الناقص علي....

وإستمرت معاناتي وحالتي هذي ...

لين وصلت من العمر عتيا... ووصلت عشر سنوات... وكأن المعاملة بدت تزين... وكأنهم تعوذوا من أبليس وأقتنعوا إني انسان... صرت إذا دخلت مكان ولا سلمت على أحد تلقاه يسولف معي ووشلونك ياعزوز ووشلون ابوك ووشلونك أمك ... الخ

وماعاد صار احد يقول لي رح ادخل ناد اهلي من وسط البيت.... وبديت أتضايق لأني ودي ادخل تعودت.. من يوم عمري 3 أيام وهم اذا بغى أحد ينادي أهله دزني لهم أناديهم... وكنت استحي إذا دخلت مجلس مليان حريم ...لأنهم يبدون بالكلام الجارح.... اللي هو.. هاه يا أبو خشه وش عندك داخلن علينا... تبي الرضعه ترا خلاص امك وقف حليبها... وبعدين ياأم عزوز ... وشلون كنت ترضعينه صدق هو وخشته ذا المايلة....

وانا أتحطمممم ويضيق صدري.... بس أذا طلعت من عندهم وشفت شجرة العنب مثمرة..نسيت كل كلامهم ونقزت فوق الجدار عشان ألقط العنب من فوق الشجرة...

ويوم صار عمري 15 سنه وبديت أطلع وأدخل واسهر ... إيه بديت أسهر أبو فتح الباب على مصراعيه وقال لي: ياوليدي لاتجي الساعه 10.30 بالليل إلا وأنت بالبيت وإلا تراني ابلزخك بذا العصا اللي معي ......

وأيضا في هالسنه تحققت أغلى أمنياتي... وتعدلت خشتي... وكان هذا هو الشي االوحيد والحسنه اللي ماقبلها ولا بعدها واذكرها لأبوي...

كنت جالس مع خمة شباب بقاله... وكانوا توهم طايحين بالتتن ... ويوم انهم بدأ يتتنون... وإلا ابوي توه موقف الددسن عند البقاله ونازل يبي يشري جرايد وشافني...

وقزني بعينه... وانا ناظرته.... وطالت النظرات بيننا... يوم قال : هلالالالالالالالالالالالا ابو سويلم وشلونك ... وألتفت وراي ...إلاه أبو سويلم جارنا وراي يبي ياخذ له فواكه من محل الفواكه اللي جنب البقاله .. وابوي من الصبح قاعد يصور فيه ويتمقل يبي يشوف هو أبو سويلم وإلا لأ... ويم انهم كل واحد راح يسلم على الثاني... وكانت منطقة إلتقاء الطرفين جنبي بالضبط....

ويشم ابوي ريحة التتن ... ويلفت ويناظرني مع ذا الشله المشكلة أني مانيب ادخن بس جالس معهم... ويقوم ويلفعني طراااااق.. نشب راسي بصندوق الطمام اللي بالمحل.... ويوم اني قمت ... ويجيني ابوي قال : انا اسف ياوليدي احسبك ولدي.. قلت انا ولدك.. قال : لاهين انت وين وابو خشه وين... بس والله شبهت عليك قم قم عسى ماجاك شي...
قلت : يبه انا عزوز وش فيك انت ...( واناظر مرايه فياغرا كانت واقفة جنبنا والقى خشتي معتدله....

وأقوم واخم أبوي... وأناقز على الرصيف من الفرحة... وأطلع بوسط الشارع وانا مادريت عن نفسي... وتخمني سياره من ذا السيارات .. وودوني للمستشفى ..ولقوا واحد من ضروسي طايح.... ووركي كنه مهوب مضبوط .... و رجلي انكسرت ..يعني بعض الرضوض البسيطه... قلت لهم ياجماعه الخشة جاها شي...
قالوا لأ الخشه من ابدع مايمكن... قلت هذا المهم..
أستغرب الدكتور وقال : ليه....
قلت : يادكتور أنا لي 15 سنه كل شي فيني سليم إلا ذا الخشه كانت مايله ...جاء الدور ان كل شي يخرب الا الخشه تزين...