العزوبي ::

قال العزوبي يوم شاف المعاريـس *** الرابـح اللـي لاقعـد مايقومـي

أول سنة كلٍ يبث الاحاسيس *** وثاني سنـة تجلـب عليـك الهمومـي

وثالث سنة حط الرمل والمتاريس *** لابد مـن حـربٍ تقـوم وتدومـي

لامن دخلت الدار لاكنهـا بليـس *** متلفلـفٍ فـي غاليـات الهدومـي

تأخذ من المخباة وتسحب من الكيس *** وتغير الموديـل شـيٍ لزومـي

وان قلت ما أملك يامره لوهو فليس *** قالـت تديّـن لا تكثـر بلومـي

ولاجيت مرة ناويٍ لك ب....... *** قالت تصّبـر خـل قلبـك رحومـي

ليتك تساعدني تصحح كراريس *** زادوا علينا أربع حصص في العلومي

أزوارة في العصر والصبح تدريس *** والليـل تصحيـحٍ وودي أنومـي

تبكي إذا جاها وجع لوهو ضريس *** وتقول أبي دكتور ماهـو حكومـي

يروح عمرك بين عرسٍ وتأسيس *** واربع سنيـن والبزاريـن كومـي

وسط المطابخ بين قز ومحاميـس *** هـذا صحـن رزٍ وهـذاك ثومـي

والا خلصت إمنظفٍ الملاليس *** جتك تقـول انهـج نبـي زود لومـي

ولا جبت قالت اكنس الحوش تكنيس *** خل البلاط يصير مثل النجومـي

ومكرسٍ جهدك من الخوف تكريس *** وان نادتك بالصوت اقبلت مومـي

يجيك تـال الليـل دايـم كوابيـس *** ويشيبنـك مزعجـات الحلومـي

هذي حياة اللي ركض باغي...... *** ضيع حياة أول وصـار محرومـي

تعيش يالمعرس حياة المحابيس *** وشف العزوبي بكل شـارع يحومـي

من مفرق جلاجل إلى جوي للخيس *** وان حار حايرهم بوسطه يعومـي

يفرح إذا شاف الوتر والمراويس *** وفي كل يـومٍ كاشـتٍ ومعزومـي

شف العزوبي مايعرف الهواجيس *** ولا يـودي حرمتـه كـل يومـي

يا عنك ماحاش الفخر والنواميـس *** الا عزوبـيٍ يعـرف السلومـي

اذا اعرس المعرس غدا عندنا هيس *** ونزيل اسمه من سجل القرومـي

والى بغيت البهذلة والدحاويس *** فأعرس وخلك من عـداد الرخومـي

وش صابكم من عرسكم يا المفاليس *** وش استفدتوا غير دق الخشومي

اللي تزوج أشهد انه غدا تعيس *** والرابح اللـي ماخـذٍ لـه..........

ترى عناق العام نطت على التيس *** والحرعقب العرس يصيـر بومـي


العريس ::

قال العريس أنا الذي في سعاده ××× ماني عزوبي ضايق الصدر مهمـوم

مبسوط من مثلي قعد عند غاده ××× مهوب مثل اللي لحالـه تقـل بـوم

في كل ليله حاضنٍ له وساده ××× وانا مع المزيـون فـي غرفـة النـوم

أنا اشهد انه عايشٍ في قراده ××× يـروح عمـره مـا تهنـى ولايـوم

الى دخل للبيت يبلش بـزاده ××× يقعـد يقطّـع لـه طمـاطٍ معـه ثـوم

ولا قضى عقب العصر من عداده ××× والحوض من كثر المواعين مزحوم

والى غسلهن ثم فك السـداده ××× دلـى يغسـل لـه سراويـل وهـدوم

وان ماطبخ روّح لمطعم حماده ××× والا قعد في منزلـه واعلـن الصـوم

وان جاه ضيفٍ باغيٍ له رفاده ××× يروح يشـري رز وايـدام ولحـوم

ما يعرف الشمبو وراسه عراده ××× وشمغه من الكـواي مليانـه رقـوم

ما يكنس الفرشه ويلقـط بـداده ××× امـا بقايـا رز او خبـز معـروم

عنده صراصيرٍ بحاجه اباده ××× تسرح وتمرح في الغرف دايـم الـدوم

يجمع قروشه ويتسلف زياده ××× حتى يسافـر مصـر او ديـرة الـروم

او راح يم التاي وترك بـلاده ××× ناظـر جـوازه ممتلـي كلـه ختـوم

دايم يسافر ما يعـرف العبـاده ××× يسكـر وينكـر و........ بالكـوم

وإلى رجع يروح يم العياده ××× حيـث ان فيـده مـن فعايلـه مزكـوم

وإلى قعد مارس مع .......عاده ××× حيثه مسيكينٍ من العرس محـروم

له موتر خرده كثير فساده ××× في كـل يـومٍ فـي الاشـارات مصـدوم

غمارته تقول ورشة حـداده ××× ومريقـده فـي شنطتـه دوم محـزوم

دوم يتنقل تقل كنه جراده ××× فـي كـل يـومٍ نـازل لـه علـى قـوم

يسهر والى قام الظهر من رقاده ××× روّح على شغله والى اليوم مخصوم

يذي بنات الناس يبغي مراده ××× في كل يومٍ زاهمٍ لـه علـى ( هـوم )

اراه مايعرس ويقدح زناده ××× يترك بنـات النـاس ويصيـر معصـوم

يلقى هنوفٍ تخدمه مثل داده ××× ويصيـر رجّـالٍ ويسلـم مـن اللـوم

يفرح الى من قرب وقت الولاده ××× ويصير معنى العرس بالحيل مفهوم

يشوف أولاده ومعهم شهاده ××× قبـل الوفـاة وقولـة النـاس مرحـوم