[c]صار لي اسبوع منعزل عن الناس بالمزرعه وبعضكم عارف ليش انعزالي واتمنا ما نخوض في سبب الانعزال لاني حاب انسا المهــــــم جاني احد الزملاء يبي يحل مشكلتي او يساعدني على حلها حب قبل مايحل مشكلتي يفتح معي موضوع من باب الترفيه او من باب الجد كان يتكلم ما ادري عنه [/c]
[c]قال لي بصراحه ياناصر وحده خبله اكلمها على التلفون صار لي تقريب الاسبوعين مرقمها طبعاً في السوق عرضت علي اني اتزوجها تقول ايش حبتني من اسلوبي في الكلام وشكلي كمان عجبها لما قابلتها في السوق يوم نطلت عليها الرقم لا ويقول (( هبله تبيني اتزوجها )) قلت لها افكر في الموضوع طبعاً انا ما عندي استعداد في مجرد التفكير في اني اتزوجها كل همي اقضي وقت وبس [/c]
[c]قاطعته انا وقلت له طيب يا ـــــــــ ليش ماتتزوجها قال مجنون انت انا اتزوج وحده تعاكس في التلفونات لا وتاخذ ارقام في الشوارع وتصدق ياناصر اني لو ما نطلت انا الرقم كان هي نطلته علي[/c]
[c]قلت له طيب وش يمنع كل ذا مايمنع انك تتزوجها مو نفس الصفات اللي فيها فيك قال لي ياخوي انت شكلك انجنيت صحيح تبيني اتزوج وحده فيها هذي الصفات اللي انا قلتها يا ناصر ذي كلمتني وش يمنع بعد ما تتزوج انها تكلم واحد ثاني [/c]
[c]مستحيل يا خوي ذي حبتك قال حب ايش وخرابيط ايش ذي مرقمها بالسوق وتعاكسني على التلفون يعني ذي فاسده وما تصلح للزواج ابد قلت له طيب ما لها توبه قال حتى لو تابة مين راح يغفر لها المجتمع كذا قلت له يعني أنت مستحيل تتزوج وحده كانت تعاكس انت تبي وحده شريفه صح قال اكيد يا خوي الواحد كل حلمه انه يتزوج وحده شريفه تخاف الله وتستره ويسترها قلت له زين اش رايك ازوجك اختي طبعاً ذا صديق عزيز يعني يمون قال لي الشرف هو انا الاقي احسن منكم قلت له بس انا ماراح ازوج اختي لواحد يعاكس لانك الحين تعاكس وترقم وتطلع بنات تعبانات مثلك بعد ماتتزوج اختي وش يضمن لي انك راح تبطل الحركات ذي قال صدقني راح اتوب قلت له ومين راح يقبل توبتك المجتمع كذا مو انت اللي قلت والا ايش والا تقصد ان المجتمع يقبل توبة الشاب اما البنت لا قال اكيد قلت له غلطان انا ما افرق بينك وبين البنت وصدقني لو تقدمت وطلبت اختي وقلت لها انا عن حقيقتك ماراح ترضى تتزوجك لا هي ولا اي بنت شريفه تخاف الله [/c]
[c]بصراحه صاحبي راح من عندي وهو زعلان ناديت عليه قلت له تعال مو انت جاي تحل مشكلتي قال ياشيخ روح انت كلك مشاكل وماراح تنحل وشغل سيارته وفحط علي وراح وهو زعلان بس اللي انا استنتجته من كلامه هل فعلاً المجتمع في السعوديه (( واقول السعوديه لاني لم اعش في السعوديه كثيراً )) مع العلم اني سعودي هل المجتمع يقبل توبة الشاب اما البنت فلا يقبل يعني ان الشاب يعاكس شي طبيعي والبنت عار وفضيحه وما تقبل لها توبه [/c]
[c]اسف احبتي على الاطاله ولاكن احببت ان انقل لكم هذه القصه الحقيقيه والتي لم يمضي على حدوثها اكثر من اسبوع وفق الله شبابنا وشاباتنا وحماهم من الحرام وهداهم الى ما يحبه ويرضاه وفي الختام تقبلوا فائق التحيات والتقدير من اخوكم [/c]

[gl]الدكتور/ناصر[/gl]

منتديات مدرسة المشاغبين - منتديات الفسحة العامة