- السلام عليكم ورحمة الله

- عليكم السلام ورحمة الله وبركاته .. أهلا أبو العز .. شرفتنا بطلتك كيفك وكيف الوالد والإخوان؟

- الحمد لله .. كلنا بخير والحمد لله .. لكن أنا أبيك بموضوع

- أكد تفضل

- يا إبراهيم أنا متضايق

- افا .. خير ايش الي حصل؟

- يا أخي المعدل رايح فيها والاختبارات جايه وصراحة .. خايف أجيب نتايج زفت

- اها فهمت عليك .. طيب ممكن أسألك أنت ليه خايف من الاختبار؟

- أنا مو خايف منه .. لكن قلقان من النتيجه .. حاس اني ما راح اجاوب

- طيب .. هل تتوقع أن أسئلة الاختبار مش موجودة في المنهج؟

- أكيد لا .. لكن من راح يفهم المنهج؟؟

- هههههه .. طيب يعطيك نصايح أنا مجربها أيام الثانوية والكلية .. وان شاء الله بتنفعك

- هات ما عندك .. يجعل سره في اضعف خلقه

- ههههه .. ماشي يا أبو العز ماشي

- هههههه .. قول لعل وعسى يطلع معي شيء وافرح العجوز

- بإذن الله بيطلع من ورا هالراس علوم

- هههههه

- طيب يا حبيبي راح أعطيك طرق للمذاكرة ..

- حلو

- الطريقة الأولى .. المشي

- المشي؟

- نعم المشي .. خصوصا في المواد الي تعتمد على الحفظ .. أفضل طريقه للحفظ هي المشي .. امسك الكتاب وتمشى وأنت تقرأ النص وتكرره .. وتسمعه على نفسك بصوت عالي .. جزء جزء .. مع الوقت راح تحس إن مخك بدا يسخن وتشتغل خلايا الذاكرة بأقصى طاقتها

- ههههههه .. حلو يسخن كنه ماكينة ديزل

- ممكن تشبه المخ بكذا .. لما يسخن راح تلقى إن نفسك تنفتح على الحفظ .. وراح تحفظ الكتاب من الجلدة للجلدة لو بغيت وبدون مشاكل بإذن الله

- حلو .. لكن امممم مجرب أنت الطريقة هذي ولا بتجربها علي؟

- هههه .. أتذكر فائدتها الكبيرة لما جربتها في اختبار الجيولوجيا في الثانوية العامة .. كنت أتمشى في الشارع وأنا أحفظ العصور الجيولوجية وكنت اسمي كل سيارة من سيارات الجيران باسم عصر جيولوجي وأنا أحس بمتعه بهذي الحركة لأنها تطرد الملل من الحفظ والمذاكرة

- والنتيجة؟

- درجه كاملة في اختبار الوزارة

- ما شاء الله تبارك الله

- جربها وادعي لي

- حلووو طيب والطريقة الثانية؟

- الشخبطة

- هههههههه .. أنت منسم ههههههه

- أتكلم جد .. خل معاك قلم ودفتر فاضي أو أوراق ببيضاء .. وابدأ شخبط .. ارسم دوائر ومربعات .. حط فيها العناصر أو المعادلات أو المواضيع .. ووصل بينها باسهم

- اها زي الرسوم البيانية أو الي ما ادري شيسمونه الأشكال الخوارزمية في مادة الحاسب الآلي

- بالضبط .. أنت معي على الخط

- حلووووو

- الطريقة هذي راح تخلي المعلومات أو المعادلات أو تسلسل المعلومات تنطبع في ذهنك على شكل سلسلة صور ضوئية .. وراح تحس في الاختبار انك تشوف المعلومات قدامك

- يا ولد .. ممتاز جدا .. طيب امممم .. وإذا كنت بليد أصلا وما اعرف وش السالفة في المادة .. كيف أذاكرها وأنا طول السنة مطنش

- اها .. في حل كمان لهذا الموضوع

- هاته والحقنا فيه يا عم!!

- طيب يا عمي الحل بسيط جدا .. صادق طلاب ممتازين

- هههههه .. قصدك دوافير

- دوافير دوافير إذا كان هذا بيخليك مبسوط ..

- ههههههههه

- المهم .. المذاكرة الجماعية مفيدة جدا جدا .. لكن بشرط .. لازم يكون في معاكم طالب ممتاز وفاهم المادة .. يصير هو يشرح لكم درس درس .. هو يستفيد لان معلوماته تترسخ بشرحه لكم ..

- وإحنا الدبش نفهم منه المادة ونعوض الوقت الي ضيعناه في التطنيش والنوم في الفصل

- ههههه .. صحيح

- طيب وإذا ما كان عندنا دافور يدرسنا؟؟

- تقاطو وجيبوا لكم مدرس

- هههههه .. طيب الطريقه هذي قد جربتها انت؟

- نعم .. في اختبار رياضيات تفاضل وتكامل .. كنت مع اغلب الشباب في الحاسب من جنبها ههههه .. وفي يومين صديق لنا في قسم الكهرباء فهمنا المادة بشرح ولا أحلى منه .. وحتى أعطانا ملخص وتمارين .. وحلينا في الاختبار بكل سهوله والحمد لله وجبنا معدلات حلوه بعكس توقع الدكتور بأنه لن ينجح احد

- يا ولد .. لازم اضبط علاقاتي مع الدوافير من الان

- ههههه .. بالتوفيق



لا تجعل هذه الرسالة تقف عندك
انشرها حتى يستفيد منها الاخرون

وبالتوفيق للكل

منتديات مدرسة المشاغبين - الطلاب و الاختبارات و الاسئله لكل المناهج الدراسيه