واللي أفضى منهم: الدونت والبطاطس المقلية مخطط شنيع لنشر الصهيونية بواسطة دهن الخنزير



والمصدقين روحهم: أمريكا تغزو ديار المسلمين بواسطة شيبس ليز وسنكرز، وقد وجب الجهاد



واللي حاطين انفسهم أطباء:

شرب الماء البارد بعدالكبسه = سرطان القولون، وإلا سرطان الجهاز الهضمي كله أحسن

شرب اللبن قبل الدجاج المشوي يجيب قرحة في المعدة إلى الأبد وماتروح

أكل السلطة في صحن مسطح من غير ليمون = ديسك في الظهر والرقبة واليد اليسرى

ومع ليمون = التهاب المفاصل والركب والإصبع الصغير

عدم أكل وجبة الإفطار الساعة 7 = انسداد في الأوردة بالإسمنت

خبز الخباز = أمراض الكبد وإنفلونزا الدجاج



واللي حاطين انفسهم أصحاب نصيحة:

لا تآكلون سويت - لاتآكلون برجر

لا تآكلون آيس كريم - لا تآكلون سمارتيز

لا تآكلون خبز وجبن

لا لا لا لا لا لا لا لا لا لا ......



شدعوة...؟؟؟



اجل وش ناكل ؟؟

كل ما طلع شي جديد ذبحتونا عليه...

شيليز وكرسبي كريم وماكدونالد وستاربكس وبيبسي هدوا العالم كله وقرروا يخلون المسلمين يأكلون خنزير....



ترى حستونا !!

كل شي مسرطن؟؟؟

يالله...

كل شي زين وحلو وناجح فيه دهن خنزير وجزء من المؤامرة الصهيونية الكبرى..؟؟

سلامات...

ترى فلسطين راحت بدون دونت كرسبي كريم

وأفغانستان يقصفونها كل يوم بقنابل متقدمة مو ببطاطس مكدونالد



اتركوا عنكم الخرابيط.... واتركوا عنكم حكي الإشاعات...

الموبايل يسبب التفوئيد

والصابون سرطان مباشر ما في كلام

وشامبو جونسون للأطفال اللي كلنا من عام السبله سبحونا فيه واحنا ورعان يسبب السرطان ويقضي على الأجيال

واللابتوب يسبب الحصبة

والواير حق تلفزيون الصالة فيه ذبذبات خطيرة تسبب جنون البقر لعيال الحاره

ياحبيبي على وحش التكنولوجيا اللي بيهجم علينا .. لو ما قرينا الإيميلات كان رحنا ضحية الكارثة الإلكترونية البغيضة والوايرات المشربكة



كل مافتحنا الإيميل: إحذروا.... الامر خطير.... لا يجب السكوت عنه....

حصل في السعوديه: حرمه خذت كرت فيه مادة مخدرة وجتتها دوخة وسرقو فلوسها







وكله كوم... وإيميلات الحلال والحرام ومابينهما كوم ثاني

فتاوى الإيميل الحديثة، هذا حرام، وذاك حرااااام مضاعف، وجهنم الحمرا تنطركم كلكم، والموت وعزرائيل يحسبون لكم الدقايق...

ياجماعة ترى رب العالمين شديد العقاب صح

بس بعد غفور رحيم، وسعت رحمته كل شئ

والحي أبقى من الميت..

والرسول عليه الصلاة والسلام قدم الفرح على الحزن...

والله قال: "ولا تكن فظاً غليظاً"



هاذي غير وصايا وتحف الاستهبال:

الشيخ فلان مكشوف عنه الحجاب شاف منام اللهم صل عالنبي

وكلكم لازم تقرون الإيميل وترسلونه حق 10 أشخاص وإلا بينهار سد مأرب... خير؟؟؟

ريحونا عاد من سوالف الترهيب والفتاوى اللي تلف الانترنت كل يوم...



وما يقهرني الا جماعة "ارسلها"... عشان خاطر حبايب خالة جيرانكم ترسلها... ارسلها ترى بتندم... ارسلها أمانة عليك يوم القيامة.... استحلفك أن ترسلها.. رح بعيد بس

وانت من تحملني أمانة وتستحلفني مرة وحدة يا أخي؟؟؟

خاش إيميل وإلا خاش حرب؟؟؟



وعيال عمهم: جماعة "انشر".. إعلان هو؟؟ ولا تسويق إجباري؟؟

ما بقى الا يقولون لك: "انشر احسن لك" أو "احترم نفسك وانشر"



والا اللي ايقول لك: إذا تبي لا ترسلها... بس الأجر بيروح عليك...

يعني الأجر ألحين كله صار في هالإيميل...؟ انصك باب الحسنات يعني؟؟؟

ومن خولكم تطلبون من خلق الله ترسل إيميل؟؟؟ مو على كيفكم من يرسل ومن ما يرسل وش يرسل...



والمتفلسف يقول لك: لا تخلي الشيطان يضحك عليك وما ترسلها

احذر أن يوسوس لك إبليس أن لا ترسلها

احلفوا بالله؟؟؟

الشيطان ضاحك عليكم وماكل بعقلكم حلاوة وانتوا بس معبين لنا الـinbox بإيميلات متشابهة كل يوم نفسها توصلنا

وعباقرة الرياضيات: ارسلها مرة تكسب 456739832469 حسنة

ارسلها مرتين تكسب 8496565045945476644 44748700000

حسنة..

"؟؟؟؟؟؟؟؟؟؟؟؟"

على كيفك هو توزع الحسنات؟؟؟؟؟؟؟

بس ملينا.. حتى الدين ما رحمتوه؟؟



ياجماعة.. "الكلمة طيبة صدقة"

والدين يسر...





الإيميل وسيلة تبادل معلومات خفيفة واستفادة... مو مركز خدمات أمراض الموت... ولا مركز التحذيرات من عصابات البش والدبش، ولا أداة للتنفير من الدين ونشر فتاوى شيوخ سبيس تون



وإذا الإيميل له قيمة وفيه فايدة الكل بينشره بدون صيغة الأمر البايخة.. وطريقة أرجوك أحب خشمك ترسلها

والناس أدرى باللي ينفعهم، ما يحتاجون أحد يقول لهم وش يسوون

منتديات مدرسة المشاغبين - منتديات الفسحة العامة