اعلانات ساخره ...... بمناسبة عيد الاضحى المبارك ..... اتمنى تعجب اللي يقراها
(1)
يعلن سيف العلم خان ... صاحب محلات ( كل فطير وطير ) اصالة عن نفسه ...ونيابه عن اصحاب البزنس .... وخصوصا اصحاب محلات الملابس النسائيه والاطفال والمشاغل النسائيه ومهرجانات التخفيضات وبمناسبة عيد الاضحى المبارك لافراد الشعب السعودي الشقيق اللي عندهم مشكلة... شراء اغراض العيد في اخر لحظه اننا بنرفع الاسعار... وحسب عادتنا السنويه علما ان الزياده ستكون في حدود 20 بالميه لاسواق جنوب وغرب الرياض
.وترتفع الزياده كلما اتجهنا شمالا - على قولة حسن كراني - حتى50 بالميه .....اما شرق الرياض ف.... للاسف ما نقدر نرفع الاسعار لانه ما فيه الا سوق حجاب للاخوه الخواجات وسوق المجد للاخوه القصمان ... ومعروف انه ها النمونتين ينشبون بحلق البياع ويشترون اللي يبون بسعر التكلفه ... او اقل
وبها المناسبه يهدي سيف العلم وربعه ها الاغاني
اغنية ... زوروني كل سنه مره ( فيروز) للحبايب في ادارة حماية المستهلك .... هذا اذا كانوا يشتغلون ايام العيد
اغنية .... انت وينك ادور لك يوميييييين ( اصيل ابو بكر )..... للكفيل
اغنية .... حبايبنا وش الدنيابلاكم ( عبد المجيد عبد الله ) للاخوه والاخوات اللي فوق بالاعلان
************************************************** *************************
(2)
يعلن التلفزيون السعودي ( القناة الاولى ) وحرصا منه على راحة مشاهديه - كثرو منها- - انه بحاجه عاجله جدا لمقدمة برامج اطفال من النوع الماصل علشان تقدم برنامج الاطفال لايام العيد .... ومثل منتم عارفين اعزائنا المشاهدين ان المطلوب من مقدمة برامج الاطفال انها تعرف تسأل اطفالنا .. فلذات اكبادنا الاسئله التاليه
اولا : ايش اسمك يا شاطره ؟
ثانيا : كم عمرك ؟
ثالثا : تحبي بابا وماما ؟
رابعا : عندك انشوده ؟ واذا عندك ... ممكن تقوليها لنا ؟؟
واخيرا ... صفقوا لها
و......... رجاءا من الاخوات اللي عندها موهبة القاء , اوناجحه جدا في تقديم برامج الاطفال , او صاحبات الحضور المميز ... بليز لا تعبون انفسكم.... لانه بصراحه الاولويه عندنا للي ما عندهم خبره ولا اي موهبة اعلاميه ... والكئيبات ... واللي عندهم عاهات نفسيه ......و........ اللهم لا شماته.
************************************************** ************************
(3)
يعلن التلفزيون السعودي .. بقناتيه الاولى والثانيه اننا توهقنا وضيعنا شريط الاغاني حق العيد (اللي احد اشهر اغانيه ... ومن العااااااااايدين ... ومن الفااااااااايزين ... ان شا الله ) .... نرجو ممن يجده ان يسلمه لبيت المذيع / سليمان العيسى ... واذا ما حصل احد بالبيت ... يسلمه للسواق او الشغاله .
************************************************** ************************
(4)
تعلن الاتصالات السعوديه انه خلافا لما عودنا عملائنا الكرام عليه ايام عيد الاضحى كل سنه من اختناقات في شبكة الجوال وصعوبة تمرير المكالمات والرسائل .... نتوقع ان العيد هذا انه يمكن ..... يمكن يكون بدون اختناقات ... بسبب مثل منتم عارفين مضايقة شركة موبايلي - الله لا يعطيهم عافيه خربوا علينا عملائنا - بس نتوقع عند اتصالكم على 902 ... تنتظرون اكثر من نصف ساعه علشان احد يعطيكم وجه ... نعتذر عن التأخير في الرد على مكالماتكم .. لاننا مرسلين اكثر موظفين ال 902 لمكه المكرمه ... منها يحجون ومنها ينشبون لشركة موبايلي كل ما نزلت موبايلي عرض اسعار جديد للحجاج يكلموننا موظفينا من هناك علشان ننزل عرض ارخص وخدمه زي وجيهنا ..... وعموما نحب نقول لعملاء موبايلي السعوديين ... ترى مردكم علينا بخدمة الهاتف الثابت .... وقديمك نديمك
************************************************** **************
(5)
تعلن جريدة الرياض بحكم انها جريدة الاعلانات الاولى ولا تهون الجزيره ونيابة عن بقية الجرايد انها تستقبل اعلاناتكم بمناسبة عيد الاضحى المبارك وكما عودناكم كل عيد حتى قبل موعد وقت الطباعه بخمس دقائق والاولويه لحجز صفحه كامله وبغض النظر عن المضمون ... خصوصا اعلانات المعايدات المالغه والمجاملات اللي بدون طعم....... وبالمناسبه يسر كل الجرايد انها تعطيكم نسخه مجانيه من ملحق الاعلانات مع كل عدد (!!!!!) .... ونصيحتنا لاعزائنا القراء انهم ما يهملون ملحق الاعلانات ... ترى والله العظيم عملائنا دافعين دم قلوبهم علشان ننشر اعلاناتهم وبعضهم ما بعد سدد لنا ..... ولحجز مساحه اعلانيه اتصلوا على الارقام اللي تحت ... واذا كانت الخطوط مشغوله ... ترى موظف الاعلانات يغازل على حسابنا الله يهديه ... اعيدو الاتصال مره ثانيه وما لكم الا طيبة الخاطر
************************************************** *************
(6)
يبارك الدفاع المدني مقدما لجميع ابناء الشعب الكريم بعيد الاضحى المبارك .... وبهذه المناسبه نود التذكير بكل اعلاناتنا وتحذيراتنا السابقه ... اللي ملينا وحنا نقولها لكم .... بس شكلكم مطنشين !!! واللي خلاصتها ... اغسل ايديك اننا نعرف بيتكم ونوصل له بسرعه ... لانه ما فيه احد بالدنيا يعرف كل الشوارع وكل بيوت الناس !!! وننصح كل رب اسره انه ياخذها من قاصرها وبدل ما يتصل علينا ويسبب لنا قلق ... يتصل على احد اقارب العائله علشان يساعدهم اذا حصل اي طاري ... لا سمح الله..... وبعدين لا احد يسوي فاهم ويشتكينا لاننا تعودنا نقول ( لا صحة لما نشر في جريدة ... ) ومن واقع التجربه نقول لكم غلطان يا معاند بحر ... واخيرا ... نداء لكل شاب يعاني من النحافه المفرطه او سوء التغذيه او حتى سوء الهضم .... سجل معنا عسكري بالدفاع المدني .... ونضمن لك القضاء على مشاكلك الهضميه خلال شهرين او اقل ... اما اذا استمريت معنا سنه او اكثر .... نضمن لك ان كرشتك توصل قبلك بخمس دقايق او اكثر .
************************************************** ************** انتهت
كتبها لكم ..... راكان العبد الله .

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه