في يوم ..مشرق بالليل..ومن صباح هذا المساء...ولد فتى مملوح ..يدعى المفقوش وكان هذا الفتى..يتميز منذو نعومة اصابعه ..بأنه خرشه ..مع شيء من الطفاقه..ولايهون الأستدلاخ ويعد المفقوش..ايضا..اول من انولد بالعالم..وهو عمره سبعطعش..يعني سبعطعش..سنه منسدح ببطن امه يقول منيب طالع لين تشرون لي سيارة.. وكذلك..وبعد اربع دقايق ..وست وسبعين ثانية..من مولد صويلح...ولدت الفتاة شجون.. والتي تتميز..بقناصيعها..والتي كانت سبب ضياع مستقبل المفقوش...وايضا..تتميز ..بطول القامه..حيث انها اذا جت تركب السيارة يصفطونها بالشنطه اللي ورا بعد ..ان مرت عدة سنين...وتوالت الأيام ...وفي اليوم العاشر..من شباط الخامس حزيران السابع من عام الف وسبعمية وسبع وثمانون من سبتمبر نوفمبر الجاري..للميلاد قبل الهجرة

في ذلك التاريخ اللي قبل شوي..والله منيب قايله مره ثانيه.. ومن صباح ذلك اليوم.......

ترررررررررررررررررررررررررررررررررررررن = هذي ساعة المفقوش الخراشه

قام المفقوش من فراشه..وبكل أدب اخذ الساعه..وفلق بها هندي (نفس الهندي اللي جلده المفقوش يوم يقوله وراك تنسدح قدامي..في موضوع كيف تسوق السيارة بالرياض).. فتح اللمبه..حيث كانت لمبه لونه اسود ..على باله بتصير ظلام.. وكان المفقوش يحس..باحساس ..نفس احساسك اذا ارسلك ابوك تشري مقاضي ويوم وصلت البقاله نسيت وش تشري.. فتح المفقوش الطاقه ( النافذه - الشباك )..وقعد يتمغط ..ويتمغط...لين تمصع ..ولكن مازال يتمغط ..يوم ناظر تحت ..ترارا (موسيقة تصوريه) انصدم ..وصابه الذهول..مع شد عضلي بالخشم...وانهبل..وجاه اسهال باصبع رجله اليسار...ياللهووول ماذا رأى المفقوش...؟؟

عندما..قام المفقوش..الى الطاقه (الشباك - النافذه ) ..نسينا نقولكم انه كان فيه ستارة على الطاقه..تونا مركبينها....

لأن مساعد المخرج ..الأخ محماس..توه يجيب القطة حقت الفلم..حيث انه قاط معنا بستارة..خربزية مائلة الى اللون الأخضر..اللي لاشفته من بعيد قلت انه اسود..كاروهات..مقلم ببرتقالي..مع قليل من الشخابيط عليها..تقل شخابيط واحد بثاني ابتدائي حاء....كل ذا وصف الستارة.اهم شي..فتح المفقوش ..الستارة ..ومن ثم الطاقه..وبعده قليل من التمغطات المتتابعه...لفت نظره ..شيء بحوش الجيران..

وصرخ المفقوش فجأه قائلا : وجع ياملا البلا وش ذي الجنيه..وانطلق يجيب حطبه موزيها بالدولاب..

تنبهت له الجنيه : عض على شحمه لا اجي احوسك ..انا شجون بنت جيرانكم ..اول مره تشوف..وحده منفقع بشوشتها قنبله ؟

رد عليها المفقوش...بالفعل..وليس بالقول...حيث..نشب الحطبه بجبهتها...واتبعها..ببعض الشتائم...منها ..قال : انثبري بس ياللي خشتك كنها حاصل قسمة 72 على 87 .

ردت ..عليه شجون..بنظرة خاطفه..تدل على ..مدى ماتتمتع به من خبث ولعانه ونجاسه لو يفرقونها على فصل اولى ثانوي طاء بمدرسة خزاعة بن اموكاشي..بنيجريا لكفتهم ..

وردت عليه..قائله : كش عليك..يارب تزلق بقوطي صلصه على خشتك..ويمر ددسن محمل رز ..ويدعس خشمك ..انت ووجهك اللي كنه ..دفتر توحيد ابو سبعين

فيه هذه اللحظه..الحاسمه من الهوشه..المفقوش فهم غلط..

وقال بنفسه..ياعمري ياشجون تقول يارب يدعسني ددسن محمل رز بس ؟؟ ياربيييه ماقالت محمل اكياس سمنت (علما ان كيس السمنت اثقل من خيشة الرز بخمسة كيلو ) ياربييييييه ما تحمل..حبتني شجون لا ما اقدر اي كانت اي كانت = يعني ما اقدر بس بالأجليزي

وبلحظات ماكان المفقوش يهوجس..جته بياله مسرعه مره ..ماردها الا خشته ..وانتبه انها شجون ..كانت تشرب شاهي...

جاء حس بهول الموقف..وقال لها بيتين شعر ...:

ماكنت ارضى تزعلين ....وانتي بتهديني الزعل ( بعذره والله فالقته ببياله )

محروم عيني شوفتك (الله من النصب ) ........لا تحرميني كلمتك ( يقصد فلقتك )



ردت عليه شجون...وبــــكل ماتحمله من رومانسيه في وجدانها ..قائلة...: اقول انثبر وهات بيالتنا لا اجي اتوطى ببطنك



قال المفقوش : هاه ايه البياله سمي هذاه ( فهم غلط المفقوش وقال بنفسه..اكيد تبين احط لها رساله بالبياله..بس على مين تلبعها ..وحط لها علك ابو طبعه ..وكانت الطبعه صورة عنز منسدحه )

================================================== =============

------------------------------ فترة إعلانية اصبروا شوي الحين نجي -----------------------

صابون ابو عنز الرهيب....تراه ازين شي..اشره تراه رهيب ....حتى شوفو عصاقيل صويلح في المسلسل

عصير بردقان ..ذو الصفطه الذهبيه....تشربه بالشفاط..مايتنثر ولا شي..واذا تنثر على ثوبك...جب ثوبك نغسله =

------------------------------ عودة لإكمال المسلسل ------------------------------

اخذت شجون البياله ..وقزت العلك ...( وفهمت غلط هي بعد ..وقالت بنفسها..ياربيييه ..شكله حبني..وش دراه ان ابريق الشاهي حقنها فيه شخر..واننا نبي نسده بعلك ) ومير تلتفت على المفقوش ..وتقوله : خذني بقايا جروح ...ارجوك داويني (بهاللحظه المفقوش قال يووه الصيدليه صاكه) صاكه = مسكره

المفقوش ...وصمخ ...المفقوش وصندوقين صمخ يا السلوقي وش قاعد تسوي = هذا ابو المفقوش جاي يركض

المفقوش : سم يبه هاه وشو نعم وش سويت والله موب انا اللي اخذ موترك وفحط بالشارع اللي ورا وصدم الهندي وفقع كورة جيرنا

طبعا ابو المفقوش..مسك المفقوش وعبر عن مشاعره ..بحيث انه صفقه تصفيقا مبرحاوبنفس ذيك اللحظه ...

شجون ...شجون .. ياجعل يطيح عليك مكيف صحراوي وجع وش تسوين بالحوش = هذي ام شجون ..جايه تركض

شجون وبكل لطف ردت : اصلا ماعندنا مكيف صحراوي

طبعا ام شجون ..مسكت شجون ..ووربطت قناصيعها بالمروحه وشغلتها على رقم 5

في صباح ..يوم جديد..وبعد ماانتهى ابو المفقوش من تصفيق المفقوش...وطاحت شجون من المروحة..

شجون...قررت تروح للبقاله ..وبكل براءة..اخذت معها شنطته الرهيبه.. اللي مليانه صواريخ وطرطعان..وفشق للشوزن..وعلكين من اللي يطقطقن..(يجدر الذكر ان شجون ذات سوابق بسرقة الولاعات من الباكستانيه اللي يعمرون عمارة قبالهم..واكتشفوا انها تستخدم الولاعة لشب الصواريخ والطرطعان)فتحت شجون باب الشارع...وكالعاده...مر ددسن ..محمل سبعشرين هندي..كلهم ملتفتين للجهة الثانيه مايبون يشوفون شجون.. سارت شجون بالشارع متجهة للبقاله..واثناء مشيها..حست ..بأنها مراقبه ( نفس الأحساس اللي يجيك اذا كنت قاعد تنقل واجب الرياضيات بالفسحه ) وبحركه سريعه ..التفتت شجون .. على بالها كافشتهم..واذا بها تدعس قوطي الصلصه (الذي سبق ذكره بالحلقه السابقه) وتزلق فيه .. وتخم الأرض...وبذيك اللحظه كان المفقوش..جاي يركض لاحقينه شباب الحارة يبونه يجيب قطة الكورة.. يوم شاف المفقوش شجون ...ويكعععع ضحك ..هييييييييع هيع هيع هيع ( المفقوش وهو فاق كشرته يضحك) جت ابتسمت له تلك الأبتسامه ..الخضراء.. ذات الرونق اللي مهوب..سهل..واللي لا شفتها تحسبها كروكي توصيف قصر افراح..

بس ولو ..ذا الضحكه كانت سبب ..ادى الى ان المفقوش..نقز لشجون..ومد يده يبي يقومها عن الأرض..

يوم مدت يدها له..جا قالها بكل ماتحمله خشة المفقوش من رومنسيه : قومي يابعد جنوط الماكسيما اللي واقفه هناك....سلامات لكرتون العلوك اللي معك ..

ناظرته شجون بازدراء ( مادري وشي بس مشوها) ..قائله : مفقوشي(اسم الدلع ل المفقوش)

رد المفقوش ..وبعد انا اصابته حالة من الذهول..وعم على خشته هالة من السعابيل ..وقال : هاه ياخشم مفقوشي

شجون : تصدق اني لاشفتك اتذكر حمزة ادريس يوم يضيع البلنتي ( شجون كانت حاضرة مباراة المنتخب )

المفقوش : ياعمري ياشيخ ...تصدقين اني لا شفتك اتذكر اني ماحليت واجب العلوم ..

شجون..ياربيييه ذبحتني تراك ..براطمك البنفسجيه ماخلتني انام الليل

المفقوش : وانا وش اقول اجل..مع قناصيعك..آه بس ..ياليتني البوكله اللي فوق راسك ..

بهذه اللحظات..جاء صوت واحد ساحب جلنط عند اللفه..وجاي طاير ناحية المفقوش و شجون..



================================================== =============



------------------------ فترة إعلانية اصبروا شوي الحين نجي -----------------------

شمبو الحبشوش الزين..انواع النفيخات تطلع لك..ويجي معه هدية عبارة عن مسواك ..استخدمه المفقوش بالمسلسل

------------------------------ عودة لإكمال المسلسل ------------------------------

تربت تيت تربت تيت تربت تيت = هذا عبودي طاق الترنق البرتقالي ابو شخطين على جنب..وقاعد يشربك

عبودي : المفقوش..ترى عندنا مباراة اليوم بالحبشه ..لآ زم تجي

المفقوش..مازال خاق مع شجون ..ويناظرها وهي رايحه ..ويقول بنفسه..آه ياحلوها..تشبه ثلاجتنا ام 36 قدم ..

المفقوش : خل عنك ..بس قم شغل اللكزص ( اللكزص = الددسن..بس يدلعونها ) وينقزون..للكزص...ويلحقون شجون..شجون فهمت غلط..وتحسبهم البلديه كفشوها انها مهربه صواريخ وطرطعان ..عاد هجت ..للبقاله

دخل المفقوش البقاله..وهو متلطم ( هذي قمة التنكر عند المفقوش )

شاف شجون..وجا يركض نحوها ..شافته هي..وضحكت ..باشر عليها المفقوش بحمضيات ..جت فلقته بالحمضيات ..وقالت : بالله يابن الناس..ابعد عن دروبي..منتا ولي علي..وصوبك مهوب صوبي

المفقوش ..وهو متأثر بجراحه قال اغنية باك ستريت بويز اللي بالوجه الأول من آخر شريط لهم ..

I need you ..tonight..I need you...this time...

شجون : ولكن يالمفقوش..تدري اني بسافر عقب اسبوع .بروح للكاميرون اكمل دراستي بفن شب الصواريخ ..

وقبل ان يقول المفقوش شيئا &&& سمعوا دوي انفجار..من بعيد..وهو كان صوت ابو المفقوش وهو يعطس.. ، واذا بالمفقوش بدا يتنافض...وصار كنه من بياجر منول واطلق المفقوش عصاقيله للريح...ياترى الى اين ؟

المفقوش..يركض..ويركض..ويركض..يلتفت ورا ..ويشوف خشة ابوه وهو معصب يلحقه بالددسن..

ابو المفقوش : اوقف لا ادعسك ..انت وسيقانك اللي تقل عسبان نخله..

المفقوش : وه وه ..لا منيب كل يوم تصفقني حرام عليك

ابو المفقوش..وبكل مايحمله من كرهه لولده المفقوش..سحب جلنط ..مما ادى الى انه صدم المفقوش .. مع اصبع رجله الصغير..

ويخر المفقوش صريعا.....‍‍‍‍‍‍‍‍‍‍‍‍‍‍

نروح لشجون...كانوا يلحقونها اربعه هنود موب حبن فيها..بس يبونها ترجع لمبات سياكلهم ..ماخذتهم تقول نبيهن عندنا عمل فني لأبله هيله.. اهم شيء..رجعت شجون للبيت مادرت وش صار لأصبع المفقوش.. كاننوا اهلها مايبون يعلمونها بالخبر ..المحزن

كلهم يتصددون عنها ...لين جت ام شجون ..وقالت لها بكل ماتحمله خشتها من حزن : انتي يالخبله ..دريتي ان المفقوش انكسر اصبعه ……ردت شجون والدموع تغمر عينيها قائله : احسن وذهبت شجون لفراشها تبي تنام..ولكن فكرت وتبادر الى ذهنها فكررة خطيرة ...اخطر من هجمة الكاتو اللي بالعارضه يوم مباراة الهلال والنصر..

وقالت..شجون بنفسها..خلاص ابلعب حسب تكتيك حبيبي المفقوش..وحسب نظريته اللي تقول خربانه خربانه

ولبست ملابس الخطة..وهي عبارة عن كنادر الخلطه ( ماخذتها من ابو بستك = الباكستاني ) شماغ ابو كريم ..ابو جيرانهم ..كان معلق شماغه بالسطح يبيه ينشف..واختفى فجأه ...ملابس الرياضه حقت اخوها سعيدان..وكانت عبارة عن الوان فريق نادي مدغشقر اللندني بواشنطن..علما انا سعيدان كان عنده حصة رياضه بكرا.. نزلت شجون للحوش..تلفتت ذات اليمين ..قليلا..وذات اليسار..واذا بها تنقز من شدة الخوف ماذا رأت ؟...يالهي انه المفقوش

شجون: الله ياخذك وش جابك حوشنا

المفقوش : هاه وشو لا جاي اشوف وش اطول نعال ابوكم والا نعال ابونا

شجون : تصدق اني كنت بنقز على بيتكم..بشوف ايهن احلى صحونكم والا صحوننا

المفقوش: شجون بلا نصب..تراي جاي اقولك سر خطير

شجون: وشو مفقوشي عمري

المفقوش ..وبعد ان صابته حالة استدلاخيه دامت ربع ساعه من هول كلمه عمري قال : ما اعتقد ان فيه بالدنيا ملاك....تشبه لزولك تصور مجمعه

شجون ..وهي ضايعه علومها : لا تنصب شغالتنا احلى مني

المفقوش وبكل مايحمله في براطمه من لعانه : هاه وين شغالتكم تنام

شجون : وجع ياشينك انت ووجهك تراي اغير عليك .

================================================== =============

------------------------------ وقفة مع أهم الأنباء------------------------------

الموجز..

صواريخ من نوع ابو فاس...قطع امدادات ميرندا الفراوله عن المتضررين بحارة ابو المفقوش....قنابل الفكس بألمانيا

الأخبار بالتفصيل....:

هددت رئيسة وزراء النرويج ..السيدة فطيمة ام العصاقيل..بتصريح نقلته وكالة ابو زهقه للأنباء..انها ستقوم بارسال صواريخ من نوع ابو فاس الى زغرب

وقالت ايضا ان باستطاعتها قطع جميع المويعينات (تصغير مواعين) عن تلك البلاد..مما اثار ضجة بالوسط الجنوبي من بتنجنيقا

لحظه بقلب الورقه

قام السيد جون دويرج رئيس المانيا الأنفصاليه..باهداء جائزة نوبل للسلام للسيدة وضحى الشناوي..حين ابطالها للقنبله ..الفكسيه المسيله للدموع

قال مصدر موثوق بكذبه..ان السيد دغيليب افتتح الخيمة الجديده بحارة ابو المفقوش..وقام بشب حطب البرسوبس بدلا من السمر حفاظا على الحياة الفطرية

------------------------------ أعزائي المشاهدين طولنا عليكم بس معليش--------------------

المفقوش : شجون ..الى متى وانا بصير محروم من شوفة خشتك السحريه ..اللي احبها اكثر من حبي لأبوي

شجون : خلاص هانت ..وشرايك نهاجر لبيت خويك عبودي

المفقوش : اما نروح لعبودي معصي والله لو تموتين

يجدر بالذكر ان عبودي مملوح وذو شوشة ..ويتمتع بأسلوب في كلامه ..مما يسبب في تضييع علوم الفتيات ..

لذلك لزم التحذير من عبودي لما يتمتع به جاذبيه

شجون : ياربييه متى نتلاقى ونقعد نلعب بلاي ستيشن بشريط الكورة

المفقوش : اص بس تخبرين يوم اعطيك فريق البرازيل وانا آخذ السعوديه ..وارقعك 5 صفر

شجون : ايه اصلا كنت ناسية وش اللي يشوت كل ماضغطت شي مايتحرك

( علما ان المفقوش كان فاصل اليد حقت السوني ولا عبن على شجون ..وهي مصدقه ) وفي تلك اللحظه..اذن الفجر ..وحان وقت سفر شجون بعد معاناة دامت نص ساعه ..بين المفقوش وجدار بيتهم..حيث انه عجز ينقز..الجدار..بما انه كان لابس وزرة كاروهات مما ادى الى صعوبة التعامل مع الجدار..وفي اثناء نقزة للجدار..لاحظ شيء مكتوب على الجدار.. واذا به يرى رسمة قلب ..شاقه ساطور..ومكتوب جنبه ..شج + مفق = حب وفصفص..ونود لفت انتباهكم لما تتمتع به شجون من ذكاء في التمويه..عشان ماتنكشف انها تحب المفقوش عندما عاد المفقوش لغرفته..قرر ان يتروش..( وهي تعتبر المرة الثالثه في حياة المفقوش..وقد سبق له ان تروش في عام 1407 وعام 1415 ) واثناء ماهو يسبح..انكسرت الطاقه ..وطاحت عليه بلكه مربوط عليها صحيفة بلكه هي حصاته (حجر) متوازي الأضلاع ذات لون رمادي تشوفه دايم عند العماير اللي توها تنبني ) وينزل المفقوش يركض للحوش شجون..وهي دالقه خشتها ( يعني مبتسمه مع قليل من الدلاخه ) ويمسكها المفقوش ويصفقها لين عضت الأرض

المفقوش : انتي يالمهبوله كسرتي فرشة اسنان ابوي

شجون : وش اسوي عاد البلكه اخف شيء لقيته..والا كنت ناويه احذف ( ارمي ) جنوط الجمس

المفقوش : طيب اصبري بروح اقرا الرساله

شجون : ايه تراي مستحيه ..حتى شف خدودي..اول مره يصير لونهن برتقالي

نود لفت عناية الساده المشاهدين ..اننا قمنا بقطع هذا المشهد السابق ..من قبل الرقابه..حيث ان المفقوش كان جاي يركض ولا امداه يلبس شي..غير المقوصر..( والمقوصر عبارة عن شورت ولكن ساده يعني بدون الوان )

رجع المفقوش...انسدح..فتح الرساله..وبدا يبحر في اموج الرساله..وكل مايقرا سطر,,يقعد يضحك مره ويصيح مره اخرى

نقز المفقوش للتلفون..دق بيجر على صديق عمره عبودي..

المفقوش : 999 ....عالو عبودي عندكم ؟؟

999 : ايه وشدراك...

( عبودي مشهور بأنه يحب يقطع الأشارات لأنه يحب سندويشات الجبن اللي بالحجز )

عبودي : المفقوش ..وش تبي ياخي قاعد العب بلوت مع اكبر عربجي بالشرق الأوسط..عبدالكريم ابو جلمبو..وخليته يفلقني بحطبه تذكار

المفقوش : اها بس لا يكثر ..هج من الحجز ..ورانا مطاردة

عبودي : تامر امر يابو شجون

المفقوش : هلا عساك من عواده ( المفقوش مايعرف يرد ابد )

سعيدان ( اخو شجون ) قاعد يشغل الددسن..وينادي شجون قائلا : اختاه هيا بنا سوف نذهب

( سعيدان من اشد المعجبين بعبسي صديق عدنان )

شجون : ورا ماتنثبر لا اجي اعفط خشمك ذا اللي كنه ركبة مصطفى ادريس..

سعيدان..يمسك شجون ويركبها بالصندوق حق الددسن..ويمشون ....ولكن اين المفقوش..؟؟

شجون ..قلبها يطقطق..وتقول بنفسها..ياربييه وين المفقوش اطلبه تسعطعش ريال

لحظه..ماذا نرى...نشوف غبار وعجاج قادم من بعيد..يالهي انه اللكزص حق عبودي .. سعيدان..مسرع ..وجرس السرعه يرن لأنه تعدى سرعة 160 ..بس ولو يقول عادي..ومشغل اغنيته المحبوبه..يابنات المدارس ليتني عندكم سواق

شجون..بصندوق الددسن..والهوا مطير شوشتها..ولا تهون عصاقيلها الفسفوريه

المفقوش..يقول لعبودي بكل حماس..: قرب لمهم بسرعه

وبحركه من المفقوش..تشبه حركة توم كروز بفلم ميسيشن امبوسيبول 2 ..مع فارق الخشش..ونقز فوق كبوت اللكزص

المفقوش..والهوا لاعب بخشته ولا يقدر يشوف زين : عبودي الله ياخذك ورا كبوت السيارة حار..اقرب شوي لمهم

شجون ..ناظرت المفقوش..وعم في قلبها..الفرح..مثل فرحتك اذا قمت الصبح لقيت موترك معبا بنزين فل وتنقز ..لآخر صندوق الددسن..وتمد يدها لالمفقوش...قائله : المفقوش دوك يدي حط التسعطعش ريال

المفقوش : وجع هذي يد والا ملعقه ..والله على بالي ذي مغرفة الرز..

وبلحظه جت اشارة وصارت حمراء..وينقز المفقوش لصندوق الددسن وينسدح..متغبي..ولكن ..توهق المفقوش ...كان بالأشارة ..شرطة اللي يقولون حط حزام الأمان طبعا سعيدان..مسوي فيها ينكت وقاعد يسولف مع الشرطه.. ولكن الشرطي الفذ جبران خليل جبران..لفت نظرة شيء بصندوق الددسن.. وعندما اقترب من الصندوق.......!!

المفقوش..وهو يهم بالأنسداح ..خوفا من ان يراه الشرطي جبران..قال هامسا بأذن شجون : احبك

شجون : مفقوش ..وشو وش قلت

المفقوش : احبك ....خلاص تعبت..قلبي يعورني كل يوم ابي اقول هالكلمه ..خلاص ماني ( منيب ) قادر اتحمل..

شجون : ياعمري انت..عطني يدك..

المفقوش : خذي قلبي خذي عمري..مو بس يدي..

اخذت شجون ..يد المفقوش..وحطتها بين كفوفها..وغمضت عيونها..وقالت : المفقوش ..احبك اموت فيك

المفقوش: وانا احبك ..لو تجافيني..على كل الخطا مسامحك..احبك يانظر عيني..ورضاك الزم..

التقت عيون العاشقين..وكل منهما يغمرهما الحب .. هم المفقوش..بابعاد خصله من شعر شجون..نزلت على عيونها..

وقالها: من شفاتها ماميز الصوت من همس *** يسبح النظر فيها ولا يمل نظرتها

غظيت عيني عنها كان بالأمس ***واليوم انا من بعدها ملك ضحكتها
لو تنظر بعين اللطف للحجر حس***تحت القدم حس الثرى بخف خطوتها

شجون : آه يامقوشي عمري كافي عذبتني.. ونزلت من عينها..دمعة ..لما اعتراها من حب جامح لمفقوش..وقالت له :

دمعتي تنبيك عن حب اكيد ** غيرها ياروح روحي وش بعد

وفجأه..واثناء هذا المشهد العاطفي..واللي كلنا انا وطاقم التصوير..كنا قاعدين نشاهق من الصياح..

طب الشرطي جبران خليل ( الله ياخذك انشاء الله قطعت علينا احلى مشهد بالمسلسل )

وقال جبران : ايش هاذا ..ايش قاعدين تسووو هونا

المفقوش : اقول كل تراب..لا اقوم احوسك ..ولا تناظر شجون لا اتوطى ببطنك

شجون : وجع وش ذا الخبل..وراه يناظرني كذا

جبران : اقلك انتا مين ..وش قاعد تسوي هنا

المفقوش : ياخي ياشين الدلوخه....قاعد اسوي خبز..وش شايفني اسوي بعد انت

شجون :مفقوشي عمري..انقز بنا لسيارة عبودي خل نهج

ويشيل المفقوش ..شجون ( ولو انها اطول منه ) ويركض بها بين السيارات ..وشجون ..تغمرها اسعد لحظات عمرها

المفقوش ..والعرق يتصبب من جبينه .. : ودي آخذك لمكان بعيد لحالنا..وبس اناظرك مابي اكثر..حدي نظر مابغيت اكثر..الله امر لعيونك اسهر

شجون : ياليت يابعد كل من لي يا اغلى من الغالين ياروح روحي

( اقول ملاحظين مدى تأثر المخرج انا بأغاني خالد عبدالرحمن )

وصلوا لسيارة..عبودي...حيث كان عبودي..قاعد يناظر النخله..ويقول باستغراب..وراهم مالقحوها

عبودي : هاه المفقوش..وش القصه

المفقوش : عبودي طلبتك ..مابيهم يمسكونا

عبودي : افا عليك بس..اوريك بجبران ذا

وينطلق بهم عبودي.. ………وطردي...بالشوارع..يمين يسار يمين يسار..وتخييط بالعالم..

شجون : مفقوش روحوا لطريق خريص ترى الزحمة زينه

عبودي : قلها تنثبر لا احوسك انت وياها

المفقوش : شجون حبيبتي..خل نلعب اونو بس خلي عنك السيارات

شجون : تيب ياعمري انته ( لا حظوا شجون مسويه فيها رقيقه ...ايه افلقني )

وهم بالطريق..عبودي شاف ددوريات من بعيد..وبدا يخترش..ويسوي نفسه انواع ابراءة..واستخدم اسلوب المفقوش المشهور..وهو الذكاء الأستدلاخي ..آنف الذكر في موضوع سابق.. وهم طايرين..فجأة..وقف طريق خريص.من الزحمه.يالهي..وهم يمشون بسرعه 160 عبودي والمفقوش وشجون ..لاحظوا انه فيه جمس موديل واحد على ما اظن واقف قدامهم على مسافه قريبه جدا وحسوا انه سوف يحدث عناق اخوي بين اللكزص والجمس....؟ بدأ يقترب الجمس..الأحمراني..شيئا فشيئا…ويكبر ..ويقتر..ويكبر…. ولكن..ماذا..المفقوش..بكل مايحمله..من براءة الأختراع..بحركة الغزاله اللي بالسيكل..قام وسحب الجلنط.. هو سحب الجلنط...وبدت اللكزص..وتسوي خمسميات..وصارت السيارة..تقل الصحن الدوار..االي التذكرة حقته بعشرة.. وبعد...عدة دورات....وبينما..كان راس شجون..رايح جاي مابين الدريشتين الي ورا.. حدث العناق الحار بين اللكزص..والجمس ..طبعا..عبودي..مزبن عمره..حيث طلع له من السواقيه ( الدركسون ) مجموعة من النفيخات ( بالونات - اير باقات )

اما المفقوش..فبكل مايحمله في طيات خشته من لعانه..قام وفتح دريشة السيارة..ونقز..وهو متعنقط ( متعلق ) بقنصوع شجون..

ويخمون الأرض....وبينما كانوا خامين الأرض..حدث مالم يكن بالحسبان..!! سيارة..تمشي 2 ميل ....منهو ؟؟ انه ابو المفقوش شخصيا ابو المفقوش( وهو مطلع رقبته مع الفتحه اللي بالسقف ) : وجع وش ذا العالم المتسدحه بالأرض..

المفقوش ..يهمس بأذن شجون : اص..سوي نفسك كرتون بطاطس

شجون : اقول انثبر وش بطاطسه انت وخشتك..قل كرتون ثلاجه ..ويالله يالله

المفقوش : شجون..جبتي المقوصر حقي الكاروهات ( مقوصر = شورت )

شجون : مهوب وقته ..بس تراي بقولك اني ماخذه مقوصر ابوي ..

المفقوش : ترى بجلدك ..ومن قالك اننا رايحين نكشت وناقصنا خيمه ( مهوب سهل المفقوش يعرف يذب على مقوصر ابو شجون )

شجون : اهجد بس ..من زين ابوك عاد ..اللي لاشفته من بعيد..تحسبه زمزمية

..واستمر هذا الحديث العاطفي..مدة دقائق..معدودة..لأنه ابو المفقوش..قز عبودي يتعارك مع الأير باق وهب ابو المفقوش لنجدة عبودي..حيث..صفقه بالزبيريه قائلا : لا تخرب نفيختنا

عبودي وبينما هو غايص بالنفيخه : ياشين ذا الشيبان لا سوو لي فيها معصبين واثناء ذلك..كان المفقوش و شجون يركضون ..

ويلتفت المفقوش لشجون ..ويقولها وهو متحمس..: انسدحي قدام ذا الددسن اللي جاي

شجون : كل تبن والله مانسدح..والا عشان سيقاني تقل مطب

المفقوش : انسدحي بس عشان نلعب عليه وناخذ الددسن

وصدقت شجون ..بحكم ماتحمله من عشق لمفقوش...وتزلق على راعي الددسن بكل حماس ولكن هنا المفاجأه....راعي الددسن كان المنحوس ..توه جايب اخته الشغب زهور ..( والملقبه بزهور ) من المدرسه ويجدر بالذكر..ان بين المفقوش و المنحوس كره..منذو الطفوله..حيث كانوا يتنافسون على شجون.. وكان يستعرضون قدام مدرسة شجون..حيث كان المنحوس بحكم ان ابوه يعتبر من اعضاء شرف نادي الكيرم الوطني فقد كان يستورد شورتات وبعدة الوان ..ونذكر منها الشورت الفوشي المقلم بالأخضر والأحمر ( تحسون صار ستارة زيود ) اما المفقوش ..فلم يستعرض الا بشورته الكاروهات وكان هدية من شغالتهم

المفقوش : وجع ..انكبنا يا شجون..طحنا بذا الكمخه

شجون : ماعليك الحين العب على اخته ..( يجدر ان شجون مسلفة زهور لفافات الشعر..واربع بوكلات )

زهور : هاي شجون ازيك عامله ايه ( ولو صارت حسنيه مهيب زهور )

شجون : ياعمري انتي يابعد سروال السنه حق ابوي

زهور : وش عندك بذا..اكيد عندكم عمل فني بمادة الوطنيه ( زهور متعدية لوحه دلخه بتسع وثمانين ميل )

شجون : ايه بالحيل..بس وخري بنركب انا و المفقوش

المنحوس : شجون ..احبك ..يابعد برطمي..( المنحوس يتمتع ببراطم تقدر تقول رصيف بشارع )

المفقوش ..وهو يهم بأن يجلد المنحوس : حبك سوداني حول عنده اختبار فيزيا ومذاكر توحيد ..ياملا الوجع ياجعل يطيح عليك جدار مكتوب عليه ذكريات سليمان ابو جلمبو

ويتلاقطون ..وتعصب شجون..وتمسكهم وتركبهم صندوق الددسن..وبكل جراءة..تسوق الددسن ( ارجو انكم ماتفهمون غلط وتحسبون ذا الحركه اني ودي البنات يسوقن ..وانا ارفض ذا الكلام بتاتا وقاطعا ....ولكن حنا توهقنا..ولازم نسوي كذا )

وجت شجون تبي تسوق..والتفتت على زهور ..وقالت : الله يازين رقم جوال اخوك المنحوس ..( شجون تناظر عداد الكيلوات ..تحسون ان الددسن طاق المليون )وتشغل السيارة..ولكن..هل تبي تمشي..؟ شغلت شجون..السيارة...وعشقت القير بالثاني..بحكم انه تموت على القناة الثانيه.. ودعست كل البنزين..مما ادى الى انلزاق خشة زهور بالقزازة..وايضا ادى الى انحلال المضاربه القائمة بالصندوق..فنعتبر حركة شجون ..على ماقال المفقوش يوماها..رمية بغير رامي..وايضا طيحت قوطيين حمضيات بزبيرية واحده

شجون : زهور..طلعي خشتك مع الدريشه ..واذا نغزتك مع بطنك اصرخي..بما ان ذا الددسن مافيه بوري

زهور : طيب..اوريك البواري شلون

وتناظر شجون بالمرايه..لتطمئن على خشة حبيبها المفقوش..وتتفاجأ..بأن خشته لازقه بالقزازه ..حيث ان المنحوس ماقصر..

ومسوي له حركة متعلمها من يوم هو صغير.. وفي نفس تلك اللحظه...كان عبودي..قد تخلص بكل حرفنه وبطرنه..من الشرطه..وجاء مسرعا لأنقاذ صديقه المفقوش ولكن ..تلك كانت حزة طلعت مدارس....وعبودي فتى الحارة..المملوح..والذي حصل على جائزة ملك جمال الحارة لسبع سنوات متتاليه

ويحجر لعبودي باص فتيات..مما ادى الى انه باشر عليهن بكرتون سنكرس ليتخلص من هذه المشكله واسمحوا لي اقف احتراما لهذه الحركه الذكيه من عبودي وصل عبودي الى الددسن..وبكل حرفنه..حط زبيرته على البنزين..عشان يثبت السرعه....وذلك بعد ان غطس الزبيريه بطاسة مويه ( هنا يتبين لنا قمة الذكاء لدى عبودي..لأنه استخدم نظرية ..العربجي الشهير طاحوس والتي تقول .. ان الزبيريه يزداد وزنها بالماء وتصبح خفيفه كالريشه بالشمس ) وبعد ان ثبت الدركسون برجله..طلع من الدريشه..مع ملاحظة انه تعلق بصندوق الددسن بيديه ( اخس ياعبودي غطى على فان دام ) وبكل مايحمله من تهور في كيانه..قفز قفزة لولبيه..تذكرني بنقزة كابتن ماجد يوم هو كتفه يوجعه بالمباراة النهائيه وفعلا تمكن من الوصول للدسن..ولكن ..بعد ماذا بعد ماتصفق المفقوش شر تصفيق..ووجد المنحوس..طاق ابتسامته المعهوده..واللي كنها واجهية هايلكس ويمسك المنحوس عبودي..ويمردغه .ويصفقه تصفيقا..نتج عنه..ان انشق برطم عبودي وتساقط شعيرات قذلته بمعدل اربع شعرات بالثانيه.. ولكن ..هنا تقع المفاجأه...انه ابو المفقوش مجددا ويتهور ويسحب جلنط على شجون..مما ادى الى انهم صدموا عمود اللمبه..( يجدر بالذكر انه كان جنب العمود ثلاث لحجيات يبيعن تيم وسفن اب

وقالن اللحجيات لأبو المفقوش : كنقر صثبيمسثتش تنلمكؤءطؤء ءخؤءد طكرلانسزؤء

( قالنها بصوت واحد ..والله مالقينا لحجي يترجم لنا ..ولكن اعتقد انها مديح لأبو المفقوش )

التفت ابو المفقوش لهن قائلا : الشرهه مهيب عليكن ..الشرهه على السفن اب اللي قاعد معكن

وراح طب على صندوق الددسن..ومسك المفقوش..مع عصاقيله..واخذه اللى البيت

شجون : المفقوش لالالالالالالالالالالالالالالالالالالالا مش آدرة مش آدرة

المفقوش ..وهو يسحب على الأرض..وطالع سرواله السنه ..وشكله ينرحم صاير كنه دفتر املاء مشقوق : شجون ..ترى الحب يحيا بالجوع ويموت بالغذاء .. صراحه ..ماندري وش قصة ذا الجمله ولكنها تحمل في طياتها معانن جمة

عادت شجون الى البيت..واستلمتها امها تسطيرا وتصفيقا وتكفيخا ..مما نتج عنه صعرور في الجبهه ..بزاوية 22 درجة شرقا عن الخشم انسدحت شجون..وهي تفكر..وتهوجس....واذا بها تجيها حطبه طائرة من فوق الجدار..ومكتوب عليها ..الى شج .. الوعد 9 ليلا تحت نخلة السكري ..التوقيع عبودي .وبعد ان عدة شتائم من شجون لعبودي حيث ان الحطبه جت بنفس مكان الصعرور..عم بخشتها ابتسامة الفرح ..لماذا ياترى..؟ وفي الصباح الباكر..كان ابو المفقوش..من زود الفضاوة قاعد يلعب اكس اوو مع الهندي اللي يغسل السيارات وتطن براسه..يروح يستهبل على ولده المفقوش ..على اعتبار ان ابو المفقوش مسوي فيها عادل امام

دخل ابو المفقوش غرفة المفقوش : مفقوش وينك جايب لك هديه ..

ويدور بالغرفه ..ومالقى المفقوش....وانتبه ان سروال السنه ابو كرسي المفضل لدى المفقوش ليس موجودا ..؟

وهذا يدل على ان المفقوش هاجر ؟؟ ويصرخ ابو المفقوش بأعلى صوته : وجع وين ذلف ذا الدلخ.. وينقز مع الدريشة ( وين صار سوبرمان ) ممتطيا الددسن في هذه الأثناء..كانت شجون ..توها قايمه وخشتها صايره تقل صطل بوية ..يوم فتحت نور الغرفه ...تفاجأت بوجود شخص ...؟؟؟؟؟

قالت شجون..وبكل دهشه : هاااااو ؟ المفقوش ؟؟؟؟؟؟ مفقوشي عمري وجع وش مدخلك غرفتي

المفقوش ..وهو يناظر من الدريشه : انثبري شوي ..تراي متنكر على شكل شماعة ثياب ..اص

شجون : مفقوشي ..قلي مكان نتلاقى فيه ..وخلاص..

المفقوش : انا بس جيت ابشوفك وابمشي..القاك بنفس المكان اللي حدده عبودي..تحت نخلة السكري

ونقز المفقوش ..من الدريشه..وتزحلق من الماصورة..ويطيح بشغالتهم قاعده تلعب كيرم..جا المفقوش بكل نجاسه نثر الحبوب..وقال ..ياشين السرج على البقر.. كان عبودي ..الصديق الصدوق ..والفتى المخلص لالمفقوش ينتظره باللكزس..عند برادات المسجد

المفقوش : عبودي.. ابشرك ماشافني ابو شجون..

عبودي ..وهو يناظر البراده مستغربا : ياخي ذا العربجي ابو جلمبو ماخلى مكان الا كاتب فيه ذكرياته..

المفقوش : عبودي وراه ماتعقل لا اجي انتف ذا الشعره اللي بقرعتك

( يجدر ان عبودي عقب ما انجلد من المنحوس طاح شعره وصرفها وحلق صفر ..على باله ظلال رونالدو )

عبودي : اركب بس ..انت ووجهك اللي كنه برشامة املاء باختبار تعبير

وصلوا لنفس الموعد للنخله...ولاحظا وجود غزال الصحراء..انها من انها شجون ..ومعها صديقتها زهور

المفقوش وهو يركض وفاق كشرته ..ويصرخ : شجووووون ....وشجون تركض لمه وتصرخ : اصبر اصبر لا تجي الله ياخذك مالبست الكعب زين ..

عبودي كان يناظر زهور بكل استغراب ..ويقول بنفسه : وش ذا الطخمه الله ياهي حلوه ..شكلي ابستعرض مهااراتي

زهور وهي تناظر عبودي وتقول بنفسها..ياربييييه وش ذا الملاك ..ولو انه قرعه.

المفقوش ..بعد ان خطف شجون خلف الشجره..وقال..شجون..شلونك عمري..مهما فرقونا العواذل..مهما صفقني المنحوس ..لن اتركك ....وقالها اغنية ..وين مايروح الأخضر انا وياه ( على اعتبار انا شجون لابسه تنورة اخضرانيه مقلمه بالبرتقاليي..ولو تحسون انها علم بنجلاديش )

شجون : عيوني مفقوشي..ابي اهاجر معك لأي مكان ..

المفقوش : خلاص انا مجهز كل شي..نبي نمشي للشرقيه هالحين..

وفعلا كان المفقوش ..مستاجر ددسن....وانطلقوا به متجهين لطريق الشرقيه..

وكانت زهور لحالها..وقالت لعبودي : افا وش ذا لجحده

عبودي : هااه ايه وش ذا صح...وشرايك اوصلك ؟

زهور : مش آدرة ...مش آدرة ...مش عارفه ليه ..

عبودي : اقول اص بس يا ظلال اصاله ....ويسحبها مع شوشتها بكل حنان الى اللكزص

بينما كان المفقوش طاق سواليف مع شجون ..نقتطف منها هالسولافه : تصدقين يا شجون يوم انا صغير تضاربت مع اربعه كبارين وصفقتهم كلهم

شجون : ايييه على مين ماكني شايفتك يوم يتوطى ببطنك المنحوس. ……اهم شي وصلوا تفتيش الرياض الأول..

الشرطي عقاب جزاء وقفهم وقال : اربط الحزام

المفقوش..على باله يستعرض عند شجون : لا مالي خلق

عقاب : اجل مالك خلق..طيب انزل ويصفطون على جنب..وبعد قليل من الهوشات ..مشوا المفقوش..بعد ان توسطت له شجون

وصلوا شاطي نصف القمر...طبعا المفقوش طب يركض مشفوح اول مره يشوف بحر..اما شجون ..كانت تغير الأستبنه بحكم انه فيه كفر منسم شوي وبينما كانت تغير الكفر..جا ظلال واحد جنبها والتفت ..وتفاجئت ...انه المنحوس؟

ويخطف شجون ويركبها بالغصب..وتصارخ وتصارخ..

ويجي المفقوش يركض وهو يتقاطر ماء...ويصرخ نجوى ..اوه قصدي شجون ..شجووووون..وجت موسيقى حزينه

وهو يركض والسيارة تبعد..وشجون تناظره بالقزاز وتصيح.....طاح المفقوش من التعب ..وقعد يقول

اقفت مراكبهم الا يالله الخيره ....عيني تفيض الدمع بفراق خلاني

وحس المفقوش بفقدان الأمل..ولكن ..كالعاده..المنقذ يأتي في وقته انه عبووودي

عبودي : المفقوش ياخي ضاقت الأماكن الا تنسدح فيذا ( عبودي مسوي فيها من اهل الرياض )

المفقوش : عبودي تدري اني احبك اكثر من ميرندا الفراوله..

عبودي : اهم شي اركب بس ..ويا انا يا المنحوس ذا ..وهذا شنبي احلقه اذا ملقيته لك..

المفقوش: تشلم تشلم .... بس وراك جايبن معك نوال الزغبي ( زهور قاعده تغني على دلعونا على دلعونا )

بعد ان خلصت زهور من اغنية على دلعونا..وجت تبي تغني اغنية ام كلثوم اقبل الليل..

واذا بالمفقوش..يركض الى شنطة اللكزص..ويجيب حطبه ويصفق بها زهور....ويبدو ان المفقوش ..قد ضاق ذرعا بزهور

وقال له عبودي : ياخي وراك عليها..صوتها ازين من صوت كنداسة مازدا مشقوقه ..بس ولو حلو

زهور ..وهي تمسح خشتها : عبوووو..ايش بوه هادا ..على باله معصب ( عبو على بالها دلع )

المفقوش: اجل عبووو..اقول اهجدي بس لا اقوم امحطك بالعقال

عبودي : المفقوش تراك زودتها...من زين شجون ذي وخشتها اللي كنه جدول ضرب خمسه ....ولننتقل الى شجون..حيث بعد ماخطفها المنحوس..كان رابطها بالمرتبه الي ورا..وقايلها..شجون..يابعد ركبتي..لا تتحركين لمين اجي

ونزل للبقاله يبي يشري عسكريم ( هذا كبرك يا المنحوس وتاكل عسكريم = آيس كريم ) وبينما كانت شجون تهوجس..دق جوال المنحوس..نقزت تبي تشوف الرقم يالهي ...انه رقم سعيدان اخوها ،،،،،،،،،،،،،،،،وتضغط على يس بخشمها وترد

سعيدان : الوه..المنحوس صديقي فينك بوه

شجون : سعيدان اخوي ياحبي لك هيلب مي تكفى

سعيدان : وش ذا شكلي غلطت ودقيت على جوال شغاله

شجون : سعيدان يالدلخ انا اختك شجون لا تقهرني.

سعيدان : هاه..يا ذا البنات ابلشوني..لا رحت اشري خبز ..اللحجيات ينشبن بحلقي حتى هنا بعد

شجون : سعيدااااااان ..وجع ( وتبادر الى ذهن شجون معيارة سعيدان الشهيرة ) >> ياسعيدان ..يابو فنيخه

سعيدان .سمع ابو فنيخه من هنا..ومير يصاب بالذهول..وقال : شجون وجع وش جابك لجوال المنحوس..ليش تسرقين جوال صديقي

شجون : يالدلخ المنحوس ذا الحمار خطفني..يالله رح ازهم على المفقوش وقله اننا واقفين عند بقاله اسمها الورود

سعيدان : هاه ايه طيب مع السلامه

ويدق بيجر المفقوش..وينقز يروح يدق على سعيدان..المفقوش : هلا سعيدان وش تبي منيب لاعب ياخي لا عمرك تدق علي

سعيدان : ياخي ابيك تجيب اختي من المدرسه..قصدي تقولك اختي انها هي والمنحوس عند بقاله ..اسمها وشو ياربي نسيت

المفقوش : وشو ..شجون وينها سعيدان ياتبن تكلم تذكر يالله بسرعه

سعيدان : ياخي..اصبر بشرب سفن اب...ايه تذكرت بقاله اسمها الشجر مدري الزهور مدري ورود

المفقوش: ياشين الدلوخه ياناس..ودي اجي واجلدك لين تعض الأرض

سكر الخط..التفت المفقوش على عبودي..حيث كان عبودي ..يناظر جبهة زهور مستغربا ويقول بنفسه : الحين ليش جبهتها تقل مربوعه

المفقوش : عبودي..تعرف بقاله اسمها الورود....؟

عبودي : ايه افا عليك..بس ياخي ليش زهور تشبه صدام االددسن..بس ولو حلوه

ويبتسم المفقوش..وتبان الدرايش اللي باثمه..وهي من اسباب الركبه اللي جته من المنحوس.. وينطلقون الى البقاله المذكورة...وصلوا ..ولا لقوا احد..بس لقوا..ورقة مكتوب بها ..من شج الا مفق..سمعت المنحوس مواعد صديقه على كورنيش الخبر

ويروحون لكورنيش الخبر..وينزلون يمشون ..وعبودي ..يمشي ..ويقول مستغربا..وش فيه ذا البنات ماعمرهم شافوا واحد مملوح ويدهر عبودي..يباشر على البنات...ويطق معهن سواليف..وزهور ودها تجلده والمفقوش كان يمشي ويدور..وفجأه لفت نظرة قرطاسة علك ابو طبعه اللي تاكله شجون.. ويركض..وفعلا يجد المنحوس..منسدحا..وشجون ..قاعده تناظر البحر ..ويتغبى المفقوش ورا الجدار..وينادي عبودي ..ويرد عبودي : هاه ياخي ترى المنحوس صفقني لين قلت بس

المفقوش : ماعليك ابهجم عليه بقارورة..وانت بالحطبه

وهم يمشون شوي شوي..شافت زهور شجون ..وقامت تصارخ...هع هع شجون تعالي نلعب

ويلفت عبودي على زهور ..ويصكها بالحطبه..قائلا : الشرهه مهيب عليك الشرهه على اللي جايبك

وانتبه المنحوس وقام عليهم,...ويهج المفقوش ويلحقه عبودي..ويراكضون..ولكن عبودي بكل ذكاء..وبحكم معرفة بنقطة ضعف المنحوس..صرخ وقال..المنحوس ..( حيث عبودي كان ماسك الجوال ويبي يحذفه ( يرميه ) بالبحر ) ويصرخ المنحوس..الزبده..ركض المفقوش لشجون..واخذها ..وجاهم عبودي يركض..ويهجون..ويلحقهم المنحوس وقرووا يرجعون للرياض....وهم في طريق العودة..مسكتهم الدوريات..بقيادة جبران خليل جبران قرر المفقوس..قرار..خطير بعد وصولهم للرياض..و..اتجه الى بيت ابو شجون.. نزل شجون..وطق الباب..فتح ابو شجون..وقاله : ابو شجون..ابقولك سر خطير

ابو شجون وهو يناظرة بنظرة اشمئزاز مع قليل من الأستغراب : خير وش عندك

المفقوش : انا طالب يد بنتك شجون..ابي اتزوجها..

ابو شجون : ابد اذا نجحت هالسنه ..انت وياها افكر انشاء الله

نقز..المفقوش..لعبودي..وقاله..واللي يرحم والديك وين وصلنا بالجغرافيا ( المفقوش بثالث ثانوي ادبي )

عبودي : ياخي وش دراني ..آخر مره حضرت يوم يعطونا الكتب

المفقوش : ياخي لازم نجتهد يالله امش نروح لهاني يدرسنا ( يعتبر هاني..من دوافير المدرسه ..ماخذ بالجغرافيا 17 من 15 ..لأنه حل اسئله زود ) لقوا هاني..ببيتهم كالعاده..فتح هاني الباب : اهلين المفقوش وايضا عبودي..اكيد جايين تبون..واجب الجغرافيا..بس منيب مديكم هوا..

عبودي وبكل رقه : ورا ماتعقل انت لا اجي اوقع على جبهتك..

هاني : اوكي تيب تيب ادخلوا......وقعدوا يذاكرون..والمفقوش بدت تظهر عليه اشباه مدحت من كثر المذاكره.. وبعد ..اوقات عصيبه..مع هاني..وتفحيط على دفتر التاريخ..وطقاق مابين المفقوش وعبودي على برشامه الفقه..مع انه كان اختبار حديث.. واقتربت الأختبارات..واليوم الأربعاء..والسبت اختبار علم اجتماع وحديث..كان المفقوش و عبودي متسدحين بالملحق..قام المفقوش فجأه

ناظر عبودي..وفهمه عبودي ..كالعاده..وقال المفقوش...: احبها يا عبودي ..آه يا شجون....ويمسك الكتاب..ويغطي وجهه فيه..

ويجيه عبودي ويحضنه ويبكي المفقوش على صدر عبودي..وكان عبودي يناظر رقم الفنيله حقت المفقوش..ويقول مستغرب ..ياحبي لك مفقوش من عرفتك وانت حدك فنيله علاقيه مشخله بعد..

طب علييهم ابو المفقوش..يوم شافهم..قال : لا ياشيخ انت وياه يا جايبين هدف التعادل الحين ..قم لا الحين امحطكم بسعفة النخله

وهم يذاكرون..والشواهي تدهر عليهم من هيله ..اخت المفقوش ..ولاتهون فطاير الجبن اللي ترسلهم شجون..واللي ماياكلهن احد لأن المفقوش مخليهن معه ذكريات.. جا صبح الخميس..وكان عبودي..توه يقوم وخشته صايره كنه طرمبة حقت الهوا ( طرمبه = اداة تستخدم لنفخ الكورة بالهواء ..واسألوا راعين لعب الكورة بالشارع ) وتفاجأ ان المفقوش الى هالحين يذاكر...وشاف نص دفتر المفقوش ..يكتب فيه شج ..ولا تهون القلوب..وكان عبودي يناظر مستغرب يقول وش ذا التفاحه المعوقه يا المفقوش..

جا يوم الأختبار..كانوا رايحين مبكرين..والمفقوش مشغل اغنية..متى اشوفك ..متى القاك متى قلبي يحس انه..لقى نفسه ..لقى عمره..ونبضه يكتب احساسه.. وعبودي..وهو يسوق ماسك الكتاب..ويفتح الصفحات بسرعه..يقالك اني اذاكر....والمفقوش..فاتح الدريشة ومطلع يده..وخذ يا هواجيس ( ذابحه الحب )

ويقول بنفسه..شجون ..الحين تتنفس نفس الهوا اللي اتنفس..وتشوف هذي السماء..ونفس الطريق هذا هي شافته ..آه ياقلبي..والتفت للمرتبه اللي ورا..وقال وكانت قاعده هنا..احبها ياناس..اييه يا الدنيا...وقعد يتذكر لحظات طفولته مع شجون ..

ويتذكر يوم كان يعلمها تلعب مصاقيل..وكانت تناديه اذا ضربها المنحوس..ويجي المفقوش يركض..وينقز على المنحوس اهم شي عنده يدافع عن شجون.. ويتذكر..يوم كانوا يلعبون كورة بحوشهم..والبنات يطلطلون ( يويقون ) عليهم..وايام ماكان يستعرض قدامها بسيكله..وعلى باله يبي يسوي غزاله..ويصلفط على ظهره.. ونزلت من المفقوش دمعه..تذكر..يوم يلاقيها صدفه عند باب بيتهم..بعد ماطاحت شنطتها وتنثرت الكتب بالأرض..وجا المفقوش وشال الكتب ..وشجون تناظره بحياء.. ويقطع حبل ذكريات المفقوش..عبودي وهو قاعد يسمع تعريف علم الأجتماع..ومير يتفلت عليه المفقوش ويقول : منتب سهل يا هاني ..وراه ماتركد لا اصفقك وكل هالهواجيس..بطريق المدرسه..مع انها جنب بيتهم بس طول الوقت واقفين اثر عبودي ناسي يفك الجلنط..( لأول مرة تعتري عبودي حالة دلاخه ) مشوا للمدرسه..كانوا متأخرين..وهم بالفصل..المفقوش مدهر يحل..وينغزه عبودي ..مفقوش سؤال جيم ياخي ويسوي المفقوش حركته الشهيره اللي على باله مزكم ..ويحكي شوي ..لعبودي....وبعد ماخلصوا اختبارات .. جت توزيع الشهادات..والمفقوش..متشقق من الوناسه..ويقول لعبودي..خلاص مابقى الا شوي واتزوج شجون....اخذوا الشهادات..المفقوش ..نجح نسبته 93 % وعبودي نسبته
87 % ..ويرجعون للبيت مستانسين..والمفقوش..خشته صايره تقل وسبر محطوط عليه ايقنور

( هذه الفاظ مستقاه من الشات )

ومن صباح بكرا نقز المفقوش..لأبوه ..يقول مشينا يالله لشجون....وبعد هوشات مشوا العصر..لبيت شجون

فتح لهم ابو شجون..ودخلوا..وبعد عدة فنيجيلات قهوة..قال ابو المفقوش..حنا جايين نبي بنتك شجون لولدي المفقوش..ابشرك نجح واشتغل بمستشفى التخصصي .. **********رد ابو شجون..وقال مبرووك...بس

المفقوش : بس ؟؟؟؟؟

ابو شجون : والله مدري وش اقولكم بس شجون مخطوبة ..!!!

المفقوش : %&*#$ٌلألأٌ^&%#@ = سبات متلاحقه قطعناها

ويبكي المفقوش ويذرف الدموع ..ويطلع يركض من الحوش..ويلتفت يلقى شجون تطل من الدريشه..ويناظرها وهي تبكي وتبكي ..وهو صد عنها وقال : تركتني يا غدار بليا عذر ....وهذا الجرح بصدري قهر

وطلع من البيت..وركب السيارة...ومشى بكل تهور ......!! بعد ان طلع المفقوش..مشى بالشوارع..مايدري وين يروح..حس انه كره هذي الدنيا كلها ومافيها.. خلاص..بدا يحس احساس اخذ كرت احمر بمباراة نهائيه..واول ماتبادر الى ذهنه صديقه عبودي..

لقى عبودي...واخذه عبودي..وراحوا للبر..وقعدوا يفكرون..قال عبودي لالمفقوش : شرايك نسافر ندرس برا ؟

المفقوش: اللي تبي ياعبودي بس فكني من هاللي انا فيه..

عبودي..خلاص من جد نبيع سيارتي(اللكزص) وانت بع موترك..ونسافر للوس انجلوس..خابر لي واحد اعرفه هناك

المفقوش : خلاص يالله خل نتجهز..

وزبط عبودي كل الشغلاات وباع السيارتين..وراحوا يتقضون ..وكل منهما طق له شورت فوشي ماندري ليشوقالواللأهلهم..والعالم تصيح وراه تسافرون ومدري وشو والمفقوش..جايه تبلد احساس..من كل شي...بعكس عبودي اللي كانت الدنيا مش سايعاه

قبل يوم من السفر..المفقوش كان يفكر..وش يبي يسوي..هناك..كل تفكيره شلون يضيع فلوسه ابشري موستنج..وابضف من هالشقر اتمشى بهن..انا وعبودي ..بلا هالخربطه اللي هنا ..مطاريس شجون والمنحوس جا موعد السفر..مر المفقوش على عبودي..وكان ابو المفقوش هو اللي يبي يوديهم... وصلوا المطار..واذا بالعالم كلهم يودعونهم كل بزارين الحارة ..ولا يهون المنحوس اييضا وزهور متوزية ورا العمود على باله مستحيه من عبودي. وعبودي ماجاب خبر..قاعد يناظر ارقام الرحلات مستغرب..يقول ياذا ابو جلمبو حتى هنا حاطين اسمه والمفقوش جالس..على الكرسي ينتظر عبودي يخلص من التجهيزات حس المفقوش ..بشي في قلبه..بدا يتحرك شي بمشاعره..وصار يتلفت ويدور وبين جموع هالبنات المحتشدات لوداع عبودي وهو يدور مابين العيون والوجيه وحس انه وده يبكي ...حس ان الأمل بعودة شجون ..موجود ....وفقد الأمل بعد ماشاف خشة المنحوس وهو مبستم.. اخذوا الشناط..وهم يمشون..ويلتفت بكل حزن يودع اهله..وهو يحس انه الوداع الأخير ويقول بنفسه..شجون..هذا آخر شي بيننا..خلاص منيب شايفك طول عمري.. ابترك كل هالديرة اللي فيها ...بترك كل اهلي..خلاص وعبودي كان ..يلوح بيده الكريمة على جموع الفتيات..وهن متسدحات يصارخن من اجل عبودي ولا تهون زهور..اللي ماسكه صورة عبودي وقاعده تشجع ( حشا صارت مباراة الهلال ) وبعد ماجوا يدخلون الطياره..فجأه ..وقف المفقوش ..!! ^^^^^^^^^عبودي : مفقوش وش جاك

ويلتفت المفقوش ورا..وراح يركض ..ويركض..والناس تناظر المفقوش..وابوالمفقوش يصارخ ..مفقوووش وين تبي تروح

وعبودي يلحق المفقوش ....مفقووووووش لا تروح

ومن بين كل هالزحمه...كانت تلك البنت..الفتاة التي احبها المفقوش.. الفتاة التي ذرف المفقوش دموعه لأجلها.. جايه تركض من اول المطار..بعد معاناة مع ابوها..جايه وهي تبكي.. والمفقوش شافها و..راح يركض ويبكي وهي تركض وتبكي.. وحدث اللقاء ....!!

انه المفقوش ..يلتقي بشجون من جديد.. وتغمر شجون دموع من الفرح...وتعجز على الكلام ..والمفقوش ماقال شي الا كلمة احبك ..

وشجون..ترد عليه ..احبــــــــــــــك

والمفقوش..يرد...احبـــــــــــــــــــــــــــــــ ـــــــك

وياخذ يدها..ويحطها بصدره..ويقبلها..بكل ماحمله من رومنسيه في تلك اللحظه..

وزهور..انهارت من هول المشهد..وخمت العمود وقعدت تصيح..

وعبووودي..راح نقز على جموع الفتيات يباشر عليهم بسندويشات فلافل..

والمنحوس...........اختفى

وابو شجون..وابو المفقوش..مو مصدقين

وبذلك...انتهت معاناة العاشقين..

النــــــــــــهايــــــــــــــــــــــــــه

هههههههههههههههههههههههههههههههههههه
:Dا معليييش تقبلوها بروح رياضيه :D


الحين وروني شطارتكم في الردووووود


تحياتي لكم

شااااااااااااااااااااااارب فليت

_________________


شــــكرخــاصلأخيالعزيزمـــــلكالــــفلاش

الله ياطوووووووووووووووووووووووولها

اش الفلم المكسيكي البدوي

مشكووووووور كان نفسي اكتب رد طويل

يعني فلم مكسيكي آخر خخخخخخخخخخ

<<<<نذله

_________________

ارجو عدم رفع المواضيــــع التي تعدت مايزيد

عن ستة اشهر ....ويعطيكم العافيه ياارب ....