سألتة ماذا تذكر من ذالك اليوم
تنهد قليلا ثم قال:
حرب الحريم يا ويح قلبي
ثم استرسل بمقدمة طلالية (((ابوك يا الادب والبلاغة))
واعطني المعلومات التالية

نقلا عن لسانة:
مقدمة:
طول عمري اخاف من البنات... واذا شفت بنت تمشي من طريق امشي من طريق ثاني... ولا اقوى احط عيني بعينها مهوب ذوق واخلاق... الا ذراقة
واذا مشيت بالسوق بس احوق الجدار من كثر ماني لاصق فيه ولا اصدق اخلص غرضي واطلع قبل تجيني جزمة طايرة"وانتم بالكرامة" والا شنطة شاطحة والا ذبة ماني ناقص اسمعها زود وهي: (سعودي مشفوح يبي يرقمني).. رغم اني منيب يمها ومالها سنع.. بس وش نقول.. الزلابة زلابة

حرب البنات :
صحيت هذاك اليوم الصبح والا اشوف ابوي رايح جاي في البيت ويفرك يدينه ويتحسب.. وامي حوله تقول ماصار الا خير يارجال اذكر ربك وان شاء الله شدة وتزول.. وهي بالعتن ضحكة كبر قريح ودها تفقع ضحك بس مايمدي.. واسمع الصراخ والمطامر في غرفة اختي.. واروح لمها والقاها ترقص وتنطنط وهي تقول(وقل جاء الحق وزهق الباطل ان الباطل كان زهوقا).. قلت وش السالفة؟ قالت مادريت وش صار وينك عايش انت؟.. قلت: توني طالع من سراييفو من شوي.. ويني فيه يعني كنت نايم لعنتن تلعن بليس وش صاير؟.. قالت: رح شف التلفزيون انا ما اكلم رجاجيل.. تحمدت ربي عالعقل ورحت اباشوف التلفزيون الا اشوف بشريط الاخبار في الجزيرة مكتوب: (هذا وقد اعلن مراسلنا في الرياض ان جحافل الحريم قد تزايدت على حدود مدينة الرياض......) انا شفت كلمة جحافل الحريم وتسدحت ضحك ههههههههههه أجل جحافل الحريم هاه؟ الله يقطع شيطانكم يالجزيرة ماتخلون عنكم خفة الدم.. اجل هالحريم يبون يحتلون الرياض؟ يلعن ام المسكة هههههههه طيب ورا مايحتلون ماليزيا وربي اصرف.. قسم بالله مب عاقلات امريكا على غفلة

قفلت التلفزيون ورجعت لاختي قلت خل الحق اسطرها كم كف قبل يسيطرون عالوضع.. والقاها عند الشباك تصفق وتضحك بهبال من زود البسط وتنطنط واقول لها: الحين من زود مانتوا باذينا وذابحينا تبون تحتلون الرياض بكبرها وتستلعنون براحتكم؟.. قالت : خل نفتك.. ترا مختنقين.. قلت والله ثم والله انكم مهايطية وماتدرون وين الله حاطكم.. واجي لمها واخنقها إلين تفلت العافية وألف بشماغي على فمها عشان ماتصارخ واطلع من غرفتها وارقى فوق السطح

كلها لحظات الا تسمع صوت الصراخ والزغاريط مالية الرياض.. وشوي وتنقلب الاضاءة وردي على بنفسجي فكل الشوارع.. وترفع الاعلام الوردية حقتهم معلنين سقوط الرياض بيد الجيش الحريمي!.... انا كنت متوزي فوق السطح واناظر للشوراع عن كثب وانا حاط يدي على راسي واقول الله يستر.. وطبعاً كعادة الحريم اذا استولوا على شي او حطوا يدهم على شي.. استبدوا واستلعنوا وسووا اللي ماينتسوّا ... قطعوا كل وسائل الاعلام والاتصال بخارج مدينة الرياض وقفلوا كل المنافذ الخارجة والداخلة للمدينة... استولوا على كل شي بالرياض وغيروا طاقم الادارة الى حريم.. في كل الادارات الحكومية والوزارات والاسواق والمؤسسات والشركات.. المشكلة ما اكتفوا بس انهم يسوقون السيارات ويطلعون لهم بطاقات شخصية بصور متبرجة وتفشل الله لايبلانا.. اخواتنا في الله حظروا على الرجال قيادة السيارة الا بمحرمة وممنوع البطاقة الشخصية الا اذا متلطم وعند الضرورة فقط هههههههههههههههه فاهمين المساواة على كيفهم بنات فاطمة.. والألعن من كذا انهم ألغوا الحجاب بشكل نهائي بحكم ان الرجال زلايب.. او ماراح يفكرون يناظرن.. باختصار صاروا يتعاملون مع كل الرجال السعودين مثل ما كانوا يتعاملون مع الأجانب والسواقين قبل الاحتلال.!!!

وانا في سطحي اناظر استغربت عدم وجود أي مقاومة رجالية.. ههههههههه افاااااا يعني كل هالاشناب طلعوا بلوشي.. رخوم زي حالتي؟ والله مشكلة.. وفجأة لفت انتباهي وانا اناظر تحت بالشارع هالبنات المراهقات بسياراتهم انواع المساقط والتنطيل والاستهبال على الشباب ضعوف الله مساكين.. صح كان فيه جبهات مقاومة هنا وهنا بس مااش ماحولك احد.. الشباب مساكين ناقصين حنان وكلما جا واحد بيستقوي شوي ابتسمت في وجهه البنت والا غمزت له والا ورته ساقها راح اخينا في الله في خبر كيف الحال!!.. المهم خمتني فكرة وقلت خلني باروح اخذ لي فرة بالرياض اشوف الشوارع والناس.. وانا نازل مريت على اختي بغرفتها ولقيتها توها تصحى من غيبوبتها ولا بعد درت بالسالفة.. قمت كفختها بكفين وخنقتها إلين طلعت عيونها ورميتها ومشيت... اخذت السيارة اللي مظللة تكتيم عشان ما اتعرض للأذى وانا امشي بالشارع او شي مثلكم عارفين الوضع مايطمن!

مشيت فهالشوارع وشفت العجب العجاب.. اخواتنا في الله قلبوا الدنيا كلها غرفة نوم! .. هههههههههه أجل بالله فيه احد صاحي يقلب لون الزفلت موف.. والا يلبس الفيصلية فستان عروس؟.. والا يعلق صور بيكهام وجواد العلي في اللوحات الدعائية؟... ههههههههههههههههه لا و مغيرين اللوحات الارشادية.. الزم المسار الايمن حطوها الزمي المسار الايمن جعلي ماعدمتس.. ممنوع الوقوف حطوها لاتوقفين هنا يابعد عمري انتي.. ولوحة ثانية : الشاحنات تلزم المسار الايمن نعنبوا من لامني فيتس يابعد كل من ساق شاحنة انتي!......
محلات الحلاقة قلبوها كوافيرات.. والخياطين مشاغل.. والمطاعم خلوها مطاعم .. وحاطين عند كل اشارة ثلاجة شاهي وثلاجة قهوة وكيس فصفص للي تبي تتكي وتسولف مع خوياتها.. وحاطين كل الاسواق والمجمعات للنساء فقط وفقط وان شفنا رجال نبي نحش رجوله حش!... وقالبين كل ألوان السيارات للاصفر والاحمر والوردي والليلكي والنهاركي وصباح الخيركي... مو بس كذا لاغين كل دعايات اللبن والسيارات واي شي ممكن يستفيدون منه الرجال ومخلين دعايات المكياج والفساتين...

لا واللي يموت ضحك يوم صرت عند الاشارة اللي عند صحارى لقيت حاطين في الشاشة اللي هناك "ما إلك الا هيفا" واخواتنا في الله متبطحات عالشارع يطبقون معها؟.. وانا اناظر فيهم واتفكر وش هالبلوى اللي بلانا ربي فيها..

مادريت الا بسيارة قدامي.. واصدم فيها... يالله لاتغضب علينا يالله... وقفت ونزلت وتجيني راعية السيارة متفلتة.. قالت: وش بك انت وش بك؟؟ ماتشوف انت ماتشوف؟؟ حمار انت حمار؟؟.. قلت : بشويش طيب بشويش .. قالت هذا انتم يالرجاجيل دلوخ ومتخلفين.. قلت.. اقول لايكثر بس ننتظر الدورية الحين تجي.. وتجينا الدورية وتنزل منها العريفة مناحية بنت صيتة(هههههههه حتى في النسب لغوا شي اسمه رجال!).. قالت : ابك وش علامك انت؟.. قلت هي وقفت بنص الشارع.. قامت ناظرت لها وقالت : ابتس علامتس انتي... قامت هذيك تفلتت بالحكي.. اصلاً هذولا الرجاجيل مايعرفون يسوقون متخلفين دخيلين على بلدنا"حشا صرنا افارقة؟" بعدين غمزت لها او مدري وش صار... قامت العريفة ناظرت لي وقالت: ابك الخطا عليك في المية مية.. قلت طيب ممكن اوصل البيت واجي؟ ترا مهوب عشاني اباوصي امي على شي.. قالت: إهيــــب ياوجهه دام انها عشان اميمتك.. طس لابارك الله فيكم من اشناب والحقني في مرور الشمال..انت توحي؟ قلت طيب يصير خير... واروح لم بيتنا واطلع لغرفة اختي والقاها تو مابعد صحت.. قلت خلني اعطيها جرعة تكفيخ تكفيها إلين يمديني ارجع... واصكها بكم بقس على كم كف ثمن عودت لم قسم مرور الشمال..

وألقى ملازمة أولة هناك اسمها نوف بنت العنود.. اخذت ملف الحادث وجلست تحقق معي وكذا.. قالت: وش اسمك؟.. قلت : مشعل محمد .. قالت هههههههه وش اسم الوالدة؟.. قلت : اسمها شريفة.. ليش؟.. قالت : يعني يصير اسمك ياشاطر مشعل بن شريفة.. النظام كذا .. قلت : .... بعدين قالت لي: ورا تصدم بنت الناس كذا؟.. قلت : انا ماصدمتها هي اللي وقفت بنص الشارع وبلا استدلاخ انتي واياها كلنا عارفين انها هي الغلطانة!.. ابتسمت وقالت اخيراً لقيته... قلت منهو؟؟... قالت ههههههههههههه اول مرة اشوف رجال يدافع عن نفسه.. بالعادة الرجال يتنازلون عن حقوقهم قدام الحرمة ويتصرفون بكل رخامة ولازبة مادري ليه؟؟.. واخيرا لقيت واحد حمش وسنع واقدر اعتمد عليه في مشروعي.. قلت: اجل لو شفتيني وانا معصب وش بتقولين .. الا وشو مشروعك؟؟

قالت : تحرير الرياض.. والله منيب راضية عن اللي صار..لا انا ولا اغلب الحريم .. صح انها فلة وبسط ووناسة بس المسؤولية شينة.. قلت والله شكلك طيبة وبنت حمولة.. بس انا وانتي مابيدنا شي.. وش السواة.. قالت لاتخاف فيه حلول واجد.. وبعدين دامني انا وانت سوا أكيد راح نصير قوة ضاربة في مقاومة الاحتلال الحريمي.. ياحمش انتا.. ياقوي... يابعد كل الرجاجيل ... قلت : افااااا كنت داري والله من اول ماتكلمتي.. انتم يالحريم مادري كيف ان كيدهن عظيم صدق!...

قالت.. بلا دلع.. هاه تبي نتعاون تسترجعون الرياض؟ قلت: ايه اكيد .. قالت خل نبدا من الحين. قل لي وش اكثر شي لفت انتباهك بعد احتلال الحريم للرياض؟.. قلت والله التغييرات اللي في الشوارع وقلب كل الاشياء لصالح الحريم خاصة في الدواير الحكومية والتعاملات وكذا.. قالت : طيب وش فهمت من كل هذا.. قلت انهم من جمبها ومايدرون وش يبون بس اشياء ثانوية وظاهرية... قالت: هذا هو.. كلهم نفس الشي.. يبون الاهتمام.. يدورون اللي يهتم فيهم ويشوف طلباتهم السطحية البسيطة ويلبيها.. وهذا هو مفتاحك للانتصار على الحريم.. انك تناقش قلوبهم ومشاعرهم تدخل لهم من هالمدخل.. مو بالقوة!... وانت تقدر تمثل هالدور مع كل وحدة فيهم وتكسبها...قلت طيب انا اغطي مين والا مين.. الحريم واجد... قالت انت علم غيرك.. وكل واحد ومجهوده.. وانتم عاد اساليب ومايحتاج... قلت مشكووورة ألف شكر.. اقسم بالله مادري شلون اشكرك والا كيف ارد جميلك... يالله اباروح ابدا المقاومة..وطلعت من عندها..

بديت مقاومتي في شمال الرياض.. لقيت كم بنت جالسات وقربت لمهن وجلست اصارخ واقول.. اخ من هالرجال مالهم امان.. اقسم بالله مادري شلون اعتذر لعالم الحريم من غدر الرجال ومكرهم وخديعتهم.. آآه بس لو بيدي اقتل كل واحد يغدر بحبيبته او يخونها او يتركها.. آخ بس... وينادوني ويجلسون يشكون لي.. وانا معهم وهاتك ياسب وشتم في هالشباب..

واطلع من عندهم والقى وحدة راكبة بي ام واناظر لها واقول: ليتني من ابناء الاثرياء ياراعية البي ام عشان اتشرف اكون من نفس الطبقة الاستقراطية حقتكم ... انا حسيت انها ضاعت علومها مع الكلمة بس مشيت صراحة ..

وامر من جمب بيت واشوف وحدة في البلكونة طفشانة وحالتها حالة واقعد اغني: على سطح البلكونة.. غزال يمشي على هونه.. سهام الموت بعيونه.. هو الظالم وانا المظلووووم.. وتخق الضعيفة .. واتركها..والقى مجموعة شباب متوزين ورا سيارة مصدومة عشان فيه بنتين مارين مع الشارع يخافون يشوفونهم(ياحياة الشقا).. واجيهم واعلمهم على هالاسلوب.. واعطيهم مقاطع اشعار واغاني واقول.. اذهبوا والنصر حليفنا باذن الله ...

واجي في كوفي شوب كان فيه شلل بنات كثير.. واقعد اسوي نفسي اقرا مقال بصوت عالي : ماذا فيها لو قاد النساء السيارات.. أليس هذا بضروري؟ أليس؟؟.. أليس والا مهوب أليس... بل أليس وستمائة أليس!.. انها ضرورة قصوى ومن اهم متطلبات العصر والمغرب والعشاء والبطاقة الشخصية وحقوق المرأة في كافة مجالات الحياة والجزيرة وعكاظ .. وانني اطالب كوفي عنان وكوفي شوب والهلال وكافة معالم المملكة الأثرية بدعم هذا المشروع العظيم.. والسلام ختام..... صح الكلام مخربط ولا ادري وشو بس يالله مشي حالك.. يقتنعون بسرعة

في كل يوم كانت شهرتي تزيد وشعبيتي في تزايد.. ويلتم حولي الكثير من الرجال في مقاومة الحريم السلمية.. واصبحت رمز للمقاومة ويشار إلى بالابهام .. وبدينا نوزع منشورات للشباب فيها كل اساليب التدليع والغزل والكلام الحلو.. وكافة طرق الاهتمام بالمرأة ومتطلباتها اللي لها داعي واللي مالها سنع.....
وشوي شوي (والا نخليها شيئا فشيئاً؟).. طيب.. وشيئاً فشيئاً بدأت تخف الالوان الفاقعة من شوارع الرياض.. ونال الحريم مطالبهم بالاهتمام الزايد فيهم وفطلباتهم وخرابيطهم اللي ماتخلص واحقيتهم في اشياء كثير مهيب من حقهم.. مقابل انهم يرجعون الى مكانهم.. ويخلون المسؤوليات والمصايب بروس الرجال! .... وبدت تخف وطأة العنف ضد الرجال.. وفي صبيحة ذلك يوم.. اعلن متحدث باسم الاحتلال الحريمي عن انسحاب كامل القوات الى خارج الرياض.. ورحت فتحت قناة الجزيرة لقيت مكتوب في شريط الاخبار(هذا وقد اعلن مصدر مسؤول انسحاب جحافل الحريم الى خارج اسوار مدينة الرياض............) هههههههههههههههههههه للحين مصرين على جحافل ذي؟

وبحمد الله انتهى الغزو الحريمي الغاشم لمدينة الرياض.. ومن عقب هالانتصار العظيم حسيت اني صرت رمز للأمة في المقاومة والقوة.. مدري انا اللي صدقت نفسي والا العالم يريشون بي.. بس للأمانة جلست ادعي للملازمة الاولة واقتنعت بمقولة (وراء كل رجل عظيم امرأة).. ولكن اقتنعت اكثر بمقولتي الشخصية(وراء كل امرأة عظيمة.. زلابة)!

ماعلينا.. هذاك اليوم رجعت للبيت وانا منهك وتعبان عقب الجهد اللي سويته في استرجاع الرياض.. واول مادخلت البيت لقيت اختي توها صاحية من غيبوبتها.. قالت لي .. اصبر بس كم يوم البنات بيحتلن الرياض.. ووقتها اباوريك... قلت في خاطري: والله انتي من البنات اللي انظلموا صدق.. بس مهوب كل من تنظلم تقوم تجيب العيد وتحلل ماحرم ربي!

ها قولوا ايش رأيكم

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه