رؤوس الأقلام :-

1- أبو سعد .... (( رفيق دربي ))

2- الدينّاا ... (( سيارة تشبة الونيت ... أسأل عنها هنود البطحاا ))

3- اللآذقيــة ... (( بر بعد ثادق ... ))

4- الجربوع .. (( فار البرّان ))

5- الحلمـة .. (( رح لأبو سعد ويعلمك وش هي ))

7
7
7
7
7
7
7
7
7

الســــــــــــالفــة :-


هذي سالفة حصلت لي في سنتن من السنين ... كنت أنا وابو سعد جالسين على زلفة دكان ابو مقباس ناكل فشار وموز ... ومنسجمين معها ...وفجأة يمر واحد وخويه معه من قدامنا

ونسمعهم يقولون اللآذقية .. عاد تعرفون أنا وأبو سعد قراوى جلسنا نفكر وش اللآذقية ...قلنا اكيد انها بر ... (( ماقلت لكم قراوى )) المهم قلت انا وش رايك يابوسعد نروح لها .. قال هو

ماشي بس وينها فيه ... انت تعرف مكانها قلت انا لا والله ماادري ..قال طيب والسوات..قلت نسأل ابو مقباس، قال يالله مشينا ..جينا لأبو مقباس وسألناه قال .. ايه اللآذقيه ... ماتعرفونها

هذي تلقونها بر كله نفود .. ورا ثادز(( ثادق )) يعني مسافة 5 أيام بسيارتكم.. قلت انا لبو سعد انا بروح لها بكره تخاوين.. قال اكيد بخاويك ...ويجي باتسر ونزهب أغراضنا ونحطها في

الدينّاا .... ونمشي من الرياض ... ونمسك طريق خريص مستانسين بنروح اللآذقية .. ونوصل لحريملاء ... ونوقف عندها نتغدى ..(( مرقوق وخبز )) يمديكم على ذا الأكله ... ونتبطح

((نقيَل)).. ولاقمنا الا الساعه 5 العصر وحنا متغدين الساعة 1 ظهراَ (( يمديكم على اللغة )) وبعد ماقمنا.. ركبنا الدينّا وجيناك طايرين الين وصلنا ثادق.. يوم وصلناها هدينا السرعه ...

(( ندوراللآذقية )) الين لقيناها ... حتى مكتوب عليها لوحة اسمها (( shagra )) هي والا لأ .. أكيد هي .. الزبده اننا طبينا فيها ودلينا ندور وندوج فيها نغازل شجر الله ... ورماله

البنفسجية .... وضبانها الكحلي ... وحنا جالسن ندور .. شبت مع ابوسعد وقال رح نطعس ... ياولد ذي دينّا قال ابد رح طعس .. قلت على كفالتك قال على كفالتي مع مرتبة سوّاق ...

قلت يالله .... ونجيك مديورين الين وصلنا للزفلت ... يوم وصلناه ونجيك مدحدرين مره ثانية ... (( نآخذ عزم )) يوم وصلنا للطعوس القى جربوع ... (( أنا عاد اموت في الجرابيع ))

وابدا اطارد ورا ذا الجربوع كأني توم وهو جيري .. وابو سعد يقول ايه صده .. يمين يمين .. لالا يسار .. هاه اسقط عليه .. أفااااا دخل جحره.. قلت انا لأبو سعد ماعليك..حنا متعشين

عليه متعشين قال وش لون قلت شف..(( اكيد تعرفون بيت الجربوع له فتحتين فتحه واضحة يدخل معها...وفتحة ماتشوفها (( والله مدري وش يسمونها))..)) المهم قلت انا لأبو سعد اسمع

دور الفتحة الثانية ذي واذا لقيتها اقلس عليها قال اوكي>>> وخر عنه يعرف اوكي...وأنا بصب مويه في جحره واكيد انه بيطلع من عندك قال ماشي صار...ويجلس ابو سعد 3 ساعات

الين لقى ذا الفتحة ... (( أوة أنا وين شطحت عن الموضوع .. )) (( مساكين منسجمين في الموضوع وانا خربته )) <<<<< أها بس انقلع وكمل السالفه لألومدك ... وين وقفنا .. ايه

ويجلس ابو سعد 3 ساعات الين لقى الفتحة يوم لقاها .. صبيت أنا الموية في الجحر .. وشوي ... وينقز الجربوع من الفتحة الي عند ابو سعد ويدخل تحت ثوبة .. الين وصل لديوده

ويجيك ابو سعد ويقمط على ديوده يخاف ان الجربوع يقرطها (( يعضها )) لاكن الجربوع ماعنده فيه ... عض ديود ابو سعد وخلاه يصايح ... ابو سعد من قو العضة اغمى عليه ...

والجربوع انحاش وساعة وحده وابو سعد مغمى عليه وانا جالس جنبه (( يابو سعد قم ... يابو سعد قم )) لاكن مافيه فايده ... يوم قام ابو سعد بعد ما حطيت وجهه الي كنه راس شيشه

في الشكمان وكرشته ...قال ميدي ... ودني بيتنا مابي اللآذقية ... ابي السويدي .... يابن الحلال .... قال ابد ودني السويدي...ابي اروح للمستشفى...((طاحت حلمتي الي على اليمين))

قلت طيب يالله قم .. علشان نروح ... قام المسيكين ... وركبنا الدينّاا ورجعنا للرياض .... وحنا راجعين للرياض ضيعنا الطريق (( المزفلت )) ومسكنا طريق ترابي ... الين ودانا

للحوطة .... (( وينا وين الحوطة )) دخلنا الحوطة وسألنا واحد عندكم مستشفى ... قال لأ وين مستشفى عندنا مستوصف .. قلت الي يجي ... وينه فيه ... قال شفت ذاك النفود هو وراه

قلت طيب أورغوار(( الي هي باي باي بالفرنسي )) هو يحسبني اقوله انت حمار ... ويمسكني ويغفلني ... الين مادريت الاوانا تحت الدينّاا ... وابو سعد قاعد يحفر جنبي ... قلت له

خيروش فيك قال ابد هما يوم جلدك ذا الرجال..أنا ماتحملت اني اكون بديد واحد((حلمه وحده)) شغلت السياره ورحت للوصف الي قاله..مهب هو قال ورا النفود قلت الا..قال هو خلاص

هذي النفود حنا فيها ... قلت طيب ليش انت تحفر .... قال هو ابد غرزنا ... قلت طيب انا وش جابني هنا ... قال صراحة تعيجزت أشيلك واحطك في المرتبة .. ربطتك في الصدام ..

قلت والله خوش ... يالسمرمدي ... اناا على تالي عمري انربط في الصدام ... قال اقول اها بس لايكثر تعال ساعدني نطلع ...

وبعد 9 ساعات طلعنا .. من التغريزة هذي ... قال ابو سعد يالله امش ماامدانا نمشي الا ونغرز مره ثانية ونجلس 9 ساعات ثانية الين طلعنا وشوي ونغرز مره ثالثة ورابعة وخامسة

وكل شوي 9 ساعات الين انهد حيلنا بس الحمدلله ... وصلنا بعد ذا التعب للمستوصف ... ويوم وصناه لقيناه مسكر ... ومايفتح الا باتسر ...ونستنى الين باتسر .... يوم جاء باتسر وفتح

لقيناه مليان اوادم ... ومافيه حجز الا بعد اسبوع ...يوم انهم قالوا كذا اغمى علينا ....وبعدين شالنا واحد راعي جح ... وودانا معه للرياض ... ونطلنا في مستشفى الشميسي ....

وندخله ... أنا اسبوع وطلعت ... يوم طلعت رحت ومريت حقين الفديو الي في الشميسي (( يعني الي جنبنا )) وشريت شريط عدنان ولينا ... هدية لأبو سعد الي الى الحين عنـــــــد

الدختــــــــــــــــــــووور ..... في المستشفى ......يصلح حلمـته الطايحة ...

أخيراَ تقبلوا تحياتي محاتسيكم :-

~ دعلج~

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه