 |
| |||||||
 | |  |
 | |  |
 |
| | LinkBack | أدوات الموضوع | طريقة عرض الموضوع |
|
#16
05-11-2010
| |||
| |||
 رد: قصة رومنسيه حب عند المصعد قمة في الرووووووووووووعه بليز ممكن ترسلولي قصة (حطمني أبي) خاطري فيها  |
|
#17
06-16-2010
| |||
| |||
| رد: قصة رومنسيه حب عند المصعد قمة في الرووووووووووووعه لذيذة ولله يامان |
|
#18
06-17-2010
| ||||
| ||||
| رد: قصة رومنسيه حب عند المصعد قمة في الرووووووووووووعه اوكي الجزء الثاني (( الجزء الثاني)) (( غرفة خلود)) سارة تصحي خلود من النوم : خلود ... خلود قومي وش ها لنوم ... خلووود خلود : كم الساعة الحين؟ سارة : الحين الساعة وحده الظهر خلود : وشو الساعة وحده ؟؟ يوووه تأخرت وما صليت الظهر سارة : اخاف الفجر بعد ما صلتيها؟ خلود : لا لا الحمد لله صليتها اصلا ما نمت الا بعد صلاة الفجر سارة : زين يالله قومي أنا وتركي ننتظرك على الغدا خلود : سارة آسفه لاني ما طبخت لكم اعذريني يا قلبي سارة مبتسمه : ولا يهمك ... يالله عاد قومي لا تتأخرين ابتسمت خلود لا ختها وقامت من فراشها و سارة طلعت من الغرفه وخلود راحت تغسل وتتوضأ ******************* (( بيت بو سعود – غرفة سعود)) سعود يكلم عبير على الجوال سعود : آآه يا عمري مشتاق لك عبير : خلاص هانت بكره بطلع من المستشفى و... سعود زعلان : وبتقعدين بيتكم شهر عبير : طيب وش اسوي يا قلبي تدري هذا البكر يعني لازم نفاسي عند امي سعود : لازم تقعدين شهر ؟؟ عبير : يا قلبي يا سعود هونها وتهون اوكي ؟ سعود يغني : احبك والقمر يشهد ونجم الليل يا عمري .. احبك تشهد الدمعه ..احبك تشهد جروحي .. غرامك صار عنواني وانا قبلك بلا عنوان ..آآآه احبك يا عمري عبير بخجل : وانا بعد احبك موت سعود : حبي يصير انام عندكم في البيت؟ عبير : هههههههه لا ما يصير و اشجان وين تروح ؟؟ بس يصير انك تزورني سعود : لا والله ... اصلا غصب راح ازورك وبجيك اول ما اخلص الدوام ولا راح اطلع الا .... 2 بالليل يعني بصير لززززقه عبير : هههههههه احلى لزززقه يا عمري صوت طقطقه على باب غرفة سعود سعود : لحظه يا عمري ..... مين؟ نسرين : انااااا سعود : ادخلي يا نسرين فتحت نسرين الباب : قوم تغدا... سعود يكلم عبير : تصدقين يا عمري من بعدك غداي وعشاي من المطعم!! نسرين ارفعت صوتها عشان عبير تسمع : كذاااب ما عليك منه كل يوم أنا اطبخ له انهد حيلي من الطبخ سعود : أنا كذاب هين يا نسرينوه عبير : ههههههههه خلاص عمري روح تغدا سعود : طيب وبعد الغدا برجع ادق عليك اوكي حياتي ؟ نسرين بشويش : ول عليك .. ما تشبع منها ؟ عبير : اوكي يا قلبي ... مع السلامه سعود : مع السلامه ... امووووووواه سكر سعود الجوال ورفع راسه ويشوف نسرين تبتسم سعود : للحين انتي هنا ؟ نسرين : يا اخي احترمني سعود : وش تبين ؟ نسرين : ابيك تنزل تتغدا سعود : لا يكون انتي اللي طابخه؟ نسرين : لا تهاني سعود : اشوى نسرين مسويه معصبه : بلا اشوى بلا هم خلصنا يالله قوم سعود قاعد يدور اقرب شي عشان يرميه على نسرين ولما التفت ما شاف الا غبارها... نزلت نسرين للصاله تركض .. وكانت تهاني تجهز السفره تهاني : هيييي عن الخبال وش فيك ؟ نسرين : سعود يبي يضربني تهاني : اكيد رافعه ضغطه تستاهلين بو سعود : تعالي عندي ولا راح يقدر يلمسك راحت نسرين وقعدت عند ابوها نسرين بقهر : ايه والله يحسب نفسه هو الوحيد اللي عنده مره ذبحنا عالطالعه والنازله عبير وعبير تهاني : يمى منك قولي الله يهنيه مو تحسدينه بو سعود : بكره بتعرسين وبتذبحينا بزوجك وكأن محد عنده رجل الا انتي ههههههههه نسرين تمثل : يبى خلاص استحي تهاني باستغراب : انتي تستحين ؟؟ نزل سعود وتهاني راحت تجيب الغدا سعود : وينها هالملسونه؟ نسرين تخبت ورى ابوها سعود : ايه انخشي ورى ابوي الوعد بعدين بو سعود : حدك عاد الا نسريني لا تلمسها نسرين تسوي حركات بو جهها لسعود ترفع ضغطه ..وسعود يتوعد فيها... جات تهاني وحطت الصحن وتجمعوا على السفره وتغدوا ******************* (( في بيت بونايف – الصاله)) الكل قاعد بالصاله ام نايف وبو نايف قاعدين على الارض يتقهون .. فيصل منسدح على الكنبه .. ومقابله نايف قاعد على الكنبه يطالع قناة العربيه دخلت حنان الصاله وكتابها بأيدها وراحت وقعدت جنب نايف حنان بشويش : ناايف نايف ووجهه على التلفزيون : نعم حنان بشويش : وش فيه فيصل البارح؟ التفت نايف لحنان وبصوت خفيف : وش فيك انتي تبين تفضحينا؟ قلت لك ما فيه شي؟ حنان : ما فيه شي ؟ طيب .. يمىىىى نايف دقها بكوعه : خلاص بعدين اقولك ام نايف : نعم يمى حنان مبتسمه : الله لا يهينك صبي لي شاي قعدت حنان تتقهوى مع امها وابوها .. وبعد دقايق قام نايف وطلع الحوش شافته حنان قامت ولحقته .. راح نايف ناحية الكراسي وقعد وحنان وراه نايف : وش فيك لا حقتني ؟؟ قعدت حنان : ابد ما ابي شي بس ابي اسولف معاك نايف : مصره الا تعرفين وش فيه فيصل؟ حنان مبتسمه : اذا سمحت نايف : بس توعديني ما تقولين لاحد خاصة امي وابوي حنان : اوعدك والله ما اقول لهم نايف : يا طويلة العمر البارح الساعة 12جاني اتصال من جوال فيصل .. رديت الا هو خويه وليد .. وليد : نايف.. تعال الاستراحه الفلانيه واخذ اخوك .. نايف : وش فيه فيصل؟ وليد : مدري وش اقولك .. نايف : قول اللي عندك خلصني وليد : بصراحه اخوك كثر شرب اليوم وطاح علينا ومو عارفين وش نسوي فيه قلت ادق عليك وانت تتصرف نايف : يا عيال الكلب توهقونه ويوم يطيح عليكم تتبرون منه نايف يكمل السالفه لحنان : وقفلت الخط ورحت له الاستراحه الا هو منتهي والباقي انتي شفتيه حنان منصدمه : معقوله فيصل يشرب ؟ نايف : أنا نفسك ماكنت مصدق فيصل تغير كثير مو مثل اول حنان : صدقت حتى بدراسته كان دايم ياخذ ممتاز والحين عايد السنه نايف : رفقاء السوء لهم دور حنان : وانت الحين وش بتسوي ؟ نايف : مدري..رحت له الصباح وكلمته وللأسف كلامي مااعجبه وقال لي مالك دخل فيني وانا مو بزر ومن هالكلام حنان : ليش ما تقول لبوي؟ نايف : وش بيسوي ابوي بيحبسه في البيت ؟ ما عليك أنا راح احاول معاه وان شاء الله ينصلح حاله حنان : الله يسمع منك نايف : ....... الا خلود شخبارها؟ حنان : الحمد لله بخير نايف : اتهقين شعورها نا حيتي كيف؟ حنان : شلون يعني كيف؟ نايف : يعني تسولف عني ؟ تحسين انها مهتمه فيني ؟ حنان : عاادي تسأل عنك احيانا نايف : حنان تكفين كلميها في موضوعي .. حنان : أي موضوع؟ نايف :قولي لها الزواج بعد ما تتخرج أنا موافق بس على الاقل نكتب الكتاب حنان : تبي تخطبها يعني ؟؟ نايف : ان شاء الله بس ابي اعرف شعورها ناحيتي بالاول حنان : امممممم خلاص ان شاء الله اليوم ولا بكره افتح لها الموضوع نايف مبتسم : صدق .. يا بعد عمري يا اختي ********************* (( في بيت بو خالد – الصاله )) مها : يمى .. اليوم بعد بروح بيت عمي زين ام خالد : ما تشبعين من بيت عمك ؟؟ اقعدي اليوم اخوك سعود بيمر علينا مها : وش اسوي فيه يعني لازم اقعد معاه كفايه ان انتي موجوده خالد : حتى أنا بكون موجود مها : شفتي هذا خالد بيقعد واكيد ابوي بعد بيقعد بو خالد : لا لا أنا مشغول وبعد العصر بطلع مها : يمى يكفي انتي وخالد ام خالد : من متى ما شفتي سعود ؟؟ يا بنت استحي وقعدي مافي روحه لبيت عمك مها مدت البوز ... رن جوال خالد وطلع برى يكلم .. مها شافت خالد برى على طول تذكرت نهى وراحت فوق لغرفة خالد.. افتحت باب الغرفه سكرته بشويش شغلت الكمبيوتر ... افتحت نافذة المسنجر سجلت ايميل خالد في ورقه فتحت صفحة الانترنت شافت المحفوظات ... سجلت اسماء المنتديات اللي يدخلها خالد واخذت اسمه المستعار.. سكرت كل شي وطفت الكمبيوتر وطلعت من الغرفه مها : اوووووووف الحمد لله .. تمت العمليه بنجاح انزلت تحت وقعدت تترجى في امها الا ترضى لها وتخليها تروح لبيت عمها .. امها وافقت بس قالت لها بعد ما يطلع سعود تروحين.. دخل خالد الصاله مها : وش هالاتصال اللي يخليك تطلع برى وتكلم؟ خالد : هذا واحد من الشباب مها : واحد من الشباب تطلع برى وتكلمه ليش ماكلمته هنا؟ خالد : مهيوووه انتي تعرفيني أنا مااحب هالخرابيط مها في نفسها : ما تحب الخرابيط ؟؟ ايه هيييين علينا هالكلام ام خالد : شوفي ان ماسكتي عن اخوك ما تروحين لبيت عمك مها : خلاص يمى تووبه هااا بسكت ما ني متكلمه اخذ خالد الجوال ودق على اخوه تركي خالد: السلام عليكم تركي : هلا والله وعليكم السلام خالد : وينك يا اخوي لا نشوفك ولا تسأل ولا تدق تركي : وش اسوي مشغول بدراستي وبخواتي خالد : يا اخي ليش ما تجي خلود عندنا على الاقل كلنا مجتمعين مها مو عاجبها كلام خالد وتقول بصوت محد يسمعه : يا ويلكم ان جبتوها هنا والله لذبحها تركي : حاولت فيها وكم مره اقول لها بس ما في فايده خالد : اذا ماتبي كيفها بس انت وساره لازم تجون تزورونا ولا نسيتوا ان عندكم اخوان واهل تركي : وش دعوى يا اخوي كل يوم اذا راحت لأ مها أنا وسارة نجي البيت بس انت ما تنشاف خالد : اليوم أنا قاعد في البيت ولا بعد سعود راح يمرنا تعال انت وساره اوكي تركي :صدق ؟ سعود بيمر عليكم من زمان ما شفته النجس .. الا امي شخبارها؟ خالد : بخير الحمدلله .. يالله اجل اخليك الحين اذن العصر بقوم اصلي ... سلم على خلود وساره تركي: ان شاء الله.. فمان الله ***************************** |
|
#19
06-17-2010
| ||||
| ||||
| رد: قصة رومنسيه حب عند المصعد قمة في الرووووووووووووعه (( في بيت بو ناصر )) بعد ما طلع بو ناصر وناصر وماجد للصلاه راحت مي تركض لبيت الشعر تبي تعرف وش كان بالكرتون اللي امس ؟؟ دخلت لبيت الشعر وشافت شي جديد (( طاولة بلياردو)) مي تكلم نفسها : بس .. طاولة بلياردو !! وانا على بالي شي مهم وحلو مالت عليك يا ناصر كل هالازعاج على هذي .. الحمد لله والشكر راحت مي غرفتها ودقت على سارة مي : السلام عليكم سارونه سارة : هلا وغلا وعليكم السلام مي : شخبارك وش مسويه؟ سارة : الحمد لله بخير انتي شخبارك؟ مي : الحمد لله عايشين .. ها بتجينا اليوم؟؟ سارة : ايه ان شاء الله.. اول ما يجي تركي من الصلاه وننزل خلود عند امها اجيك على طول مي : يعني يبي لك نص ساعه تقريبا .. سارة : تقدرين تقولين كذا مي : سارة .. وش رايك تجيبين خلود معاك من زمان ماشفتها سارة : مدري بصراحه خلود ما تحب تطلع بس بحاول معاها مي : ايه حاولي معاها.. زين وش سويتي في الاحياء ذاكرتي؟ سارة : ايه ذاكرت فصل وباقي فصل مي : يا حظك سبقتيني أنا ماخلصت الفصل الاول سارة : مي لازم ناخذ 15 هذي ثالث مو لعبه مي : اكيد لازم نجتهد .. وبعدين عندنا بكره كله ... اليوم خلينا نرتاح من المذاكره سارة : خلاص صار لا تنسين جهزي الكيرم والورقه ههههههه مي : خلاص اوكي .... يالله مع السلامه سارة : حياك حبيبتي .... ************************* ( في بيت ام خلود – الصاله)) ساره : خلوود خلود تقرا الجريده : نعم سارة : وش رايك اليوم نروح بيت عمي سكرت خلود الجريده : بيت عمي ؟؟ لا لا ماني رايحه .. بعدين انتي عارفه لازم ازور امي سارة : مو شرط الحين اذا جيتي من عند خالتي نروح خلود : بس انتي تعرفين نهى ماتحبني وانتي بتقعدين مع مي أنا وين اروح؟؟ سارة : قعدي معانا.. اليوم معطينا انفسنا اجازه وراح ننبسط كثير خلود متردده : امممممم مدري والله سارة : خلاص ماعلي منك تجين يعني تجين دخل عليهم تركي تركي : السلام عليكم خلود وساره : وعليكم السلام تركي : يالله ما جهزتوا؟ خلود : يالله بروح البس عباتي تركي : وانتي يا سارة ؟ سارة : مو رايحه بعد ما ترجع خلود من المستشفى مر علي وودنا بيت عمي تركي : خلود بتروح بيت عمي ؟؟ سارة : ايه .. وش فيك مستغرب صح؟ هذا بفضل الله ثم فضلي أنا اقنعتها تركي : ايه والله شي غريب .. بس تصدقين زين سويتي على الاقل تغير جو.... زين انتي قومي البسي بنروح البيت سارة : مالي خلق اروح اشوف مها ترى أنا مروووقه وما ابي اخرب مزاجي تركي : ما عليك من مها .. ما اشتقتي لامي ولخالد ؟؟ سارة : الا وودي اشوفهم بس مها بتسد نفسي تركي : ماعليك منها ان غلطت عليك أنا بوقفها عند حدها .. على فكره سعود بيكون موجود سارة مبسوطه : قول والله .. اجل خلاص بروح من زمان ماشفته والله مشتاقه له ولسوالفه جاتهم خلود خلود : يالله تركي أنا خلصت تركي : يالله سارة روحي البسي عباتك سارة : يالله ثواني بس طلعوا من البيت وركبوا السياره وكان تركي حاط على ام بي سي اف ام واندمجت خلود مع الاغنيه وراحت عالم ثاني (( عمــــري ماتمنـــيت شـــــي قد ماتمنيت اشوووفك .. واروي عينــــــي من حلاك وتلمـــــس كفوفي كفوفك لا تعيشني بخوووف وتعتذر لي بالظــــروف.. لا تعيشني بخوووف وتعتذر لي بالظــــروف حتـــى أنا عندي ظروف يمـــكن اصعـــب من ظروووفك)) وصلوا المستشفى ونزلت خلود وكانت تتمنى لو تشوف راعي المصعد.... ******************************** (( في بيت ام خالد – عند باب الشارع)) خالد : هلا وغلا بالقاطع هلا تفضل سعود حب خشم خالد : هلا فيك .. شخباركم؟ خالد : حنا بخير بس نسأل عنك؟ دخلوا داخل الصاله سعود : ما شاء الله العايله كلها هنا مجتمعه ام خالد : هلا وغلا بوليدي .. كلنا مجتمعين عشانك سعود سلم على امه واخوانه قاموا يسلمون عليه تركي : حيا الله بو ريناد شلونك ؟؟ سعود : والله بخير الحمد لله مها : ليش ما جبت لنا ريناد نشوفها ؟؟ ام خالد : ايه والله ليش ما جبتها ؟؟ سعود : خلاص بكره عبير بتطلع من المستشفى واجيبها لكم ان شاء الله ((ام خالد ماتبي تروح لبيت بو سعود بحكم انه طليقها )) سارة : اكيد حلووووه صح ؟ سعود مبتسم : الا قمر تشبه امها ..( مد سعود جواله لساره) خذي تلقين صورتها بالاستيديو ام خالد : شلونك مع عبير ان شاء الله مرتاح؟ سعود : الحمد لله مرتاح لاخر درجه مها : والله يا بختها لقت لها واحد جميل ويحبها بعد ليتني الاقي واحد مثلك سعود بغرور : ده بعدك أنا مالي مثيل هههههههه ام خالد : الله يحرسك من العين ويوفقك يارب سارة : سعود ... ترى ارسلت الصوره وسويت لك اقتران يا ويلك ان مسحته سعود : لا ماني ما سحه وانتي بعد يا مها سوي لي اقتران علشان ما تلعبون علي مها : ههههههه عشان ما نصيدك بس ولا يهمك بسويلك... اشوووف عطيني الجوال ابي اشوف الصوره ام خالد : اجل وش اخبار مرتك ان شاء الله بخير؟ سعود : الحمد لله تو جاي من عندها وتسلم عليكم كلكم خالد : اقول سعود وشخبار شركتكم؟ سعود : والله بخير .. بس ترا في منا قصه لا تناشبونا فيها خالد : ههههههههه المناقصه من نصيبنا ان شاء الله سعود : ايه بنشووف من اللي بيربحها (( قعدوا يسالفون يضحكون ... جات الساعة خمس الا خمس )) تركي : يالله عن اذنكم بروح اخذ خلود من المستشفى ... يالله سارة قامت سارة وحبت راس امها : يالله يمى مع السلامه ... مع السلامه جميعا ********************** (( بعد صلاة العشا – في بيت بو ناصر)) مي : حيا الله من جانا تفضلوا دخلوا البنات بالصاله وقعدوا مي : خلود وش اخبارك وشلون امك ان شاء الله طيبه ؟ خلود : الحمد لله بخير .. انتوا شخباركم وشلون عمي ؟ مي : والله بخير سارة : اجل وين نهى ؟؟ مي : فوق مع اختك مها خلود بصوت صغير لساره : كملت مها ونهى .. شوفي أنا بدق على تركي يا خذني سارة : خبله انتي والله ما تروحين مي : وش فيكم ؟ سارة مبتسمه : ما فينا شي ... المهم جهزتي العده مي : ابد كل شي جاهز دخل ناصر بالصاله شاف خلود وصد ناصر : احا احا عندكم احد غريب؟ مي : لا لا هذول بنات عمي تعال ادخل دخل ناصر : السلام عليكم البنات : وعليكم السلام ناصر وهو يطالع خلود : انتي خلود ؟؟ والله تغيرتي .. شخبارك ؟ مي : تغيرت للأحسن ولا للأسوء ناصر : الا للأحلى بكثيييييير ((خلود انحرجت ودها الارض تنشق وتبلعها وهي اذا انحرجت لازم خدودها ووجهها يصيرون حمر)) سارة : افااا وانا مو مليانه عينك ليش ما تسلم ؟ ناصر : آآآسف شخبارك سارة وشلونك بالدراسه؟ سارة : الحمد لله بخير ناصر : ممكن اقعد معاكم ؟ مي : ايه عادي ما فيها شي قعد ناصر : خلود .. ليش ما تزورينا دايم ؟ شوفي ما شاء الله سارة كل خميس عندنا ومها تقريبا كل يوووم خلود وعيونها بالارض : ودي بس امي مريضه لازم اكون بجنبها ناصر : ايييه ما تشوف شر... وش اخبارها الحين؟ خلود : الحمد لله بخير (( لحظة سكووووت)) ناصر :انتوا متأكدين ان عااادي اقعد معاكم؟؟ سارة : ايه عادي وش فيك منت بغريب ناصر : بس يمكن خلود مو ما خذه راحتها خلاص أنا بقووم خلود بخجل : لا عادي يا ولد عمي .. خلك معانا (( تعودت خلود على الجو وعلى مي وناصر وقعدوا يسالفون ويلعبون ويضحكون حتى ماجد جاهم وقعد معاهم وكانت جلسه ولا اروع)) (( في غرفة نهى)) نهى ميته من الفرح : مشكووووووره يا مها والله ماقصرتي مها : ولو احنا بالخدمه .. بس قولي لي وش بتسون في الايميل والمنتديات؟؟ نهى : امممممممم اولا بسجل في المنتديات وبرد على مواضيعه وبتميلح عليه بشوفه يعطيني وجه ولا لأ... وبعدين بسوي ايميل ثاني غير اللي عندي وبضيفه وبصير صديقته واخليه يقول لي كل اللي في قلبه وبكذا بعرف هو في قلبه احد؟؟ ..وبعرف بعد يحبني ولا لأ ؟؟ مها : والله انك خطيره ... طيب افرضي انه عرفك وش راح تسوين ؟؟ نهى : لا ماراح يعرفني وكيف يعرفني ؟؟ انتي ما عليك حطي في بطنك بطيخ صيفي وخلي كل شي علي مها : انتبهي يا نهى اخاف انه صدق يحبك لكن اذا عرف انك مسويه هالحركات يقلب عليك ويكرهك نهى بخوف : ان شاء الله مايصير الا الخير.. مها : زين .. أنا جيعانه ابي آكل نهى : يالله ننزل تحت وندور لنا شي نا كله مها : يوووووه اخاف اشوف نصووور ترى حدي مالي خلقه نهى : ناصرمو موجود يالله قومي (( نزلوا نهى ومها للصاله ويسمعون هالضحك والسوالف )) مها : انتوا عندكم احد نهى : مدري والله خلينا ننزل ونشووف (( نزلوا اشوي بحيث انهم يشوفون من اللي بالصاله .. شافوا سارة وماجد ومي يلعبون ورقه وناصر وخلود قاعدين يلعبون كيرم ويسالفون ويضحكون )) مها معصبه : خليدوووه وش اللي جابها بيتكم ؟ نهى : مدري عنها .. شوووفي نصووور شكله مبسوووط فيها مها : والله ما اخليها بعد تبي تاخذ ناصر مني والله ما اخليها هين (( انزلت مها معصبه .. مسكتها نهى )) نهى : هي انتي وش فيك ؟؟ هدي اعصابك توك تقولين مالك خلق نصوور والحين نصوور صار حلو لما شفتيه مع خلود مها : أنا ما همني نصووور بس... نهى : اجل وش اللي همك .. انه يطالع وحده غيرك ومين هالوحده خلووود .. مها عصبت اكثر : وخرررري عني زين (( انزلوا للصاله .. وخلود لما شافت مها وقفت على طول والكل قاعد يطالع مها اللي موصله حدها من العصبيه)) مها بصوت عالي : انتي وش عندك هنا ؟؟ كل مكان أنا اروح فيه الاقيك موجوده قام ناصر : هيييييي مها وش فيك ؟؟ احنا مو بالشارع قصري صووتك .. وبعدين هذا بيت عمها وحياها الله بأي وقت مها : لا والله وتدافع عنها بعد .. عجبك يا ست خلوود .. ناصر اللي ما عمره رفع صوته علي ويترجاني عشان ابتسم له يكلمني بهالطريقه ؟؟ مي : مها لو سمحتي احترمي نفسك واحترمي المكان اللي انتي فيه مها : مي مالك دخل أنا اتكلم مع اختي ... ردي يا ابله خلود (( خلود مو عارفه وش تقول قامت تبكي وراحت تلبس عباتها واخذت جوالها تبي تدق على تركي .. راح لها ناصر واخذ الجوال منها )) ناصر : خلود .. وش تسوين ما عليك منها انتي في بيتنا مالها دخل.. يا شيخه انتي زين جيتي والحين تبين تروحين؟؟ خلود وهي تبكي : ناصر واللي يعافيك مالي خلق الهواش .. الله يخليك عطني الجوال ابكلم تركي مها معصبه : وخررر عنها خلها تروح انت وش عليك منها راحت سارة لخلود : خلود والله ماتروحين انتي جيتي معي بتروحين معي خلود زاد بكيها : سارة أنا مااقدر على مها بليززز خلوني اروح ناصر معصب : مها شووفي لك خيارين يا اما انك تطلعين فوق وماتنزلين أو انك تتطلعين برى البيت .. مالنا خلق مشاكل مها : بعد تطردين يا نصووور هين أنا اراويك (( وراحت مها فوق بتاخذ عباتها ولحقتها نهى )) نهى : مها وش فيك صلي على النبي مها معصبه : وخررري عني .. اخوك يطردني من بيتكم وتبيني اقعد بعد (( انزلت مها ونهى وراها )) نهى : يا مها يا حبيبتي لا تاخذين على ناصر هو مقهور لانك ماتعطينه وجه مها وهي تلبس شيلتها : يطردني عشان خلووودووه والله راح تندمون كلكم .. وخري عني انتي بعد (( طلعت مها من بيت عمها .. وراحت نهى للصاله )) نهى معصبه : زين عجبك الحين يا استاذ ناصر .. يالله خذ راحتك معاها اقعد واضحك وانبسط ناصر : اقول انقلعي بس لا تخليني احط الحره فيك نهى : لا بعد اطردني من بيتنا ماجد : نهى خلاص روحي فوق خلصينا كفايه اللي صار مي : خلاص أنا اللي بطلع فوق .. يالله خلود يالله سارة ناصر : انتظري يا مي محد رايح فوق الا هي نهى : اقول لا تسوي فيها رجال ويعني كلمتك هي اللي تمشي ماراح اطــ .... (( ارتفع ضغط ناصر وراح لنهى وشدها من شعرها وقعد يضربها وراح ما جد وفكهم ووخرنهى )) ماجد بصراخ : خلاص اطلعي غرفتك.. ناصر وش فيك هذي اخرتها تمد ايدك على خواتك؟؟ (( راحت مي تجيب كاس ماي لناصر )) خلود تكلم سارة وهي تبكي : أنا السبب لو اني ما جيت كان ماصار اللي صار سارة احضنت اختها : لا والله مو منك هذا كله من مها هي اللي تحب المشاكل مي : خذ يا اخوي وهد نفسك الموضوع ما يسوى ولا يستاهل بعد ماشرب ناصر الماي : خلود أنا آآسف على اللي صار .. اعذروني كلكم (( طلع ناصر فوق لغرفته وماجد راح لنهى .. اما مي قاعده تهدي بخلود وتحاول تسكتها و ساره دقت على تركي عشان يا خذهم)) ******************** (( في غرفة ناصر )) ناصر منسدح على سريره ويكلم نفسه : أنا وش سويت ؟ الحين خلود بتحرم تدخل البيت .. بس مها ارفعت ضغطي ونهى بعد كان لازم اقص لسانها .. بس أنا اول مره امد ايدي عليها !! ياربي وش قاعد يصير .. لا يكون مها تفكر اني مهتم بخلود عشان كذا هي عصبت ؟؟ معقوله تغير علي ؟؟ بس والله أنا ماحب الا هي .. ليش مها تفكر اني ممكن احب غيرها .. الحين شلون بترضي علي .. ياربي ارحمني .. ********************* (( في غرفة نهى )) ماجد فتح الباب اشوي وطلع راسه : ممكن ادخل طالعته نهى ولا ردت عليه ماجد : بليززززز نهى وهي تمسح دموعها : ادخل وسكر الباب وراك ماجد : نهى حبيبتي لا تزعلين على ناصر نهى والعبره خا نقتها : يا ماجد ابوي ما مد ايده علي .. يجي ناصر يمدها ولا بعد عند بنات عمك ماجد : اذا تبين الصراحه انتي بعد غلطانه .. انتي نرفزتيه بكلامك نهى : ............. ماجد : وش رايك تروحين تعتذرين منه؟ نهى عصبت ودموعها على خدها : من جدك انت تبيني اعتذر له .. لو شيصير ما راح اعتذر له ماجد : اوووووووف الله يهديك .. تراه اخوك الكبير لا زم تعتذرين منه عصبت نهى : ماجد قلت لك ماراح اعتذر لأحد .. كفايه مها زعلانه علي وانا مالي الا هي .... (( قعدت تبكي نهى )) ماجد لو سمحت خلني بروحي ماجد : بس يا نهى ... نهى وهي تبكي : الله يخليك ماجد خلني بروحي ******************** (( في بيت بو سلطان )) ام سلطان : يا أشجان ....... أشجان أشجان طالعه من غرفة الجلوس الخاصه بالحريم : نعم يمى ام سلطان : هااا رتبتي الغرفه ؟؟ حطيتوا السرير ؟ أشجان : ايه سلطان جاب السرير وانا فرشته وعطرته وضبطته ام سلطان : سرير الصغيره لا تحطينه عند سرير امها اشجان : ليش يمى ؟؟ انتوا اول كنتوا تحطون البنت جنب امها ام سلطان : لا لا تحطونه بعدين الحريم يشوفون البنت ويعطونها عين .. خلي سرير البنت هنا بالصاله والناس اللي نعرفهم ومن اهالينا ندخلهم هنا يشوفونها اشجان : اهاااااا ..طيب خلاص الحين اشيله واجيبه هنا (( راحت اشجان .. ودخل ابوها وقعد مقابل زوجته )) بو سلطان : هاااوش تسووون ؟ ام سلطان : نرتب الغرفه .. انت عارف بكره الصباح بتطلع عبير من المستشفى لازم كل شي يكون جاهز بو سلطان : ايييييييه .. زين صبي لي قهوه ************* |
|
#20
06-17-2010
| ||||
| ||||
| رد: قصة رومنسيه حب عند المصعد قمة في الرووووووووووووعه في بيت بو سعود )) (( الكل قاعد بالصاله )) نسرين : تهاني ... بكره متى نروح لبيت عمي تهاني : اكيد العصر نسرين : تصدقين اشجانوووه لها وحشه من زمان ما شفتها تهاني : بكره بتشوفينها وبتشبعين منها سعود بوادي ثاني : آآآآآآآه واخيرا عبوره بتطلع من المستشفى نسرين : من قدك يااااعم.. اكيد بتصير لهم لزقه و نوع امريكي ههههههههه سعود : يحق لي الزق والله بو سعود : بس كذا بيطفشون منك وخاصه اشجان ماراح تاخذ راحتها تهاني : ومن قالك اصلا يا سعود انك بتاخذ راحتك مع زوجتك ؟؟ من 4 العصر الى 12 ونص تقريبا بيكون عندهم حريم وانت في الصبح بتكون في الشركه يعني ما عندك الا الظهر نسرين : هههههههههههاااااااي يالمسكين سعود زعلان : يوووووه تصدقين ما فكرت بهالشي .. بس مو مشكله اكيد بو سعود بيرضى لي اخذ ساعتين أو 3 ساعات في الصبح اجازه بو سعود : لو تاخذ نص دقيقه بخصم عليك نسرين : يحيا العدل ... يعني بس انت ولد راعي الشركه تبي تتسيب في العمل ؟ قام سعود يبوس راس ابوه : الله يخليك بس ساعه وحده بو سعود : على حسب الشغل سعود : ااااااه الله يلين راسك بس نسرين : اقول تهاني .. خلود وش اخبارها مالها حس تهاني : والله ما ادري عنها من امس سعود : مين خلود ؟ تهاني : صديقتي اخت اخوانك ... عرفتها سعود : ايييييييييييه بس بس عرفتها.. اذكرها يوم كانت صغيره وكانت جميله هي الى الحين حلوه؟ نسرين : ووووووووووول والله لعلم عليك عبيررر هييييييين والله لقول لها سعود : هااااااا نسرينوووه يا ويلك ان قلتي لها .. وبعدين انا اعتبرها مثل اختي يعني عااادي بو سعود : لا مو عااادي استح على وجهك انت رجال متزوج ما يصير تقول هالكلام تهاني : يوووووه كبرتوا السالفه .. ما يسوى عليك سألت هالسؤال .. .. ايه خلوود ما زالت جميله وتهبل وفيها شوووي من ساره اختك نسرين تمزح : وش رايك اخطبها لك ؟ سعود يمزح : اذا احلى من عبير اخطبيها بس مو تقولين لها نسرين : هي احلى من عبير بشوووي سعود : خلاص اجل اخطبيها بو سعود : سعود العقل زين سعود : وش دعوى يبى امزح مع نسرينووه الخبله ابيها توصل الكلام لعبير واشوفها تغير علي ولا لأ... وبعدين لو يجيبون لي ملكة جمال العالم غيرررر عبووورتي ما ابي *************************** (( الساعه 11 ونص بالليل – غرفة خلود)) ساره قاعده مع اختها ساره : حسبي الله عليها مهاخربت جلستنا خلود : لا يا ساره انا اللي خربت عليكم لو اني مو موجوده كان ما صار شي ساره : والله قهر .. بس شفتي ناصر كيف مهتم فيك؟؟ تصدقين هذا اللي قهر مها اختي وانا اعرفها زين خلود : ........... قامت ساره : اسفه يا خلود كان ودي ابسطك واغير جوك ... بس والله ما كنت عارفه ان بيصير كذا خلود وهي مبتسمه لساره : خلاص ولا يهمك دامك انتي معي صدقيني انا مبسوووطه ساره بأبتسامه وهي طالعه: يالله تصبحين على خير خلود : وانتي من اهله اخذت خلود جوالها ودقت على تهاني خلود : السلاااام عليكم تهاني : هلا وغلا وعليكم السلااام خلود : امممممم نايمه؟ تهاني : لا صاااحيه ... تصدقين تو متكلمين عنك في البيت خلود : خير ولا شر ومنهم انتوا؟ تهاني : انا ونسرين وسعود خلود : سعوود؟؟ ما تستحون تتكلمون عني عند اخوكم ؟ تهاني : لا تخافين مدحتك ما حشيت فيك خلود : الله يا خذ شرك الا وينك لا تدقين ولا تسألين؟؟ تهاني : اعذريني والله مشغوله وامس واليوم رحت ازور مرت اخوي بالمستشفى خلود : ايه وش اخبارها ورنووودي شلونها؟ تهاني : الحمدلله بخير ورنووودي تجنن خلود : ومن تشبه؟ تهاني : امممممممم فيها شوي من عبير بس تشبه سعود حيل خلود : عبير اعرفها بس سعووود .. امممممم ما شفته خبري فيه من 14 سنه تهاني : ايييه ما علينا اخرتها بتشوفينه خلود : زين.. يعني في هاليومين ما عندك حتى دقيقه تسألين عني فيها؟؟ تهاني : يا قلبي انتي في بالي بس والله كنت مشغوله خلود : اوووكي سا محتك بس آخر لك مره .... تهاني : مشكوره يا قلبي .. لحظه خلووود ... تهاني تكلم نسرين : وش فيك وش تبين؟ نسرين : سلمي عليها وقولي لها مشتااااقه لهااا موووووت تهاني تكلم خلوود : هااا سمعتي نسرين وش تقوول؟ خلود : هههههه ايه سمعتها قولي لها وانا مييييته عليها بس انتوا اللي قاطعين ماتجوني تهاني تنقل الكلام لنسرين نسرين بصوت عالي : خلاص جهزي نفسك بكره العصر نجيك خلود : قولي لها لا العصر لا تجي انا اكون عند امي خليها تجي بعد العشا تهاني : ما عليك منها اصلا بكره بنروح بيت عمي (( نقلت تهاني الكلام لنسرين)) نسرين : خلاص اجل خليها بنص الاسبوع تهاني تنقل الكلام لخلود خلود : حياكم الله تهاني : الله يحيك .. ما علينا وش اخبار حنان؟؟ (( قعدوا يسالفون الى الساعه 12 وربع وبعد ما قفلت خلود الجوال قعدت تفكر بكل شي صار لها اليوووم الين ما غمضت عينها ونامت ************************** (( يوم الجمعه الساعه 9 صباحا— في المستشفى )) راح سعود عند الاستقبال يبي يكمل الاجراءات ويدفع اللي عليه عشان يطلع عبير الموظف : امممم معليش يا اخ سعود بس المريضه تعبت البارح والدكتور طلب انها تقعد الين العصر سعود بخوف : تعبت وش فيها ؟ الموظف : والله ماادري بس الدكتور بيجي العصر ويكشف عليها واذا انها طيبه بيسمح لها بالخروج سعود مستعجل : طيب مشكور يا اخوي راح سعود وبخطوات سريعه لغرفة زوجته ودخل عليها وهي كانت قاعده على السرير ترضع رنودي سعود : هاااا يا قلبي وش اخبارك وش فيك؟ عبير : ما فيني شي يا عمري انت وش فيك جاي تركض احد لاحقك ؟؟ دخل سعود : وش اللي ما فيك شي هذا وجهك اصفر قولي لي وش فيك؟؟ عبير : حياتي والله مافيني شي بس شوية نزيف والحمدلله خف اشوي سعود : يعني ما يضرك؟ عبير : ان شاء الله لأ وبعدين اقولك خف احسن من البارح سعود : انتي متأكده انك احسن ؟ عبير : قلبي انا بخير ... لهدرجه تخاف علي سعود قرب من عبير ومسك ايدها : اكيد يا عمري بخاف عليك والله لما قال لي الموظف انك تعبانه جيتك طاير والله خفت عليك يا غاليه عبير : يا بعد عمري انت .. زيين انتظرني اشوي عشان البس ونطلع سعود : لا ماراح تطلعين الحين راح تقعدين الين العصر يجي الدكتور ويتطمن عليك واذا انتي بخير يكتب لك خروج عبير زعلانه : يوووه والله طفشت من هالمستشفى سعود بحب : والله انا اللي طفشت وابيك تطلعين بسرعه (( قعد سعود يغني لمرته )) .. تعـــــال وما بقى لي يوم في غيــــــابك يصبرني آخاف امووت من شــــوقي وانت مطول غياااااابك ... تعال وكل شي صااااار في بعدك يذكرني دروبك ضحكتك طاااااريك وريح العطر بثيابك... وباس ايد عبير .. تذكر انه العصر ما يقدر يجي ويا خذ زوجته لان عنده شغل مع بو خالد سعود : يووووه حبيبتي اليوم العصر ما اقدر اخذك عبير : ليش؟ سعود : بروح عند عمي بو خالد بنشتري منه بضاعه وبنخلص اوراق وفواتير ومافواتير وسالفه طويله بعدين اقولك عليها.. لحظه يا عمري سعود دق على سلطان سعود : الوووووووو سلطان وتو صاحي من النوووم : نعــــــــــم سعود : نعاااامه ترفسك انت الى الحين نااايم؟؟ سلطان : وش تبي قول اللي عندك خلصني سعود : اااه يا قليل الادب ... المهم انامن بعد صلاة العصر بكون مشغول مع عمي بو خالد .. يعني مر على عبير وطلعها اوووكي سلطان : وداااق على من الصبح تقولي هالكلام نطرت الين الظهرولا العصر ودقيت سعوود : قلت لك عشان ما انسى ..ولا تخاف بدق عليك العصر واذكرك اوووكي سلطان : اوكي اوكي سعود : يالله كمل نووومك قفل سعود الخط ويكلم عبير : والله اخوك هذا مشكله .. الله يستر بنتي ما تطلع عليه عبير : ههههههههه لا ان شاء الله تطلع عليك (( وبكل حنان قالت )) طيبه وحنونه ومرحه وتحبني مثل ما انت تحبني سعوود : حبيبتي ما في احد بهالدنيا يحبك كثري عبير : الله يخليك لي ولا يحرمني منك يا بعد عمري .. اقول حياتي دق على امي وقول لهم اني مو جايه الحين سعود مبتسم : على امرك انتي تاااامرين امر ودق سعود على عمته وقالها السالفه كامله ********************************** اليحن حبايبي انا نزلت لكم جزء ثاني فطلب ما عليكم امر اذا ممكن ابي ارائكم في القصه |
|
| مواقع النشر (المفضلة) |
| أدوات الموضوع | |
| طريقة عرض الموضوع | |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر رد |
| حركات رومنسيه تحبها المرأه أحيانا لا يعلم بها الرجل | عطر الدمام | حواء النسائي الربايع و الستات للبنات نسائي حريمي بنوتات امومه طفوله فقط | 75 | 02-11-2011 04:33 AM |
| .... () () ][ عبدالرحمن المسعد يتهرب من مشاكل ملعب الملز وهذه الحقيقة كاملة ][ () () .... | Mr. Abdullah | الرياضي رياضه عربيه كرة قدم العاب قوى ومنوعات رياضيه sports | 14 | 10-13-2010 10:14 PM |
| أسألكم بالله .... بلغوا المسعد ..... وليد يامسعد | حسين الرحيلي | نادي الاهلي السعودي - القلعة | 5 | 09-07-2010 10:36 AM |
| لو عندنا هذا المصعد قلبناه ملاهي {الحق شوفو الصور} | ميدو السامرونه | ممنوع مخالف مكرر | 38 | 03-27-2010 07:21 PM |
| موضوع مهم أرجو من الجميع قرائته أسباب الكابوس المزعج | المشاغب التاسع | تطوير الذات و البرمجة اللغوية العصبية تنمية المهارات الحرية النفسية EFT التنويم الإيحائي Hypnosis | 7 | 03-16-2010 10:17 PM |
-الدورات
التدريبية بجامعة نجران-
العرض العادي
