ملف علاقي..الدراسه..دافور..سنارة سمك..عبادي..ديون..سلف..قووطه..حوض سمك..اربع صور شخصية..براد شاهي

مربط الجـن · #1 (**permalink**) 10-19-2009, 03:01 PM

هذا الموضوع برعاية لبتن

علامة الذوق الرفيع

مربط الجـن · #2 (**permalink**) 10-19-2009, 03:04 PM

السلام عليكم يا أهل الدار .. السلام على من سلمت عليه .. السلام على من رد السلام ولا سلام لليهود غير وعليكم ويازين السلام يبعث الاريحية بالنفس حيييييل

تخيل انت وياااه وانت ماشي طبلوونك بالخط السريع والدرب ظلمه وبوووه واحدن من بعييييد يكبسلك بالانوار وش يكون موقفك ؟ الوكاد ان قلبك يبدأ يلعب وينبض بشدة .. مير لا وقفت للرجال واول ماوقف وكلمك وقالك السلام عليكم ياخوي .. توماتيك ترتاح نفسياً وتقول ذا ماهوب من قطّاع الطرق ولاودهـ يفقع لمبات سيارتي

بعد عشرين عام على إنطلاقة الحرب .. 19/3/1983 م
السالفة يا أحبائي ومو حبيباتي إني دخلت غرفتي ونصيت سريري واستلقيت على ظهري ونمت.. لاتلوموني غصب انام على ظهري عندي مكتب بالغرفة أبو خمسطعشر درج .. مراهق بمعنى الكلمه.. كل مالقيته إياها قام يصافق بدروجه ويعفس أم الأوراق اللي عليه حتى إن فيه قلم في زاوية المكتب قام يكتب لحاله وإذا قمت الصبح ألقى المكتب لازّن فـالسرير والوكاد انه صادن عن المكيف براااد
<<<علينا

ومثل أي واحد نايم .. قمت أحلم حلومن تحبها قلوبكم .. حلمت إني أمشي فالشارع وكانت الديرهـ مظلمه الله العالم إن الدنيا ليل .. رفعت سروالي بشوف الساعة كم ؟
<<< حاطن الساعة بساقه

طلعت الساعة 2 الظهر والقمر طالع ... ماخشّت مخي ..!!
قلت ياولد اللي يسأل مايتوهش شف لك أي واحد وإسأله الساعة كم ؟ يمكن ساعتك خربانه .. تكيت على الرصيف أحتري أحد يمر .. أحتري أحد يمر ماااش محد مر .. وبعد قطرة من الزمن مر واحد .. مير الحقه وأهمس في إذنه " أنت ياهيه .. الساعة كم ؟؟ " قال لي 2 الظهر قلت طيب ورى القمر طالع !! قال أي قمر هذي شمس يالسطل قلت لا قمر أصلاً ذيك الخطوط اللي نرسمها حول الشمس في حصة الفنية وينها ؟؟
<< يقالك تفسير منطقي هالحين

مير نتهاوش أنا أقول قمر وهو يقول شمس .. قلت لازم نخلي واحد يحكم بيننا .. قال خلاص أول واحد يمر نسأله .. تكينا على الرصيف .. عاد أنا فيني عادة لا صرت أنتظر شي أقرّط أظفاري .. قرطت الاظفر الاول وبديت فـالثاني بس مااااش محد مر .. زهق خوينا قال ياولد كم باقي ويمر أحد عشان نسأله ؟ .. قلت له أبد كلها إظفرين ويمر أحد

قرطت أظفاري كلها وحليت بالأصابع بس ماااش ما أحد مر ! وماهي إلا لحظات ومر واحد ( يحلفون إن إسمه بدري بن توك تجي )

مسكه خوينا وقال له هذيك شمس والا قمر ؟ ( ملعون حاط الشمس قبل علشان يقولها ) قلت لالا هذيك قمر والا شمس ؟؟ ( بعدددي يالذيب ) .. ناظر فينا نظرة إستحقار وتهكم ( قسم بالله مدري وش معناها بس أحس إن مكانها هنا مزبوووووط ) وقال : والله مدري هي شمس والا قمر أصلاَ منيب من هل الديرهـ

راح ذاك الأحد اللي مر قبل شوي .. وخلاني مع خوينا لحالي .. قام يقول لي شمس وأقوله لا قمر .. حتى مردغني
بعد ما مردغني .. قعدت لحالي أبكي .. وصارت دموعي تصبصب على الأرض .. وبينما هي تصبصب ظهر وميضٌ من الأرض ( أروح أسلوب تشويق ) وماهي الا دقايق حتى إختفى الوميض .. تدرون وش طلع ؟؟؟
.
.
.
.
.
.
.
.
.
طلع لي بسكوت " مارس "
فكيت القرطاسة يوم جيت بآكل .. ناظر فيني بطني نظرة ورع دب يقزك وأنت تبلع وتحس إن خدودهـ تقول " تكفا إقسم لي " .. حسيت إن بطني عنده علم .. قلت هااا وش عند الحلو؟ قال لي بصوت واطي " مربط أنا مانيب مطمن لـ هالمارس " قلت له آها بس مآكله مآكله .. بصراحه حسيت إنه مشتهي المارس ويبي يعيفني فيه عشان يأكله بطني وأعرفه
بعد ما أكلت المارس .. وقع بصري على قرطاسته .. فقزيت تاريخ الصلاحية

نعم لقد سوف قزيته ..
<< إنه منتهي

قمت من الحلم مستعجلللل ومرتاااااع .. << قبل ما يأخذ المارس مفعولة

وقعدت أهوجس بالحلم ..!! ياربييه وش ذا الحلم اللي يروّع .. وش هالموضوع الماصل مع القايله ..؟

قررت إني لازم أقطع الشك بالسكين .. وأروح لأقرب مفسر أحلام اللي أكثر من البقالات هالأيام ..

رحت لشيخن سموه لي في ديرتن من الدير .. دخلت عليه .. وقلت له ياشيخ أنا حلمت بكذا وكذا..!! عسى ماشر لايكون المكتب أبو خمسطعش درج عملها وأنا الحين حامل

قال : لا لا تخاف . تفسير حلمك يا بني إنك ......................
قطعت كلامه وقلت : طسسسسس بس منتب أبوي ولا أعرفك << ياشين الدفاشة
قال : إصمت ياخي خن أكمل كلامي .. تفسير حلمك وهو إنك بتصير رئيس دولة في شهر مارس هذا .. والحرب بتنتهي على يدك ..
قلت : الشرهة مهيب عليك على اللي جاي يسألك
رحت لبيتنا .. وقعدت أفكر بكلام الشيخ .. هو صدز بصير رئيس دولة .. يعني بيقولون لي ياطويل العمر؟؟ ..

ومن يومها وأنا ما أفارق التلفزون .. حتى إن الريموت لصق بيدي من كثر ما أحوص بين القنوات
وماهي إلا دقايق ...
وطلع خبر عاجل بالجزيرة .. >> الحكومة الأمريكية تعين مربط بدل من صدام حسين رئيساً للعراق وإيقاف الحرب حتى إشعار آخر

قمت أضحك وأقول الله يقطع إبليسك يا عبادي هالحين مالقيت غير هالكذبة !!؟ أكيد هذي كذبة إبريل مايخلي هباله هالثور

قربع قربع قربع << نغمة الجوال

أناظر الرقم .. مكتوب " الأمم المتحدة " .. قمت أرتجففففف ..
والجوال يتقلب بيدي إلين صار خبز أفغاني
أرد والا ما أرد ؟؟ أرد والا ما أرد نتفت أباطي وأنا أقولها إلين وصلة إلى آخر شعرة بآباطي .. حزروا وش طلعت ؟؟
.
.
.
.
.
.
.
.
.
.
.
أرد
مربط : من أنت ؟؟
الأمم المتحدة : نحن الأمم المتحدة نود أن نشعرك أنك أصبحت رئيساً لدولة العراق من بكره تدوام !

>> مهوب آدمي اللي كلمني !! كلمني ذاك زي حق الاتصالات اللي يقول سددوا والا قطعنا عنكم الحرارة وخلينا البرد يذبحكم
طوط .. طوط .. طوط

قلت خلاص ياولد.. هذا قدر من ربك .. لا تعترض .. تزكرت ورح داوم !!
جاء اليوم التالي .. تروشت .. وتنظفت .. والله إن جلدي مستنكر الصابون بس ماعليه .. ولبست ثوب المناسبات ( تصدقون إني موقف طولي لعيون هالثوب << انبسط ياابو ديزل ) ولبست الطاقية أم زري ذهبي فاقع

( على طاري فاقع عندي لغز وش هي الكلمة اللي اذا شلت حرف الألف منها تطلع فقع )

دورت لي فنيلة يمين يسار ياولد فنيلة ماااش فنايل عاد الشكوى لله بروح بدون فنيلة عبدالله بالخير مهوب أحسن مني
تصدقون يالأجواد إن قارورة العطر نقزت من الطاولة وانتحرت تقول " لو إني دارية إن أخرتها بيبخوني على ذا الشين ما كمّلت دراستي وصرت فليت أصرف "

إنتهت عملية الزكرته بنجاح منطقع النظير
شغّلت الدوج .. وأقلعت للأمم المتحدة بوقع العقد ثم بعوّد للعراق أستلم المهمة
أووووه عاد .. يوم أقبلت على مقر الأمم المتحدة مبنا يهوّل القلب تسبيررر مرة .. بس مهوب مرة مرة يعني مرة شوي .. مهوب تقولون ذا مربط يفقّش علينا .. وصلت لبوابة المقر .. إحتفوا بي وقدموا لي الورد والزهور ( والمعاريض ) .. والكيمرات مغير تقابس .. ياليتكم تشوفون المبنى بس .. أول ماتدخل خضار وزرع غير طبيعي ربيييييع.. حتى من كثر الخضار ودك تصير عنز .. وفـالنص نافورة كنّها قلّة عمر أبو رأس وولد الجن فارش له بساط على جبهة أبو راس وخذ سعابيل

دخلت المبنى وأنا فاقن خشيشتي .. تصدقون عندهم غرفة ترقى وتحوّل
<<قصده الاصنصير

وفي كل زاوية كيمرة الظاهر إنهم يصورون طاش ماطاش ..
وبينما أنا منبهر بالحركتات اللي عندهم جاني واحد عبد خشته خشة طرار بس الولد ساكبن عمره .. تصدقون وجهه زي لون جزمته كذا التطقيم والا بلاش .. قلت ياولد يمكن طرارينهم كشخات .. عطه ريال والا ريالين وخله يتوكل !

وأدخل يدي في مخباي وأطلع له ريال .. مير يأخذ الريال وينطله لي علي ..
وقال : I,m not طراراً << نعم إنها الحقيقة لقد قالها بالحرف الواحد راراً
قلت : ماعليه يا أخوك ماكنش أصدي
قال : Are you MORABET ??
قلت : الله الله !!
قال : والله والله << الملعون طلع يتابع طاش
قلت : ها آمر وش تبي ؟؟
قال : إمش نوقع العقد علشان تباشر فالوظيفة الجديدة ..!!
قلت : قدااااااام <<- ضاري بالجريات ماله في العقود واللمبات
رحنا .. ووقعنا العقد .. ودزّيت لأنقرة ( عاصمة العراق حالياً .. قام الخليفة مربط بنقل مقر الخلافة إليها عام 1985 م ) ..

تم بحمد الله وسلامته الوصول إلى أنقرة .. أول مادخلت أنقره مريت لي مطعم شورما يمدحونه هناك ومير أبلع إلين مليت الحفيرة والدوادمي وشقراء .. ويوم شبعت قلت " الحمد لله " ..
وبعدين سألت معلّم الشورما عن مكان القصر الرياسي ووصفه لي .. وقفت لي تاكسي وخليته يوصلني هناك

وما أمداني أدخل القصر الا هاك الصاروخ لا قطن طاقيتي الزري .. تليت الصاروخ بيدي الا مكتوب عليه رسالة

صاروخ توماهوك ( دفني وأطيح بي إتش ) من النوع اللي يطيح بالغلط
قلت إيه بالله تبطي يا اوباهاما .. أجل النص بالنص يالتسلب

وأزهم على المايسترووو .. وأقوله " ((((( حبي ))) تعرف رقم 905 ؟؟ "
قال لا والله يا أخوك وش قالوا لك الإستعلامات إزهم على الإستعلامات وإسألهم ..
دقيت على الإستعلامات وأخذت رقم 905 وأزهم على 905 وأسألهم عن رقم اوباهااما ومير يعطوني إياه .. وأرسله له رسالة مكتوب فيها :

(( من عمك مربط إلى اوباهاما .. بترول والله ماتذوقه يالهيس .. والا ماتوصله بكروز .. واصله باللي أنت خابر .. )) << كان ودي أكمل وأشرشحه بس قهر الجوال مايكفي الا 70 حرف
وبعد ماقرأ اوبوهاما الرسالة .. عصّب وقام يهايط على الهواء مباشرة .. ويقول (( مريبط ..؟ تسانك ماتبي الحرب فعطني البترول والا طاردك عن الديرة خلال 48 دقيقة )) ..
عاد أنا ياجماعة الخير خفت أرجع لحالة الفقر اللي كنت فيها .. وأخلي العز عشان بترول .. إلعن أم البترول اللي يفرق بيننا ياشيخ

وأرسل له رسالتن ثانية كتبت فيها :
(( اوباهاما وش رأيك أمد لك سلك من البترول وتصير صقيقي ولحدن يتعرض أحد ))
وما أمدا الجوال يقول تم إرسال الرسالة .. الا الولد طالعن في التلفزيون .. ويقول (( نحن نرحب بالإقتراح الذي طرحه مستر مربط .. بس لو يمد لنا سلكين .. ونصير Love بعض ))

وأرسل له رسالتن ثالثه كتبت فيها :
(( مهوب سلكين .. بمد لك أربعه .. إجحدها ))
وما أمداني أكمل الرسالة .. الا الباب يطق .. أفتح الباب الا هذا اوباهاما ومعه عامل .. يقول يالله سوو درب للسطح بنمد السلوك
ودرب .. درب .. الشكوى لله
وماهي إلا دقايق ..
االا السلوك ( والمواظبة ) ممدة وخالصة .. ومير أقهوي اوباهاما وعامله .. وأعزمه على العشاء .. وألزم عليه .. مااااش عيّا يقول بيروح يجرب البترول صافي والا لا
وتصاحبنا أنا وياه .. وإنتهت الحرب .. وصار الحلم علم

وسلامتــــــــــــــــــكم

مايستفاد من الموضوع :
1- اوباهاما رقمه مميز .
2- لا تقطع الإتصال رأس مالها سطرين . << مساهم بالإتصالات
3- لاتحط لك مكتب بوسط الغرفة .

k@dy · #3 (**permalink**) 10-19-2009, 03:16 PM

ههه
مشكور

ويعطيك العافية

جمالي سبب للبنات احراج · #4 (**permalink**) 10-19-2009, 04:15 PM

قصم قصمـــــــــــــــــات انك توووووووووووووووووووووووووحفه

عندك خيال لاتحسد عليه وسذب الله يبعدنا عنه<<تراها اكبر تسذوبه تسذوبتن رباديه

والله لو درى عنك اوباماوعن هرجك انك تعاف الدنيا

وترضى بالفقر اللي انت فيه والدجه والدرج ابو خمس طعش درج

وترجع على فطيرة لوزين وعصير سنتوب وتحمد ربك مية مره عليهن

خ ـــــــفاَاايا · #5 (**permalink**) 10-19-2009, 05:16 PM

اقتباس:

لو إني دارية إن أخرتها بيبخوني على ذا الشين ما كمّلت دراستي وصرت فليت أصرف

ههههههههههههههههههههههههههه
ههههههههههههههههههههههههههه
ههههههههههههههههههههههههههه
منتى بصااااحي وربي ..
.

.
ابدعت وربي .. تسلم الايادي المبدعه
لآ عدمنا جديدك

خ ـــفاآيا

استضافة مواقع	معنى كلمة	رسائل مسجات	دردشة شات	افلام مقاطع فلم مقطع
مكتبة فلاش اسلامي	الثقافة الجنسية	صور في صورة	شات صوتي	الأسره المسلمه
ابتسامات خلفيات	العاب جديدة	دليل مواقع	احداثيات gps	القرآن الكريم
بطاقات كروت	جوال موبايل	جافا java	قصص روايات	sitemap
كتب الكترونية	ماسنجر في مسنجر	خطوط	وصلات روابط	العاب بنات للبنات فقط

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طريقة عرض الموضوع
العرض العادي الانتقال إلى العرض المتطور الانتقال إلى العرض الشجري

ملف علاقي..الدراسه..دافور..سنارة سمك..عبادي..ديون..سلف..قووطه..حوض سمك..اربع صور شخصية..براد شاهي

ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه