 |
| |||||||
 | |  |
 | |  |
 |
| | LinkBack | أدوات الموضوع | طريقة عرض الموضوع |
|
#1
12-06-2009
| |||
| |||
 العقــد النفسـيه .. في " بزران " السعوديــه ... طفولة الطفل السعودي .. وهو يتعرض للإضطهادات .. والترجيموالتقبيص .. وحتى لو كان الطفل جميلاً ... فلابد أن يأخذ نصيبه من تقبيص الخدود ... وطبعات أرواج الحريم على الخد من أسوء ما يتعرض له البزر السعودي ... خاصه أن كان هذا الروج من أسواق السويلم أو أي محل من محلات أبو يمن طاح بالمرق قعد له ساعه واحترق اولا عقدة الأسم في بداية الولاده ... أول مايتعرض له البزر السعنن .. هو الاضطهاد باختيار الاسم .. عزيزي المواطن ... إذا كان اسم أبوك أو جدك خليّوي وإلا نبهان .. وش ذنب طفل توه طالع على الحياة يتسمى هالاسم ؟. قمة الاضطهاد وضيقة الصدر لما الواحد صغير واسمه أسم شايب .. وش هالعيشه ياعالم ؟ أو مثلا يطلع على الدنيا واسمه متعب والا حزنان .. سلامات ؟ لو يجيه ضيقه والا شي قال بس هذا من اسمي ... أصلاً من السنه أنه الواحد يختار الأسم المناسب والي له معنى حلو لولده عقدة منت ولدنا اللهم آجرني يارب .. ياخواني سووو فيني سواة .. قسم بالله انه حتني وسوسه صدق عاد نعرف وحده من أقاربنا جايبه ولدين من البوسنه والهرسك .. قلت صدق لو اني مثلهم أهلي جايبيني مناك وش دراني .. ماقالوه اخواني عبث بالاخير يوم أني كبرت شوي عرفت أنهم مجرمين .. وصرت أنا أسويها في اخوي الصغير بس على أنجس كنت آخذ بالحديقه الخلفيه ظلاااام .. واقول يوسف أنا جني ماني أخوك عمر بس متلبس.. وأخوك عندنا هناك ذبحناها بس ياقي نذبحك انت بس والله ياجاني ضررررررب من أبوي بعدها .. لان الولد فعلا خاف لا تلوموني الي اسويه هذا كله من بزارين عماني وخوالي إللي مايخافون الله .. مدري ليه كنا دايم نخوف بعض .. والله إني اذكر وجه أخوي في الظلام يوم يوخر البطانيه ويطل بوجهي يروعني ينعن صدق طبعا أتوقع مافيه أحد ما أنقال له منت ولدنا عاد أنا على بالي حساس .. أخذ ملابسي وأطلع للحوش يعني أني بطلع من البيت كني بهاجر ياربي لك الحمد بس مجنو منذ الصغر عقدة أخوك الصغير سبحان الله الأهل السعوديين ماعندهم روح الحريه والاشياء ذي .. وان كل واحد حر بأشيائه يعني دايم الكبير يضطهدونه عشان الصغير وإذا قال شي قالو له انت الكبير وهذا الصغير ماينلامون اذا قامو يفغصون أخوانهم الصغار .. أبو الحاله الي كذا ... المهم وتمر عليك الايام وتتشوت من الغرفه وتنام في الظلام الحالك لحالك ليه ؟ عشان اخوك الصغير وانت كبرت خلاص .. أبو القهر الي كذا عشان كذا أنا أقترح الاب والام لما يجيبون طفل ثاني يذبحون الاول الجد عاد لما يجيبون طفل ثاني يساوونهم بالمعامله ... ولا يحسسون الاول انه ذا الصغير الفطفوط جاء مكانه وأخذ الدلع كله ... عقدة المدرسه أكره ياعالم أساتذتنا .. والله أكرهم .. نواف وفصيل اكرهم كره ماهو طبيعي ... كوابيس ماهم أساتذه أول مادخلت أولى كانت أستاذنا نواف يدرسنا كل شي بالحياة طبعا .. بتاع كلو المهم أحنا وقتها نخاف مره ... وكنا نحسب للمدرس حساااب . نحس انها مب انسان .. نحس أنه ملاك شي مو طبيعي .. نقدره مررررررره .. المهم ان نواف ذا من زود الفسقه مدخل بروسنا انه يشوفنا بكل وقت والله ياني تعقدت .. معاد أبي ادخل الحمام أخاف يشوفني بعد يعني مره صارت حالتي صعبه مادريت أن نواف مثله مثل اي انسان.. يقوم من النوم بعيونه الي مليانه غمص .. ولاجاب خبرنا أجل فاضي هو يراقبني وانا أتروش الله من زين الشكل .. ليتني كبير بعد لا بزر يتروش وش يشوف صدق . بس أكتشفت أنه نصاب مايراقبنا يوم وصلت ثاني ابتدائي .. اما فيصل .. آآه ياقلبي للحين أتذكره هو وعلكه .. والله ياني أنضرب ضرب منه .. واذا جيت البيت لين اخوي بعد مضروب يدينا حمررر .. الله يعظم أجر اميمتي المهم ان فيصل ذا كان يضربني عشان جدول الضرب .. والله ياعالم للحين .. ماحفظت جدول الضرب .. عقدة البنت.. يوم كنا صغار ... كانو اهلنا يحسسونا أن البنت كائن حي ممنوع الاقتراب صرنا نستاحش مره نحس انهم شي غريب عننا .. والحين لما كبرنا ... لو أشوف بنت أروح ملح وأصير كشنه .. والله إن هالتربيه غلط ... بنت وش صارت حضرتها ما آخذه علقي لاأن كل ممنوع مرغوب .. >>>برآآآآآ عقدة ترى ربي يحط بالنار اعرف كثير ناس للحين نفسيتهم مو شي .. والسبب هالاسلوب الوعضي الغريب .. معليه ليه لما يكذب الطفل نقول له ... بيحطك ربي بالنار ليه مثلا مانقول له ... ترى ماتروح الجنه . ؟ فيه امهات الله يهديهم ... كذا اسلوبهم لو شافت الصغير يكذب أو يرقص على اغاني قالت له ترا ربي يحطك بالنار ويصب في اذنك رصاص ياكثر ماسمعناها ... والا يجيك أحد كبير يقول لك تخيل تموت وانت كذا ... ليه محسسين الاطفال ان الموت ماوراه الا العذاب طيب أنا مسلم واصلي ... وربي رحيم ... ليه كذا نظرتنا عن الموت حتى يوم كبرنا ليه محد قال لنا واحنا صغار انه لما نموت نروح لربي ... هالشي يحسسنا بالامان .. ليه محد قالنا لما نموت نروح لحياة ثانيه والمسلم مايشوف قدامه الا كل خير ليه العنف بالتربيه ... نفسية طفل هذي ... ماتجي بالتخوف والترهيب ابد أفلام الكرتون الحزينه بصراحه ما اقول الا حسبي عليهم أجل سالي وهايدي .. كيف كنا نطالعها .. وربي اني ابكي عليهم ..وأنا الحين بشنب أبو النفسيه الي كذا ياعالم .. ليه يفرجونا على كراتين تحزن ؟ واتذكر بعد ذيك الانشوده (( وصلو علي صلاة لا ركوع لها ولا سجود لها لعل الله يرحمني )) والله ذا الانشوده ما انساها مستحيل لاني جلست سنتين يمكن وأنا اصحى الليل أبكي أهلي تعبو معاي مره .. الي يقول جاته عين .. كل شوي موديني لشيخ يقرا علي ومن ذا تفله ومن ذا مويه ومن ذا حبة سوداء ومادرو ان علتي من هالانشوده .. كنت أسمعها ... وتخيلو أني ابكي اقول لاعاد تشغلونها .. وربي ايام مستحيل أنساها .. احس انها يام خنقه عقده اذا كبرتو من كثر ماكانت تنقال لنا صرنا نتمنى اننا نكبر بسرعه والحين يوم كبرنا ... كل العالم أشوفهم رازين بتواقيعهم وعناوين الموضوعات ( كبرنا وليتنا ماكبرنا ) والي جالس يشعر ... ويقول ( ياليت ان الزمن يرجع ورى والليالي تدور ) والي تقول ( ليتني طفله أكبر همومي لعبتي ) جتنا صدمه .. توقعنا ااننا اذا كبرنا بنصير وناسه ... وتتحقق كل احلامنا من كثر مايقولون اذا كبرتو .. المشكله أننا نشوف وجيه الكبار دايم معبسه ونفسيتهم خايسه .. بس مافكرنا زين الضرب أعتقد انه الضرب مره مؤثر ع الطفل خصوصا اذا كان قوي ترا أن ضد ان الشخص يكون سلبي ويخلي عياله على راحتهم .. مافيه مانع .. يضربهم لكن مو الضرب القوي الي يعلم ع الجسم ولا الضرب الي قدام الناس ... فيه اهل الله يهديهم يهينون الطفل قدام الناس على بالهم مايحس .. أكره الي يضرب ولده قدامي .. احس إنه رجال نذل حتى انا أصير ودي أضربه وهذانا الحمد لله كبرنا و كبرت العقد معنا .. بس الله يستر لا نعقدها بعيالنا ماهو رايكم في الموضوع وذا عندكم عقد انا ماذكرتها قولوها نبي نضحك
_________________  ~~العاقل يفهم من غمزة والجاهل يفهم من رفسة .. |
|
| مواقع النشر (المفضلة) |
| أدوات الموضوع | |
| طريقة عرض الموضوع | |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر رد |
| العقد النفسيه في بزران السعوديه>>> | ررريانه | ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه | 17 | 11-30-2009 04:51 PM |
| العقــد النفسـيه .. في " بزران " السعوديــه | بحه الشوق | ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه | 10 | 11-19-2009 11:13 PM |
-الدورات
التدريبية بجامعة نجران-
العرض العادي
