بسم الله الرحمن الرحيم



المقدم : اخباركم شباب .. عساكم بخير و نعمه و صحه و عافيه مع الخلطه السريه كنتاااااااااااكي
المخرج : قسم لو ما تنطم ان يجيك شي ما جاك انت و وجهك هاللي كنه كفر منصلخ
المقدم : طيب لا تدف انت و خشمك هاللي كنه حلاو مصاص ..
المخرج : يا زينك ساكت و يلا عطنا مقدمه حلوه .. اكشن
المقدم :-
الحين مهوب كنه الدراسه جت ؟! .. الا صدق الدراسه جت و قبل يومين رحت المدرسه بعد ( توه يستوعب انه راح المدرسه ) !! .. والله مهيب شينه هالدراسه عادي خل ندرس .. عاد حنا مستضيفين لكم ضيفكم العزيز على قلوبكم و هو " شليويح " عايش بالثقبه بس اصله من خنشليله ( وش ترجون منه ) و شليويح في الحقيقه و هو خريج سجون قصدي خريج اول ثانوي .. يعني خبره بالثانوي و الى الحين هو يستخدم خبرته و يعطيها للناس ..
شليويح : الله يحييك .. هذا من ذوقك و انا ان شاء الله استعرض مهاراتي و اقدمها لكم لكي يكون البرنامج ناجح كثير بقوه <-- ما في راسه فصحى
المقدم : هلا بك حبيبي .. اعزائنا المشاهدين نبقى مع فاصل اعلاني الين ما اشوف لي صرفه مع هالشماغ مدري وش بلاه ..
المخرج : منيب حاط لك فاصل كمل البرنامج بس ..
المقدم : تم .. ذاك اليوم مدرس قال لشليويح قم من مكانك قال بعد خدمه اربع و عشرين سنه ثانوي تقول لي قم من مكانك الله يصلحك بس
شليويح : هههههههههههههه و قسم بالله انك ذكرتني بايام زماني القديم الجديد <-- قل قسم بس ابد تراني ما خربت كفرات ذاك المدرس و لا قشعت المرايات و لا جبت مسامير و حطيتها ورى الكفرات
المقدم : كخخخخخخخخخخ الله يلعن امك يا شيخ .. ودنا بصراحه انك تبين لنا سبب مجيئك الى هنا .. يعني بالعربي وش تبي ؟؟ سلف ما عندي
شليويح : هههههههههه الله يرجك رجه مبرحه كبيره و طويله و جيده و منسمه و قشرا و ....
المقدم : اعزائي المشاهدين لا تشرهون عليه تراه جاي مرفع .. كمل شليويح كلامك ..
شليويح : حبيت من خلال هالبرنامج اني استعرض اهم النصائح للطلاب لكي يصبحون دوافير ( لا يا شيخ ) ..
المقدم : على فكره ترى شليويح شخص نادر و لا تقدر تسير عليه الا بسجن الثقبه .. توني مطلعه الحين بكفاله و جايبه عندكم يقدم برنامج
شليويح : ههههههههه ما ينقال لك سر .. ههههه سر والا ركبه .. هههه ركبه والا سيقان .. الله يرجني ..
المقدم : اقول بس عطنا نصايح و لا يكثر
شليويح : امممممممم يلا خل نبدأ بالاولى ( الظاهر انه راعي طويله ) ..


1- وش تلبس انت لا جيت تروح للمدرسه ؟! .. سوال وجيه نوعاً ما .. لو مثلا تقول لي البس طاقيه و ثوب .. ابقول لك لااااع و الف لااااع وش له تلبس طاقيه و ثوب بس ؟! ( اجل تبيهم يلبسون صروال الاتفاق و فنيلة النصر ) .. ما عليك من الناس اللي يقولون لك البس ثوب و طاقيه .. انت البس اللي يعجبك و يعجبني ( واحد قاط ) .. انصحك نصيحه اخويه انك تلبس شماغ العقل و تطق بنت البكار و تفتح زر ثوبك و انفخ الصدر و كل من يكلمك قل له " خلووووها " !! .. و خلك عربجي و اسلوبك نفخه .. يعني القرد اللي بحديقة " التوي بارك " اللي بالثقبه احسن منكم ؟! ( قسم ان بهالحديقه قرد ملعون والدين زاااااااااحف تعطيه الزقاره على طول يولعها و لا جابت زوجته ولد ذكر على طول يذبحه ما يبي الا بنات عشان لا اكبرو يتزوجهم و يجيب بنات من جديد ) ..


2- اخي الطالب من يقول الشمس باكر مقبله كل شمسٍ ما لها وجهك ظلال ( يعلمكم انه حافظ شعر ) <----- لا و بعد تراني حافظ ديوان و قسم ( ذكرتني بالمصري اللي كان يتسنن عقب الصلاه و يوم قامو الناس يمدحونه قام و قطع صلاته و قال تراني صايم بعد ) .. وش له تتعب نفسك و تشتري شنطه و انواع الزحمه و الطفش و الكتب تصير ثقيله و تثقل كتوفك و تخترب و تصير رقيقه ( حلوه رقيقه تراي سارقها من مجلة سيدتي بس لا تعلمون احد ) .. ايه اجل تقول لي تبي تشتري شنطه انت و وجهك هاللي كنه صحن فول ماكله صعيدي .. ياخي ليه تخسر اهلك انت و وجهك .. شل كتبك بيدينك بدون لا شنطه و لا شي .. و ان ما قدرت خذ من اهلك خمسه ريال و طس اقرب بقاله و اشتر لك سير ابو ريال و يبي يبقى لك اربعه ريال من الخمسه اللي خذتهم من اهلك .. الباقي اشتر لك فيه قوطي ببسي و كتكات و اشتر لي معك بعد <-- ما وراه خير .. المهم لا جبت السير يستحسن ان يكون لونه اصفر و ان كنت ولد نعمه اشتر لك اثنين واحد اصفر و واحد ازرق و اكتب عليهم النصر عز ....

المقدم : دقيقه يا شليويح معنا اتصال من خنشليله
شليويح : هلا هلا حبايبنا ذولا ..
المتصل : الووووووع
المقدم : هلا والله وش فيك معصب هد اعصابك بس
المتصل : شليويح ادرى وش له انا معصب
شليويح : لا يكون انت صويلح اللي بجنب الزنزانه حقتي يومي مسجون بخنشليه ..
المتصل : ايه
شليويح : لا تخاف حبيبي فلوسك تبي ترجع لك
المتصل : يلا مع السلامه

طووووط طوووووووط

المقدم : وش بلاه ذا الله ياخذه <-- توك تتكلم و قبل شوي منطم ..
المتصل : لا ياخي هذا صديقي بس هو فيه حاله نفسيه و دايم يعصب ( عاش مصرف )
المقدم : اهاااااااااااااااااااا .. طيب هذا فاكس جاينا من الحزام الذهبي و يقول فيه
" انا طالب ادرس في مدرسه مستأجره و دايم احط نيفيا بس منيب خكري .. عندي مشكله و هي وشلون اهرب من المدرسه .. انا ما اعرف "
شليويح : ههه حيا الله اللي مهوب خكري .. بالنسبه لمشكلتك هذي حلها مهوب صعب و لاهوب بسيط بنفس الوقت يعني المشكله جذريه ( مهوب عاقل فيثاغورس الجرٌاديه ) .. بس انت ما دام انك تقول ان مدرستكم مستأجره يعني هي بيت .. اول شي تسويه تاخذ كتبك من اول الدوام تحطها عند دريشة المطبخ .. و في الحصه الاولى قل للمدرس بروح الحمام ابزغل .. و لا رحت الحوش خذ كتبك اللي عند دريشة المطبخ و قطها بالشارع ( لا تلومني لو طاحت على راس المدير و هو برى ) .. و لامنك قطيتها بالشارع دخل ثوبك في صروالك الطويل و انقز النقزه البهلوانيه اللي ما يسويها اطلق قرد بالعالم و اشقح السور و اذلف المكان اللي تبيه ..
المقدم : والله يا انت دمار شامل يا شليويح انت و خشمك هاللي كنه ركبة حاشي
شليويح : على الاقل احسن من فتحات خشمك هاللي كنها ولف ماي (بزبوز) ..
المقدم : اقول كمل نصايحك يا الدمار الشامل ..
شليويح :-

3- وش هي اغراض المدرسه اللي تشتريها .. لا يكون بتسوي لي فيها دافور و بتشتري لك مقلمه و درزن اقلام سايله .. آآآآه بس يا خرااااااابي .. يعني لازم تشترون هالاقلام السايله .. تخيل طاح القلم السايل منك و انفجر و قام يطشر السايل و طار على ثوب المدرس ؟! .. صحيح انها مهيب مشكله لا جا على استاذ عصمان الزول حق الرياضيات لأنه هطف و لاهوب مسوي شي و تبي تلقاه اليوم الثاني و هو توه ما غسل الحبر من زود العجز .. لكن المشكله الخطيره لو جا الحبر على استاذ انور صعيدي حق العنقلينزي !! .. وش راح يكون موقفك يعني .. عندي احساس ان وجهك يبي يصير كنه قطو حصران و مستحي يسويها قدام الناس !! .. بس خلاص رااااحت عليك يبي يجي انور صعيدي و يصكك خمس كفوف و رفستين الين تاكل تبن و تعض الارض ( و ان رحت تشتكي عند الاداره يقول والله العظيم ما ضربته ) .. اللي حبيت اوصل له انك لازم تشتري اربع اقلام ام ريال .. و قسم بالله ان كتابتها وش زينها .. و انصحك بعد انك تصفقها بجيبك اللي فوق اربعتهم جنب بعض .. يعني شوفوني عندي اربع اقلام ام ريال و استاذ انور صعيدي مهوب ضاربني لا طشر الحبر عليه !!

4- بحصة الرياضه .. انصحك تلبس الفنيله و الصروال تحت الثوب .. لكي يسهل عليك فصخها اخي الطالب .. و يا حبذا لو كانت الفنيله نصراويه و وراها رقم تسعه ( قصدي ماجد عبدالله مهوب علي يزيد ) .. يعني وش لك تلبس بدلة رياضه من اول اليوم و تتعب و تعجز عن الحركه و قسم بالله ( عاش مصرف ) .. و لا جات حصة الرياضه تبي تلعب و انت لابس الفنيله و تبي تعرق و تصير ريحتك صنان و ترجع الصف و انت ريحتك صنان و لا فصخت الفنيله و يبي يصير الصف زريبه من ريحتك !! .. الزبده يعني اول ما تجي حصة الرياضه افصخ ثوبك على طول و اجلس بفنيلتك و صروالك و رح طقطق كوره و لا خلصت الحصه اذلف للصف و البس ثوبك و كمل يومك الدراسي بجهد ( والله من نصايحك ذي ما ندري وش هو الجهد ) ..

المقدم : الله يخرب بيتك انت و نصايحك .. اقول اها بس .. معنا اتصال من بنيٌه ..
شليويح : افلقني ان كانها مهيب من منفوحه
المقدم : لا والله مهيب منفوحه .. البنيٌه ذي من الثقبه من قدك عاد <-- بزعمه يرفع معنويات
المتصله : الصلاااااااام
شليويح : و عليكم الصلام .. بس وش دعوى يا المخرج .. من متى صرت تخلي نيجيريين يتصلون علينا ..
المتصله : على الاقل احسن منك يا الفحمه اقول بس ارجع لسوق الفحم لا يصيدونك ..
المقدم : هههههههههههههههههه الله يرجكم يا شيخ ..
المتصله : الزبده ابيك تعلمني وشلون ادخن بالمدرسه
شليويح : ما يبيلها شي .. اول ما تدخلين المدرسه ادخلي الحمام على طول و جيبي معس عطر و علك اللي عليه صورة قطو تكروني من برى .. و اول ما تدخلين الحمام طلعي الزقاره و خلي وحده من خوياتس النيجيريات يراقبون برى الحمام و اول ما يجي احد تطق الباب هي و انتي على طول ترشين عطر و تقطين الزقاره بالبالوعه الله يكرم السامعين ما عدى انتي ..
المتصله : طيب يلا طسس

طوط طووووط طوووووط

المقدم : و معنا اتصال ثاني بعد
المتصل : الووو ..
شليويح : يالله حيه
المتصل : ما هذا البرنامج الذي ليس جيد ؟ .. لقد خربتم طلابنا و بناتنا بهذه النصائح الخربانه 100% .. لماذا تقدمون هذا الحثاله لكي يقدم البرنامج ؟ و لا يزيد عليه الضيف فهو سمرمديون(سمرمدي يعني بروفسور بالدشاره) صايعون جداً
شليويح : قل قسم عشر مرات
المتصل : على تبن يا (.....) <-- وجع

طوووووووط طووووووووووط

المقدم : انقطع الخط الظاهر ان الخطوط متشابكه ( ايه طيب صدقناك ) ..
شليويح : ايه صحيح كلامك ..
المقدم :لحظه اتصال من لبنان الوووووووومين معنا
المتصله: معاكم عمشه من لبنان
شليويح: عمشه ولبنان ايه هين الا من الصمان بس غلطانه بالنطق
المقدم : اسكت انت ووجهك اللي كنهثلاث صعايده يدفون ددسن ايوه عمشه
عمشه: حبيت اني اسلم على ضيفكم المحبوب وبدي ائولوووه انوووه مهضدوم كتير
شليويح: مهضوم وش دعوى بيض شكلتس جوعانه
عمشه : يخزي العين شو خفه هالدم
شلويح : ايه انا كل بتله اول ما اقوم من النوم اشرب فيمتو خخخخخخ
المقدم : ممكن تتلايط انت وخشتك يامال الشين انت كفو تكلم ذي
شليويح : ياخوي وش اسوي المعجبين كتر خير الله ابك عانها يابيي
عمشه : هيدي الساعه الخراشه اللي كلمتك فيها شلووحتي
شلويح : غدى وجهه برتقالي من الحياؤ اول مره اجد يدلعه بالعاده بالنعال شووووكرن خيتي
عمشه : باي ياعرزي شلووحتي
شليويح : ياعرزي ولبنانيه شكله راعيه مرقوق وجرابيع ذي زين باي
المقدم : كمل النصايح ..
شليويح :-

5- اول ما يدخل استاذ الرياضيات السوري قل له يا استاذ ما نبي درس و كوٌك الطلاب و خلهم يقولون معك و بعد ما يوافق فل ابوها سواليف .. و ان ما وافق كوٌك الطلاب يرقدون و ان ما ارقدو ارقد انت .. و صدقني قسم بالله انك تبي تحلم بالرياضيات .. و تشوف " جتا هـ " تتمشى و تخاوي " جا هـ " و تشوفهم يبوسون بعض .. و حتى انك تبي تحلم بفيثاغورس و هو يحك راسه بعود اسنان و شكله تقول كنه قطو خال و تتروع انت بالحلم .. و تجيك معادله بالحلم و تتهاوش معها و المعادله تصيح و تقول حلني .. و انا اقول لها لا اصلاً انتي ما لس حل في المجموعه كاف !! ( التصريفه بنت حلال ) .. و تبي تشوف كتاب الرياضيات جاي يصفقك و بنهاية الحلم يبي يجي فيثاغورس و بيحسب شماغك و بتقوم من النوم متروع و الاستاذ يسحب شماغك و انت على طول بتحسب ان الاستاذ هو فيثاغورس و بتقوم تلعن شطيانه و تصفقه الين ما يعض الارض و انت يالضعيف تحسبه انه فيثاغورس مهوب الاستاذ .. لكن يعني وش بتقول للناس ؟! .. بتقول كنت احسبه فيثاغروس ؟! .. عاد خلاص بتقشر بصل مع الاداره و يمكن يخلونك تبيع بالمقصف ( والله لا اشلح الفلوس كلها و انحاش )

" مدري ليه احس ان شليويح جاه النوم "

المقدم : يااااااااوك .. قسم بالله انك محشش ..
شليويح : هماك مطلعني من السجن
المقدم : ههههههههههههه يلا عاد نبي نختم برنامجنا بسالفه من سواليف المدرسه القديمه ..
شليويح : اممممممم يا كثر السوالف .. خل اقول هالسالفه اللي نختم فيها برنامجنا الناجح و الشيق <-- والله ؟؟

مره من المرات صنفت معي انا و ولد خالي ان حنا نهرب من المدرسه .. عاد وقتها كانت مدرستنا عباره عن بيت مستأجر .. و كانت علينا حصه فاضيه يعني المدرس غايب الظاهر انه حامل .. المهم يوم خذنا الكتب حطيناها مع دريشة المطبخ و طلعنا الحوش و سالنا المدير وين رايحين و قلنا له الحمام قال وش معنى اثنينكم مع بعض قلنا ابد والله ما نسوي شي بس دخل المدير داخل المدرسه و بقيت انا مع ولد خالي بالحوش و رحنا عند دريشة المطبخ و خذنا الكتب و طلعنا مع الباب بسرعه .. لفينا يسار لقينا الهندي حق المدرسه ينظف و على طول لفينا يمين ما نبيه يشوفنا المهم كملنا مشي على طريق البيت و شوي الا نشوف كامري استاذنا المطوع .. وقف جنبنا و عطيناه ظهرنا و من زود القمطه و الثواره قطينا الكتب على جنب .. و جلس المدس ينادي يا شباب و حنا جاحدينه و معطينه ظهرنا و يوم جانا و طق ظهورنا لفينا و قال قسم اني داري انه انتم .. قلنا له مستاذنين من المدير ( ما يعوق النصب ) .. و راح الاستاذ و يوم وصلنا بيوتنا جلست ربع ساعه الا التلفون داق .. رديت الا هو المدير و يقول لا تجي الا مع ولي امرك و كلم ولد خالي بعد .. و باليوم الثاني جاب ولد خالي ورقه و قلم و كتب كلام كأنه من امه و زبدة الورقه انه تدخلهم المدرسه بدون ولي امر لأن لا علمت ولي امرهم بتصير مشاكل عائليه .. دخلنا المدرسه و قال المدرس لا تدخل الا مع ولي امرك .. و يوم عطيناه الورقه دخلنا داخل .. و خلانا ثلاث ايام ورى بعض بالحوش تقول غنم و الشمس صاقعتنا .. و بعدها جلدنا كل واحد ثمان جلدات يحبها قلبك ..


المقدم : وع بايخه
شليويح : البايخ انت .. كش عليك انت ووجهك اللي تقل بيبسي مع الليمون

المقدم : في نهاية البرنامج لا يسعنا الا ان نصفق شليويح طراق على جبهته لنصائحه اللي من جنبها .. و الطراق مسك الختام



ملطوش ومعدل



تحياتي

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه