ياعزتي للقرنديزر ياجماعة الربع توهق

سلام شله تسيف انتم عساكم منيحين عساكم تزقحون عساكم بخير وبنعمه عسا ماعليكم خلاف عسا ماحد وجعان

ايه هين والله كني اشوف بعضكم الحين يقول يادين الله العله ذا وش عنده والله شكله جاي يخطب

ههههههههههههه

اقول شلااااااتووو ((( تدليع شله )))

اقول تذكرون نكتة الرجال الزبط الفنتاستك المطنوخ الي يقول به خكري لفعوه ورعان الحاره وارسل برقيه لليابان طلب 5 قرنديزر للضروره وبمواصفات خليجيه
ههههههههههه

ذكرني سسالفه منذ مبطي مرمسه (( مرمسه = مبطيه ومبطيه = ماليبها علم ومالي بها علم = لاتشرهون علي لو ضيعت نصها ))

المهم ادري نصكم يقول اخل ياحبك للقرق ولا اكوفي عنان (( عاد تصدقون ان كوفي عنان لحية غامقه .. احم قصدي غانمه ))

المهم نبي نجيب سالفة قرنديزر الله يرحمه (( يامال الجمه ياذاك الولد والله كان مسوي رجه ))


المهم سنبدأ باجزاء القصه ولاحد يصفق والله ان صفق احد لتشوفون بباي والليث الابيض (( ياحبي له )) وسقوبي دوبي وهااااااااااااي يباااااااااااااااه والطقه الباقيه هنا

لاني ماتحمل تصفيق من جد رقله

والله الا اجيكم مدربي راسي

ماقلت لكم يحب يطلع عن النص

امحق نص

المقدمه مايجي الموضوع ربعها (( ياحبه للجيب الربع والبر ))

خلااااااااااااااص لاتنفخون بنبدا نبدا بلاش احد يجدع على المسرح قواطي ززززززززززززززززززززززين

بسم الله

==============================

اليوم والساعه والوقت

1404
1984
الساعه 5 العصر

كنا بالغرفه انا وعيال الحاره طبعا جيين لان تلفزوني ملون وتلفزوناتهم ابيض واسود (( به نظريه ان الملون يصرف اكثر بالكرهب لذا بعض الاباء ممنوع لديهم الشيء ذا ))

كنا كالعاده جالسين بالحجره (( الغرفه )) وكلللللللللللللللللهم وراي تعرفون راع البيت ابن امه يجي قدامي عند التلفزون

المهم جلسنا على دقة (( علي علي بطل فليييييييييد هيا طر ياقرنديييزر بعزم قاوم ... نسيت الباقي ))

المهم امي الله يخليها لي كالعاده مجهزه بسكوت ابو ميزان (( يااااااني اموت فيه )) ومعه الشاي
وهات ياانواع تبحليق العيون خوفنه يطير لقطه من الفلم المهم جاء سويد يزحف لمي كالعاده عشان البسكوت ماله بالاثاره والافلام الله ياخذه
قال بدر ابي بسكوت (( فككها من جد الناس لقرنديزر وذا يبي بسكوت والله حاله ))

المهم واطالع به من رجله لراسه بكل كبرياء وغطرسه (( مدلع )) قلت سويد اقول الفقها وطس وراك تر امني ناقصك
نعنبوك ماتجي الا عشان البسكوت ومير الطعه ويقوم من الغرفه زعلان ويبتسي ويناشق وحالته حاله يوم سمعت صوت المناشق بعد واصيح نااااااااااااااااااااااااااااانتي بسرعه قفلي الباب عنه لايتحسف خابره دايم على ذالحال

(( كني مصختها صح )) الا مصختها من جد والله ماعاد بقي االا اجيب سالفة ابوي يوم تطاق ذك اليوم مع راعي المعرض (( وده يقولهها ومستحي ))

هههههههههههههههههههههههه

خلاص ببدا والله العظيم تووووبه بدون مقدمات شباب خلااااااص قررت ابدا

------------------------
كان ذك اليوم دايسكي بالحديقه مع هيكاروا وماادراك ماهيكاروااااااا يوووه نعنبو ذالبنت يهي مزيونه (( اقول اشوف المشاغبات بدو يحمقون كرتووون ياهوووه وش ذالغيره ))
المهم جالسين يتبادلون اسمى وانبل وارق واعذب آيات الحب (( وده يلف ويقلبها رومانسيات ))
وياحبيبتي وياحبيبي ومن هالحتسي الي انتم تخبرونه (( ياكثر الي حافظينه بسبت النصب ))

هيــــكارو ::حبيبي دايسكي
دايسكي ::يااااااااااااااااااااعيون دايسكي وياكرشه والله لبيه ياحياتي
هيــــكارو :: تحبني
دايسكي :: اقول قم بس قم نعنبوك وشوله اطابق واراكض ورا هالوحوش ؟؟ كله عشانك الله ياخذ ذالخشه
هيــــكارو ::طيب لاتدف تر اغزل مو مطاق انت ووجهك
دايسكي ::حياتي ام سوري والله غصب عني ذالوحوش والمخنز ذا الي اسمه دكتور امون خلوني اصير عصبي
هيــــكارو ::مقدره ياحياتي والله عارفه قد ايش تتعب عشاننا
دايسكي ::اييه الله يعين هيكاروا وربي فقدت اعصابي شكلي بهاجر للمريخ
هيــــكارو ::أهيء أهيء أهىء ليييه دايسكي كسرت قلبي لهالدرجه احنا يااهل الارض مغلبينك وصرت تفش خلئك فينا ومنتا طايق ولو مره تتحكى معانا (( متأثره بالالبي سي ودها تقلب ياباني ))
دايسكي ::ايييييه خليها على الله والله العظيم جوالي ضيعته بمطاق امس مع المروح الي يسمونه تانشمكخان (( جايب الاسم من راسه ))
هيــــكارو ::يؤ يؤ يؤ يؤ معقول دكوسي (( تدلعه ))
دايسكي ::اجل اتسذب عليك لاوالفاتوره ضربه بسبب هالمطاقات والشركه خربو بيتي الله يخرب بيوتهم ماكأننا ماوطنين يرفقون فينا (( ايه هين وش جابك لنا ياباني يتميلح مسوي سعودي ))
هيــــكارو ::حبيبي لاتشيل هم ابوي يعرف الوزير وبخليهم يقسدون لك الفاتوره
دايسكي ::مالت عليتس انتي ووجهك احسبك بتقولين بسددها عنك
هيــــكارو ::حبيبي روحي لك مو بس الجوال
دايسكي ::روحك خليها لك انتي فيك شده تسددين جوالي والا لا والله مالاقيها غيركن يبنات المدارس لامصاريف ولا شي وشعليكن وانا نص راتبي يروح بنزين وزيت لطيارتي قرنديزر والله حاله العن ام القهر
هيــــكارو ::ليه غيران مني ؟؟
دايسكي ::اقول تراك مصختيها كل ماجينا للحديقه نتغازل قلبناها هوش وش قصتك انتي لاتخليني انقز اجيب قرنديزر ثم والله لتلعنين الساعه الي عرفتني فيك فاهم
هيــــكارو ::هىء هىء هىء (( مالها الا المناشق والتبكبك عشان تكسر قلبه ))
دايسكي ::حياتي انا اسف والله غصب عني طلعوني عن طوري من القهر (( قلب كويتي الولد ؟ كثر منها قرنديزر كويتي )) (( والله لو عندهم قرنديزر ان يطلعون ابو عدي مع مخرج 4 الي حول ايران ))

دايسكي ::بيب بيب بيب بيب بيب بيب (( بيجره يدق ))
هيــــكارو ::وش ذا دايسكي
دايسكي ::اندري والله مادري لاتشكين فيني والله شكله امون مو وحده . طمر ابو الشباب لاقرب كبينه ودق
دايسكي ::الوووووو
دكتور امون ::لواااه تمسك بطنك وينك فيه يالوووح من اليوم ادورك نعنبو ذالخشه انت والي يعتمد عليك
دايسكي ::ويني فيه ؟ وانت شدخلك حتى اموري الخاصه بتلاحقني فيها والله حاله
دكتور امون ::اقول لاتنسى انت ووجهك تاني اصرف عليك من حر مالي يالوووح ومرتبك يحلم اكثر الناس انه يحصل عليه
دايسكي ::اقول والله لو اشتغل بكبينة اتصالات انه اصرف لي منك وطيارتك ذي الي بليتني فيها
دكتور امون ::اقول لايكثر عجل علي الحيوانات ذولا توهم متصلين وجايين لكوكب الارض بيطاقون معكم واهو بالمره شف الزلابه كوجي وينهو طاس ياحب ذالبزر للدوجه والختخته بالحارات
دايسكي ::لاحووووووول ياخوي انت كل من هب ودب ودق عليك وقالك ترانا جايين نتطاق معكم صدقت وبعدين مالقيت الا ذالوقت ياخوي وربي الواحد مايتهنا بحياته بسببك تدري ويني فيه وايش وضعي
دكتور امون ::ايه ادري كالعاده مع بنت القزم ذا الي يسمونه دامبي الله يقشعه من الارض كانه مقرفني هو وشنباته المهم يابو الشباب زي ماقلت لك عجل ودور الزلابه دايسكي ترا ماعاد بقي عن جيتهم شي عجل ماودي اطول معك ترا الوقت مو وقت تخفيض يالوح والجوال هلكني بسببك انت وكوجي كل يوم اطارد وراكم تقول بساس (( قطاوه ))
دايسكي ::والله ماقطو الا انت ((طبعا بينه وبين نفسه ))
دكتور امون ::اسمع دايسكي غير زيت قرنديزر قبل تروح ترا ه منذ مبطي ماغيروه مني ناقص اوضبه واجدد مكينته فاهم ياتنح
دكتور امون ::طو ط طوط طوط طوط طوط (( فصل الخط ))
دايسكي ::الوووو يالوح اسمع تراك فقعت مرارتي (( داري ان الخط فصل بس يتميلح قدام هيكاروا ))
هيــــكارو ::دايسكي بشر عسا ماشر
دايسكي ::الا شر وعيش مرررر (( قلب بدوي بكرتونه ))
هيــــكارو ::وراااااااااااو (( تقلد بنياتنا يااهل القصيم ))
دايسكي ::اقول اعاد تمططين فمك تسذا ورااااااو ورراااااو ترا والله شهر وفمك كبر البعير
هيــــكارو ::أهيء أهيء أهىء ((( ياحبها للبكاء ))
دايسكي ::اقول والله مني داري الاقيها منين والا منين مابين الدلخ ذا دكتور امون وبين السربوت دايسكي الي ماشوفه الا بالطياره والا وقت صرف الراتب ومابينك انتي . تراك عليتيني بروحي الحين يوم تشاهقين وتبكين ليييه ابفهم والا خلاص تعودتي يلعن ام الهقر (( قالها وهو عجل والا الصحيح القهر ))
هيــــكارو ::اوريك عند ابوي ان ماعلمته ماكون هيكارو
دايسكي ::يويييييييييييييلي ويلاه منك انتي وابوك اقول لاتخليني القطه بشنباته واعلقه بميدالية قرنديزر ترا والله ماعاد اطيق شوفته على الارض


++++++++++++++++++++++++++++++++++++++++++++

اوووووووف واله تعبت لكن الجزو الثاني او الحلقه القادمه عقب تبيع باكر

الاخوان الي مايفهمون تشفيرنا اقصد الاسبوع الجاي وممكن لو تكاسرون اخليه عقب يومين





هههههههههههههههههه


البدر:D