ياصاحبي جيتك أبشكي لك عن أحوالي

جيتك ومدامك رفيقي ليـه أطولهـا

العلم ومافيه يـاأول وآخـر آمالـي

عندي رساله ولادري كيف أوصلهـا

اللي سبتني وانـا مـن قبلهـا سالـي

أبيك توقف معـي وتـروح تسألهـا

وش فيها تفتح علي أبـواب عذالـي

وتحمـل النفـس حاجـه ماتحملهـا

وش فيها رغم الوفـا تتركنـي لحالـي

وأنا لجفاها تركـت الدنيـا بأكملهـا

وأن كان هذا زعـل علمهـا يالغالـي

ماكان قصدي ورب البيـت أزعلهـا

علمها واللي يخلـي قلبـك الخالـي

عن ضيقتي وين وصلت من تجاهلهـا

علمها كم لي وأنـا ماشلـت جوالـي

كله على عشـان ماأقلـب رسايلهـا

علمها وشلون لامـرت علـى بالـي

أروح وأضـم صورتهـا وأقبلـهـا

وعلمها كيف أنشغل عن كثرة أشغالي

واسرح وأغمـض عيونـي وأتخيلهـا

علمها عنـي وعـن همـي وغربالـي

علمها في كـل حاجـه فـي تجهلهـا

وان شفتها دنقت تبكي علـى حالـي

أنسى الكلام وتذكر كلمـه وقلهـا

قل شاعرك :بيعتذر ويعاهـدك تالـي

أنـه يرتـب حساباتـه مـن أولهـا

ويقول:حتى القصيد اللي علـى بالـي

والله ماعـاد أكتبـه كانـه يزعلهـا