راسي اللي من هل الموقف يشوش = وفكري اللي قال فـ الابيات عاش
يوم صارت فـ المعاني قلت خوش = ابتدى للناس ترتيب النقاش
شي واضح ما بدا فيه الرتوش = ابتدى بالعقل ماهو بالهواش
العلوم اللي لفتنا فـ الدشوش = خلت العاقل من القصه يداش
طاش وإلا جعل عمره ما يطوش = حقنة الفكر الخبيث وسم طاش
ما ذبحنا غير تصريح الجحوش = وماش من زود الغبينه ماش ماش
النفوس اللي تغيرها القروش = الله انّه لايبارك فـ المعاش
تبت ايدي من ينوش الدين نوش = كيف دين الله من الساقط يناش
كيف يالساقط على العالم تهوش = والله انّه شي يقهر كل جاش
وكيف تخدش عالم الدين بخدوش = يوم بعت الدين من اجل العراش
اللحى زينة هل الوجه البشوش = والنوايا طيبه يا لون شاش
الله اكبر هزت كبار العروش = سببت في عالم الكفر ارتباش
ديننا دونه طوابير الجيوش = ما يزعزع ركنه الثابت خشاش
يالمغفّل بارد الوجه الغدوش = استمع لي زين يا مال الخراش
ما ذكرت الموت والدنيا حروش = تبرد الاطراف من عقب الرعاش
وما ذكرت الحشر والعالم تطوش = صابهم من هول هالمنظر غباش
ليت تذكر من تحوش الناس حوش = كنهم من حولها مثل الفراش
والله انك غير فعلك ما تحوش = ودينك اللي اقترضته صار كاش
قبل لا تطلع حياتك بالفشوش = لا يجي في بالك الدنيا بلاش