ماشاء الله تبارك الله ماشاء الله لاقوة الا بالله اللهم انا نسالك الهدى والتقى والعفاف والغنى

روابط مهمة و مفيدة : لاستعادة الباسورد الرقم السري || كيف يتم تفعيل الاشتراك || أفضل طريقة لطلب كود تفعيل على البريد

ღ سُمُـوّ الأَمِـيِرَة ღ · #1 12-17-2006

والله انك مبدع انت و فانيلتك!!(روووووعه)

السـلآم :

قصهـ روووعهـ للكآتب / شطيط

و ليس ل د. فانيله علاقي كماذكرت سمو الاميرة و العهده على الرواي فارس الفوارس

اتمنى تعجبكمـ ..

خطاب توجيه معلم جديد

* الأسم: فنيله بن نغيمش بن حنتوش المتشلـّوط !!!
* رقم الاحوال المدنية: ....................
* مسمى الوظيفة: معلم تعليم عام
* قرار تعيين: 759/8
* موقع المدرسة الموجّه إليها: الرياض- حي الفيصلية ( الغالـّة)
* المرحلة: الثانوية
* التخصص: لغة عربية
* المرتبة: بند 105

داعبت سطور هذا الخطاب سعادتي وبهجتي فأخذت أجري فرحاً وسروراً في نفود بلدتنا معانقاً اتربتها وطعوسها الساحرة .. تلك البلدة التي احتضنت طفولتي حتى جعلت مني معلماً مربياً للأجيال و محوراً رئيسياً في بناء المجتمع وقدوةٍ لأبناءه..

ولم تقتصر الفرحة بي فحسب .. بل إن العائلة شاركت ابنها البار هذه المناسبة السعيدة بإقامتها حفلاً إقليمياً في المزرعة شمل تهاني وتبريكات الأقارب والأصدقاء لي متخللاً العبارات الصبيانية: اخس يا فنيله .. نقلوك للرياض وحطوك في الفيصلية مره وحده وغيرك رافسين تعيينهم للخرخير في صحراء الربع الفاضي!! .. تكفى يا فنيله لا تنسى ترقـّم لنا بنات الفيصلية إذا شفتهم !! <<< الشرهه عالحمار اللي عازمهم !!

وفي صباح يوم السبت.. حزمت حقائبي و ارتديت أفضل ملابسي ولبست نظارتي الكبيرة ثم ركبت مع احد (الكداديّن) و اتجهت إلى العاصمة الرياض مبحراً في مخيلتي عن رقي وتحضر هذه المدينة وبالأخص الفيصلية التي لطالما رأيت شموخها و رونقها وإبداع تصميمها في التلفاز .. فكيف بسكانيها ؟؟<<< يا جماعة الخير وضحوا لهالبريء الطاهر تراني رحمته !! ...

وحنا ماشين في الطريق.. شوي الا و نشوف باصات نقل المعلمات متقلّبه والبعارين متمددة جنبها تخرخر دمان .. تأملت في أحد الباصات المنكوبة والقى رجل بعير متفحّمة داخله في فم وحده من المدرسّات اللي ناشبتن في الطبلون .. وجنبها زميلتها متكوّمة في عبايتها ومتعلقه عالباب!!.. ناظرت عالجنب واشوف الباقي طالعين مع الدرايش يلفظون أنفاسهم الأخيرة ..

كمل الكدّاد طريقه بحكم انه متعود على هالمواقف الروتينية اللي يشوفها يومياً !! .. وبعد معاناة السفر وصلت للرياض وجلست عالرصيف ثلاث ساعات احاول أوقف تاكسي و المشكلة كل من قلت له "حي الفيصلية" على طوول يحط بالأول ويكنس عالبنزين.. وش السالفة ؟؟ <<< قسم بالله على نياته هالولد .. تكفون اشرحوا له قبل لا يتقطع قلبي عليه ..

تعددت محاولاتي مع سائقي الأجرة حتى صادفت أحدهم متردداً بين الحاجة للنقود والخوف من المكان المقصود فغلبت عليه الحاجة وأعلن موافقته بصوتٍ ضئيل خالطه التوتر والندم .. ركبت معه وسرنا في طريقنا إلى حي الفيصلية في صمتاً رهيب تشوبه نظرات السائق لي بكل شفقة و رحمة وكأنني سأذهب إلى الجحيم هههههههههههه <<< وتضحك بعد !!

وعند وصولنا لمشارف الحي .. توقف السائق واعتذر عن إكمال الطريق معللاً بذلك خطورة المكان !! .. فأخذت أنظر حولي وإذا بي اسأل السائق : وش ذا المزبلة .. وين الناطحة ؟ .. فأجابني ضاحكاً: ما حطوا برج جوال علشان يحطون لك ناطحة .. اقول بس عطني حسابي 50 ريال وتوكل على الله .. اجل ناطحة سحاب هنا خخخخخخ!!...
قطع حبل تساؤلاتي ذلك الرقم الغريب وقلت مستهجناً: ليش 50 ريال؟؟ .. فأجابني: انت الظاهر حبيب وما تدري عن البلاوي اللي تصير هنا.. يكون في علمك هالحي من أجرم الأحياء في الرياض ومشهور باللحووج والمخدرات والحشيش والعنف يعني توصيلتي لك هنا تعتبر مجازفة !! .. قاطعته: طيب والناطحة؟؟ .. صرخ في وجهي مستنكراً : يا خوي ذبحتنا بهالناطحة ... اصحى يا غبي .. تراك منتب في العليا... انت في حي حقير اسمه الفيصلية و مشهور بالغالـّه .. يعني بالعربي اللي جابك هنا لعب عليك يا المخفة !! .. ثم اختتم غاضباً: فهمت يا حمااار !! ..

انطفىء نور سعادتي وانهارت طموحاتي وأمالي عندما هبطت كلمات ذلك السائق كالصاعقة تصفع خدي و تيقظني من حلمٍ كنت قد غرقت فيه ..

نزلت منهاراً من السيارة أبحث عن المدرسة في طرقاً متصدعة وأزقةٍ مظلمة ومنازل موحشة و رديئة .. فاستوقف نظري جلوس أحد داكني البشرة من السكان (لابس ثوب رمادي يسحب تحته سروال رياضة أصفر مخطط بأحمر) وينظر لي بعينيه الحارقة نظراتٍ مرعبة ومريبة شبيهه بنظرات مصاصي الدماء لفريستهم!! ..

تجاهلته مسرعاً في خطوتي و مرتعداً من نظرات السكان الذين خرجوا من بيوتهم وازدادت كثافتهم لرؤية ذلك الكائن البشري الأبيض الذي اقتحم مسكنهم بكل جرأه وسذاجة .. فأخذت اجري واجري حتى وصلت إلى المدرسة التي لا تقل رداءتها عن رداءة المباني الأخرى في هذا الحي الدنيء ...

دخلت غرفة المدير حاملاً خطاب التوجية فأندهشت من جدرانها المليئة بكتابات طائشة: ( يا روحي يا عتاب ) .. (زمانك لو صفا لك يوم لا تحسب صفت لك كل الأيام) .. (انا فدا عودك يا بو رايش) .. (يا ليتني طير ثم اطير واقب في حصة التعبير) .. (ابو صالح سرى ليله هل الدمع من عينه).. (تحية لطخمات الغالـّه ) .. (استاذ ناصر على تبن) .. (ذكريات شلة الأنس وما وراء الكواليس فصل 3/3 فرع المروجين) <<< كل هذا على جدران غرفة المدير اجل جدران الحمامات وش مكتوب عليها ؟؟ ..

لم تكن تلك التفاهات الطائشة سوى حافزاً لي كي أجعل من هؤلاء الشرذمة طلاب مثاليين و مصلحين في المجتمع بحنكتي التربوية !! ..

دخل علي المدير ( ابو تركي) وعطيته الخطاب ثمن قام يناظرني بتمعن وقال: ما شاء الله مشخّص و مسكر الياقة وباخ عطر وماسك شنطة .. فعلاً مدرس مثالي .. بس صدقني كلها يومين وتداوم بسروال سنة هذا إذا ما تعرضت لحالة تحرش من عوامل التعرية اللي هنا!! .. قاطعته بغلظة: عفواً وش اللي سروال سنة وتعرية يا استاذي الكريم.. احترم البيئة التعليمية لو سمحت!! .. ضحك ساخراً: هذا كلام كل المستجدين في البداية .. شف وانا اخوك نصيحتي لك اترك هالمدرسة أحسن لك ولا بتشوف شي ما يسرك من (هالزومبي) اللي هنا!! ..

نفخت صدري بكبرياء وثقة عمياء: بالعكس.. اللي يسوونه الطلاب شي طبيعي وخصوصاً انهم في مرحلة مراهقة .. واحنا كتربويين لازم نبدّل سلبياتهم إلى ايجابيات ونكون قد المسؤولية يا استاذي الكريم!! .. ضحك المدير ساخراً للمره الثانية: لا يا شيخ .. اقول بس تذكر اني نصحتك!! ..

بعدها أخذ القلم و كتب أسفل الخطاب: نفيدكم علماً بأن المرحوم قد باشر العمل في المدرسة ليوم السبت سائلين المولى عزوجل ان يجعلها أخر الأحزان ويلهمه الصبر والسلوان ويفرج عن كربته ويجمعه بأهله وذويه وهو بصحة وعافية اللهم يا حي يا قيوم فك أسره عاجلأ غير آجل يا سميع الدعاء !! ..

بعد ما وقـّع المدير أسفل الخطاب .. قام يجيب الختم من الدولاب اللي وراه .. وفجأه لمحت ورقة دفتر ابو اربعين على ظهره مكتوب عليها (( انا حمار)) !! ... قلت له: يا ابو تركي فيه ورقة وراك مكتوب عليها انا..!!.. قاطعني بربكة: ايييه الله يهديهم عيالي دائماً ينسون أوراقهم معي <<< والله من النصب !! ..

ختّم الخطاب ثمن عطاني جدولي وعلى طول رحت أباشر عملي بحماس منقطع النظير .. وانا ماشي في الأسياب اسمع همسات المدرسين وهم يقولون: وصل الضحية 30 وصل !! .. تجاهلت خزعبلاتهم المغرضة و كملت طريقي للفصل بكل جاهزية و همه دءوبة ..

دخلت الفصل وأخذت انظر (لأربعين) طالب بنظرات ٍ قاسية وصارمة تحتويها الشدة و رباطة الجأش في هدوء وسكون اثبت للجميع جدارتي وجبروتي في السيطرة على الطلاب .. وفجأه وقف طالب يدعى (علص) وهو يشير لنظارتي الجميلة قائلاً: شوفوا شوفوا الدرايش اللي لابسها على عيونه !! .. تلاشى الهدوء شيئاً فشيئاً وتعالت ضحكات الطلاب الهستيرية وبدأت افقد السيطرة على الفصل حتى انقلب رأساً على عقب ..

حاولت اهجّد الفصل واسكّته ما فيه أمل .. شديت عليهم بحدة نظراتي وبرضو ما فيه أمل .. ضربت عالطاولة ببطش يدي ويا جبل ما يهزك ريح!! .. قاطع (علص) ضحكات الطلاب قائلاً: شوفوا شوفوا شلون شنبه عريض واصل لأذانية وخشمه طويل واصل لرقبته كن وجهه علامة زائد !! .. عقبها الفصل انفجر ضحك وانا اللي تقمط نظراتي الحادة وبدا وجهي يسيح من التحطيم !! ..

كرر الحقير (علص) مصالته: أستاذ فيه خمس طلاب عندهم قصر نظر ممكن نجلـّسهم على حواجبك ويشوفون بنظارتك الكبيرة !! .. تمزّعت بطون الطلاب من الضحك .. وانا اللي عيوني بدت تستسلم لنظرات الأسى و الحزن وبدت ثقتي بنفسي تهتز خصوصاً وانا اشوف براطم الخوال تزبّد وترج يمنتن ويسره من أثر الضحك ..

استجمعت قواي واسترجعت جزء من ثقتي مبتسماً في وجه الطلاب: هههه ماشاء الله دمكم خفيف .. طيب يا شباب .. مزحنا قبل شوي وضحكنا مع بعض.. الآن انتهى وقت المزح و نبي ندخل في الجد!! ..
بعد ما قلت تلك العبارة رفعت رأسي شامخاً بكل فخر واعتزاز قائلاً : معكم أستاذ فنيله بن نغيمش بن حنتوش المتشلـّوط !! .. ما امداني أكمل كلامي الا ويقاطعني الوقح (علص) وهو يقول بعجلة: المطر المطر !! .. سألته: وش اللي المطر ؟؟ !! ..قال بذهانة: هذا حل اللغز اللي قلته قبل شوي !! .. قلت له بكل براءة : عفواً هذا أسمي موب لغز !!..
لم أكد أكمل توضيحي إلا وتعالت ضحكات الطلاب المستميتة فأدركت بأن (علص) يسخر مني للمرة الرابعة ..

رفعت نظارتي بجدية ومشيت بين الصفوف قائلاً: خلاص اسكتوا يا شباب .. ترى اللي تسوونه عيب .. يجب علينا أن نتحلى بالأخلاق الحميدة ونقتدي بخُلق السلف الصالح فنحن شباب الأمة وعصبها .. نحن شبــ .. دررررررردب !! <<< صوت طيحتي عالبلاط بعد ما عكرفلي طالب حيوان اسمه ( جويعد) !!

وقفت وانا انفض الغبار عن ثوبي والطلاب يضحكون على غبائي!! .. قفلت اخلاقي ميه وثمانين درجة .. و رحت لـ (جويعد) قلت له بعصبية: انت اللي حطيت رجلك قدامي !! .. حط عينه في عيني وقال: ايه انا .. عندك شي؟؟.. قلت: لا بس بغيت اتأسف لك على رجلي اللي صقعت في رجلك بدون قصد!! <<< الخوف سلطااان !!

رحت عند السبورة وعطيت الطلاب مقفاي علشان اكتب مقدمة تمهيدية للمادة .. ما دريت الا و يسنتر على ظهري قوطي ببسي فكك ست فقرات من عامودي الفقري !! .. التفت بصعوبة بالغة وعطيت الطلاب نظرة يغلب عليها الغضب والقسوة ثمن شلت القوطي وحطيته في الزبالة قائلاً: أخي الطالب اجعل من فصلك نظيفاً ومميزاً برمي العلب والقاذورات في القمامة!! .. شوي ويمحطني على فمي نفس الطالب بقوطي ببسي ثاني فرّق ضروسي عن بعضها وهو يقول: يعني قصدك نرميها هنا خخخخخخخخخخخخ!!

استخدمت أسلوب الترغيب باللين في التعامل والتحفيز على الإنضباط مقابل زيادة الدرجات وتبسيط الإختبارات ولكن دون جدوى .. استخدمت كافة الأساليب والطرق التربوية وأيضاً دون جدوى !! ... وش الحل ؟؟

رن جرس الحصة وتوني بطلع من الفصل الا ويناديني ( جويعد ) : استاذ استاذ !! .. قلت له : نعم !! .. قرب مني وهو يتمحص في وجهي قائلاً: فيه شيب في شعر خشمك !! .. تفاعلت معه بحماس: وين فيه ؟؟ .. قرب أكثر وهو يأأشر بأصبعه على فتحة خشمي الرائع: شف هنا !! .. ما أمداني اتبّع مع اصبعه الا و يصفق خشمي بكتاب رياضيات وهو يردد ضاحكاً: لعبت عليك لعبت عليك !! ..

شلت شماغي و نظارتي اللي طاحوا و مسحت الدم من خشمي ثمن طلعت لغرفة المدرسين وانا مسكر اذني من ضحك الطلاب على سذاجتي !! ..

اول ما دخلت للغرفة حسيت اني داخل قسم العظام في مستشفى الشميسي .. شفت معظم المدرسين مجبسة يديهم ورجليهم وحاطين شاش على وجيهم و انواع الكسور و الرضوخ والتشوهات .. وكل واحد يقول يالله نفسي ..

انعزلت على حده وطلّعت دفتر التحضير أحضّر للدرس الأول .. شوي ويلفت نظري مدرس مجبّسة رجوله جايني يزحف على بطنه من أخر الغرفة وهو يقول: هلا والله بالضحية رقم 30 .. هلا بك في مهنة الضغط والسكر والقلب و جميع الأمراض المستعصية .. معك اخوك المرشد الطلابي (صالح) !! .. قلت بريبة: ونعم والله !! .. بعدها سكت وانشغل في عميلة الزحف الليين وصل لي وجلس جنبي وهو يلهث: تصدق اني اشفق عليك .. أحد يدخل التدريس في هالوقت .. من أول المدرس له هيبة وشخصية لدرجة انه إذا مشى في شارع , الطلاب يمشون مع الشارع الثاني من الخوف.. لكن هالحين وزارة التربية صارت في صف الطالب و سحبت كل صلاحيات المدرس وهيبته بحجة التوجية والإرشاد بزعمهم يقلدون التعليم في اليابان .. يعنبوكم وش جاب طلاب اليابان لطلاب الصمّان ؟؟

قلت له : لا لا انا اختلف معك يا أستاذ ( صالح) لأن التوجية والإرشاد هو الطريقة المثلى للتعامل مع الطالب وليس الضرب والعنف .. (يمكن تكون الوزارة غلطت انها نشرت خبر منع الضرب في الجرايد و حسست الطلاب انها في صفهم ضد المدرس) .. لذلك انا اشوف المفروض على الوزارة انها راسله القرار كتعميم داخلي لمدراء المدارس وفي كل الحالتين القرار بيوصل للمدرس صاحب الشأن <<< تصفيق حار لهالمدرس المثالي تكفون !!خخخخ

أشار (صالح) بإصبعه على إحدى الزوايا المظلمة قائلاً: شايف المدرس اللي ينتف في شعره و يكلم نفسه هناك !! .. نظرت إلى رجلاً مأساوي و مطأطأ ٍ رأسه إلى الأرض فقلت بفضول: ايه وش فيه ؟ .. قال: هذا كان من أفضل المعلمين على دفعته .. متمكن من المادة و يشرح بذمه وطبعاً المسئولين ساحبين عليه وجاحدينه حتى كلمة شكر ما عطوه .. وفي يوم من الأيام تبلى عليه طالب حاقد كان راسب عنده واشتكاه بتهمة التحرش الجنسي .. بعدها عينك ما تشوف الا المسئولين والمشرفين التربويين جايين ركض من الوزارة وانواع التحقيق والإستقعاد اللين صدر قرار بفصله ولولا الله ثم الطالب اللي رحمه واعترف بالحقيقة والا كان هالمسكين يبيع مساويك عند بوابة الوزارة !!

سكت (صالح) لوهله ثم أردف ساخراً: المشكلة ان الطالب شييين و عليه وجه بيضاوي كنه حوض فرنجي لو تشوفه ان تقضي حاجتك على وجهه .. ياخي إذا أمه اللي هي أمه كانت دائماً تلخبط وتلبّسه الحفاظه في وجهه .. ماتبي الوزارة بغبائها تلبّس هالمدرس المسكين تهمة !! ..

ترررررررخخخخسس <<< اي صح نسيت اقولكم ان الجرس مكسور !!

اوه رن الجرس.. عن اذنك يا استاذ (صالح) عندي إشراف فسحة !! .. حملت حقيبتي وذهبت إلى المقصف شغوفاً بلقاء الطلاب ومتحمساً لتنظيمهم متجاهلاً ما سمعت ورأيت!!

وصلت للمقصف .. واشوف طلاب المدرسة كلهم متكدسين على فتحة وحده وانواع الطقاق والمدافف !! .. حاولت اسيطر عليهم ما قدرت .. صارخت بأعلى صوتي وبرضو ما قدرت .. وفجأه جت على بالي فكرة تربوية جهنمية بعد ما لفت نظري طالب طوووويل القامة مفتول العضلات سوداوي البشرة شاحب الوجه هادي الطبع يدعى ( جاسر) وهو يخترق الصفوف والطوابير

تقدمت للزحمة واخترقت براثنها اللييين وقفت قدام ( جاسر وانا رافع راسي مية سنتيمتر عامودي واقول له: باين عليك أعقلهم وأشطرهم لذلك انا قررت أعينك " نظام" تشرف معنا على الطلاب في الفسحة والصلاة وطبعاً ما راح نقصر معك بالمعاملة و الدرجات !! .. نزّل (جاسر) راسه ميتين سنتيمتر أفقي وناظرني بنص عين ثمن دعس على وجهي وكمل طريقه ولا كأن فيه مواطن صالح واقف قدامه!! .. بعدها توالت دعسات الطلاب على وجهي اللييين طبعت أرقام مقاسات نعالهم عليه ..

طلعت من الزحمة زحفاً بعد جهداً جهيد ثمن وقفت وانا انفض الغبار عن وجهي .. فجأه حسيت بغصه و اتفل تفله مريرة طلع معها زبيرية واحد من الطلاب ناشبه في حلقي !! ..

لبست شماغي ويجي عندي البثر (جويعد): استاذ شف فيه شيب في شعر خشمك !! .. قلت بذهانه: علينا يا (جويعد) التسذوب.. لا تخاف منيب شايف شي!! .. قال: اصلن وشلون تشوف اللي داخل خشمك يالغبي !! .. ويمحطني بطراااق على خشمي للمره الثانية وهو يردد ضاحكاً: لعبت عليك لعبت عليك !! ..

شلت شماغي من الأرض ونظارتي اللي نشبت بين حدايد المقصف ومسحت الدم من خشمي ثمن رجعت لغرفة المدرسين متغلق وضايقن صدري.. توني بجلس الا ويدخل علي المدير: استاذ فنيله عندك حصة إنتظار في فصل 3/3 !! <<< هالحين انا ما صدقت اطلع من هالفصل وافتك من غثاثة ( علص) .. ارجع له وحصة إنتظار بعد !!!

اخذت شنطتي بقوم .. فجأه لمحت ورقة على ظهر المدير وهو طالع مرسوم عليها بالبخاخ سهم يوصّل لنقطة ارتكاز المنطقة الوسطى ومكتوب فوق السهم ( معبر جـِمال ) !!... قلت: يا ابو تركي فيه ورقة وراك مكتوب عليها.. !! .. قاطعني بربكة: ايييه ذا العيال الله يصلحهم ما ودهم يتركون عادة نسيان أوراقهم معي !! <<< وش ذا العيال اللي مخططين على أبوهم !!

دخلت لفصل 3/3 و تفاجأت بحادثة لم يسبق لها مثيل في الميدان التعليمي!! .. شفت الطلاب يعمّرون حشيش ويشربون عيني عينك !! .. يشربون حشيش في الفصل !! .. حشيش يا جماعة الخير !! ..

ما قدرت امسك نفسي من العصبية وانفجر عليهم غاضباً: لو سمحتم ممنوع التدخين !! <<< بالله عليك !! ورا ما توزع عليهم منشورات توعويه عن التدخين وتغني لهم" سلامتك سلامتك نود لك سلامتك " ..

الزبدة .. ان الطلاب فقدوا من الشرب.. وتمسك معهم يسبحون في بحر ..عقبها قاموا يوخرون الطاولات علشان يسبحون !! .. اللي يطب صاروخ عالبلاط ويشمّع فيه وهو يحرك يدينه ورجلينه قائلاً: يمديكم عالسباحة !! .. وخويه وراه يلحقه وهو يزحف: عوووو جاك سمك القرش!! .. واللي جالس على الأطراف مسوي بينقذ خويه من القرش وماد له طرف شماغه وهو يقول: اسحب اسحب!! .. واللي يمشي وراهم وهو يقول: وخرر انت وياه عن السفينة !! .. ما امداه يقول "سفينة" الا ويطمر عليهم طالب من فوق الطاولة وهو يقول: تششششش ( بزعم انه موج )
بعدها قام طالب اسمه ( صنيتان) يلاحقهم وهو يصارخ : طوووط طوووط خفر السواحل وصل .. وقف على جنب يا راعي السفينة!!.. جلس ( صنيتان) يحوس ثمن طلع برا الفصل ويشطف غرفة المدير وهو يردد: طووط طووط !!.. كمل طريقه وطلع من المدرسة وهو ما زال يردد: طووط طووط !! .. ومن بعدها ما عاد رجع !!

ناظرت للزاوية وأشوف ( جويعد ) جالس يدف الجدار .. وخويه جنبه يسأله: وش فيك ؟ .. قال: ببعد الجدار ما ابغاه جنبي!! ... قال: اجل دفـّه بعيد لا يطيح علي!! ..
تحمدت ربي على نعمة العقل والتفت للجهة الثانية وأشوف ( علص) واقف قدام المكيف يناظره بعصبية وهو يقول: لا تنفخ!! .. وجنبه ( جاسر الطويل ماسك له زاوية و جالس بكل هدوء وسكينة يقرا كتاب ( عذاب القبر ) !!

جاني ( علص) وهو يشفط الزقارة بعمق وينفث في وجهي قائلاً: خذ اشرب؟ .. قلت: لا معليش انا ما اشرب!! .. ما وعيت الا وهو قاضبني من رقبتي وينشّبني في السبورة: اشرب لا افقـّع وجهك يا حمار !! .. قلت بخوف: سم طال عمرك !! <<< لا تشرهون على سلبيتي لأن الوزارة فارضتها على المدرس بموجب قرارها السامي رقم 3602/31 بتاريخ 13/9/1417: " يمنع منعاً باتاً على المعلم حمل العصا أو ضرب الطالب حتى لو ألقاه أرضاً "

راعيت رزقي وأكلت تبن بموجب القرار السامي المذكور أعلاه .. وأخذت الزقارة وشربت بالإكراه .. عقبها بديت أفصل وصرت اشوف بحر قدامي وسفينة وسمك قرش وكل الخرابيط اللي فوق صارت واقعية !! .. شفطت الزقارة شفطتين وثلاث اللييين حسيت بشد عضلي في مخي وبديت اعيش دور البحر من الفقده... بعدها فصخت كل ملابسي ما عدا سروال السنّه وأرقى على طاولة وأقوم أهز خصري بكل خلاعه بزعم اني احد حسناوات شاطىء ميامي !! .. الطلاب قاموا يصفقون لي ويطبّلون عالطاولات وانا اللي اتحمس وأردح رقص بسروال السنه واسترسل بالغناء مغرداً: ماشربش الشاي اشرب ازوزا انا ... سو يا سو حبيبي حابسو .. بوس الواوا خلي الواوا بح .. فرشي التراب يضمني وهو غطائي !! <<< خروج عن النص خخخخخخخخخخ !!

دخل علي استاذ ( صالح) ويجرّني من اذني برا الفصل قبل يصير ما لا تحمد عقباه !! .. ركبت معه في السيارة وانا أغني: أمه نعيمة نعمين خلي عليوه يكلمني!! .. غثيته بهالأغنية طول الطريق الليين وصلنا لبيته وانا مازلت مستمر في التغريد!! .. دخلنا البيت واطيح في الصالة من الدوخه!!

قمت من بكره الصبح اتلفت يمين يسار احاول اتذكر وش صار امس .. وش اللي جابني هنا .. وما لقيت جواب!! .. طلع استاذ (صالح) من غرفته وشرح لي اللي صار !! ..

استحقرت نفسي بعد اللي سمعته .. ولكن كالعادة تغاضيت عن الأمر ثمن رحت للمغسلة اغسل وجهي استعداداً للداوم !! .. ناظرت في المراية وبديت اتأمل في شخصيتي المسالمة!! .. فجأة طلعت لي شخصيتي العنفوانية في المرايه تقول لي: إلى متى بتصير ذرووق و جبان .. إلى متى بتصير زلااابة يا زلاااابة!! ..قلت: لااا انا منيب زلابة !! ..

أخذت شخصيتي العنفوانية تردد: يا زلابة يا زلابة!! .. فأثارت جنوني وخرجت من بيت الأستاذ (صالح) أركض غاضباً و مستنكراً تلك الكلمات القاسية!! ..

وصلت للمدرسة ودخلت الحصة الأولى منهار نفسياً .. أول ما دخلت لقيت (علص) والطلاب يناظروني بنظرات مكر ودهاء ذكّرتني بشرفي المهدور أمس !!

فتحت الكتاب بشرح الدرس الاول .. ويقاطعني (علص): كيف سروال السنّه ابو نغيمش ؟ .. بعدها قام يتطنز علي ويرقى فوق الطاولة ويرقص وهو يغني بسخرية: ما اشربش الشاي اشرب ازوزا انا !! .. والطلاب يناظرون فيني ويضحكون ضحكات ماكره حطمت نفسيتي وخلتني البس نظارة شمسية علشان اخفي دموعي الغرّاء !! ..
سكت (علص) ثمن قال: الله يهديك يا ابو نغيمش .. شاري نظارة شمسية بعد .. كان ركّبت ستاير لنظاراتك الطبية اوفر لك خخخخخخخ!!

بعدها همست على مسامعي شخصيتي العنفوانية: يذب عليك وتسكت له يا زلابة .. وخرر الله يلعن اللي مقضبك الطاره !! .. فجأه شعرت بشخصيتي العنفوانية تتغلغل في جسدي وتركل براءتي وطيبتي خارجاً !! ..

استفحل جسمي واستنشطت عضلاتي وقلبت عيوني حمر!! .. رميت النظارة والشنطة وفتحت الياقة و رفعت كمومي بكل سربته .. ثمن اتجهت لـ ( علص) بجبروت لا مثيل له !! .. فجأه اعترض طريقي ( جويعد ) : استاذ فيه شيب في شعر خشمك !! .. عطيته نظرة حارقة وامحط خشمه بأقرب كرسي ثمن رفعت رقبته وأشنقه بسلك المكيف !!

دب الذعر والخوف في صفوف الفصل وانا اللي أجرّ (علص) من أذنه لمقدمة الفصل و أفتح فمه قدام الطلاب وأأشر على سنونه: وش ذا السوس يا قذر .. كل هذا سوس .. يعنبوك تاكل زفلت انت .. وبعدين وش ذا الثوب الوصخ .. يعنبو بليسك ثوبك لو اصفطه انكسر من الوصاخة يا وووصخ .. رح اغسله بفازلين ولا عاد تجي للمدرسة الا وانت نظيف يا شرذمة !!

جلست اذب على ( علص) الليين طاحت حنوك الطلاب من الضحك عليه!! .. وبعد ما بردت حرتي بالذب عليه , مسكته تصفيييق الليين قال ربي الله .. عقبها قاموا علي ست طلاب مسوين فزعة لخويهم بيضربوني وانا اللي استسعر عليهم تصفييق وتسطير خليتهم عظة وعبرة للمدرسة كلها <<< ست طلاب ياتايسُن خخخخخخ !! ..

ومن يومها قررت اني اضرب قرارات الوزارة بعرض الحائط .. وصرت ما ادخل لأي فصل الا بعجرة امغط بها المشاغبين ( المئيوس منهم تربوياً ) اللييين انضبطوا الطلاب و رجعت المسيرة التعليمية للمدرسة وهيبة أعضاء هيئة التدريس واحترامهم .. وصارت المدرسة تشارك في مسابقات الإلقاء والمسرح و دوري مبارايات الكورة مع المدارس الثانية لدرجة انها أخذت المركز الثاني على مستوى جنوب الرياض ..

وبعدها بيومين .. استدعتني الوزارة للتحقيق وأحالتني على لجنة قضايا المعلمين بعد ما ثبت اني احمل العصا واضرب الطلاب.. وبعد إجراءات مريرة طبقوا بحقي عقوبات نظام تأديب الموظفين !! ..

أثناء ذلك همست على مسامعي شخصيتي العنفوانية: يا رجال كل تبن انت وهالوزارة .. والله انت الكسبان على هالعقوبة .. اجل لا شكر ولا حرص ..و صاجينا بالبيئة المدرسية ونص المدارس عندنا فصولها مطبخ ومقلط حريم وغرفة نوم حتى الحوش قالبينه ملعب بدون ما يبعدون الخزّان اللي ما فيه رجل طالب ما شمعّت فيه ..

رحت لمكتب مدير التربية و التعليم وكتبت استقالتي له ثمن قضبت الباب .. فجأه استوقفتني عنفوانيتي قائله: لحظة لحظة نسيت شي مهم !! .. رجعت لمكتب المدير وصفقت جبهته بالدباسه ثمن طلعت راجع لقريتي العزيزة!!

مسكت طريق صلبوخ .. وشوي الا واشوف واحد يمشي ويردد " طووط طوووط" .. ويوم دققت فيه الا وهو ( صنيتان) اللي طلع من الفصل وما عاد رجع !!

كملت طريقي .. وأشوف باصات نقل المعلمات متقلّبه عالطريق وانواع الإصابات والضحايا المتوالية واليومية!! .. تبادلت ضحكات السخرية مع شخصيتي العنفوانية على هالوزارة اللي فالحه تراقب دفاتر التحضير وكشوف غياب المعلمين وتاركه أرواحهم تهدر يومياً !! ..

المهم .. وصلت لمزرعتنا.. ومن يومها وانا اسقي الزرع والقـّح النخل واقابل هالعنز والخرفان بكرامة محفوظة ابرك لي من مقابل طلاب بدون كرامة

برايفت حبايبي المعلمات :

نصيحة من محب غيور .. ابعدوا عن حي الغالّه .. وانتبهوا على أنفسكم .. الا ورا ما تتركون التدريس وتجون عندي في المزرعة نلقّح النخل ونحلب الماعز ونقطف من أشجار الزيتون ونلعب " انا الذيب باكلكم" نراكض ورا بعض في حقول القمح والرز !! <<< يعني حقير ونصاب بعد خخخخخ !!

برايفت اخواني في الله المعلمين <<<

انتم أعمدة هذا الصرح العظيم .. أنتم النور في الظلمة .. انتم أساس بنيان هذا المجتمع .. ثابروا يا أخواني .. خلكم في التدريس مهما تصفقتوا وانداست كرامكتم تراكم تحملون رسالة سامية .. وإذا تبون نصيحتي اطلبوا نقل لحي الغالّه <<< ما يبيهم يجون للمزرعة خخخخخخخخخخخخخخخخ

قفلـه

متى نشوف مدارس بدون اسوار ( جدران )

تمت

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه

!KAZANOFA! · #2 12-17-2006

والله ميت من الضحك

ههههههههههههههه

بس تبين الجد هذا مو حي الفيصلية ذا حي شيكاغو

وترا فعلا هذا الحي مشهور بالاجرام ..............

يعطيك العافية

معلم الورد · #3 12-17-2006

القصة مره طويلة

بس تظحك

مشكووووووووووووووووووووووووووووووووووووووووورة

أميرة بكشتي

تقبلي تحياتي : معلم الورد

كويتي وعلى البحر بيتي · #4 12-18-2006


	°l\|\|l°بسمـ اللـهـ الـَـرٍحمنـَ الـرًحَـِـيمًـ °l\|\|l° تبين الصراحه يام كشه ماقريتها لكن بقولج مشكوره وماقصرتي حبي وتقـديـري،، سيــوفـ

ღ سُمُـوّ الأَمِـيِرَة ღ · #5 12-20-2006

تسلمووون ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طريقة عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر رد
تابع لقصة مريامي وسلطان	موت وميلاد	منتديات الفسحة العامة	10	08-10-2006 04:00 AM
لمحبي الكاتبه.. حمران النواظر(جديدها نظره حب)..لاتفووتكم	ملاك الغيد	منتديات الفسحة العامة	31	05-05-2006 02:27 PM
اذا دخلت وقريت صدقني راح تدمع عينك........	نهاية عذاب	منتديات الفسحة العامة	2	08-26-2003 07:10 AM
جاك والدختورنـاصـر وعبووودي في المغرب	ارشيـف	ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه	11	03-14-2003 11:11 PM
ياخوان الله يرحم الي جابكم لاحد يدف وشيلوا السكاكين	ابو عمر	منتديات الفسحة العامة	17	12-08-2002 03:55 PM