بس قولي وش سالفتك يعني اول مره تشوف بنت ؟ قلت لا والله شبعان من البنات لكن اول مره اشوف انثى ابتسمت وبدأت على وجهه علامات الخجل واحمرت وجنتاها وتحمست وقلت لا شعوريا يازينك ياناه
كانت كلمه ياناه معبره بقوه طبعا كلكم تتسألون وش معناها وهي تعني التشديد في معنى الكلمه يعني انتس زينه بقوه ثم صفقتني بذلك الكف وقالت عيب لا تقعد تغازل انا اكبر منك قلت وهل الحب يعرف عمرا ؟ قالت والله يا ان ماتركت هالحتسي الماصخ ياظلال غازي القصيبي اني لا اموسرك بلي الغاز لين تعرف تلوي شدوقك لحقت عمري وقعدت اضحك قلت لا بس كنت اختبرك انتي تحبين الفصحى ولا قرويه تحبين الهرج العامي قالت لا انا احب الانسان الغير متكلف واللي على طبيعته قلت اجل ابشري من بكره اجيكم بالسناوي ولا يحتاج اكشخ قالت اقول خلاص عاد عطيتك وجه يالله روح لبيتكم ياشاطر وبكره اذا رحت تجيب لبن مر علينا يمكن نبي شي

المهم رجعت البيت واكملت يومي وانا مستانس بكل شي صار مع وضحى وانتظر اليوم التالي بفارغ الصبر واول مره اروح اجيب لبن من دون لا احد يقولي واشطف بيت وضحى والقا الباب مفتوح بس هالمره مافيه احد غريبه وش اللي صاير وادخل البيت مالقيت احد في الحوش واطلع يوم جيت اطلع الا صوت يناديني واطالع الا وضحى لكن هالمره الصوت صوت وضحى بس الشكل ماهو شكلها فاله شعرها ولابستن التي شيرت الوردي والبنطلون الجينز انحشت انا يوم شفتها ماهو من الروعه ولكن كنت استغفر واقول وش هالمنكر << طراه ان ذاك الوقت اللي تلبس بنطلون يمكن يكفرونها وهي تناديني تعال تعال وين رايح ماعجبتك يعني ؟ قلت الا بس وش هالخلاعه قالت وش خلاعته اسكت بعد انت انسان متحجر قلت اسمحيلي صح اني خاق معك للنعله بس ماتوصل لاني اغير مباديء قالت طيب انت تعال اجلس ويحلها الف حلال قلت طيب << من الخقه مايقدر يقول لا

جلست معها وقالت اليوم بعد بتجيب لبن ؟ قلت لا زبادي حلوه صح ؟ قالت وهي ملامح وجهها توحي بانها تقول وش الله بلاني في هالورع لا وبعد ماصل ههههههه دمك عسل ياحليلك وش رايك فيني اليوم قلت رايي فيك تعرفينه من ايام الروز الحمر انتي لو تلبسين خيشه محليك ربي << باين ماعندي اسلوب صح ؟

قطعت لحظه التأمل في بعض وقلت وضحى انا كاتب فيك ابيات البارح اقدر اقولها لك ؟ ابتسمت وقالت ماشاء الله تكتب شعر ؟ قلت لا والله بس من شفتك فيه مشاعر اتجاهك وقدرت اكتبها بس عاد تحملي ترا منيب شاعر قالت سمعني ماعليك كل شي منك حلو


تنحنحت شوي وقلت
من شافها وهي تشرّق ملابس
وده يصير في يدها لو فنيله
قالت بس بس لا تكمل الحين ماتعرف تعبر عن مشاعرك بشي افضل من هالمفردات ؟
قلت وش اسوي

شاعر صغير وعلى قدي
ما اعرف اوصفك ياوضحى


وتبسمت قالت ياحبيلك خلاص يالله روح بيتكم قبل يجون اهلي ويقولون وش مقعدك معه قلت يووووه بدينا حركات بنات السويدي ؟ اهلي ومدري وشو ومن هناك تلقى داق على رقمك واحد ثاني ؟ وتبين تصرفيني << تحيله للدلوخ اللي دايم يتصرفون بهالتصريفه بعد الساعه 12 بالليل


جا اليوم الثالث واللذي كان بمثابه يوم تاريخي في حياتي عندما طلبت من امي تحضير ملابسي عشان اخذ الشاور فقالت لي ياوليدي الله يصلحك وش هالملابس اللي يبي لها تحضير انت ملابسك معروفه لبسه وحده مغير تتروش وتلبس نفس اللبسه متى صار عندك ملابس نحضرها لك رديت قائلا يابنت الحلال وراك من اليوم تحاولين تطلعيني في نظر الناس اني ملحط ترا فيه ناس يقرون موضوعي ذا بعدين يمكن يجيني تقييم مثل اللي قيم امير المملكه وقال ماعليش شكلك قروي وماتعرف البودي شوب ردت علي قالت الدعوه تسذا لا والله ياوليدي دروجك مليانه همول << همول معناتها ملابس ترا لغير الناطقين باللهجه البدويه البحته


قلت طيب وين الشامبو قالت اي شامبو فيهم حق العبايات ولا اللي تتروش به ؟ قلت وش الفرق كلها اتروش بها قالت حق العبايات مخلص بس فيه الشامبو سلفكرين بالبيض قلت شي كويس على الاقل تكون ريحتي بيض بدال ريحه هالخياس اخذت لي دش ولبست ملابسي ودزيت لبيت وضحى لاني اليوم ناوي اصرح لها بحبي وان مرحله الاعجاب عدت وادخل البيت والقى وضحى تتبسم لرؤيتي وعيونها فيها شي طبعا كلكم تفكيركم بيروح بعيد وبتقولين يمكن غمص لا الله يلوع تسبودكم عيونها فيها حزن وقعدت اسولف عليها وانا ابربر طول اليوم عليها وهي مفهيه قلت وضحى ادري انك اليوم خاقه معي عشاني متروش بس ترا لاحقين على التفهيه في الاشكال خلتس معي وركزي في كلامي انا تراني احبك ياوضحى طالعت وضحى وضمتني قالت وانا بعد احبك هي قالتها ولا ماقالتها انا قمن اناشق على قميصها واقول اخيرا قالت احبك وهي تدفني بقوه قالت ورع قلنا لك نحبك ونموت فيك بس مو لمرحله انك تناشق في قميصي قلت بشويش ياللي ماتلبس الا من فرزاتشي << طبعاً فرزاتشي ذيك الايام كان موضه مدري الحين هو موضه ولا لا << قروي وتوهق ترا


قلت ترا راس ماله قميص من سوق حجاب لا تقعدين تسوين علي البنت الهاي كلاس << لمهم قعدت تضحك قالت ياحبي لك وانت حمش خلاص لا تزعل ناشق وخذ راحتك طالعت فيها وقلت ايه ناس ماتجي الا بالعين الحمرا


راحت الايام وانا ووضحى نعيش اجمل ايامنا على الاطلاق وفي ذلك اليوم سألتني سؤال قالت انت تحبني صح ؟ قلت ايه وقالت تبي تتزوجني ؟ قلت ايه قالت بس انت توك صغير قلت انتظريني لين اكبر واجي اخطبك من اهلك قالت والله ؟ قلت ايه انا ابي اتزوجك وانتي قالت انا بعد ابيك وعضت اصبعها وركضت تدخل بيتهم يعنني مستحيه قلت في نفسي الله من الحيا اللي مدري وش يبي هالحزه وقعدت افكر طول الايام وانا معرس على وضحى وبدت الدراسه وبديت اجتهد عشان ما ارسب ولا شي واحاول اخلص بسرعه عشان الحق على وضحى قبل احد ياخذها مني لكن في اخر زياراتي لوضحى كانت تخفي عني شي وفيها شي ماهي مثل قبل تضحك وتسولف بس كنت ما ابي الزم عليها واسئل قلت يمكن اشياء خاصه

الى ان جا ذلك اليوم وانا راجع من المدرسه الا اشوف بيت وضحى قدامه سياره تحميل عفش واشوف جمسهم قدام السياره وكل اهلها فيه وقفت مذهول لعده دقائق بعدين قعدت اضحك قلت شكلها كاميرا خفيه حبت تسويها في وضحى لم افق من صدمتي الا يوم شفت الجمس بدا يحرك وانا اطلق لساقي العنان وما اشوف قدامي الا صوره وضحى وسوالفنا وكل الاشياء اللي كنا نسولف فيها واركض بكل سرعتي وقربت من مؤخره السياره واشوف عيون وضحى وهي تناظرني وتبكي مغلوب على امرها واتمسك في السياره من ورا واقول وضحى تراني احبك صح بتعرسين علي ؟ وهي تهز راسها وتبكي تمسكت بالجمس لين وصلنا الدائري ووقف ابوها قال ننعبوا ابليسك ترا منيب فاتحن هالجمس ملاهي من شفتك في الحاره وانت متجود احسبك بس تبيني اوصلك لاخر الحاره وبتنقز عند اخوياك ووصلت الدايري وانت متمسك وش فيك رديت قلت وش هالذكاء الخارق يا ابو وضحى يعني بالله مامسكت معك توقف الا هنا ؟ كان وقفت من اول شي وسألتني على العموم انا كنت بس ابيك توصلني للدايري وبعدها الله يستر عليك لاني ابي اتمشى ومشيت وقبل لا امشي كتبت على قزازه الجمس من ورا ماراح انساك ونظره النظره الاخيره لعيون وضحى ومشيت وانا غير مصدق بما حدث مشت الحياه وانا كل يوم امر بيت وضحى واتذكر الين كبرت ووصلت لعمر الزواج واهلي يقولون بنخطب لك وانا اقول اذا تعرفون بيت اهل وضحى روحو اخطبوا لي ولا غيرها ما ابي لكن السؤال اللي اسئله نفسي ؟ وضحى على وعدها لي ولا نستني ؟



^^
تصدقون عاد على هالنهايه انا ودي اصيح مدري عاد عنكم



في الختام وضحى في كل بيت وفي كل حاره في السعوديه كلنا وحنا صغار كل واحد خاق مع بنت جيرانهم او اي وحده في عمره لكن السؤال هل الخقه ذي تكبر معهم ؟ ولا ينسون ؟