الفتنه بكامل مباهجها

قبل ما أبادا
كان يا ما كان مبدأ
كنت أخون ومدري اني كنت أخون
أي مبدأ اللي خذلني قبل ما ابدا ؟
كيف ؟ مدري .. ليه أخون أجمل عيون ؟
ياعيونك ..
آه منها ..
وين ابلقا العذر منها ؟
وآه مني ومن قساي
هي قناعاتي خطاي ؟
او خطاي اني توشحت الكفاف
وارتشفت من المعاناة الجفاف
وارتويت .. ارتويت
لين صدقت المبادئ واقتنعت
أن أجمل حلم طاف
وما دريت ..
ان حسنك غار من طاغي غلاك
وأن حرفي طال لكن ما سراك
ما اهتدي الدرب لبهاك
وما تغرب في فياف الطرس لجلك
لا ولا ضل بغواية سحر نجلك / تيه كحلك
ذي حقيقة حرفي اللي لا غواك ولا اهتداك
اعذريه
×××
واعذريني
للخيانه الف باب وألف معنى
للوفاء يا للأسف ما غير باب
قلت اسافر في عيونك واجتمعنا
أنا والشوق وخيالي والسراب
وارتبكت ...
كيف ابتهور واخونك ؟
×××
قبل أغامر
كان يا ما كان نظره
قبل ما اثمل وقضت اتعس شعور
عضت ابهامي ندم / ميلاد حسره
ليه أنا اجهل وصفهن ’’ هن خرس / حور ’’ ؟
وانتهى المشهد بعبره
×××
عندها بس .. اكتشفت
باغترابي طول عمري عن عيونك
كنت أخونك ..
كنت أخون الشمع في عز الظلام
والا وش معنى اهيم وما أهيم ؟
×××
كان قصدي يا ملاك اصلاً غلاك
ايه همي هم والغاية رضاك
وتاه حظي واعذريني ما لقاك
وما بقالي من الكفاف الا الكفاف
والقصيد وحسرة الحلم اللي طاف
وطيف نظره
كلها استغراب / ما أدري كلها استفهام
وادري صعب القى العذر منها
آه منها
جردتني من الأماني
قبل ما ابدا