... صيفـ هذا العامـ أسوأ صيفـ عشتهـ فيـ حياتـيـ ...

صيف هذا العام أسوأ صيف عشته في حياتـي=باختصار اكثر .. مررت بمرحله جدا حزينـه
كنت عايش في صراع كبير من ذاتـي لذاتـي=كنت ضايق .. واشعر انّي بعد ضيّقت المدينـه
كنت اخطّط وانتظر صيف السنه هذي واحاتـي=لجل اعيش اجمل إجازة حب ما بينـي وبينـه
الحبيب اللي مـن اول كـان أجمـل ذكرياتـي=وصار أبشع ذاكره في داخـل اعماقـي دفينـه
والله اشوى لو صدمني فجـأه بغيـر امنياتـي=ولا أموت بأمنياتي غـدر مـن طعنـة يمينـه
ضيّق الدنيا بعيني صدق.. واحتـرت بجهاتـي=كنت أشبه ما أكـون بحـال قبطـان السفينـه
لا ارتفع موج البحر والريـح هبّـت والتفاتـي=كان عكس الإتجـاه اللـي يحسّـس بالسّكِينـه
راكبين اثنين عرض البحر والمركـب مؤاتـي=للغرق .. أو .. واحدٍ منّا يضحّي عن ضنينـه
يعني كان الحل واحد .. يامماته .. يا مماتـي=البلى في ناتج الحلّيـن.. امـوت مـن الغبينـه
قال: ويش الحل؟ قلت: التضحيه من واجباتـي=لازم آضحّي عشان اعطيك بعـض الطمأنينـه
قال: إفرض لو خذاك البحر.. قلت: اعلن وفاتي=قول: مات فلان لجل اعيش .. والمولى يعينـه
قال: طيب.. لا رحلت شلـون بتهنّـى مباتـي=قلت: فكّر في رجوعي بس .. وانطرني لحينـه
وانتبه تنسى و تكفى كل شـي الا .. وصاتـي=إنتبه للقلب تكفى .. قـال: فـي أيـدي أمينـه
قمت اودعْه بْسكات ودمعتـي تشـرح سكاتـي=وماذبحني ضيـق إلا يـوم انـا اقبّـل جبينـه
وارمي نفسي للبحر واختلّ في موجه.. ثباتـي=والبحر لبعيد اخذْني وصرت لامواجـه رهينـه
لكن الله مدّ في عمـري.. ونجّانـي بصلاتـي=ما وعيت الاّّ وانا مابين شطّ .. وبيـن طينـه
والحبيب اللي نجى .. ماكـان متوقـع نجاتـي=جيت من بعد الغياب المُر.. ادوّر عـن حنينـه
ما لقيته في المدينه وانشغل بالـي .. واحاتـي=ورحت من باب انشغالي اسأل الجيران.. وينه؟
قيل: سافر في إجازة حـب دام الصيـف آتـي=جاه غيرك ياخـذه مـن قبـل يوميـن بْيدينـه
وقتها دنّقت راسي حـزن .. حسيـت بشتاتـي=وقتها حسيت نفسـي طفـل .. أهلـه بايعينـه
وش حصل لابن اللذينا؟ ولاّ انا وش هي سواتي=مـا تقـول الاّ كأنّـي ذابـحٍ لـه .. والدينـه
ذا وانا اللي لجل عينه ما بخلـت بتضحياتـي=والقهر .. لابارك الله فيه .. مـا بيّـن بعينـه
دام حتى ما حفظ لي عشرتي واحسن جزاتـي=ويش برجي منه؟ لابـو عشرتـه.. لابوسنينـه
كان هذا احساسي اللي دوم اعيشه وسط ذاتـي=ولاّ انا ما جيت بحر ومانـي قبطـان السفينـه
بس انا اللي كنت اخطط لجل احقـق امنياتـي=في إجازة صيف ضاعت غدر من طعنة يمينـه
رحت بيتي.. مـا معـاي الاّ أقلّـب ذكرياتـي=واقفل الغرفه عليّ .. وأسمـع اغانـي حزينـه
لجل ذلك.. كان هذا الصيف الاسوأ في حياتـي=لجل ذلك.. كنت أتعس شخص عايش في المدينه