من حضرتك عشان قلبي تذله

سو اللي برأسك ولاتذكر أسباب *** لاصرت بايعني توكل على الله

مابيني وبينك مشاريه وعتاب *** شف دربك اللي جيت منه تدله

ماراح تغلبني لو الحب غلاب *** من حضرتك عشان قلبي تذله

في ذمتي لجعلك عبرة للأحباب *** لين الخل يتوب عن جرح خله

زلاتك اللي مانفع فيها حساب *** لاجيت أعددهن ثمانين زله

أحرجتني بين القرايب والأحباب *** كن الجفا سيف بوجهي تسله

ماكنت أقصر فيك من كثر الإعجاب *** يومك تساوي عندي الكون كله

كنت القريب وكلهم كانوا أغراب *** حتى القمر لاغاب شفتك محله

خلاص لاترجع ترا خاطري طاب *** أبي طرا اللي كنت عايش بظله

رح وإعتبرني واحد أذنب وتاب *** ماني بثوب تلبسه ثم تمله

مايجتمع بالحب صادق وكذاب *** رزقي على الله وأنت رزقك على الله