مرحبا باللي اقلطوا علينا
ما اطول عليكم (اخلص--ابشر) مرة من المراريت اللي تسنها مريتات كبيرة(افلقوني اذا فهمتوا شي) كنت مشغوووووول ولا ادري وش اللي مشغلن خبركم عطيل تسلاب المهم في يوم من الأيام كان الوقت بالليل والدنيا رمضاء وأنا ميت من البرد وتوي جاي من عزيمة كنها عرس بس العرس فاظي، المهم بعد ما جيت من العزيمة تذكرت إني جوعان قبل ما أتعشى في العزيمة (بس أنا شبعان هالحين ) يعني ما أعرف وقت الجوع متى (أفهموها بأه) المهم مريت مطعم بطريقي وطلبت تسع نفر رز ونصف دجاجة (أخوكم جوعان) ودبيتها رز حتى طلع مع شكمان سيارتي(من الشبعة) المهم رحت للبيت أبنام ومعي السن توب حقي (طبعاً بعد العشاء علشان يسد الفراغات وأعلم إني ولد نعمة) بعد ما خلص العصير وأنا أمشي بطريق الملك فهد قمت ورميت السن توب (على فكره باقي فيه أشوي) ورحت للبيت لأني بديت ما أشوف الطريق من الشبعه وصلت البيت وحطيت رأسي أبغى أنام وبعد شوي ما دريت إلا واللي يطق الباب حيل قلت وش ذا يالله عسى خير يمكن أم جيراننا تبي تولد ويبغوني أوديها للصحية، المهم فتحت الباب (وش أشوف؟؟) ست طعش عسكري واقفين عند الباب ومعهم أثنين وعشرين جيب ضد الرصاص(مصفح) وثلاث دبابات وسيكل عشرين (جوبيتر)وواحد معه سلسلة مفاتيح (ماله دخل تراااه برى الموضوع وانا بريء منه ليوم القيامة)، والعساكر إللي معه هاون واللي معه مضاد للطيرات أنا أول ما شفتهم جان عقر البقر ، قلت يمكن يحسبوني أسامه بن لادن (بس بيني وبينكم الصره ما خرت وسروالي ناشف أخوكم شجاع) المهم بعد ما فتحت الباب وشفت اللي شفت قال لي واحد أوعى تتحرك أي حركه حاضرب بالمليان، قلت سم وأبشر رفعت إيديني وكلبشون بعشرين كلبشه أو واحد وعشرين ماني متأكد وركبوني الجيب وعلى طول للسجن ، ويوم وصلنا السجن وهم ينزلونن من الجيب (انا مغميات إعيوني ولا أشوف شيء) سمعت واحد يقول جبتوا المجرم ،صراحة طاح قلبي بس حيل أخاف تنفلت (أخوكم حتى الأن شجاع) وهم يجرونن للظابط عطاني طراق خلاني أشوف سور الصين ويلحقني الثاني وأشوف عمارة المملكة وسور الصين بجنبهن واحد ويدخلوني السجن وكل ما مريت على واحد عطاني طراق إلا واحد أخلاق ظربني بحنية مع (بلا إحراج) أنا كل همي ودي أعرف وش أنا مسوي ،المهم أنا حتى الآن ما صحت ، آخر واحد فيهم معه إيد ولا كريك جيت أبسأله عن السبب عطاني طراق نساني الصياح ويعطيني الطراق الثاني وأتذكر الصياح وأنسى السؤال ،المهم دخلوني السجن وفكوا الكلبشات (أنا بعد الكفوف والطراقات نسيت أسمي) المهم بعد ما صحيت من هالطراقات قلت أتمشى بالسجن ونتعرف على الموجودين ،والقى هاك الواحد جالس يصيح قربت لمه قلت خير انشاء الله ليش تصيح مديون وداج قال ياليت قلت له وش السبب تصيح ترى الدنيا ما تسوى قال أنا لي ثلاث وعشرين سنه بالسجن قلت ليش قال صادم بوابه صلحه قال ماهي هذي القظية قلت وش القصه قال أنا معي تريله وكنت ماشي ومسرع شوي وأنفقع الكفر القدامي اليمين وانحرفت التريله على عائله جالسه على الرصيف خفت على العائله وخرت التريله وصدمت بوابة واحد من التجار وياليت إني داخل بالعائلة أصرف ،قلت طيب وش التهمه ، قال التهمة يقولون لو التاجر موجود ما سافر براء وطلع كان صدمته ومات ، قلت الله يعينك ورحت وخليته ،والاقى غرفه بابها أحمر وعلى الباب دريشه صغيره وناظرت مع الدريشه وألقى واحد معلق بالمروحة راسه تحت سألته قلت أكيد داخل ببوابة التاجر ما سافر براء قال ياليت قلت والسبب ،قال رامي قوطي ببسي بطريق الأمير سلمان قلت ساده ومشيت وخليته ، واتذكر إني رامي علبة سن توب في طريق الملك فهد (هالحين من يمسك الصره ) واركظ للحمام وادخل بدون ما أسكر الباب(أي باب؟) وبعد ما نزل كل اللي بمخي طلعت والقى العسكر موقفين واحد على الجدار ومصوبين الرشاشات لمه والظابط جالس يعد علشان يرمون بوقت واحد(حنين الظابط ما يبغى يعذبه؟) سألت اللي واقف عندي قلت وش مسوي هالمجرم ؟ قال رامي فاين بطريق الملك فهد (أي صره ؟)بعد ما رموه التفت الظابط وقال وين أنت ؟ ندورك من زمان أمسكوه وربطوه وحطوه على الجدار ، العساكر ما صدقوا خبر على طول حطوني على الجدار وصفوا مستعدين كلن متولم قام الظابط يعد وغلط بالعدد قاموا العساكر يظحكون وهم يظحكون رنة الساعه عند راسي وصحيت من النوم
وحلفت ما عاد أرمي أي شيء في الشارع
وعلى فكرة لاتعلمون أحد لأني أخاف يمسكونن ويقولون ليش ترمي علبة سن توب بطريق الملك فهد بالحلم


ملاحظه: السروال بعد ما قمت من النوم صاير رطب يعني (أخوكم جبان) ;)

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه