رحله صيد خكاريا (قصه خيال علمي)

في احدى اليالي السود والموحشه
المليئه بالعواصف الهوجا
وصوت صفير الريح(نفس الصوت اذا كنت ماصكيت دريشة غرفتك زين وكان فيه هوا قوي)<=== يلعن ام التوصيف ياشيخ

كنت انا وصديقي العزيز ابو شوشه مهجدين الاسود وملبخين الفهود
طالعين نصيد جرابيع وكانت اول مره نطلع نصيد فيها
طبعا كنا راكبين بالوانيت الاحمر حق جدي الهنقلين موديل 74طبعا مافي مسجل عندك رادو روسي تطلع الانتل مع الدريشه
والمكيف قوي مره لانه يجيك مع كل مكان من التنسيم بس كان يعاني من مشكله صغيره انه يهرب ركاب
يعني نمسك خط الرياض9 اشخاص ناصل البر 2 والثالث متعلق بالصدام الي ورا
وكنا انا وابو شوشه لنا 4ساعات ندور جربوع واحد مالقينا
وحنا نتمشى في البر قال ابو شوشه انا اسمع صوت تلفزيون ونتبع الصوت ونلقا جربوع جالس يناظر قناه فلاش مسلسل
((الخطر معهم))<====ماعندهم الا هو

طبعا انا وصديقي ابو شوشه اخلاقيات المهنه ماتسمحلنا نهاجم العدو من الخلف
وقررت انا و ابو شوشه بعد اجتماع مغلق اننا ننزل ونعلم الجربوع اننا فيه علشان يهج<===واضح مهجدين الاسود
ونزلنا وصادفنا السيد جربوع وقلناله السالفه كيت وكيت قال والله اني متكسر بس بعد مسلسل( الخطر معهم)
خلص المسلسل وقام الجربوع ونزل الوزره وطق الشورت والشرابات وكنادر الكوتش(مانع الانزلاق) وخلا الفنيله العلاقي
ونحتريه لنا ربع ساعه يصخن الاخ

.......(((وبدا المطارد))).........

ودعس الجربوع وحنا عيا لايمشي الوانيت ياولد ادعس امش وانا داعس عليه الين ماطلعت المكينه لسانها
غرزنا ياولد واكبس للجربوع ويجي قلتله بالله نبي خدمه بسيطه نبيك تدف معنا الله لايهينك قال الجربوع يله ويدف هو وابو شوشه ويمين يسار وطلعنا
ويركب ابو شوشه وانزل من الهبله تقل شايف جني ابو شوشه شوشته طايره <== حاط جل على شعره ومع التراب وقفومغبر وجه واتعوذ من ابليس واقرا المعوذات واركب واقول للجربوع يله هج
ويدعس الجربوع قدامنا وحنا وراه ومن قشعه لقشعه وانواع الجروف وانواع شبوك الغنم وانواع البنقاليه الي عند الغنم
والجربوع انواع التحويس بنا وناكلكم هكالجرف الي مابعده ويطير الوانيت ويتقلب عشر قلبات الا ربع<===تراني عادهم
ولاصحيت الا على كفوف الجربوع وانا بالصندوق واصحى واقول ابو شوشه وينه وندوره انا والجربوع نص ساعه
((اجودي هالجربوع))ونلقا ابو شوشه متعلقة شوشته بقشعة عضرس(شجرة شوك) وش يفكه عاد
ونحاول انا والجربوع نمعطه لاكن مافيه فايده شوشته شابصه ويقول الجربوع خل نربطه بالواير ونسحبه<===جازتله الفكره
واربطه مع رجوله وادق سلف ويشتغل الوانيت اصلي
واتله بواحد ويصارخ ابو شوشه من شدة الالم واوقف وارجع لمه وانواع الدمان تطلع من شوشته وابو شوشه يصارخ
واتذكر ان معي بالعده صاروخ (منشار كهرب لفك الحديد ) واخذه واحاول اقص شوشة ابو شوشه وبلعنة الجدف قصيته
واخذت ابوشوشه وادهن راسه بزيت فرامل والف عليه خرقه<=== وش اسوي مامعي عبله اسعافات اوليه
وبدا ابو شوشه من عقب زيت الفرامل اذا عطس تطلع منه ريحت (فحمات)

المهم تعاطف معنا الجربوع يوم شافنا ماعندنا خبره بالتمقنص ودرى اننا ماعندنا ماعند جدتي وسلم نفسه
لنا بدون مقاومه والله عليه قلب هالجربوع

وتوته توته خلصت الحتوته...


*·~-.¸¸,.-~*بقلم ياكثرك*·~-.¸¸,.-~*

رساله لخووي يزن555 المفروض تغلق مواضيع الي ينقل الموضوع ولا يكتب منقوول
ولا تغلق الي ينقل مشاركاته الي كاتبها هو
واعذراني راح اترك هالمنتدى