ياسائلاً تسأل ترى الصوت مسموع=وما نشر بالصفحـه قريتـه بذاتـي
سويت لي مشروع من غير مشروع=والزمتنـي بالـرد دون شهـواتـي
اكيد عندك يا فتى الجود موضـوع=والا مسوي بـك زمانـك سواتـي
مسقيك من علقات الايـام قرطـوع=وتسمع صراعي فيـه ومغامراتـي
فان كان هذا الامر بالشكل والنـوع=خـل الامـر لمكـون الكاينـاتـي
ساير زمانك كان لك قلب وضلـوع=وارج الفـرج بايامـك المقبلاتـي
وان كان ما طاعتك خلك لها طـوع=ما انته بضاربهـا برمـح الزناتـي
اما سوالـك مـا جوابـه بممنـوع=ولو للحيـاه اسرارهـا الخافياتـي
اجاوبك لو ما معي منـك منفـوع=تحب تعرف كيـف قصـة حياتـي
حياة ذيباً عايـش الفقـر والجـوع=ليلـه يبـات وليلـة مـا يبـاتـي
اعيش عيشة ذيب والراس مرفـوع=وان قلّ مالي عـزّ نفسـي غناتـي

وقت(ن) يخلي صاحي الفكـر يحتـار=ويشوف من هـول الدهـر مايروعـه
تلقى الفقير وفزعتـه خمسـة انفـار=وتلقى الغني كـل الجماعـه فزوعـه
ياعاشـق الدنيـا تـرى مالهـا جـار=كما واحد(ن) في حبها طـار شوعـه
اليوم تضحـك لـه وتعطيـه الانـذار=وبكـره تلحويهـا محانـي ضلوعـه
خلك علـى صكـات الايـام صبـار=ويـوم(ن) يفوتـك لاتمنـى رجوعـه
اقفى على مافيه مـن خيـر واشـرار=نجم(ن) هوى مايندرى عـن طلوعـه
وماهي علـى كيفـك تمنـى وتختـار=ابعد على المخلوق مـن حـب كوعـه
يخبرك من ذاق المتاعـب والامـرار=وحـاول ولاجالـه زمانـه بطوعـه
ومرت به الدنيا على بعـض الاقطـار=في رحلة(ن) ماغيرت مـن طبوعـه
والله ماواطـن عيشـة الـذل والعـار=مـادام لـي شيمـه ونفـس قنوعـه
وقرش(ن) عزيز افضل من الفين دينار=من مصدر(ن) للذل يعلـن خضوعـه
ولو الوساده من صلافيـح الاحجـار=للراس اخير مـن التـرف والميوعـه

قالوا تعلمت قلت عنادوفراسه=أعاند النفس والدنياواصارعها
ودرست في مدرسة شيبت راسه=دنيا العنا اللي قصيفات مطامعها
تلميذها دايم تكتب بقرطاسه=وتعطيه يمنة دروس مايضيعها
والله عطانا نظر وشعور حساسه=ناخذ علوم المعرفه من مراجعها.
ونساير الوقت ونقيسه بمقياسه=ونواجه النفس بالواقع ونقنعها.
وترى حياة الفتي مهما قوى باسه=محفوفة بالخطر والموت تابعها.
من مبتدأ العمر حتى يلفظ انفاسه=يمر في مرحلة تكثر زوابعها.
أول حياة الفتى مشوار وعساسه=مسافة في عجاج العمر يقطعها.
وثاني حياة الفتى تدريب ودراسه=تصعب ظروف الحياة وينشغل معها.
وثالث حياة الفتى يرجع على ساسه=النقطه اللي بدأ منها يراجعها
يرجع لسن الهرم ويضيع الطاسه=ويزحف مع الأرض ويخطط شوارعها.
واليا تلاقت متونه وارتخى راسه=ضاعت جميع العلوم اللي جمعها.

وسلامتكم