## ابتزاز فهيدان ##

طلع اخوي فهيدان بيجر جديد وطبعا حنا اول مره نشوف البيجر فهيدان استغل نقطة الضعف هذي لصالحه وبدا مشوار الابتزاز الله لا يعوده من مشوار

يجي من الدوام ويمر على الصاله وعيوننا معلقه بمخباته ويقول شوفوا ترى العرض يبدا الساعه ست و تذاكر الدخول بخمسطعش والحين انا رايح انام لاحد يزعجني

واجي اركض وراه فهيدان فهيدان

خير وش تبي

خذ هذي الخمسطعش من الحين اعطيك اياها عطني التذكره

انتظر لين الساعه ست

لا لا ما ابي اوقف مع الزحمه قص تذاكر وحر و تخبر تكثر السرقات (( صدق ))

المهم و يعطيني ورقه صغيره مكتوب عليها تذكرة دخول الى غرفة فهيدان المزيون (( شايف نفسه هالفهيدان عقب البيجر ))

وانواع المزاحم عند غرفته الساعه ست وكلن جاي للغرفه يبي يشوف هالبيجر و يسمع صوته واللي يدخل معلق برقبته كاميرا حتى ياخذ له كم لقطه واللي جاي ومعه دفتر التعبير يبي يكتب موضوع تعبير عن البيجر هذا غير اللي جاي وماسك كورته يقال له رايح رحله

و بالغرفه يبدى الاستعراض الفهيداني المنقطع النظير

و يشرح وشلون اذا دخلت 111 يعني دق علي الحين و اذا دخلت 999 يعني مستعجل و اذا دخلت 333 يعني الله يقطع هالخشه 0 و غيرها من الرموز

وانت طالع يعطيك فهد كتالوج فيه صورة البيجر و انواع الرموز مع توقيعه الكريم وغير كذا يسمح لك ان تحطه في مخباتك او تمسكه شوي و يخليه يدق بيدك بس هذا تذكرته بخمسه ريال

بعد سنتين وهو معلقنا بذا البيجر طلع طلعه ثانيه وهي الجوال و يا الله على هالجوال وش سوا فينا

اشترى فهيدان جوال نوكيا و جا يقول لنا لا يفوتكم اليوم جوالي الجديد بس التذاكر بثلاثين وماجاني ونوم بذيك الظهريه جالس انتظر الساعه ست

يا ظهر ماطولك

و يوم دقت الساعه ست اجي كافخ ا لغرفة فهيدان قبل الزحمه و شفت بطريقي ابوي قلت لا يفوتك يبه فهيدان شرى له جوال تلاحق نفسك قبل ينتهي العرض
جا ابوي بس تاخر شوي مهوب سريع مثلي وبدخلته وقفه فهيدان وين وين يابو الشباب

يقولون انك جايب جوال معك

طيب عوايل الله يصلحك






الا هذا امي جايه و معها دلالها وسجادتها قال لها ابوي تعالي شوي ابيك في كلمه

ماني فاضيه اجل كلامك

الحين تكفين

ها وش عندك

دخليني ولك اللي يدفع لك التذكره

قالت تم بس بشرط

على عيني

تشتري لي بارد من بسطت فهيدان (( شفتوا وش كثر فهيدان استغلالي حط في غرفته ركن يبيع فيه كل شي مثل السيارات اللي بالعزيزيه )) المهم ان ابوي وافق و دخلته امي

و كل يوم وفهيدان يسوي عرض جديد يوم العرض الازرق ويوم الاحمر و يوم الذهبي و انواع الجرابات و الكفرات وانا احس اني تعلقت بهالجوال حبيته لدرجه مايتصورها عقل حيث كنت بالمدرسه وعندنا حصه كيمياء و العيال ينزلون الدرج وانا اهوجس بالجوال و افكر فيه ولاني يم الناس ولا حول احد و هووووووب اطيح على الولد اللي قدامي وهو يطيح على اللي قدامه و سلسله من السقطات والخبطات اللي مالها سنع لين وصلنا لواحد راسي جثه ووقفنا قبل نوصل الارض بعدها لفوا علي وانا ابي ارقعها (( ما تترقع )) التفت وراي مافيه احد انا اخر وحد و اقول مين اللي يدف

وصار الجوال حديث العايله واذا ابوي يبي يشجع اخواني على الدراسه يقول لهم ذاكروا واذا نجحتوا اوديكم تصورون مع فهيدان و جواله (( دزني على غفله )) وتجي امي تقول وانا مالي شي يقول لها انتي الخير والبركه وامي تمشي على استحياء ومعها دلالها (( ماتشوف امي الا مع دلالها خخخخخخ ))

وسعيدان يقول لعليان شفت فهيدان امس

لا ماشفته

فاتك مع السكسوكه الجديده انا اذا كبرت ابي اسوي زيه

وانا اشوف اصدقاي اللي يقول رحت عند الجمعه سنتر واللي يرد عليه امس مريت الفؤاد سنتر وانا اجي داخل شي اقول امس رحت الفهيدان سنتر .

وفهيدان ذا ذكي مهوب يكب عفشه كله بيوم واحد يعني يوم يوريك النغمات و يقول تعالوا لنا بكره نوريكم تقنيه المسد كول كول وبدا يسدد فواتيره من ارباح الجوال و ماتشوف الا سعابيلهم تقطر وفهيدان يقول يبه هذا الجوال تقدر تكلم منه وانت تلاحق عليان وانتي يمه تقدرين تكلمين منه وانتي تحكين راسك (( اول مره اشوف احد يحك راسه بيدين ))

بعد مده انتدب فهيدان برا (( راح و اخذ حبيبي معاه ))
<<< الحمدلله ان عنده مشاعر و احاسيس مثل الخلق و تحررنا من ابتزازه و استغلاله وطلعنا على الدنيا من جديد واثاريكم عايشين بنعيم مجمعات و منتزهات و شوارع يالله من فضلك (( خبره بالطلعه من ايام البيجر ))



الموفد على قولة الجده

1- لا تمشون ورا الموضه تراها مهيب دايمه
2- شركة الامتصاصات بيجيها يوم
3- انتبهوا وانتوا نازلين الدرج لا تسلون عن انفسكم
4- اذا رحت مكان وقالوا لك عوايل لا تنتظر امي تجي تدخلك
5- الموعد مثل ماهو الساعه ست عند باب فهيدان

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه