السلام عليكم ورحمه الله وبركاته ... وبعد
بقول لكم قصتي المشهوره اللي صارت لي في البطحاء في الرياض وهي ان ابوي يقول لي لا تروح البطحاء كلها بلاوي وبياعين ومن هالقبيل
المهم ان ولد عمتي كان عنده ديكورات جوال وكا مسوي له بسطه في البطحاء المهم قدر الله علي ذاك اليوم واروح معه ومن حظي الأغبر جتنا البلديه انا جيت التفت ابي اقول لولد عمتي البلديه الا هو منحاش ومخليني جيت ابنحاش واتعكرف في الكرتون واطيح ومسكتي البلديه مو مشكله المسكه المشكله كانت في الكرتون كان تحت الكرتون 32 زقاره حشيش وبودره و17 حبه قبتاقون مدري وش اسمها
هلا هلا صرت مروج ياليل المشاكل روحنا للشرطه وسين وجيم يا ناس مالي دخل انا برى اول مره اجي للبطحاء يقولون لا انت متراقب لك فتره وحنا نراقبك صدقوني اول مره حشا وكلا انت متهم وبنحيلك للنيابه طيب يا بوي فزعتك انقلع انا نصحتك ولا فادت النصيحه يالله هذا جزاك واقل من جزاك وش جزاك يا بوي بودوني للمحكمه المستعجله لحق على ولدك ولا فيه فايده المهم رحنا للمحكمه المستعجله وكانت الطامه كان الحكم افساد في الارض تدرون وش معناها قـــصـــاص
ياليل رقبتي بطير وانا جالس وين ولد عمي ولد عمتي يقول ما عليك بتطلع بري اقوله قصاص يقول بطلع بري تصدقون شكيت في ولد عمتي شكله له قلت المهم رقبتي بتطير في تاريخ 23/4/1426 تاريخ ما ينسى المهم جا اليوم المعني اليوم اللي قبله يا ناس ما عرفت النوم وش نومه وانت بتموت قلت يا ولد انا بجيب ولد عمي بالسالفه خلهم يعيدون التحقيق بس المشكله وش هي اني مصدق على اقوالي قلت مالي الا اذا جينا بساحه القصاص اقول لهم على الاقل يتاخر الحكم
ومالكم بالطويله رحنا هناك وليتنا ما رحنا يسحبوني تسحب اقولكم رجولي ارجولي الا كلي ميت من الخوف ييجون يقولون وصيتك الا انا اللي اخورها من جد قرب الرحيل
وااااااااااااه يا الوصيه مابي شي قالو لي تشهد (( اشهد ان لا اله الا الله واشهد ان محمد رسول الله ))
وقبل تنفيد الحكم الا والصوت المزعج المدوي اللي جاني من بعيد طير قلبي من قوته
محمد وجع قووووووووووووم ما وراك جامعه
قمت طاير ناوي افقع وجه اخوي من صوته اللي هبل بي بس تصدقون ما سويت شي والله من جد صوت اخوي لا اعدامي
الحمد لله صار حلم وش حلمه كان كابوس
وابشركم انا بطلت اروح للبطحاء من الحلم
وانتو بعد انتبهو من رفقاء السوء وانتبهو من المخدرات والحشيش والمسكرات
والله الله بسحن الاخلاق
واخر نصيحه لي لا تكثرون في العشاء ترى تجيب لكم كوابيس وتصيرون مجرمين
تقبلو تحيات المخرج / ضــاع ريــالــي

منتديات مدرسة المشاغبين - القصص و الروايات و الحكايات قصص قصيرة و تعلم القصة story novelette