 |
| |||||||
 | |  |
 | |  |
 |  |  |
 |
| | LinkBack | أدوات الموضوع | طريقة عرض الموضوع |
|
#1
03-29-2007
| ||||
| ||||
 الديمــو..خـــــراطية....!! الديمــو..خـــــراطية....!! طبعا واحد من خوياي قرا الموضوع مرة.. هي مرة وحدة اللي غصب نفسه يقرا.. ويوم خلص قاري دخل العناية المركزة اسبوعين. لكن الباقين امرضوني بالقراية.. حتى شخابيطهم على الجدران من يومهم صغار فوق مستوى العقول.. تخيلوووا قبل كم يوم وانا رايح اشتري الضحية.. اتصلوا علي المتوسطة علشان صويلح.. يقولون انه كاتب على الجدران! قلت مو معقوول.. صويلح مستحيل يسويها.. الولد مثقف ولابس نظارات.. واربع وعشرين ساعة يقرا مجلة ماجد وباسم ويتابع افتح يا سمسم.. يعني ماعليش... ويوم جيتهم الا فعلا الولد كاتب ومعترف انه كاتب.. حتى جابوه وخلوه يعترف قدامي بعد! تدرون وش كاتب؟ كاتب على الجدار (لا.. لتكميم الأفواه)! قالوا لي ان الولد يتعدى على السياسة.. شهقت ومسكت يدين المدير وانا اقوووول خاف الله يا رجل.. وش سياسته بس!!! مادريت إلا الولد يقول يوووووباااه.. لا للذل والهوان.. لا تخضع بهالشكل!! التفت وانا مصدوم! وقلت له: الا ماودك تسكت قبل اواسيك بمخمس الحين.. يخليك تصور جنب شعاراتك هاللي صجيتنا بها؟؟ قال تسسيف يا يبه؟؟ هذا وانت اللي معلمنا حرية الرأي! التفت على المدير والمدرسين وانا اتنافض.. انا مدري وش هي حرية الرأي بس دايم اسمعها بقناة الجزيرة.. واكيد الحين عرفوا ان عندي قنااة الجزيرة!! بس الحمد لله ان ذكاءي اللي ما عمره خانني الا دايم بس..أسعفني فقلت لهم على طول: ان علمتوا.. أبعلم.. أجل وش عرفكم لحرية الرأي لو ماعندكم قناة الجزيرة؟؟ والتفت على ولدي.. والقاه مبسوط!! أكيد عاجبته سياسية (لوي الذراع) اكثر من سياسة (المداهنة)..! بس هين.. إن ماخليت امه تدهنه شهر ولا يطيب من الفلقاات!! - وانت!! (صرخت عليه) - سم يبه!! - هذي نهاية تربيتي فيك؟؟ تكتب على الجدران؟؟؟ - يبه.. انت اول شي علمتنا اياه: لاتحكم قبل ما تسمع لكل الأطراف.. لحول!! ماقلت لكم تبحل مع المثقفين!! قلت هات اللي عندك قال يا يبه.. هذا الاستاذ نجر قدر كرتون المنتهي.. قلت عيب تأدب.. قل اسم الاستاد زين!! قال يبه.. وش أتأدب؟ .. هذا اسمه!! قلت.. دام هذا اسمه ما حنا أبخص من اهله بوه.. قال.. يقول لنا: اذا قلت لكم تسوون شي تسوونه.. قلت له.. حتى لو غلط؟؟ قال انا ما اغلط.. قلت كلنا نخطي الا الرسول.. قال وهو معصب.. تسوون اللي اقول لكم حتى لو غلط.. قلت استاد.. انت قبل شوي تقول ما اغلط والحين تقول اغلط.. خل كلمتك وحدة يا استاد علشان نحترمك!ثم نحترم آرائك.. قام وصطرني وطردني!! يا يبه..النقاش بالمنطق ولا بالطق؟ قلت حسب البلد! التفتوا علي المدرسين بحركة وحدة!!!!! قلت حسبك يا ولد... قال المدير.. اشوا.. قلت لهم ايه انا كنت مدرس مطالعة بس (اعتزلت).. قال واحد من المدرسين.. ايه واضح! من أول ما شفتك وأنا أقولها.. التفت له وانا مبسوط .. من يوم شفته وأنا حاس إنه لمـّاح.. وما خاب ظني.. قال صويلح... أكمل يبه؟ قالت وانت للحين ما خلصت؟؟ قال لا.. قام الاستاد وطردني وقال لي.. شوف يا شاطر.. لا عاد تناقشني قدام الطلاب.. قلت حتى لو رفعت يدي؟؟ قال يدك هذي.. وسكت.. قلت ايوه!.. قال.. ارفع يدك.. ويوم رفعتها قام يجلدني!!.. حتى شوفها حمرا.. قلت وش هي اللي حمرا؟؟؟ قال يدي.. قلت اشوا.. قال يبه؟؟ تستهبل؟؟ وشو اشوى؟؟ قلت ولد.. احترم ابوووووك؟؟ قال يبه انا احترمك بس ما احترمت فكرتك.. ما قلت لكم تبحلون؟ التفت للمدير.. وقلت له وش تبون مني الحين؟ قال المدير وهو يشقق ورقة بيده.. كنت ابيك توقع لنا على التعهد اللي كتبناه.. والحين الله لا يهينك نبيك تشيل ولدك معك.. وهذا ملفه.. وفوق الملف شهادة حسن السيرة والسلوك وثلاث شهادات شكر وتقدير بس لا نشوف رقعة وجهه.. أخذت الولد وطلعنا بدون نقاش.. اصلا كتاب الجرايد يقولون تعليمنا فاشل وفاسد.. وأجي انا اصلحه بيوم؟ - لا مو فاشل ولا فاسد.. بس يبي له شوية اصلاح.. ثم يا يبه وش دخل كتاب الجرايد؟؟ ماعمري قريت لهم شي وقلت صادقين.. دايم يكذبون.. - بس يا ولدي انت تقول لا لتكميم الافواه.. خلهم يقولون ارائهم.. - يقولون ارائهم موب يكذبون! قعدت احك رقبتي... واهوجس بيني وبين نفسي.. والله بلشنا بك ياوليدي.. بهالزمن صر لوقي.. وتعلم لك كلمتين زينات تمشي أمورك مع الكبير والصغير.. لكن حكاية إنك تصير فاهم وصريح وصادق.. وربي ما تاكل الا... - تبن تبببببببن.. التفت على الولد وانا مستغرب وش دخل أم أمه بتفكيري ذا!!!! - يبه ناظر التبن المكعبات.. والسويس روول! اوه اثرنا وصلنا سوق الغنم!! يا زمان التبن! آآآ يازماااااان السرعة! وقفنا السيارة وقبل ننزل.. ما درينا الا اربعة سودانيين طابين معانا في السيارة.. وولدي يصرخ وينزل تحت المرتبة وهو يقول: خيانة خيااااانة.. وأنا اهبده على راسه واقول وشو خيانته ياملا التبن!! هذولا النصابين اللي يبيعون هنا.. قال واحد من الزولة.. انا ما نصاب.. ممكن الجماعة التانين نصابين ما عارف.. التفت له واحد منهم وفلافل الشعر وقفت تقول قنفذ... أنا نصاب ياولد خديجة (ياحليلهم. طلعوا يعيّرون باسامي امهاتهم مثلنا) وتصاقعوا الزولة وانا رحت ادور غيرهم.. وولدي يضحك ويقول تعجبني سياسة (فرق تسد).. وانا اناظر فيه وودي لو اسد حلقه..لاكييين ما فيه طريغة!! - يبه - هاه - الحين انت تبي تشتري خروف للعيد.. صح؟ - ايه - علشان تذبحه.. صح؟ - ايه - طيب انت يوم تشتريه هو يدري انك بتذبحه - لا - ولو درى تتوقع يوافق؟ - لا - يعني انت تخدع الخروف.. صح؟ طراااااااااخ (صطرته كف) وصرخت فيه: مثقف وقبلناها.. بس خكري لأ لأ لأ!! وش اللي اخدع الخروف؟؟ ولد جيرانا هو؟؟ شهق وحاول يكتم الصيحة علشان ما يحس بالانهزام قدامي.. بس احسن ما في النقاش الاخير انه انهى الحوار.. علشان كذا فيه ناس كثير يعتمدون عليه كثير.. @@@@@@@@@@@@@@@@@@@@ لما وصلنا البيت، قابلتنا نوف.. وعلشان تحسون بمعاناتي.. نوف هذي بأول ثانوي وناوية تدخل علم نفس.. وفوق كذا مثقفة.. يعني بالعربي أنواع العقد.. معقدة معقدة معقدة كنها حبل عفش عزوبية اول مرة يطلعون للبر.. حسافة بس.. ليتني طلعت معهم للبر ذيك الليلة.. قالت يا بابا.. اشوف بعيونك انك شاري خروف للعيد.. صح؟ قلت لاتسوين علي زرقاء اليمامة يا ام الخلاقين..قولي انك شامة ريحة خياس الغنم معي.. ضحكت وقالت واو يا بابا تجنن وانت كافشني.. انت لو دخلت علم النفس كان الناس ما تسمع لميسرة ولا طارق الحبيب ولا حتى لمريم نور.. قلت لها يا ماما.. وش لكم بعلم النفس؟ وش لك بالعلم كله؟؟ انتي شايفة الحين ما يوظفون المعلمات ولا الطبيبات ولا المتعلمات.. يدورون البياعات والمذيعات والسكرتيرات والجمهورات اللي على عشرات.. صرخت بكل صوتها لألألألألألألأ.. لين حسيت ان الخروف بآخر الحوش قال: لعنة! ثم كملت.. يا بابا.. تخصصي قدري.. ولا أحد يقدر يثنيني عن قدري.. قلت الله يصبر رجلك بس.. قالت الله يصبرني انا بعد.. على المرأة مثل ما على الرجل.. ولها مثل ماله.. قلت على المرأة ملابسها وعلى الرجل ملابسه.. لاتكثرين الحكي يا بنتي علشان ما يمصل... و...آآآآآآآآآآآآآآآآه - وشو ذا؟ - هذا صوت صويلح!! اكيد تعرض لعملية اغتيال!! - قبل شوي خيانة.. والحين اغيال لعنبو ابليسكم امكم مولدتكم في مستشفى ولا في استديو الاخبار؟؟؟ ركضنا للحوش ولقينا صويلح يصرخ تحت الخروف: - خلاص انت حر.. آه آه.. هذا قرارك.. أي أي هذي حريتك.. آآي خلاص بقريح لو بغيت تصير مقلقل.. وانا وش دخلللني؟ سحبت صويلح الخايس من تحت الخروف ورميته بكل قوتي فووق فوووق لين بنط بطيارة وجاك مجاوب.. واخته تركض جهته يقال لك تبي تمسكه.. وفتحت يديها على الاخير وهي تقووووول اخي.. حبيبي... تعال اليّ .. تعال إلى حيث الحرية.. وكنت حاط يدي على كتف الخروف وتابعنا الموقف بانفعال.. وسمعت الخروف وانا مركز على صويلح يقول لي لا تستحي.. مد يدك على الفشار.. وصويلح يقول لاخته وخري.. وخري لا اطيح عليك.. وهي تقول.. هذا قراري انا.. هذي حريتي انا.. ما راح اوخر.. ابنتظرك.. انا الشعب المضطهد .. وانت الديموخرااااااااطية.. وآخر ماسمعنا آآآآآآآآ طراخخ طنق بووم طع... لين انقطع الصوت مرة وحدة.. ومن الخرعة عجزت افتح عيوني.. مادريت الا وحافر ابو الخراريف يلمس كتفي بشويش.. يوم فتحت عيني الا الخروف ماط براطمه بأسى.. ويأشر جهتهم.. ويقول: أجل هذا القرار والحرية اللي يقول ولدك! ناظرت فيهم الا كل واحد منصرع بجهة.. والكتب ترفرف عليهم مثل العصافير اللي بافلام كرتون! لقطت الكتب وحطيتها بكرتون.. وصحيتهم.. وما صحوا.. ما دريت إلا الخروف يربط ايديني من ورا.. ويسحبني لين علقني على حبل المجزرة.. وتحتي كرسي.. وقبل يرفس الكرسي قال .. (إلى المثلوثة.. وبئس المصير!!) |
|
| مواقع النشر (المفضلة) |
| أدوات الموضوع | |
| طريقة عرض الموضوع | |
| |
-الدورات
التدريبية بجامعة نجران-
العرض العادي
