ماتلاحظوا إننا صرنا نسمع عن حالات اغتصاب مرة كتير في مجتمعنا ؟؟

اتركم مع القصه ..

بنت في جدة عمرها 19 سنة عايشة في الشوارع صارلها أكثر من 3 شهور , صارلها على هاذا الحال 5 سنين يعني من لمن كانت 14 سنة, أقنعوها أهل الخير تروح للصحافة و تحكيلهم قصتها و هما يساعدوها في مشكلتها .. سمعت كلامهم بعد تردد و خوف كبير ,راحت لمكتب واحد من الصحافيين و جلس معاهم مدير التحرير و الأخوات الوسيطات .. دخلت البنت بحجابها الشرعي الكامل و بدأت تحكي قصتها ..
البداية كانت زي قصص كتير بنسمعها كيف بيكونوا الأطفال ضحية موت أمهم و زواج الأب من ست تانية , ماتت امها و هيّ صغيرة واتزوج أبوها وحدة مغربية و جاب منها أطفال .. طبعا كانت البنت منبوذة في العيلة و بتتعامل أسوء معاملة من الكل , أبوها كان على طول سكران و الحشيش ماينزل من يده .. وطّت راسها و تغيرت نبرة صوتها وقالت للصحفي إلين ماجا يوم و اغتصبني !اغتصبها أبوها و هي 14 سنة !! متخيلين ؟ أنا أتذكر بابا الله يطول في عمره كان دايما يقولنا واحنا في هاذا السن انتبهوا على نفسكم ترى البنت مايعيبها إلا سُمعتها ..و سٌمعة الأب من سمعة بناته و لليوم هاذا ما أنسى كلامه و حرصه علينا .. في المقابل هادا الأب اعتدي على بنته بنفسه و دمّر حياتها و مستقبلها !
سكتت البنت و ماعرفت تشتكي لمين .. واتعوّد أبوها على هاذا الحال إلين مافاض بيها و هربت من البيت ..راحت لأخوالها استقبلوها فترة و رجعوها لأبوها..و رجع لعادته و هربت تاني للشرطة وكلموا أبوها جا أستلمها.. و فضل على عادته قامت هربت لدار الرعاية الإجتماعية و لمن كلموا أبوها هربت من عندهم و لجأت للشـــــــــــــــــــــــــــــــــــــــوارع !! ماعندها سقف تنام تحته و هي متطمّنة , كانت نتام في مصلى النساء في المولات إلين ماصاروا عمال النظافة يطردوها ..
راحت البنت ضحية مجتمع و أب وحشي و مايمت للأبوة بصلة .. ساعدها الصحفي جزاه الله ألف خير و بلغ مدير عام هيئة الأمر بالمعروف و حكاله قصتها , رفضت البنت في البداية لأنها خافت يرجعوها لأبوها إلين ماحلفلها الصحفي إنو مايودوها عنده .. واتفاعل مدير الهيئة مع حالتها و رسل ناس مختصين أخدوها من عند الصحفي ..
ياجماعة مرة انتشر عندنا هادا السلوك الغير إنساني , مجتمعنا مجتمع الفضيلة و الأصالة يقوم يصير الزنا ظاهرة عندنا ! و بالأخص زنا المحارم !! لازم يصير في حملة تثقيفية للبنات الضحايا اللي بيتعرضوا لهاذي الإغتصابات و يعرفوا كيف يتصرفوا و لمين يلجأوا ..
و يصدر عقاب قاســـــــــــــــــــــــــــــــــــــــــــــــ ــــــــــــــــــــــــــــــــــــــــــــــي جدا للآباء اللي ماعندهم إحساس و يتشهّر بيهم .. حسبي الله و نعم الوكيل