|
| |||||||
| القصص و الروايات و الحكايات قصص قصيرة و تعلم القصة story novelette يهتم بالقصة و الرواية الثقافية والتراث القديم قصص حب قصص غرام قصص واقعية قصص غريبة قصص عجيبة قصص الجن قصص مضحكة قصص التائبون قصص ساخرة قصص جرائم قصص اطفال |
 |
 |  |
 |  |  |
 |  | |
| |
 | |
 |
| | أدوات الموضوع | طريقة عرض الموضوع |
04-28-2007, 01:18 PM
| |||
| |||
 رواية((دنيا غريبة)) في البدايه راح اكتب لكم تعريف للشخصيات : ابو نواف ابراهيم ام نواف نوره نواف:26سنه الاخو الكبير شاب يعتمد عليه اسمر مملوح عيونه سود واسعه له سكسوكه يشتغل بشركه تصميم واعلان.. مبرمج كمبيوتر عبير: 23 سنه متزوجه من ولد عمها وهي بنت جذابه نعومه هاديه ريما: 17سنه فرفوشه البيت الجلسه مالها طعم من غيرها فارس: 13سنه اخر العنقود واليكم القصه... اتركم مع القصه الجزء الأول ----------- نواف: "يلا تامرون على شي بطلع" ريما: "ما يحتاج تستأذن ندري انك بتطلع انت تجلس بالبيت اصلا" فارس:" خلو الشاب يتمتع بحياته" نواف: "مع اني ما اعترفلك بشي بس صح لسانك" ام نواف: "رح رح ما نبي الا سلامتك" ريما: "الا نبي نطلع والله ..حنا منحكرين بالبيت وانتم 24 ساعه برى البيت .. من سافر السواق ما شفنا الشارع" نواف: "اذا استأذنت منك يا آنسة ريما تكلمي . . . عبير ليش مالك حس عاوزه حاقه عبير: لا تسلم" ريما: ترانا كلنا بنات وكلنا ابناء آدم وحواء يا أخي اسألني انا نواف: انت تكفيني اشتراكات النت حقتك المكتبات حفظوني من كثر ما اجيهم اهلا استاذ نواف كم اشتراك تبي ريما: هه ما قلتلك جب لي اشتراك مفتوح بس انت عييت ذنبك على جنبك نواف: لا يا شيخة " وهو يقلد صوتها" هه ما قلتلك جب لي اشتراك مفتوح بس انت عييت ذنبك على جنبك ذنبي على جنبي اقلبي وجهك عقاب شهر ما فيه اشتراك ريما: لا تتهور يا نواف وتحلف تراي ابنتحر نواف: علشان تعرفين قيمتي وانك بدوني ما تسوين شي ريما: تصدق عرفت قيمتك هاللحين قيمتك باشتراك نت انت اعتبرت نفسك هالاعتبار صووح نواف: بالنسبة لك الاشتراك اغلى من ذهب اكتشفوه من العصر الحجري له قيمة كبيرة ريما: ها ها ها ها ضحكتـ.... فارس: اقول نواف توصلني لحمد نواف: يؤ يؤ يؤ لحمد؟؟ آسف جدا بيتهم يبي له مشوار شوي واختك الكريمه عطلتني عن اشغالي ام نواف: خفوا على أخوكم كل واحد من جهة ومعليش ود اخوك لحمد ماراح يكلف عليك ريما: ههههههه يما بالله ما طفشتي من كثر ما تدافعين عنهم هاللحين انا قايلة ابيك تطلعنا ليش ما قلتي له ود اختك للسوق طفشانة يا عمري عبير: انت ام لسانين اعوذ بالله وش دراك ان امي مهيب قايلة يمكن تبي تكمل ريما: تعلميني بمامتي محدش بيعرفهاش زيي نواف: يالله مع الصلامة ريما: الى اللغاء عبير: عافهم ولا تبلانا فارس: اففففف يما متى يجي ابوي؟؟ ريما: بيجي 9 ونص هو قالي ام نواف: ما شاء الله عليك انا ما قاالي متى لحق يقولك عبير: تسألين ريما ام التحقيق ريما: نؤنؤنؤ كل هذا قهر علشان ابوي اللي قالي اعوذ بالله عواذل يدق جوال عبير بنغمة "حطني في محجر عيونك" ريما: هوز ذات؟ عبير: ما يمدحون اللقافة ابدن ابدن ريما: متى امداك غيرتي نغمته قبل يومين يوم تجيننا كانت " ااااخ ياقلبي " عبير وهي طالعة : كأنه جوالي مهب جوالك وردت عبير على سعود زوجها اللي قالها انه مشغول وبيتاخر عليها.. ام نواف: بسم الله وين راح فارس؟ ريما: تلقينه راح لحموود صديقه ام نواف: الله يهديه يمشي اللي براسه ريما: من شابه امه فما ظلم ام نواف: لا والله يعني انا اذا حطيت شي براسي مشى يلا قومي روحي ذاكري بس ريما: ذاكرت منذ قرن ام نواف وهي قايمة: ايه بالحيل صميتي الكتب من المذاكرة الساعه 1:40 الليل عبير في بيت اهلها جالسه امها راحت تنام واخوانها بعد لانه بكره عندهم دوامات.. كانت سرحانه شريط حياتها يمشي قدامها.. وجلست تتذكر كيف تزوجت سعود قد ايش صاحت ذاك اليوم وقد ايش ما كانت تبيه وقد ايش ابوها حاول يقنعها هو ونواف وامها وهي كانت رافضة مبدأ ان الشخص يتزوج القريب تذكرت يوم ملكتها ويوم زواجها كيف كان شكل سعود كئيييب وابتسامته يالله تطلع اعتقدت انه هو حتى مغصوب عليها ويوم دخل عليها وسافروا ورجعوا كانت حاطه هالفكرة براسها بإنه ما يحبها ولا هي تحبه ولا يمكن شي يحببهم ببعض لذلك كانت تتجنب الاحتكاك معه كثير .. بس هالأفكار طارت من راسها يوم فكرت بحياتها لو تطلقت بما انه ما تبيه ولا يبيها وحاولت تتقرب منه لما اكتشفت مين هو سعود..!! سعود انسان هادئ قلبه طيب وشكله يعكس ما بداخله .. عيونه تخلي الواحد يعتقد ان هالانسان خالي من المشاعر لكن هو مايعرف شي اسمه مشاعر لأنه هو المشاعر بعينها قطع تفكيرها صوت الجوال ومكتوب " عطري" ابتسمت عبير: هلا وغلا .. بدري سعود: بدري من عمرك.. يله اطلعي وحشتيني.. عبير: ثواني بس سعود: يلا انتظرك فمان الله لبست عبايتها وطلعت ركبت السياره.. عبير: السلام عليكم سعود: وعليكم السلام والرحمة والبركة وطول الطريق وعبير ساكتة سعود: عبير اشفيك؟ عبير: سلامتك حبيبي ما فيني الا العافية سعود: شكل فيه موضوع شاغل بالك وان لم يكن هناك لقافة ممكن تعلميني وشهو؟ عبير: سعود .. امي كلمتني بموضوع الحمل اليوم و .. و سعود: وايش؟ يا عبير حنا ما امدانا متزوجين سنة ونص والنص الباقي لا تحسبينه .. وأنا ما ابي عيال هاللحين ما ابي نكرر غلط امي وابوي ونجيب وبعدين يصير سوء تفاهم و .. عبير: طيب ليه انت متشائم كذا تفاءل بالخير تجده سعود: انا متفائل بس انا ما افكر بالعيال حاليا ورجاء حاولي تشيلين هالفكرة من راسك عبير: يا سعود هاذي امومة ماهي لعبة مين ما وده يصير اب او ام لا تكذب علي وعلى نفسك وتقول انك ما تبي تكون اب الابوة شي حلوو تخيل يجيك ولد بنت يناديك بابا ويقولك ودني وودني تكفى يا سعود عد نظرك في هالموضوع الموضوع حساس وانا انا .. انا نفسي أبي اكون ام سعود: يعني..؟! عبير: انت زوجي وانت اللي تقرر وانا مالي شغل سعود: عبير حنا كم مرة تناقشنا بهالموضوع؟ عبير: تدري يا سعود على كثر ما تناقشنا على كثر ما اقتنعت لأن وببساطة ما في سبب مقنع سعود: انا لله وانا اليه راجعون عبير اعقلي يا عبير عبير: اعقل العقلانية يا سعود بعدم الإنجاب هذا تخلف وليس عقلانية سعود: انا ساكت ومقدر حالتك انك معصبة فاهدي يكون افضل عبير: افففف انت ليه اذا حطيت الشي براسك ما تهتم لعواقبه سعود: لأني متأكد من سلامته وما حطيته في راسي الا ووراه فوائد جما عبير: عطني فائدة وحدة بس وخلاص ابسكت سعود: ان ابوه وامه ما يكونون مشتتين عبير: هاذي عايلتك اللي تشتت بس عايلتي ولله الحمد سليمة 100% ما صار فيها شي فلا تخرب بيوت على حساب بيوت ثانية سعود: انا ما خربت بيتي وانا اعرف بهالاشياء عبير: هاللحين انا اعرف وحدة مطلقة معي بالجامعه وكانت قصتها قصة مأساة ما هي قصة هل معنى هذا اني اترك الزواج ولا افكر فيه؟! لا بالعكس تزوجت والحمدلله حياتنا ماشية بس ناقصنا شي واحد وهو ... سعود: خلصتي؟؟؟!!!! عبير: يا برد اعصابك انت سعود: حبيبتي شي حطيته ببالي لا تفكرين تغيرينه الا اذا كنت انا منيب مقتنع فيه عبير متزوجه ولد عمها سعود انسان عصبي بس حنون بالمواقف الصعبه.. الحياه قست قلبه زي مايقولون هو وحيد امه وابوه عاش صغير متشتت لان امه وابوه انفصلوا فكان مره هنا ومره هناك وهذا حال الطفل الضحيه اللي يعيش حياته ويحس نفسه نتيجه غلطه هو ماله أي ذنب فيها وهالشى اكيد كان له رده فعل بحياه سعود.. ابوسعود (صالح) تزوج بعد ام سعود لكن ربي مارزقه بعيال وهذا السبب اللي خلاه ينفصل عن زوجته الثانيه لان كل واحد منهم فضل انه يشوف حياته بعيد عن الثاني يعني ربي ماكتب هالشى يمكن كان خيره من رب العالمين اما ام سعود تزوجت رجل دبلوماسي يشتغل بالسفاره وعاشت معه متنقله بين الدول عندها بنتين يعني يصيرون خوات سعود نادرا ماتجي السعوديه وسعود مايحرص انه يسال عنها إلا بالمناسبات وان كانت هي ما تقصر دايم تتصل وتسال واذا جت السعوديه تروح تزوره حتى يوم زواجه ما فكر يعزمها لكن تحت اصرار عمه وضغط ابوه دق عليها وبشرها والمسكينه الدنيا ماكانت سايعتها من الفرحه لكن ماقدرت تجي عشان ظروف شغل زوجها... عبد الرحمن: اخو ابو نواف وعياله هم: مشاري: 24 سنه شاب مستهتر اتكالي ماله هدف من الحياه مها: عمرها 19 وهي بنت متناقضة احيانا مثقفه واحيانا فارغة ليس لها هدف.. وسارة: 16 سنه وهي دائما مع ريماا بنت عمها سارة: مهاااااااااااااااااااااااااااااااا .. مهااااااوي مها: نعم وشتبين خير سارة: مالت عليك الشرهه مهب عليك الشرهة علي انا الغبية اللي اناديك جاء المسلسل مها: في شي اسمه تعالي عندي وقولي لي بهدوء تنادين مو كذا سارة: آسفة يا ام الفلسفة.. مها: ســـــــــــــاره سارة: انطقي بس تفرجي بروح اكلم مها: ترى ريما تقول ارحموووني من سارة 24 ساعة تكلمني سارة: اففف عالأقل ماهي رافعة خشمها زيك مها: لان عقليتها عقلية طفلة اما انا اعتبر من قافلة الناضجين سارة: ايه ايه طيب ان شاء الله مشكورة عالمعلومة الجميلة مها: العفوو ولا تغيثني ابتفرج على راحتي سارة: عزيزتي مها التلفزيون مضر على عيون الإنسان عندما يضع جل تركيزه عليه فلا سمح الله يسبب تشوهات للعين وللعمى لا سمح الله مها: لو سمحتي روحي راحت سارة تكلم ريما بنت عمها اللي ماتستغني عنها ابدا اتصالاتهم ببعض شبه يوميه.. خالد: الوووووو ريهام: يا هلا بك أخوي خالد: هلا اختي أي خدمة ريهام: لو سمحت اخوي انت حاط اعلان بالجريده عن أي شخص يبي قصيده لزفه اوتخرج يدق على هالرقم خالد: بالضبط ريهام: ايه اخوي انا ابي قصيده حلوووه لزواج اختي خالد: في أي شي معين براسك ريهام: لا مافي بس ما ادري عن ذوقك خالد: هههه لا ذوقي مهنا مشكلة المشكلة السعر اللي تبينه ريهام: شوف انا ابيك تقولي الكلام اواللي راح تكتبه بشكل عادي اذا عجبني انظمه على شكل قصيده خالد: ليه يااختي انتي داقه على شاعر ولا على حكواتي ريهام: ............!!!!! خالد: تبين شي معين ريهام: لا بس كم السعر ؟؟ خالد: اللي تبينه ريهام: يعني احدد انا خالد: ايه حددي ريهام: ليه انت مو هذا مصدر دخلك يعني تحدد انت المفروض خالد: شوفي اختي اذا كنتي تبين القصيده باسماء معينه يعني ادخل اسم العروسه في القصيده هنا السعر راح يكون اكثر ريهام: خلاص نقول من غير اسماء ب400 ريال خالد: شدعوة عاد هذا ما يجي بتعبي ريهام: حيرتنا معاك اقولك حدد تقول انتي حددي ويوم حددت تقول ما تسوى وش تبيني اسوي لك يعني خالد: شوفي راح اسويلك زفه حلووووه ومرتبه واخلي الكل يسال من سواها لكم بس بـ1000 ريال ريهام: اااللــــه وش هالثقه؟؟ خالد: يلا قررري وردي لي في زباين غيرك يدقون ومحصلين الخط مشغول ريهام: اوكي بكره اردلك خالد: اوكى مع السلامه ريهام: مع السلامه صكرت ريهام وهي مرتفع ضغطها منه "مسكين مصدق عمره يحسب نفسه خالد الفيصل" لكن خالد العكس صكر وهو يضحك على غباء البنت وثقالة دمها ويدق جواله وكان خاله ابو نواف ابو نواف: السلام عليكم خالد: يا هلا وغلا بخالي الغالي ابو نواف: هلا فيك وانا ابوك وشخبارك؟ خالد: تمام كيف احوالكم انتم؟ ابو نواف: بخير وصحة وسلامه .. وينك وانا ابوك لا تزور وتقول اشوف خوالي يبون شي ما شيات خالد: مشغول هالأيام عندي كم شغلة وان شاء الله اذا خلصتها وانا عندكم ابو نواف: ايه خلاص غداك بكرى عندنا خالد: لا والله يا خالي لا تحرجني مشغوووووول من راسي لكرياسي ابو نواف: لا حوووول اللحين انت منتب مدير شركة ولا انت وراك شي ليش ما تجي تمرني خالد: هاهاههههههه إن شاء الله اعجبك ياخال بس خليني اتخرج ابو نواف: الله يوفقك ياولدي بس لو انك ساكن عندنا لما تخلص دراستك كان احسن لك ولنا خالد: يا خالي عبير كبرت وقلنا اصغر منها وتوني ما كبرت بلعناها بس ريما ماشاء الله صارت حرمة يعتمد عليها صعبة اجلس عندكم ابو نواف: خلاص اجل لا تنسانا وترى خوالك يسألون عنك اتصل عليهم خالد: على هالخشم تامر بشي ثاني ابو نواف: سلامتك مع السلامة خالد: مع السلامة خالد: عمره 22 امه وابوه متوفين ويصير ولد اخت ابو نواف عاش عند خاله ابو نواف وقبل سنتين انتقل لشقة مفروشة خالد يملك موهبه الشعر واستغل هالموهبه بشكل حلو.. وبكره الصبـــــــــح ريما وهي جالسة بالفصل وعليهم مطالعة ارسلت لخلود ورقة واللي شكلها طفشانة ريما " وش فيك كانه احد صافقك على وجهك" خلود "سلامتك بس مليت من الحصة" ريما " كلنا في الهوا سوا" خلود " خلاص الاستاذة انتبهت واللحين بيجي دوري مالي خلق " ريما" لا من جد بك شي خلود اللي ما تنزل يدها مالها خلق" ولا ردت عليها خلود وبعد الحصة بالفسحة ريما: خلود حبيبتي مسخنة فيك شي خلود: لا بس........ بس ابوي امس تعب ووديناه المستشفى ريما وهي تناظر خلود : ايييييييش تعب ولا تقولين لي ولا شي خلود: لا ان شاء الله بسيطة ويطلع لنا بالسلامة ريما وهي تناظر عيون صديقتها الحزينة: آآآآآآمين مي: السلاموو عليكوو يا بنات يا أمورات انتو ]-[ مي صديقتهم ابوها سعودي كان عايش بالكويت وامها كويتيه رجعوا للسعودية وسكنوا هنا علشان كذا لهجتها كويتية ]-[ ريما: وعليكوو السلاموو ورحمتهوو وبركاتوو يا معفنة انتي فينك من زمان ما شفناكيش مي: مالت عليج ما عندج سالفة عبالي بتمدحيني بس طلعتي موول مو قدها ريما: موول ولا سووق هاهاهاههههههها مي: ترا عندنا نتريق ونتطنز على كلامكم انتم عبالكم انتم بس لا بالعكس حنا غشمرتنا احسن عنك ريما: ههههههههههه عادي اتنطزوا وانتطنز مي: وش فيها القمر زعلانة ريما: منيب زعلانة مي: انتي شدخلج انت قمر ويا ويهج جنه كفر منسم ريما: ههههههههههههههههه حلووووة وربي حلووووة متى اروح البيت علشان اقولها لاخوي هههههههههههه كهكهكهكههههههههههههه كح كح مي: صج انج مطفوقة ما غلطوا يوم سموج جذي ريما: خخخخخخ كلهم مقهورين مني مي: يا ساتر الرياض بكبرها بيتج ومدرستج واقاربج وما في حد منهم احلى منج ما اتوقع ان عايلتكم كلها شيف شراتج ريما: مي اقلبي ويهج ووريني عرض اكتافج مي: هههههههههاااي خلود شفيج حبيبتي خلود: ما فينيش حاقة مي: وانا اقوول انت من وين اثاريج مصريه خلود: ههههههههههههه ريما: هخخخخهههههههه مصرية من الجهتين دافورة & لهجتها خلود: ههههههههههههههههااااي تررررررررررن ترررررررررن مي: ويعه ليش ما يطولون الفسحة اكثر ريما: اقترحي عليهم سيدة مي مي: هيعيهيعيهيعي عتيجة وايد ريما: انت وضحكتك كأنه فيل اول مرة يضحك مي: ها ها ها ما تعرفين تشبهين شراتي مريم <<< الأستاذة مريم: يلا بنات كل وحدة على فصلها ريما: اففف جت مرة ابو سندريلا خلود: ههههههههه ودك تسمعك مي: اففف اصلا اذا سمعت مهي مستبعدة على نفسها هالشي ريما: على قولتك حمد: فارس اليوم سلمان بنلقاه في الأرض الفاضية اللي ورا المدرسة خلاص فارس: سلمان!! وش يبي هالكريه حمد: ههههههههههه كريه لو يسمعك كان ارتكب بك جريمه . . . بس والله انه حبوب بس عنده اشياء يا ولد تخليك تتقطع من الوناسة فارس: مثل..!! حمد: يكفي ان عنده شقة فارس: هذا اللي قاهرني وش حيثه عننا عنده حمد: لا تنقهر ولا شي خل نروح شقته ونتمتع حنا فارس: خلاص حمد: وانتبه لا تقول شي قدامه ترا بعدين يتركنا فارس ومن غير نفس: ان شاء الله وبعد الدوام ]-[ سلمان . شاب مستهتر وسمعته موحلوه.. مصاحب شلّة فاسدة .. عمره 18.. بالثانوية ]-[ سلمان: يا هلا يا هلا ومرحبا بالطش والرش والحلا اللي مابه غش حمد: يا هلا بك سلووم سلمان: وشخباركم؟ حمد: الحمدلله تمام سلمان: وش فيك فارس اطرم صاير فارس: لا ما فيني شي سلمان: ايه طيب وش رايكم نروح للسوق فارس: لا انا ما اقدربروح بروح البيت سلمان: ههههههه البيت وليش انت بنت تبي تروح البيت تجلس تطبخ ولا تنظف هههههههههه حمد: هههههههههههههههههه اتخيل شكلك وانت تنظف يحليلك سلمان: ولا يطبخ احلى واحلى هههههههههههههههههه فارس: لا خلاص منيب رايح سلمان: ايوه خلك كذا رجال حمد: وين تبي تودينا؟؟!!!! سلمان: تبون نروح لشقتي حمد............. فارس: لا لا نروح السوق احسن سلمان: مو الشقة ازين ناخذ راحتنا احسن من السوق فارس: لا انا اعتقد ان السوق ازين واريح سلمان وبنفسه " والله انك منتب هين يا فارس شكلك فاهم الدنيا ومنتب نافعني بشي بس انا وراك وراك يا فارس وقل سلمان ما قال" سلمان: السوق السوق يلا حمد: يلا فارس وبنظرات غريبة: يلا نواف يمر ريما بالمدرسة ريما: السلام عليكم نوّوف نواف: وعليكم السلام والرحمة ريما: نواف ابقترح اقتراح واتمنى انه ينفذ نواف: ما يبي لها ذكاء ما فيه ما فيه ما فيه ريما: وليش نواف: هااللحين نبي نروح البيت وفيه غدا ريما: ان شاء الله ريما: منتب مار فارس نواف: اليوم الثلاثاء يا ذكية ما يجي معي ريما: اهاا . . . ابفهم ليه ما يخلونه يطلع مثل باقي الأيام ليه يطلع بدري هذا اولا وثانيا ليه ما ينتظرك لما تروح له ولا ما يقدر يجلس عند الشمس حضرة جنابه نواف: لااا خلاص بكرى ابمرك الساعة 2 ونص وعادي اجلسي تحت الشمس ريما: اففففف انت ليش دايما تحطمني كذا كل ما جيت اتفلسف نواف: whaaat whaaat you say? ريما: انتم ليه تحطموني كل ما جيت اتفلسف نواف: حنا نحطم ريما لالالالالالالا ماهي معقولة كبيرة في حقك هاللحين حنا اللي نفشلك ونحطمك اجل انت وشو؟ ريما: من عاشر قوم 40 يوم صار منهم وانا ما جبت هالعادة من بعيد نواف: الله يهديهم صديقاتك دمورك ريما: هييييي انت وش فيك علي اليوم طفشان شكلك ولا محلم فيني امس بالليل نواف: امممم لا لا انا من زمان ما حلمت بأفلام مرعبة نواف: انزلي يا آنستي الغالية ريما لبيتي المتواضع ريما وهي نازله: يسلموو عالتوصيلة نواف: اهلين وسهلين دخلوا البيت وكل واحد طلع يغير ملابسه ونزلوا تحت يتغدون ريما: بسم الله توكلت على الله نواف: خخخخخ وين ناوية على سفرة ريما: هههههههههههههههههههههه ابو نواف: الله يعطيكم نعمة العقل ريما: افاا يالوالد ما هقيتها منك اللحين انا ريما بنتك ناقصة عقل خلاص بطلت كانت مخططاتي اكون الاولى عالمدرسة بس لما كشفتني بحقيقتي بأني ناقصة عقل لا والف لالالالالا نواف: ههههههههووووو لا هين الأولى ما في امل يمكن الثانية او الثالثة لأن الأولى وبدون مقابل خلود ريما: يوووو صح نسيت اقولكم ابو خلود بالمستشفى ام نواف: مستشفى!! ابو نواف: وش فيه؟! ريما: ما ادري بس تقول بسيطة ابو نواف: الله يشفيه ويشفي جميع مرضى المسلمين ام نواف: وين فارس؟ ريما: اوووبس ما رجع الى الآن نواف: انا يوم الثلاثاء منيب متكلف فيه ابو نواف: هو ما يطلع بدري اليوم ام نواف: الا ريما وبفمها اكل: تلقينه مع حمد يفرفرون بالشوارع ابو نواف: هذا وانا قايلة من البيت الى المدرسة هالولد صغير وش بيفهمة بين الغلط والصح نواف: اللحين بيدخل عليكم ما شاء الله مافيه إلا العافيه ام نواف: لا لا انا قلبي مو مرتاح ولدي فيه شي اللحين الساعه2 وهو يطلع اليوم الساعه12 وينه كل هالوقت؟؟!! ريما: يما لا تفاولين عليه ابو نواف: نص ساعة واذا ما جاء اروح ادور عليه ريما: يا الله وش فيكم امسكوا اعصابكم نواف: ايه يمدحون عصير الليمون ريما وهي تصب عصير البرتقال: بس للأسف ما فيه عصير ليمون جاهز نواف: عجااااازة طيب نادي الخدامة ريما:% اذا في تفاعل كملتها واذا ما في تفاعل بكملها واقراها لحالي <<<<<<<<<<<<((لزقة)) اغاني اسلامية اغاني جديدة اشرطة اناشيد جديدة احلا الاغاني اجمل الاناشيد اخر و افضل البومات -   |
|
04-28-2007, 05:56 PM
| |||
| |||
| رد: رواية((دنيا غريبة)) حااااير . يووووووه اسمي معااهم لازم اقراااااااااااااها <<<<<<مستحيه! .يلا انا بقرااها ان شاء الله بس ممكن طلب؟ لاتنزلها كاااملة انما *متعوب عليها الكلمة* قدر انملللله <<<جااااابت العيد ..لا اقصد نزل زي كذا بالتدرررررررررريج عشااااان يمديني اقراها لاني بزنس ززززمن يالله القى وقت بس ودي اقرراها شكلها ختيرة .. هاه وش قلت يابن العم؟ اغاني اسلامية اغاني جديدة اشرطة اناشيد جديدة احلا الاغاني اجمل الاناشيد اخر و افضل البومات - |
|
04-29-2007, 04:02 PM
| |||
| |||
| رد: رواية((دنيا غريبة))
لا ما عليك القصة بتزلها على شهر ((30 جزء)) يالله انتي الحين جمهوري خخخخخخخخخخخ اغاني اسلامية اغاني جديدة اشرطة اناشيد جديدة احلا الاغاني اجمل الاناشيد اخر و افضل البومات - |
|
04-29-2007, 04:04 PM
| |||
| |||
| رد: رواية((دنيا غريبة))
يعني انتي سيدة اعمال خخخخخخخخخخخخ طيب طال عمرك كل يوم جزء كذا كويس بنت العم  اغاني اسلامية اغاني جديدة اشرطة اناشيد جديدة احلا الاغاني اجمل الاناشيد اخر و افضل البومات - |
|
04-29-2007, 04:06 PM
| |||
| |||
| رد: رواية((دنيا غريبة)) الجزء الثاني -------- يوم الاثنين الصباح.. ريما جالسة بالفصل وبالها مشغول على خلود اللي ما جت اليوم وتنتظر متى تخلص الحصة وتطلع.. الساعه1 الظهر .. نواف: ملل فيصل: قل قسم نواف: قسم بالله فيصل: الغاية من هالتذمر عدم اكمال الشغل نواف وهو يبتسم: والله انك خبل وصدق المثل اللي قال " كل يرى الناس بعين طبعه" فيصل: هالمثل غبي واللي قاله قبل شوي اغبى واغبى نواف: يجي منك اكثر فصوول فيصل: خلاص نواف ما بقى الا نص ساعة ونطلع نواف: مهيب مشكلة نشتغل هالنص ساعة يدق تلفون نواف وكان ولد عمته خالد نواف: يا هلا ومرحبا خالد: هلا بنواف اللي ما يدق ويتذكر ان عنده ولد عمة نواف: لا لا خالد متصل مو معقول تصدق يارجال يوم تدق كنت بعيد عن الجوال بس شفت العاب ناريه تطلع منه قلت وش القصه لا يكون العيد جاء ومحد قال خالد: هههههه والللللله انك منسم نواف: بعض ماعندكم نواف: لا زين زين المهم وش عندك خالد: ابيك بموضوع ابتقابل معك بمكان نواف: شي مهم خالد: يعني يبيله جلسه فيس تو فيس نواف: خلاص تعال البيت خالد: لا صعبة ابشوف خالي .. وبعدها بيذلني انت ما تجي بيتنا إلا علشان نواف نواف: اممممم خلاص وين نتقابل؟ خالد: أي كوفي شوب نواف: خلاص ان شاء الله اشوفك بصدى التحليه عالساعة 8 خالد: وهو كذلك مع السلامة نواف: مع السلامة صكر نواف وهو مستغرب لان خالد من زمان مادق عليه.. نواف: خالد ولد عمتي البرنسيس داق على غريبه والله فيصل: طيب وش فيها؟ نواف: في إن بالموضوع فيصل: تعوذ من ابليس ويلا قم ما بقى شي عالوقت وينتهي مر نواف ريما وفارس ورجعوا ريما + فارس + نواف: السلام عليكم ريما: تراني ما ابي غدا عن اذنكم ابو نواف وهو يقرأ الجريدة ناظر ريما من فوق النظارة: لاتكونين زعلانة بعد امس ريما التفتت على ابوها وراحت تحب راسه: لا يالغالي بس طفشانة اليوم الحصص مملة ومالي خلق ومنيب مشتهية.. طلعت ريما فوق وراحت على طوووول عالتلفون كسرت تلفون بيت خلود لكن محد يرد وبالأخير قررت تروح تاخذ رقم جوال ام خلود من امها عارفة انها بتواجه تحقيق لا نهائي بس قالت معليه ريما: السلام عليكم يما ام نواف: هلا وعليكم السلام نواف: وش يعني السلام مقترن بيما بس ابو نواف: لا هي قالت السلام بعدين نادت امها نواف: وتقولين لأمي ليش تدافعين عن العيال انت عندك محامي ما في مثله ريما: يما ابي رقم ام خلود ام نواف: ام خلود؟! ام خلود مين؟ ريما: ااا صديقتي ام نواف: ايه شوفيه بنوتتي اللي فوق التسريحة خوذيه نواف: وش تبين فيه؟ ريما: ابكلم خلود وش ابي فيه يعني نواف: ما شفتيها اليوم بالمدرسة ريما وهي رايحة: الا دقت على جوال امها لكن محد يرد جلست تدق لما رد صوت ثقيييييل ريما: الوو خلود: هلا ريما ريما: خلوووود سلامات خلود: الله يسلمك ريما: وش فيك غايبة خلود: ............... ريما: خلود وش فيك ليش ما قلتي لي انك بتغيبين خلود: ريما تعبانة شوي ريما: تسكتيني!!!!!... خلود والعبرة خانقتها: ريما ابووي تعباااااااااااااان ريما اخذت نفس: هذا اللي كنت خايفة منه .. وش فيه؟؟ خلود: ما ادري تدرين انا ما اعرف الا انه دخل العناية والله يعين ريما: يا بعد عمري بأي مستشفى؟! خلود: بمستشفى الملك خالد يلا ابترك اللحين اذا تحسنت صحه الوالد اتصلت ريما: خلاص سلميلي على اهلك واحتسبوا واصبروا ترى الصبر زين خلود: يوصل مع السلامة انسدحت ريما عالسرير وهي تفكر بخلود الله يعينها وكالعادة في بيت ابو مشاري الصراعات والأصوات طالعة لأن البنتين اطباعهم مختلفة كل وحدة لها شخصية مستقلة.. مها: يا سارة اطلعي برا ابذاكر كلمتين على بعضها سارة: ابفهم انت كيف راسك يستوعب منهج و كتب؟ مها: قولي ماشاء الله لا تحسديني سارة: تف تف تف تف ماشاء الله لا اله الا الله الله اكبر ولله الحمد مها: وش تتحمدين عليه يا خبلة سارة: افففف ولا شي . . . حبيبتي مها محد ياخذ غلاها مها: وش تبين؟ سارة: امشي نقول لأمي تطلعنا مها: آسفة بكرى عندي امتحان فرجاءاًً رجاءاً اطلعي ابذاكر سارة: افففف وين اروح مها: كلمي ريما حبيبة قلبك سارة: ابفهم انت ليش تكرهينها؟ مها: ما اكرهها سارة: انت قاصدة تغثيني علشان اطلع منيب طالعة وعلى الفكرة ترى اسحاق نيوتن كان فاشل بالدراسة مع هذا هو اللي اكتشف ظاهرة الجاذبية الأرضية هذا انا فاشلة بالدراسة مثل ما تقولين بس اخلي في ذاكرتي الأشياء اللي تنفعني وعلى فكرة ترى ريما دافورة مها: يا ماما الدفارة مو بالترتيب ولا التقدير بالنسبة يا حلوة يعني تحت نسبة 95% ما يسمى دافورة مع ان اللقب هذا ما يعجبني و منيب مقتنعة فيه سارة: اففف تدرين انك مملة بس اللي كنت ابيه منك انك تونسيني لكن " قد احييت ان ناديت حيا لكن لا حياة لمن تنادي" وطلعت سارة وصفقت بالباب واخذت التلفون واتصلت على العنود صديقتها عبير وسعود في السياره متجهين لبيت اهل عبير.. عبير: تجيبني ولا اخلي السواق يويو يو صح السواق سافر نسيت سعود: لا لا انا اجيك بس بجي متأخر يعني عالساعة 2- 3 عبير: أيه مهيب مشكله اصلا ريما ماتنام الا بعد الفجر سعود: ريما يا حليلها من زمان عنها الملسونة عبير: ايه هي وبنت عمي عبدالرحمن سارة اذا اجتمعوا لا اله الا الله جنانوة الإنس سعود: ترى يوم الجمعه حطي في بالك ما تواعدين احد بنروح عند ابوي من العصر عبير: ان شاء الله سعود: عبير حبيبتي ابوي طلب مني طلب عبير وهي تناظر سعود: وانا لي طرف بالسالفة سعود: هو الموضوع متعلق بنا كلنا عبير: وشو؟ سعود: ابوي يبينا نروح نسكن عنده عبير: وانا مانعت ولا قلت لا؟؟ سعود: بس احس ان المرأة تفضل تسكن ببيت منفصل عبير: صحيح بس هذا عمي مهب غريب سعود: ويعني عبير: يعني خلاص نروح نسكن عنده اذا كان يبينا نسكن عنده حنا ما نقول لا سعود: يا بعد قلبي يلا وصلنا عبير وهي تفتح باب السيارة: خلاص اذا قدرت تجي تعال سعود: ان شاء الله المغرب سلمان وعمر بالشقه يتناقشون ويخططون.. سلمان: سم عمر: محد قالك انك دبشة سلمان: انت جالس تفهمني ليش تقول لي دبشة؟ عمر: لا تناقش.. سلمان وبنفسه " لو اني منب خايف انك تسوي بي شي وانت بهالحالة كان رديت عليك" سلمان: طيب طيب وش تامرني عمر: انا قلت لك وش ابي انت غبي ولا ما تفهم سلمان: خلاص انا ان شاء الله بأقرب وقت ابجيبهم لك عمر: خلاص اقلب وجهك طلع سلمان وهو معصب.. الساعه8 مساء تقابل خالد ونواف في نفس المكان اللى تواعدوا فيه.. نواف: بس ياخالد هاذي السالفه قديمه لها اكثر من خمس سنين خالد: مدري والله يانواف بس هو لما عرف انك ولد خالى قالى خله ينتبه لنفسه لانه شكله ناوي لك نيه شينه.. الرجال حاقد عليك نواف: اللى ربك كاتبه بيصير خالد: تصدق اني مدر ي وش السالفه بالضبط بس حسيت إن الدعوه انتقام نواف: لا ياخالد انا احكى لك السالفه كامله عشان تصير في الصوره وتدري انه مالي ذنب .. كنت توي راجع من الجامعه على اذان العصر سمعت صوت حرمه تصرخ وتصيح استغربت قربت من بيت جيرانا كان الصوت طالع من عندهم دقيت الجرس طولت عند الباب محد فتح لي رحت ورجعت مره ثانيه بعد ربع ساعه فتحت لي الباب بنت صغيره عمرها 10 سنين جالسه تصيح قلت لها وش فيكم ؟؟ قالت اخوي تهاوش هو وامي وضربها وقفل عليها باب الملحق من امس واليوم هو مانام بالبيت رحمتها المسكينه قلت اكيد هاذي ولدها مو صاحي .. المشكله انه صغير عمره 15 سنه خالد: يالله ناس يتمنون الام وناس يعقون بامهاتهم.. نواف: لا طلعت مو امه ياخالد مره ابوه والمشكله هى اللى مربيته لكن يوم توفى ابوه كان كاتب كل شئ باسمها .. وهذا كان سبب الخلا ف بينهم .. كان يطلب منها مبالغ خياليه مره تعطيه ومره تقول مامعي فكان اذا ماعطته يمد ايده ويتلفظ عليها خالد: طيب ليه الابو يسوى كذا المفروض التركه تتوزع حسب الشرع ؟؟؟ نواف: اللى انت ماتعرفه ياخالد انى انا رحت بلغت الشرطه عشان يشوفون حل لهاالمسكينه .. الشرطه جت وفتشت البيت لقت فيه بلاوي حشيش وخمر و.. خالد: انا لله وانا اليه راجعون نواف: وزي منت عارف ياخالد دخل هوالاحداث وعرف اني انا اللى مبلغ عليه ومن يومها وهو يتوعد ويهدد !!!!!!!!!!!!!!!! خالد: الله يعافيه ولا يبلانا نواف: المهم ماعليك منه اخبارك انت؟؟؟ خالد: ماشين .. على فكره يانواف انت عندك موقع بالنت اسمه خيال ؟؟ نواف: ايه ليش؟؟ خالد: وحنا اخر من يعلم .. نواف: ههههههههههههههه لا والله تبيني ادور في الشوارع اقول ياناس عندي موقع ادخلووووووووه لا يفوتكم!!!!!!!!! خالد:هههههههههه لا بس ذاك اليوم كنت جالس عالنت وكان معى واحد من الشباب وقالى صاحب الموقع اسمه نواف الغامر.. وهو مبرمج كمبيوتر على طول عرفت انك انت.... نواف: يارجال لي خمس سنين اكرف بالجامعه قلت خلينا نطلع منها بفايده خالد: اجل خلينا نستغلك !!!!!!؟؟؟؟؟؟؟ نواف: قويه ذي نستغلك خالد: هههههههههههههههههه لا والله من جد ابيك تسوي لى اعلان عندك اكتب شاعرنا الكبير... نواف: ههههههههههههه اوكي مو مشكلة .. عطني العبارات اللي تبيها وانا اسويه لك خالد: هذا العشم فيك يا نواف نواف: ايه يا خالد من زمان ما شفناك .. تغيب وتطوول علينا خالد: والله هاذي حال الدنيا نواف: الله يعين الجميع خالد: .. شخبار خالي ؟ نواف: بخير مزعجنا فيك شوفوا خالد وشوفوا خالد مدري وش عاجبه فيك خالد: هههههههههه قله تراني ما ابي ريما هالملسونة كأنه يلمح علي نواف: هههههههههههههههه يا شيخ طر اكثر من يتطنز عليك ريمااا خالد: افاا افاا نواف: علشان تعرف زوجة المستقبل خالد: لا تحطون امل فيني بهالقشرة نواف: هههههههه يا حليلك يا خالد نواف: إلا ما قلتي شخبارك ياشاعرنا ؟؟ خالد: تمااااااااام.. نواف: يلا عاد همتك اكتب فيني قصيدة خالد: وانا خبل اشتت افكاري باسمك نواف: هههههههههههه .. قهرر لو ابوك عمي كان اسمك صار زي اسمي كان يمديني استغل اسمك خالد: اااااخ يا نواف .. والله الشعر والقصايد ما تطلع إلا باحاسيس ومشاعر يا كثر ما كتمت بقلبي بس ربي سخرلي هالشعر وطلعت حررتي فيه نواف وهو حاط ايده على كتف خالد: يا خالد والله انك طيب .. بس مشكلتك مغرور وقطوووع خالد: ههههه نواف: ابتسم تبتسم لك الحياة عبير: يما وش فيها ريما؟ ام نواف: ما ادري عنها ما ذاقت شي من يوم ما جت نامت وقامت صلت ورجعت نامت عبير: غريبة مهب من عادتها تنام هالوقت ام نواف: ايه والله مهيب من عادتها فارس وهو قايم: يما بروح انام عبير: وش فيكم اليوم نواف طالع ومو من عادته وريما نايمه ومو من عادتها وفارس بينام ومو من عادته فيكم شي؟؟؟ ام نواف: روحي قومي ريما الساعة 11 نايمة من متى ابو نواف: السلام عليكم قامت عبير وسلمت على ابوها وحبت راسه: وعليكم السلام ابو نواف: شخبارك يا عبير؟ عبير: الحمدلله تمام انت اللي وش اخبارك؟ ابو نواف: الحمدلله . . . هااا وين ريما أجل مالها حس عبير: نايمة ابو نواف: نايمه!!!.. . روحي يا عبير قوميها لا يصير فيها شي وحنا ما ندري عبير وهي قايمة: ان شاء الله يبا راحت عبير وطقت باب غرفة ريما وفتحت الباب كانت الغرفة مظلمة وباررررررده تخلي الواحد يجيه النوم من غير شي فتحت النور عبير: ريما ريما ريما ريما . . . ريما وش فيك سلامات . . . ريما ريما ريما: هاااا وش تبين صكي النور واطلعي عبير: افاا وانا اللي اقول ابجلس مع ريما وابسهر معها وطلعتي مو قد الجلسة ريما وهي تجلس: اففففف والله طفشانة وما بي حيل اقوم بس علشانك ابقوم عبير: ابوي خايف عليك يقول هالبقرة الى الآن ما قامت ريما وهي تبتسم: الحقوق محفوظة لدى عبير الغامر عبير: خخخخخخ قومي قومي بس قامت ريما وغسلت و غيرت ملابسها وطلعت بالصالة عند عبير ريما: ما نزلتي تحت؟؟ عبير: لا انتظرك تنزلين معي ريما: اهاا وش هالحنية المتأخرة عبير: مصدقة انت ووجهك ابسألك وش فيك عسى ما شر؟ ريما: قولي ورا هالمصلحة لقافة عبير: ههههههههههههههههههه طيب بقول بس قوليلي وش فيك ريما: ابد مهنا شي بس بس بس بس بس بس نسيت احل واجب الأحياء اليوم عبير: ياناس يا عالم اموت عالنصباتهههههههههههههههااااي حلوووووة حلووووة كخخخخخخخ اللي كذا ريما: هههههههههههه امشي بس عبير: وش فيك قوليلي ريما: تحلمين اقولك علشان تعرفون انت وامي اذا بغيتوا تكلمون بعض تشوتوني من عندكم واذا قلت لكم تراني منب بزر قلتوا ما عليش اطلعي عبير: هههههههههههه لهدرجة الحقـــــــد معليش انا اختك الكبيرة يلا ريما: امحق اخت كبيرة ما شفت منك شي غير يوم الأربعاء تجيننا وتسهرين معي والأيام الباقية تجين اجلس شوي بعدين اروح اذاكر واحل واجباتي عبير: وش اسوي فيك دامك miss – دافورة ريما: وش اخبار عمو؟؟ عبير: والله لي اسبوعين ماشفته سعود يروح له ولا يقولي .. بس الجمعه قال سعود بنروح له ريما: اواواواو من زمان ماشفته وش رايكم تمروني واروح معكم عبير: خلاص اتصل عليك قبل ما نروح بساعة علشان تتجهزين ريما: اووووكيك . . . يلا ما ودك تنزلين عبير: يلا الساعة - 1 - بالليل دخل نواف البيت جاي من برى سلم وجلس يسولف مع البنات.. نواف: يلا منتب نايمين عبير: هيه انت لا تخرب اختي اذا نامت اجلس مع مين؟؟ نواف وهو يغمز لها: ههههههههههه ابستفرد فيك انا عبير: ههههههههههه لا لا انا من لي غير ريماني بعد قلبي ريما وهي منسدحة عالكنبة: ايه المصالح ما تجي الا اذا كان لك صالح نواف: وااااااااو عندك موهبة ال ال وش يسمونها تأليف الأمثال عبير: ريما وش فيك اليوم طفشانة موصلة حدك بالعادة ما تسكتين ريما وهي تناظر السقف: طفشاااااانة بقوة نواف: ايه صدق انا حاس بهالشي بس ساكت مقدرا للظروف عبير وهي تغمز لنواف: انا بروح للمطبخ ابسوي شى خفيف أكله تبون ؟؟؟ ريما: انا منب مشتهية نواف: انا جوعان.. قامت عبير دخلت المطبخ جلست تفتح الادراج بعدين راحت للثلاجه عشان ادورلهم شى تسويه طلعت التوست وقررت تعمل لهم ساندويشات تونا ومرتديلا عاد عبييير مايحتاج ربه بيت ممتازه نفسها بالطبخ مرره حلو.. نواف: ريمااااااا وش بك؟ ريما: هالخطة ما تمشي علي بااااااايخة نواف: ادري بس تنفع للاستفراد ريما: ما فيني شي نواف: علي ريما: لا بس بس تبي الصراحة نواف: ايه اصلا انا وياك 24 ساعة نسولف مع بعض ما في احد غيرنا عبير ام الاحلام ببيت رجلها وفارس صغير ومنهبل انت اعقل وحدة من بعدي طبعا ريما: خلود غايبة اليوم نواف: هههههههههههههههههههههههههههههه علشان كذا ضايق صدرك يا بخت خلود فيك ريما: لا وبعد اليوم الجدول دسم يعني ما في احد يشاركني غثاي هذا هو السبب بس نواف: مع اني منب متأكد بس يلا نمشيها لك ريما: وانت وينك طول اليوم؟ دخلت عبير ومعها صينية السندويشات والعصير نواف: يووووووه نسيت اقولك ريما: وشو؟ نواف: خالد طلب يدك ريما: هاهاهاها انا اتزوج ابو خشم في السماء هيــــــن!! نواف: هه هه هه اصلا هو يقول انا ما ابي هالملسونة ريما: نعمة من رب العالمين الرحمن الرحيم انه انعم علي بطوالة اللسان علشان ما يفكر فيني عبير: ههههههههه الا وشخبار خالد؟ نواف: يسلم عليكم كلكم ويقول فاتح خالي بموضوع خطبتي من ريما لعل وعسى يوافق عبير: ابوي اكيد بيوافق اصلا هو ما يحب احد كثر خالد نواف: تهقين ما ياخذ رأي ريما عبير: اكيـــــــد ما راح ياخذ رايها لانه هو بنفسه ينتظر هاللحظة نواف: يعني اقوله يجي بدون مقدمات عبير: قل له نواف: خلاص بكره ان شاء الله يكون هنا . . انا عارفه مهب قادر يصبر علي ثواني عبير: الله يعينه ريما وهي قايمة: خلاص بروح ارتب شنطة السفر بتاعتي دنا ماليش عيشة معاكم من بعد اليوم انتوا ما بتحبونيش دنا بكرهكم بكرهكم بكرهكم . . . طبعا اجيب شنطة كبر البيت وتصير فاضية نواف: هههههههههههه الله يقطع ابليسك عبير: هههههههههههههههههههههههههههه يا بنت اختشي دا ابن عمتك عاوزك على سنة الله ورسوله رقال ما عليهوش كلام دا رقال ولا كل الرقالة ريما: لا لا لا لا لا لا مش ممكن بروح اجلس بغرفتي لا انتحر اذا قعدت معكم خمس ثواني زيادة نواف: تعالي تعالي بس تبينها من الله تصريفة ريما: اصلا بروح المطبخ من الصبح ما ذقت شي مسويتلي اتغلى ومحد عطاني وجه وقالي كولي عبير: وانا جايبة ادوات خياطة ؟؟!! انا وش جايبة اجل ريما: لا يا حبيبتي بروح آكل من غدا ميمتي ما ذقته اليوم نواف: خخخخخخخ روحي كولي من اكل ميمتك يدق جوال عبير وكان الجوال قريب من ريما شافت المتصل (عطري) ريما: خوذي جوالك غرشه عطر يتصل بك عبير: مشكله الغيره اخذت عبير الجوال وراحت الصاله الثانيه تكلم زوجها وتركت نواف وريما نواف: ليش قلتي غرشه عطر ماقلتي كالونيا ريما: اقلد حكي اهل الامارات نواف: ااااااللللله ياسعاده السفير وش عرفك بكلامهم؟؟ ريما: من صديقتي مي ... طبعا ريما خافت لا تقوله انها تعرفت على وحده اماراتيه عن طريق النت كان يذبحها ويفتح معها تحقيق "وش يثبت لك انها بنت؟؟" "وليش ماعلمتيني ؟؟" نواف: اللي اعرفه إن مي كويتيه مو اماراتيه ريما: تتكلم مخلط بعدين هو تحقيق ما تسوى علي الكلمه اللي قلتها راحت ريما الصاله الثانيه عند عبير وهي تتنحنح.. ريما: مع انه مو من عوايدي التلصق باللي ما يبيني الا اني ابلصق هالمرة كذا براسي مهاوشة عبير: خلاص انا طالعة اللحين ريما: اخخخخخ يا قهررر ما امداك كلمتي عبير: موووتي واشبعي قهررر ريما: لا تشلحين كلمتي رجاءا نواف: يلا يلا على سريرك يا ماما راحت اللي كانت تبيك ريما: احممم كح كح كح كح كح كح ما صارت كحة عادية صارت كحة مشاري نواف: مين مشاري؟؟ ريما: كم مشاري نعرف حنا؟ نواف: مشاري ولد عمي عبدالرحمن ريما: ايه نعم نواف: متى شفتيه انت؟ ومتى اصلا سمعتي كحته؟ وهو ما ينشاف الا بآخر الليول ريما: مرة رحت عندهم لقيته فيه نواف: بيت عمي عبدالرحمن ما تطبينه من غير امي الا اذا كنت تبي ترجعين الساعة 8 ريما: يا سلاااااااااام نواف: يا سلامين . . . ياريما هالولد كحته ما جت من فراغ ما جت الا ورا التدخين عبير وهي تبي تطلع: يله مع السلامه.. نواف + ريما: مع السلامه نواف وهو قايم: ريما روحي نامي السهر مو زين ريما: مافيني نوم.. ورجع صدى صوت ريما لنفسها وعرفت ان نواف راح وتركها قامت وراحت غرفتها وجلست تقرأ رواية الخميس بالليل مباراة بين الهلال × النصر ضمن دوري خادم الحرمين الشريفين سارة: ياااا ربــــــــــي ريما وهي ملصقة يدينها وحاطتها على وجهها وبحماس: ايوه يلا يلا يلا لا لا لا لاااااااااااا خسااااااااااارة والله قهرررر سارة وهي تناظر: قهرررررين ريما: هههههههه وش بك مبلمة سارة: سلامتك بس انقهرت مها: السلام عليكم سارة + ريما: وعليكم السلام مها: شخبارك ريما؟ ريما: بصحة وسلامة سارة: ما ودك تسألين عن النتيجة مها: ومين قال اني اهتم بهالأمور؟؟؟!! وقفت ريما تنطط وتصاااارخ: قوووووووووووووول قووووووووول قوووووووووول واااااااااااااااااووو لا لا منب مصدددقة لا لا لا يتراوالي سارونة حبيبتي شوفي النتيجة كم خل أتأكد بسرررررعة سارة وهي فاتحة فمها: oooh may god ونقزت سارة وضمت ريما وصفقوا يدين بعض سارة: الا اشوف النتيجة النصر 1 والهلال 0 يا شماتى بنواف ريما: اسكتي لا تنقلب النتيجة سارة: ايه والله ابسكت اصرررف لي مها وهي تقوم: الحمدلله والشكر ريما: تحمدي على كيفك وروحي كولي لك كم كتاب وتعالي هضمي عندنا سارة وهي تكتم ضحكتها: ريما عيب تكلمين مها هههههههههه...... مها: تراكم ما تقللون من ثقتي بالطريقة على العكس تماما انتم ترفعون ثقتي اكثر واكثر ريما: مشكووورة حبيبتي عالمعلومة روحي ابدي بوجبتك الخمسطعش لهذا اليوم مها: انتم تعتقدون ان الأكل اهم من الثقافة والدراسة وهذا على العكس تماما مفروض تقارنون الأكل بالعلم والثقافة يكفي ان اول شي خلق هو القلم فـ... ريما: لا اله الا الله محمد رسول الله انا ما افتك من المدرسة تجيني اختك هاذي اموت واعرف كيف مستحملتها يا سارة سارة: انا مسكينة بيني اثنين وكل واحد اغث من الثاني ريما: الله يعينك انا عندي فارس مع انه ما يتكلم معي بس ودي اصفقه سارة: ما شاء الله تف تف تف تف تف اللهم لا حسد مها وهي طالعة: انا ودي اصلا انا ما تخصصت علم نفس الا علشان ادرس حالتكم مع ان الكتب ما قصرت ووصفت حالتكم بس انتم ما تعترفون الا بهالشي سارة: لا لا لااااااااااااااا مستحيــــــــــــل مو معقوووووووووووووول ريما: هئ هئ هئ هئ هئ الله ياخذك على بالي عندك سالفة كل ذا علشان بلنتي جا لصالح الهلال سارة: اكيد البلنتي مضمون ريما: اسكتي خل نشوف اللقطة مع اني متأكدة ان الحكم غاش بس مهنا مشكلة الله عالظالم سارة: لا لا واضحة شوفيها داخل منطقة الجزاء والكسرة واضحة ريما: طيب اسكتي خل ندعو الله انهم يضيعونها سارة: يا ررررب وفي نفس الوقت كان نواف بالاستراحه مع الشباب وكالعاده انواع الازعاج كل مجموعه بجهه ومتعصبه لفريق اللي منسدح واللي يصارخ ومجموعه حاطين الشمغ والعقل على جنب الكل متحمس نواف: لااااااااااااااااااااا ضاعت ماجد: يارجال اليوم مدري وش فيهم لعبهم مهب زي العادة نواف: يا اخي ذا اللاعب دبشة ما ادري كيف طلع من دوري الناشئين؟ فيصل: حلووووه هاذي ما ودك تصير رئيس الشباب نواف: فيصل ليش انت تحطم كذا؟ ماجد: يا اخوان فضوها سيرة النصر 1 والهلال 0 وتتهاوشون اجل لو الهلال جته حالته وصكوهم النصر بـ 5 اهداف وش تبون تسوون؟؟ نواف: ايووووووه حلوو تمام ماجد: شفتوا يوم سكتوا جاء البلنتي نواف: لا لا تكفون الا هاللاعب عقدتي في الحياة لا تخلونه يشوتها فيصل وهو واقف: اللـــــــــــــــــــــه عليـــــــــك لاعب ولا كل اللاعبين خطير خطير يا ناس يا عالم انا ما ادري ليش ما ياخذونه الأجانب عندهم؟ نواف: الله يصلحك اجلس اجلس الله عليك لاعب ولا كل اللاعبين ما اقول الا انك دبشة وما تعرف من الكورة الا انك تشجع الهلال يلا عليكم يالهلاليييييييين بالهدف الثاني ولا تفشلوننا ثامر: السلام . . . كم النتيجة؟ عبدالله: وعليكم السلام نواف: وعليكم النتيجة 1 . 1 ثامر: متى دخلوا هاذولا توه جايني خبر ان النصر 1 والهلال 0 ومنطلق بغيت اسوي حادث نواف: هاهاهاهااااي اجلس يا بابا الموعد الفوز عبدالله: تحلمون بالفوز التعادل ما يعني الفوز يا حلوو نواف: عبدالله تفرج وانت ساكت ثامر: خخخخخخخخ احلى شي اذا كان نواف يتفرج على مباراة يفشل اللي قدامه لما يقول آمين ماجد: سمعتوا الخبر يقولون إن ياسر القحطاني بينتقل للهلال اوللاتحاد عبدالله: لاانا اللي اعرفه انهم طلبوه يحترف بالخارج جايته عررررووووض مو طبيعيه نواف: يارجال كلها اشاعات ياسر عشانه فنان ولعبه حلو ونظيف الكلام عليه كثير عبدالله: لالالالالا ... اوه ... الحمدلله على بالي ضربه جزاء ثامر: امااااااااا لويطلع كلامكم صحيح وينتقل ياسر للهلال بعشيكم احلى عشاء فيصل: لحظه عيد الكلام خل نسجله اخاف بعدين تجحد وتقول انا ماقلت!!! نواف: اقول فيصل صرت زي المطربه شمس ماتمشى إلا وجوالها معها تسجل حكي خلق الله فيصل: ايه شفتوها بنت اللذينا يوم مقابلتها في برنامج لمن يجرؤ مع طوني فضحت بالعالم ماتركت احد ماقالت عنه قصه نواف ويدينه ورى راسه: ايووووووووووووووه هجمه هجمه انتهت المباراه بالتعادل 1 / 1 يوم الجمعه العصر.. الساعه 4 في رياضنا الحبيبه في شقه سعود وعبير يعم الهدؤ والسعاده على هذا البيت كانت عبير تنتظر سعود يصحى من النوم عشان يمرون اختها ريما ويروحون بيت عمها وفي نفس الوقت هي قاعده تفكر هل القرار اللى اتخذته في انها تنتقل وتعيش عندعمها صح ولا؟ يقطع عليها تفكيرها صوت جوالها وكانت صديقتها نجلاء نجلاء: السلام عليكم عبير: هلا وغلا ومرحبا وعليكم السلام والرحمة والبركة نجلاء: كيفك؟ عبير: ملاااااااانة طفشاااااااانة نجلاء: انت اللي جبتيه لنفسك محد قالك تعتذرين الترم هذا عبير: يا شيخة على بالي باخذ فترة نقاهة اثاريها انقلبت فترة كآبة نجلاء: بس حبيت أكلمك واشوف وش أخبارك وش علومك عبير: الحمدلله تمام شو اخبارك انت؟ نجلاء: خليها على ربك ياعبير عبير: ليه صار شئ جديد؟؟ نجلاء: كالعاده مره تقولين انه حنون ومره تقولين من ويين طلع لي هالوحش عبير: خليك قويه يانجلاء لاتضعفين.. نجلاء: ااااااااااه ياعبير انا تزوجت عشان اهرب من العيشه اللي كنت عايشتها.. لكن طحت بحياه مو بعيده عن حياتي الاولى عبير: ادعي ربك يانجلاء ربي مايرد عباده نجلاء: تخيلي ياعبير حتى اللحين وانا حامل ماسلمت منه ضرب واهانات عبير: يله ان شاء الله تولدين وتقومين لنا بالسلامه وتتغير حياتك للاحسن نجلاء: واللـــــــــه ماظنيت.. عبير وتبي تغير الموضوع : وش رايك تجيني تزوريني في بيتي قبل ما انتقـل نجلاء: تنقلين؟!!!!!! عبير: ايه بنروح نجلس ببيت عمي نجلاء: اهااا وانا على بالي بتروحين بيت جديد عبير: ههههههههههه بيت عمي بيت جديد نجلاء: وانت الصادقة مو شرط يكون بناء جديد ولا تشطيب جديد اهم شئ تكون الحياه حلووووووه.. عبير: الحمدلله انا مرتاحه مع سعود لكن الزين مايكمل.. ناقصني بيبي يملى علي حياتي.. نجلاء: الله يرزقك ان شاء الله عبير: اقول نجلاء شكل سعود صحى من النوم بروح اشوفه يبي شي اكلمك بعدين نجلاء: ايه ياحبيبتي مقيوله من لقى احبابه نسى اصحابه عبير:هههههههههههههه نجلاء: يله روحي بس لاتقطعين عبير: مع السلامه ريما: ماري مـــــــاري مـــــــــــــــــــــــــــــاري ام نواف: وش عندك انتي تصارخين ماري مشغوله بالمطبخ ريما: يمه هاذي الشغاله ترفع ضغطي انا من ساعه عاطيتها ملابسي تكويها والى الان حضرتها ماجابتهم عبير اتصلت وقالت نص ساعه ونكون عندك عشان اروح معهم بيت عمي ام نواف: طيب يابنيتي الدنيا ميب طايره ريما: يمه تكفين استعجليها عشان تكويهم ام نواف: ان شاء الله نواف: سلامات وش فيكم؟ ريما: ربي جابك ابيك تجي تاخذني من بيت عمي صالح وتوديني بيت عمي عبد الرحمن لاني بصراحه استحى اقول لسعود يوديني نواف: حاضر انسه ريما ماودك بعد اخذك انتي وسارة و نمر خلود بعدين امشيكم شوي وامر اقهويكم في الكوفي شوب00 ريما: اللـــــــــــــــه وناسه بس خلود ماتقدر تجي معنا مسكينه ابوها تعبان في المستشفى نواف: والله محد غيري المسكين اشتغل سواق عندك بس من غير فيزا 00 اقول اسمعيني لايكثر من بيت عمي صالح ترجعك عبير على هنا ساره تبيك خليها تجي هنا ريما: ياسلام وانت اش فيك على ساره ؟ ويدق تلفون البيت ويقطع حديثهم كانت المتصله عبير تبي ريما تطلع راحت ريما للدولاب بسرعه وطلعت لها تنوره جنز سماويه مع تيشيرت ليموني وطلعتلهم بسرعه ركبت ريما السياره وهي ساكته استغربت عبير منها انها هاديه على غير العاده عبير: وش فيه القميييل زعلان ريما: سلامتك سعود: شكلها متضايقه عشاني انا اللي اسوق بنزل وانتي سوقي بدالي ياعبير عبير: هاهااااااااا ماعندي مانع بس اخاف يصيدوني مامعي رخصه ريما: لالالا خلاص خلوها علي وانا اسوق لكم ولا سواق محترف اخمس لكم واقلب لكم السياره .. سعود: لا ياريما انا ماعندي استعداد اضحي بحياتي بخذ زوجتي وانزل وانتي خمسىىىى على كيف كيفك00 ريم ا+ عبير: هاهاهااااا عبير: ايه هاذي ريما اللي اعرفها وصلوا لبيت عمهم ونزلو سلموا عليه فرح ورحب فيهم ابوسعود ويتكلم بصوت واطي مع ولده: ها ياسعود فاتحت مرتك بلي قلتلك عليه؟ سعود: ايه يبه ومثل ماتوقعت ماكان عندها مانع استغلت عبير انشغال سعود وابوه: وش فيك احسك من يوم ماركبتي معنا وانتي متضايقه احد مزعلك؟ ريما: انا طفشانه ياعبير خلود مشغوله عني مع ابوها الله يشفيه وانتي مع رجلك مافي احد يوسع صدري الا ساره بنت عمي ويوم قلت لنواف ودني لها وقال خليها هي تجيك مو معقوله ياعبير كلامه مو منطقي!! عبير: خلاص اتركيه علي انا اتفهم معه قاموا البنات يتفرجون عالبيت ويطالعون الجناح الي راح تنتقل له عبير ورجلها دقت عبير على اخوها نواف وقالت له انها تبي تودي ريما عند ساره ومااقتنع الا بعد محاولات عبير: بكره تجهزي بمرك ونروح بيت عمي لاني تذكرت ان سعود اليوم مشغول مايقدر يودينا ريما : مشكوره يااحلى اخت تصدقين من يوم راح السواق وانا احس اني عاله على المجتمع مره معك ومره خلود ترجعني من المدرسه ومـــــــــــ...... عبير: خلاص خلاص يارب انك ترجع سواق اهلى سالم غانم عشان ريما تحس انها عضو فعال في المجتمع ريما: امين يارب عبير: الحمد لله والشكر اللي يسمعك يقول اني داعيتلك تدخلين الجنه ريما: صوت رجلك ينادي عبير: يلا ننزل طلعو من عند عمهم ونزلو ريما في البيت دخلت ريما البيت وهي طفشانه طلعت غرفتها غيرت ملابسه دقت على خلود ماردت عليها .. بالاخير راحت وشبكت نت تضيع وقتها فيه.. كان خالد جالس يرتب مكتبه ويشوف الاوراق المهمه ويجهز طلبات الناس دق جواله خالد: الو ريهام: مرحبا اخوي خالد: اهلين من معي ريهام: انا اللي دقيت عليك قبل فتره عشان تسوى لي قصيده زفه إنــــــــ..... خالد: معليش الاسبوع اللي راح انا كنت مشغول اختي دقي على مره ثانيه ريهام: طيب ممكن لحظه ..... اذا خلصت من شغلك تدق على هذا الرقم خالد: اسف انا ماادق على احد انتي دقي ريهام: انا نفسي اعرف انت ليش مغرور خالد: عفوا اختي ماسمعت ايش قلتي ريهام: اقول الكبر لله ودوم ابن ادم صغير خالد: انتي داقه تعطيني درس بالاخلاق ريهام: مع السلامه وسكرت الخط قعد خالد يضحك ويقول مشكله اللي يبي يحتكون ومايلقون احد يعطيهم وجه ورجع للحوسه والاوراق وجلس يقلب بالملفات لقى خاطره قديمه كتبها باغلى انسانه عنده وهي امه يوم كان يدرس بثاني متوسط مع انه ماقد شاف امه إلا بالصور لانها توفت وهي تولده فهو يحس انه هو سبب وفاتها ويحس انها ضحت بحياتها عشانه كان يحبها كثير كان خاله ابو نواف وحرمته دائما يمدحون فيها وفي اخلاقها وانها انسانه عظيمه ماقد غلطت على احد والكل يذكرها بكل خير ... وتذكر ايام حياه ابوه الله يرحمه اللى توفى فجاه بسكته ابو خالد: تعال حبيبي شف وش جبتلك خالد: اللـــــــــــــــــــــــــــــــــــــــــه طياره كبيره مررررره حلوه كان اذا اشتراله شي ضمه خالد: الله يدخلك الجنه يابابا وماتروح وتتركني مثل ماما ابو خالد: ياحبيبي ادعي لامك اللي بقبرها هي محتاجه لهالدعاء اكثر مني ااااااااااااه يالدنيا الغالين تاخذينهم منا وش خليتي لنا شى نفرح فيه وقطع عليه تفكيره صوت الجوال نواف: السلام عليكم خالد: هلا وعليكم السلام نواف: سلامات وش فيه صوتك خالد: سلامتك بس يمكن عشاني توي صاحي من النوم نواف: ذابحك النوم خالد: يارجال خلها على ربك نواف: ونعم بالله انا تحت انزل عندك ولا تبي نروح مكان ثاني خالد: لا دامك وصلت ادخل نواف: يلا جايك مع السلامة خالد: مع السلامة جاء نواف خالد: حيا الله نواف نواف: الله يحييك خالد: ما بغيت تجي عندي نواف: انا انعزمت وقلت لا خالد: انا خالد خــــــالـــــــد اعزم احد على بيتي اللي يبيني يجيني نواف: هههههههههههههه انت حتى بهالأمور مغرور خالد: انتم خلاص ما تشوفون واحد واثق من نفسه ويقول الحق الا وتقولون مغرور نواف: المهم يا واثق ادخل الموقع وشف الاعلان اللي حطيته لك .. وخذ هالسي دي شف التصميمين اللي سويتهم .. خالد ياخذ السي دي: مشكووور يا نواف ما قصرررت نواف: العفوو يلا عااااااد اللحين ابيك تكتب فيني قصيدة خالد: هههههههههه ما فيه خدمات ببلاش عندك نواف: لا يابووك مافي شي ببلاش هالايام خالد: طيب بكم الاعلان؟؟!! نواف: بعشر بيوت شعر خالد: لا اتكلم جد نواف: من جد انت تبي تدفع؟! خالد: اكيد .. اجل تبي تخليها مكرمة من عندك .. لا يا حبيبي قل لي كم نواف وهو قايم: يا رجاااااااال .. انا استأذن عندي شغل خالد: والله لا تقول نواف: انا اسويه بـ 500 بس والله ما تدفع ولا ريال خالد: بعدين نتفاهم لأن شكلك مستعجل نواف: ايه والله يلا نشوفك إن شاء الله بعدين .. خالد: إن شاء الله رن تلفون البيت قامت مها بترد عليه ..... ردت كانت المتصله صديقتها ريهام: الووو مها: هلا وغلا ومرحبا برهووم ريهام: شخبااااااارك؟ مها: تمام ريهام: كيف سارة وريما؟ مها: اشوف ريما صارت احد افراد بيتنا ريهام: ههههههههه يا حليلها مها: انت كيفك؟ ريهام: عسل عسل يا عسل مها: إن شاء الله دوم ريهام: تعاااااالي مها: هلا ريهام: توني مصكرة من ولد عمتك مها وقلبها يطق بقوة: وش صار؟ ريهام: مغرور مها: ............. ادري وقديـــــــمة ريهام: هههههههههههههه اسمعي اسمعي وش صار .. وحكتلها الكلام المختصر اللي صار بينهم مها تسمعها وتدقق على كل كلمة .. هذا خالد هذا خالد اللي حبته واللي إلى الآن محد درى عن اللي بقلبها إلا ريهام .. هي تحاول أي شئ يقربها من حبيب قلبها خالد لكن هو انسان ثقيل وشايف نفسه يعني مافي امل يفكر فيها.. هي لما قالت لصديقتها تكلمه كانت تبي تعرف هل خالد من الشباب اللاعبين ..وطبيعة ريهام تحب تسوي مقالب ولأن اهلها متحررين كانت ما تمانع انها تسوي أي شي ينرفز اشخاص ثانين.. اغاني اسلامية اغاني جديدة اشرطة اناشيد جديدة احلا الاغاني اجمل الاناشيد اخر و افضل البومات - |
|
| أدوات الموضوع | |
| طريقة عرض الموضوع | |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر رد |
| قصة غريبة .. | قاهرة التماسيح | صوتيات اسلاميه اناشيد محاضرات خطب وعظ | 13 | 12-23-2008 09:56 PM |
| غريبة وين الناس عنها | ولد ابها | المنتدى الاسلامى | 7 | 04-27-2007 01:26 AM |
| صور غريبة لبنات عروسات مستخفات على الآخر | نسـيم | صور مضحكة صور طريفة صور حلوه الصور المضحكه و الطريفه و الحلوه | 6 | 04-17-2007 10:32 AM |
| قصة غريبة جداً بطلها هو سائق الإسعاف | samia | منتدى الحوار العام الفسحة العامة | 4 | 09-06-2002 10:29 AM |
العرض العادي
