أهلا بالجميـــــــــــــــــع


في نظري الشاعر الكبير


الشاعر المتألق ..


صاحب الكلمات الرومانسية


والقلم المبدع



الامير بدر بن عبد المحسن




يستحق أن اكتب عنه موضوعا



اترككم مع روائع البدر




صوت العظام قصيدة


لو هو غضب بيحت ما ضم جوفي
من الغثا واظهرت عقب االعقل جهل
ولو هو الم ما طال عندك وقوفي
ولا جيت أبا اسمع قصة الذيب والحمل
ولو هو ندم كسرت .. باقي سيوفي
على دروب الوصل ومفارق الشمل
صوت العظام اللي تكسر حروفي
مابه كلامٍ تنطقه شفتي سهل
إن جيت امش الدمع تبكي كفوفي
وإن جيت أقول الشهد يوذيني النحل
الحمل ماهو اللي تشيله كتوفي
الموت لا صارت كتوفي هي الحمل
ومن قال باكر .. قلت باكر حتوفي
والباقي إنشد عنه ضراية الرمل

ظنك أحد طار قصيدة



ومـا قـد لـمـسـت بأصـبـعــي .. جمرٍ .. و في بـالـي أحـتـرق ..
ولا دخـلت البحـر وأكـفـاني معي.. ودي عن أنفاسـي افتـرق ..
لكـن لـمحـت المـوت .. مـره .. يمـكـن مرتيـن ..
وما كـان هـالقـاسـي .. الحـزين ..
سـمعـت له صـوت..أنا مرني المـوت..مثـل طـير.. و دعـاني ..

أدعـي معـي .. والا اخـشـعـي ..
و مـا هـي تـرى مـرثيتـي .. لا تـجـزعـي ..
لـيتـي شـجـاع .. الى هـالحـد .. والا صـدوق .. الى هـالحـد ..

البـارحـه .. والريـح تحـمـل رملـهـا ..
و اللـي عـطـا .. هـالأرض .. ذكــرى .. مـن بـقــايـا اهــلـهــا..
عـطـاني من بعـض الـقـبـور.. تـراب ..
و مـن كـل غـايـب .. جـلـد .. وكـفـن .. وعـتـاب ..
كـانـوا قـراب .. الى هـالـحــد ..
وذكــرونـي .. لـو الـذنـوب تـعــد .. وش كــثـر أنـا شـايـب..

الطـير مـرّ ومـرّ .. ومـا لـمحـنـاه ..
و لا دعـانـا .. بيـت قـصـرانـا .. بـه بـكـى ..
ظـنـك أحـد .. طـار !! ..

سألتي قصيدة



قالوا سألتي .. عني سألتي ..
وأنا ما ادري ويني .. ضايع ياعيني ..
ما ادرى وش اللي ذكرك ..
مقطع شعر في دفترك ..
والا الكلام عن صاحبك ..
وانت عقدتي حاجبك ..
قلتي كلام كله كذب ..
وليه اتصلتي .. عنى سألتي؟
آخر لقانا في الخريف
تذكري الثوب الخفيف
والبرد .. يوم خفتى علي من البرد..
وامطار الخريف..
ومرت سنة يمكن سنين
ويني أنا ووين السنين؟
قلتي كلام كله كذب
ليه اتصلتي.. عني سألتي ..
صوتك طيور مهاجره ..
مرت في قلبي مسافره ..
والحب .. لو طال الغياب اول مداك وآخره ..
غيبي سنه والا سنين ..
بااجيك انا .. والا تجين ..



عيونك والعتيم قصيدة



إنتى عيونك والعتيم .. سبحان رب خالقه
قصيدة لشاعر قديم .. عاشق وماحد صدقه
ومن كثر ما غبتي عليه .. جمع قصيدة وشققه

إنتى عيونك سالفه .. سمعتها ليلة سفر
واثنين مروا بعاصفه .. وضيعوا نجمة وقمر
ومن يومها كثر الظلام .. وراح السحاب وبارقه

إنتي عيونك هالمدى .. بحر وطيور مهاجرة
تركت في شطه صدى .. صوتٍ تجرح آخره
ليتك سمعتي صرختي .. بالحيل كانت صادقه

إنتى عيونك نجمتين .. ضي ٍ ورا ضي ٍ يعود
ويادوب غابوا ليلتين .. خلو شموس الكون سود
رحتي ولا ظنك تجين
وين الوعد يامفارقه
إنتى عيونك والعتيم .. سبحان رب خالقه
قصيدة لشاعر قديم .. عاشق وماحد صدقه
ومن كثر ما غبتي عليه .. جمع قصيدة وشققه





سافري قصيدة


سافري كان يرضيك السفر
جربي لو ورى ليلي صباح
بدلي الرمل بأمواج البحر
واتبعي الغيم تحملك الرياح
سافري لين تبكين المطر
واضحكي لين ما يضيق البراح
ولا تعبتي وحسيتي بضجر
خلي الشوق لديارك جناح
أرجعي في ابتساماتك عذر
مثل ما الدمع في عيني سماح
انتي العين من طول النظر
وانتي القلب من كثر الجراح




صوتك يناديني قصيدة


تذكٌر .. صوتك يناديني ...
تذكر ... تذكر ...
تذكر الحلم الصَغير ...
وجدار من طين وحصير ...
وقمَرا ورا الليل الضرير ...
على الغَدير ...
لاهَبٌت النسمَة تكسر ...
جيتي من النسيان ...
ومن كل الزمان ...
اللي مَضَى ... واللي تغٌير ...
صوتك يناديني تذكٌر ...
ناديتي ... خانتني السنين ... اللي مَضت راحت
ناديت ... ماكن السنين ... اللي مضت راحت
كنا افترقنا البارحة ...
البارحة .... صارت عمر ...
ليله ... أَبَدْ عيٌت تمرٌ ...
ياجمرة الشوق الخَفي ...
نسيت أنا وجرحك وفي ...
يتذَكر الحلم الصغير ...
ريانَة العُود ... نادي ...
نادي الليَالي تعُود ..
بشوق الهَوى ... بوعُود ...
بوجهي اللي ضيعته زَمَان ...
في عُيُونك السٌود ...
ياالضحكة العَذبة ...
عَنك الصٌبر ... كِذبه ...
وفيك العُمر موعود ...
اشتقت للحلم الصغير ...
واشتقت لجدار وحصير ...
وقمَرا ورا الليل الضرير ...
على الغدير ...
ان هبت النسمَة تكسر ...





سلامة رماحك قصيدة


سلامة رماحك اللي جرحها غالي
طعنتني غاضب لين أنكسر رمحك
لو قلت لي كان أجرح حالي بحالي
لا عاش قلبٍ جزع وارتاع من جرحك
لاجلك جروحي غدن اليوم عذالي
ذميت ظلمك وأنا من عادتي مدحك
ياليت لي ذنب وألقى علقمك حالي
وياليت بك عدل .. وأرضى فـ الهوى ذبحك
ياسيدي وإن نويت تزيد غربالي
قلي وأنا أبعد ظلامي عن سنا صبحك
لو ما يسرك أطو ل الشمس بجبالي
مايكفي إن عشقت جبالك وسفحك
كل الهوى بالهوى يزهى ويختالي
وأنا الذي في خسارة عزتي ربحك
ياعل ماتزهرالأشجار في رمالي
لو أعتذر عن شموخي في رجا صفحك
سلامة رماحك الي جرحها غالي
طعنتني غاصب لين أنكسررمحك




الرماد قصيدة


الشمس طاحت .. وبردت.. ورمد الشفق .. في حجر الارض
من يشتهي يدوس باقدامه على هالرماد كله ..
يا عابرٍ .. على المدى .. من السراب .. الى الندى ..
قلبي سقط فوق التراب شله..
او لا تدوس القلب خله .. كل يوم له شمس
وانا مالي سوى قلبي
انا .. من بكى لين الثرى بله بالدمع ..
ويوم اكتفى .. صد وعصر ظله .. ومسح بردنه .. وجنته ..
ثم ابتسم لين حسدوه الناس
يازارعٍ شوك الهراس .. فوق الرمل كله .. لاقدام من يكره الشوك
ياحظ من ياطى بقدم .. انا مالي سوى قلبي
الشمس طاحت ونثر الظلام ظله ..
على الجروح .. ياكاتم الزين الفضوح عن عيني
لا تظهر انيابك .. وتقطع احبابك شمات
انا من عطى ضي الشموس خله .. لين حسدوه الناس
ولا تنتظر غير السموس .. لله ..
انا مالي سوى قلبي ..




نامت عيونك
وصحى الليل مظنونك أغاني
قصّت جناح الثواني غيبتك
وصارت الساعة أماني
وآهـ ..آهـ
أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد .. نامت عيونك

إسهر معي ليلة
حاول تحس بلوعتي ليلة
عد النجوم وش كثرها.. ياللي بقلبي كثرها
نام .. القمر فـ وسادتك نام
ليتك تغير عادتك
خل القمر ليله.. يسهر معي ليله

أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد.. نامت عيونك

يا ساحر البسمه .. أساهرك نجمه
وابسمعك كلمه .. كلمه و لو كلمه
قم نادني .. يالله عسى تحتاجني
وإن مر ليلي ما سألت
وإن زاد ظلمك ما عدلت
آهـ.. آهـ
أنا حروفي في غيابك
لا هي حكي ولا هي قصيد
أكتب الظلما وأعيد
وإنت ياالفجر البعيد.. نامت عيونك




لكن قصيدة



دروب الارض 00 لكن 00
انا احس السفر ساكن00
دروب الارض 00 ما بين الاماكن 00
ولغير الارض وين بنروح 00 نسافر 00
كأن الصوت يرجع للحناجر 00
كأن الدمع00 يرجع للمحاجر 00
كأن الجرح 00 يرجع للخناجر 00
مثل كل الطيور اللي تهاجر 00
وترجع كل مره 000
تعب هاالبحر لا يجتاز جدران السواحل 00
تعب هاالبر 00 لا يرقى الجبل 00
تعب هاالقلب 00 لا يصبح امل 00
وانا لي سنين واحل 00
حملت الطين كله 00 لكل الطين 00
تخيل يا انا المسكين 00 كم لك 00
على هذا الانا 00 مصلوب
دروب الارض 00 لكن 00
ما للارض لو تبغى الهروب 00 دروب 00

قصة العاشق قديمة قصيدة



افارق .. هاالنجوم الطايحه ..
بين المدى والقاع ..
وفي قلبي من الاوجاع ..
مايكفي ..
وفي قلبي افارق ..
حزين اللي تركت البارحه ..
وجهه على كفوفك ..
غسل بدموعه طْيوفك ..
غرستي في صدره حروفك ..
بيارق ..
ورى هاذي الهضاب سفوح ..
عيونٍٍ مالها عيونك ..
ولاقلبك ..
اسافر كل قلبي جروح ..
وانا احبك ..
عسى لاطبت.. طفيتك حرايق ..
ولو بيديني غيرتك ..
ولو مثلك في هاذي الارض ..
ضيعتك.. ودورتك ..
ولكن انتي .. غير انتي ..
وانا .. مثل الخلايق ..
افارق ..
ودايم قصة العاشق .. قديمه ..
مثل كل الفصول ..
اللي على مر الزمن تنعاد ..
عزانا .. والدموع جداد ..
بأن الشمس وحده ..
وياكثر المشارق..



فم الجروح قصيدة



فم الجروح ..
نوافذ البوح ..
هـذي الثقوب في الصارخ الحي ..
نوافير من ضي ..
وجدار ..
املاها بحديث النار ..
واكسرها على اقدام الاماني ..
مره أغاني ..
ومرها .. كلامٍٍ جارح ..
وهذا القصيد ..اللي كتبت البارح ..
اليوم .. انفاس الصباح ..
تلفح جروحي ..
آه .. ياصبحٍٍ لمحت في عتمته روحي ..
طفلةٍ تصدح على خشب المسارح ..
ياصوتها الغاضب المقطوع ..
بعض السواد .. شموع ..
ومحدٍ درى وش قلتي ..
خانتني الجوارح ..
مثل القصيد اللي كتبت البارح ..


لا تناظرين بعيد قصيدة



تعبت اناظر فوق ..
واتعلق بشوفي ..
تحتي الثرى مشقوق ..
وهمك على كتوفي ..
ولاتناظرين بعيد ..
وبلادي في عيونك
توي قطعت البيد ..
لرضاك .. وبدونك ..
ماعاد فيني اعروق ..
ودمي على سيوفي ..
لاتمطريني ورد ..
مشقوقه كفوفي ..
مثل الثرى .. والقلب ..
قمح ونخل محروق ..
وجدراني حروفي ..
تعبت اناظر فوق ..
تحتي الثرى مشقوق ..
قمح ونخل محروق ..
ماعاد فيني عروق ..
ماتنزلي لخوفي ..؟


الكلام الغريب قصيدة


من علم لسانى
الكلام الغريب . .
إلين قلت : ان الحليب . . رمل . . والمرضعه ريـح
والصدر خيمة راعى في الجدب
من علم الكذب لسانى
الرسم . . الاغانى
الطفل في الظلما
الحـلوى في الدكان
أو خيزران . . معلم معتوه
من علم المشدوه . . بألوان العيون
هذا الجنون . . الجنون
من علمنى الحب غير الناس . .
والكره غير الناس . .
من كدس الإحساس . . في اجفانى
وخلانى احلم . . احلم
وانا من سنين . . انسانى
وامحى مكاتيبى
شوهت وجهى . . كثر ما حكيت . . ألواني
وعلى الزمان الثانى
رسمتنى . . مثل ما بغانى . .
لكن على لسانى . . بقى كل الكلام الغريب
أنا الغريب
وكل شاعر في الناس غريب
وفي الارض كهف . . من نيزكٍ مجهول
لكن يعرف يقول . . يقول
كل الكلام الصعب
الحليب رمل
والمرضعه ريح
والصدر خيمة راعي في الجدب






من الحزن الى الصديق الضجر قصيدة



بين الحنايا 00 ذيب 00
مكسوره انيابه 00
شقق عواه القلب 00
تحت الجفن شوكه 00 تسهرني كتابه 00
وهذا الزمان الصعب 00
لو غاب 00 في غيابه 000
قمر الحزن بيغيب 00
بيني وبين الآه 00
اني اطلق ضلوعي 00
تركض في هاالشارع 00
بيني وبين الدمع 00
اني أسأل خضوعي 00
ليه الشجر فارع 00
بيني وبين الناس 00
آكل الم جوعي 00
وما بيعهم إحساس 00
يبكي ورى الألواح 00
ناي للحزن مجروح 00
يا اللي نبي فراقه 00
ويا اللي تبينا نروح 00
ليه تقفل الابوب 00
حنا سكنا دروب 00
وما للألم سارق 00
ونعاتب الاحباب 00
وما بينهم محبوب 00
نلقاه 00 ونفارق 00
اصبر معي 00 لاباس 00
روزنامه في صدري 00
ويمضي العمر انفاس 00



المرايه قصيدة


كلنا عشاق لكن ..
إنتي لا ما انتي معايا ..
لما تجمعنا الأماكن
تاخذك مني المرايا ..
انتي مشغوله بروحك
ما ملك عقلك وروحك
لا أنا.. ولا سوايا
اعطي ظهرك للمرايا .. وشوفي غيرك
اظهري من ليل كحلك ومن أساورك وحريرك
افتحي الشباك مره .. شوفي الناس والشوارع
وش كثر هالغربه مره .. للي وسط الزحمه ضايع
انتي مشغوله بروحك .. ما ملك عقلك وروحك
لا أنا.. ولا سوايا
كلنا عشاق لكن
كل واحد له حكايه ..
كلناعشاق لكن
كلنا نحبك.. نحبك
وأنتي جرحك في ساكن .. وأنا جرحي برا قلبك
أمشي لو نصف المسافة .. وقفي بينك وبيني
أكسري كل المرايا .. أنتي أجمل وسط عيني
يا للي مشغولة بروحك من خذا قلبك وروحك
هو أنا .. ولا سوايا
كلنا عشاق لكن
كل واحد له حكاية



ما انكر العطر قصيدة


ماانكر العطر .. وحبيبتي
ومااجحد النور .. وحبيبتي
ومااخفي اشعور
إني احب الشمس ولفتاتها
إني اعشق الليل ونظراتها
ياناس انا معذور
في حبيبتي والشمس
وماانكر العطر
الغت مواعيد النهار .. شمس بدت مثل النهار
ريح المطر لون الخضار ..
حبيبتي أحلى البياض
وأحلى السمار
بالحيل مجبور .. ماأخفي شعور
إني احب الشمس ولفتاتها
إني اعشق الليل ونظراتها
ياناس أنا معذور
في حبيبتي والشمس
وماانكر العطر
خليني فـ عيونك هوى .. همس الحنين
لا تغمض اعيونك علي .. ولا تكذبين
تشرقني الدمعه فـ عيوني
تحرقني اللوعه فـ ظنوني
ياحبي انا والله ماأخونك
وماانكر العطر وحبيبتي


وسيم الناس قصيدة


قال مجروح ... جاوبته نعم
قال ماشوف بك ... اثار ...دم
قلت وان كان في ذاتي النزيف
قال ما به نزيف ... من عدم
قلت وان خان بي اغلا حبيب
قال وهم ... بنيته وانهدم
قلت ماعذبك يوم الفراق
قال درب وتمشيه القدم
قلت ما به سوى جلدك شعور
قال غيره فلا احس ... بالم
ياوسيم الناس لو قلبك وسيم
واكرم الناس في غير الكرم
عندك الظلم عدل ٍ في الهوى
واعدل العاشقين ... اللي ظلم
انت لو كان في حبك حياة
كان خلى حياتك له طعم
اتعس الخلق من يرجي ... هواك
ما اضيع النبض في ... قلب الصنم




مالهم صوت قصيدة


مالهم صوت .. غربوا والزمان سكوت .. ليتهم ماقربوا
وهقوني بالوصل .. علقوني بالأمل
هذا شيء لايحتمل ..
التجافي موت ..
الهوى تيه.. غرني ضعت في واديه .. وانت طيفك مرني
مرني ليل وفجر .. مرني باحلى العمر
آه من يقوى الصبر ..
التجافي موت ..
طول صدود .. صاحبك يالعيون السود .. ماسمع من صاح بك
صاح من هم وغضب .. ها الجفا ماله سبب ..
وانت من خان وكذب ..
ليه احبك موت ..


مركب الهند قصيدة


يا مركب الهند .. يابو دقلين .. ياليتني كنت ربانك ..
واكتب على دفتك شطرين .. اسمك حبيبي وعنوانك ..
طال انتظاري وقلبي جريح .. يا مركب الشوق ليت الريح
وقت السحاري .. تملا السواري ..
وابحر بشوقي لنور العين .. وارجع لخلي لأوطانه
يا بحر موجك علي عالي .. وطيفه حبيبي على بالي
والبعد قاسي .. وحبيبي ناسي
والله .. يا ربعي .. وأهلي .. وناسي ..
مشتاق قلبي لخلانه ..
يا مركب الوهم عمري ضاع .. ما بين أمل في لقا ووداع
بحر الأماني .. ماله مواني ..
ضيع زمانك .. وضيع زماني ..
وضاع المركب .. بربانه..

مراجيح قصيدة


مراجيح 00 تحمل الاطفال00
للشمس الغاربه 00 وتجيبهم 00
في جيوبهم خوف وفرح 00
والريح 00
تطوي عباة 00 وشيال 00
أمٍٍ سواد عيونها ارجوحةٍ
ويدينها قلبٍٍ يشد حبال 00
علمي بهم 00
والشمس خيلٍٍ هاربه 00
في الليل ويم جبال 00
والدنيا ما فيها احد 00
الا طفل 00
طفل ومره 00
طفل ومره ورجال 000




مرثية الدغلوب قصيدة



ذكرتك .. كانت ضلوعي خشب أثل وحشاي دروب
وقلبي غرفةٍ من طين تهاوى سقفها الدافي
ومن شح الدمع .. غنيت لك مرثبة الدغلوب
وطفلٍ للمطر يجري .. على الصخر الخشن حافي
نخياي أخلفت وعد الصرام .. وظلها المسكوب
على كبدي طويته يا الهجير الظالم الجافي
وأنا لومات غرسي منظما .. مالي عن المكتوب
عذابي اني سقيته وارتوى من قلبي الصافي
وإلى خان الشجر والطين .. لا تشره على المحبوب
زرعت ولا جنيت .. بها الزمن .. لي صاحب وافي
ندهني للرحيل .. من الشعيب المسني .. المذروب
إلى مني رقيته بان لي سهبان .. وشعافي
وذكرتك .. ما بقالي في السما لو لحظتين غروب
ولا لي في الثرى كود الذي برميه أنا خلافي
بعض طيني .. شهاب اثلي .. ودلوٍ يابسٍ مثقوب
يخر الرمل في جوف القليب .. ويظهر السافي
جريد اللي ذبل .. وإلا هوى .. أو هو موات قلوب
نويت أشد من دار العطش .. واعيش فـ اطرافي



يا طفلة قصيدة


ياطفلة تحت المطر ...
تركض واتبعها بنظر ..
تركض تبي الباب البعيد ..
تضحك على الثوب الجديد
ابتل وابتل الشعر ...
لو رميتي شالك الدافي على متن السما ..
دفيت الشمس في فصل الجليد ..
لو نثرتي صوتك الحاني .. على صدر الضما
أنبت العشب وأخضرالجريد ..

يعذرني الأول قصيدة


أحد .. سأل عني
وأحد .. نسي يسأل
يعذرني الأول ..
محد .. سأل عني
أحد .. نسي صوته
واقبل ينادي
وأحد .. نسي صوته
ساعة سكت فيني
يعذرني الأول

أحد .. يبيني احتار
وأحدٍ .. هو الحيره
والله الأماني كثار
ومابه أحد غيره ..
اللي نسي يسأل
هذا حديث الجرح
ماهو أبد مني





الجدران قصيدة


المنزل ثلاث جدران .. ورابع ..
ما بينهم ضايع .. متشقق وعاري ..
ويميزه شباك .. ضيق ..
مصبوغ.. بالأحمر الناري ..
ومحاصرٍ باسلاك .. علقت بها وردة ..
أوراقها المنزل .. والبرعم الأفلاك ..
***
وعلى الجدار الثاني ..
وأمثال .. وأغاني
مكتوبة بكسرة فحم ..
وصندوق خشب ..
مزخرف بغير الذهب .. غير الجواهر ..
تحت الكتابه نافر ..
فوقه ظلالٍ عريق ..
مثل العنيد .. من الجروح ..
مثل السيوف اللي مقابضها حديد ..
أسرار من ماتوا بعيد ..
وما خلفوا حتى الورق ..

***
أما الثالث من الجدران ..
معلقٍ عليه صورة .. لإنسان ..
من دفتر نفوس .. مكبره ..
مدري جفونه مبخره ..
ولال تجاعيد خيوط .. دخان
وفي الركن كرسي خيزران ..
يجلس عليها الوقت ..
وجريدة ٍ عنوانها باهت .. تغفى على الإسمنت ..
وفوقها كوب فارغ .. وفتات خبز ..
وأصابع ٍ للجوع صفرا مكسره ..

***
ويبقى الجدار الأول ..
وهو أعرض الجدران .. وأكثرها وقار ..
وهو الوحيد اللي انبنا فـ نور النهار ..
بوابته على الطريق الرملي ..
صَفت أحجار درجها .. بصبر ..
وش كنها .. ؟؟
سنونٍ صفر .. في فمٍ مذهول ..
وظلما تشدك للدخول .. تشدك ..
وكل ما مسكت اكرة الباب النحاس بيدك ..
تلطخت بدم ٍ طري ..
الجرح نزفٍ يحتري .. أما الطعون ..
وين الطعون .. راحت ..

***
البيت ثلاث جدران .. ورابع ..
مالهم طابع .. يجمعهم ..
يشبهون أهلهم ..
وما صادفوا غير الحياة ..



بس أحلم قصيدة



صحيح اني انسى الحوادث والملامح و الاسامي..
لما أكتب عن غرامي .. شعر ابعد ما يكون عن مجرد
جرح دامي ..
يمكن أقرب للجنـــــــــون...
من تفاصيل الحكاية..الاساور والمرايه..
عندي همــــــوم القصيده غامضه صعبه عنيده..
وانت عاشق للوضــــوح ..
ودك بسري ابوح..و انا اخر همي بــوحي
اعبر الشارع ... في الرصيف الثاني قهوه
فيها اربع طاولات ..وحده اجلس فيها وحدي ..وحده للي بيجي بعدي .. وحده لأغلى حرف عندي..أما اخر وحده دايم للي فات..
من هموم وذكريات ..زحمة لكن كل من في القهوه ربعي
كلهم دمي و دمعي ليه ما تجلس مكاني
وهذا شوفي وهذا سمعي اطلب اقلام ودفاتر ..وحاول اكتب عن شعور ..لاهو ظلما و لا هو نور ..
قلب مابين السطور .. وانا اكتب اغنيه مثل الرسايل كنت اكذب .. و الخيال العذب كذب ..
كنت لازم اخفي سري و ما اقول
ان هالمره قصيدي هو خيالات الحقــول تطرد اسراب الطيور عن حقيقه عن شعور ....
ما هو في ذهب السنابل .. انما تحت الجذور ..
كســـــروا العشـــاق بابي ...
قطعوا لحمي ثيابي.. وخلعوا الادراج ..
طاحت مزهرياتي الجميله شققوا جفني كتابي وسألوا
وين الجديله
ودمعة العين الكحيله مالقوا في بيتي الا .. وما لقوا في صدري الا .. وما لقوا في قلبي الا ..
امنياتي المستحيله ..
و اني احـــلم بـــس احلــــم ..




تحت المظله قصيدة



مطـر.. معـلق .. بنـصف السـما .. لا ينـهمـر.. ولا يرتـفع ..
وكل ما بغـينا نجـتمع.. تحـت المصابيح الزرقـا.. يطيح منه رذاذ ..
اما انـهمـر فرقا .. و الا تـقـطع وصـل .. يا مـاطـر الليـل ..
لا تاقـف بوسـط الـسـما ..

لك هـالـشـوارع .. انما تـكـفيـك.. سـاعـه .. سـاعـتيـن ..
بنـشـيب وحـنـّا واقـفين.. تحت المظله .. ماهو خـوف من البـلل ..
لكن حـنيـن .. للمصابيـح الزرقـا.. ولليلةٍسـمراء.. سـماهـا صافيه..
ومـوعـد لعـيونهـا..
والله غـرفنـا دافـيه..
ولهـا شـبابيـك وسـتايـر..على البـروق .. لكن .. زهـقـنـا بيـوتنـا ..
واللي يخـليـك .. اما انهـمـر.. والا ارتـفـع ..

تـمـرّ.. سـاعـه الا ربع .. وتـو الـسـحـاب.. مـا يـدري وش يبـي ..
أخاف أسـأل صـاحبـي .. ويقـول .. خـلـّـنا نـسـري..
ويـن نـسـري.. بـدري..
بـدري على المـسـرى ورا الـسـحاب قمـرا .. وقمرا ورا الأبواب..
تبـي المطـر يـرقـا .. وتهـطـل نجـوم .. وتظهر علي ..أنا لـو علي..
تحـت المصابيـح الزرقـا .. قـلبـي بيحـوم .. مثل الفـراش ..
تحـت الرشـاش .. والا الصحو .. لين أشـوفـك .. مـقـبـله ..
والله .. ضـلـوعـي مـبللـه.. بالـشـوق ..
ومـا ودي احاكـي صاحبـي .. ولا أسـاله .. بيقـول .. خـلنا نـسـري..
ويـن نـسـري بـدري .. سـاعـه وربع.. وحـنا واقـفيـن تحت المظله..
اما أنهمـر فرقـا .. والا تـقـطع وصـل .. يا ماطر الليـل ..
لا تاقـف .. بوسـط الـسـماء ..


أغنية في العشق والموت قصيدة




ضمي مَلامح صورته ..
ضميه .. لعله يفيق ..
يَشهق .. أو يَردّ النَّفسْ ..
ضمّيه لعَله حبس ..
صٌوته .. رعشة عرٌوقه ..
وخيم حزين الصمت فُوقه ..
مات .. مات
من قبل ما يكتب له فـ قٌربك حياة ..
من لبسه ثوب البياض ..
من سبل عيٌونه ..
مسح غبرة جبينه ..
وش يفيد ..
اللي زرع نصلٍ حديد ..
في قلبه الطيّب نسى ..
قولي عسى .. ما تلمحي ..
فـ طرف ثُوبك له دما ..
يا خٌوفتي .. اللي سبح في نهرك الجَارف ..
غد اموته ظما ..
ضمّي ملامح صورته ..
ضمّيه لعله يفيق ..
يشهق أو يرد النفس ..
صوته جرس ..
ينحب على بوابة الليل ..
يوقظ خدر جرحك ..
يتل من عينك احبال الدّمع
ضمّيه لعله سمع ..
انك تحبينه ..
ولا ..قلتي تحبيه ..
ولا .. قلتي تحبيه ..




ترحيبة الحزن والليل قصيدة


لما يبعد ... في المساطيف المسافر ..
لما يخفيه الضباب ..
لما يرحل ... بالأمل وبفرح باكر ...
لما ينسا لي عذاب ...
هلا ... يا حزن ...
هلا بالصاحب الطيب ...
ابد ... لو تبعد قريب ...
هقيت إنك مع الفرقا ... تبي تنسى حنينك لي ...
هقيت انك بعد مليت ...
من الماضي عذابك لي ...
عسى ما جرحك فرحي ... عسى يا حزن ...
أنا لو خنت في جرحي ...
وضيعني ... الهنا ليله ...
ترى ما في يدي حيله ...
هقيت إني لمحت النور ...
بيمسح دمعي المبهور .. بمنديله ...
سحرني حلو ترتيله ...
لما يسري في الفضا .. نجم السهاد ...
لما يطفيه السحاب ...
لما يملى عمرنا الماضي السواد ...
تصبح البسمه ... صواب ...
هلا بالليل ..
هلا والله ..
يا ضاوي لو أضمك لي ..
على صدري ... وافني فيك أشواقي ..
أماني ...عمري الباقي ...
هلا بالليل ...
حبيبي كسر الفرحة على صخر الجفا الجاير ...
حبيبي حزنه الزاير لياليا ... يحبك ليل ...
يقول ازرع ضنى شوق النوى فيا ...
وأنا في موعد الشكوى ...
أبي شكوى ... أبي دمعة ضنى تسوّى جراح العمر ...
هلا بالليل ... يا ضاوي بالحنين المر ...
هلا ... والله ...







ان شاء الله يعجبكم ...



وياليت أشوف ردودكم

_________________

_________________
..

تسلم اخوي على النقل

وانا من عشاق كلمة الشاعر الامير بدر بن عبدالمحسن وهو شاعري المفضل

والله يعطيك العافية

وكل الشكر والتقدير لشخصك

تقبل ودي

_________________
"]

يعطيك العافيه اخوووي على النقل الرائع..........


تحيااااتي...........

_________________

شكراً لك على هذه النقله الجميله


تقبل فائق أحترامي وتقديري


أناوليلى

_________________
شكراً