قصة يابدايات المحبة يانهايات الوله (قصة سعودية رومانسيه من أرض الواقع )

الجزء الثاني طموح ريم

--------------------------------------------------------------------------------

السلام عليكم ورحمه الله وبركاته
من حيث ماتوقفنا الجزء الماضي راح أكمله اليوم باذن الله

واتركم مع احداث الجزء الثاني من

`~'*¤!||!¤*'~`(( يابدايات المحبه يانهايات الوله))`~'*¤!||!¤*'~`


توقفنا الجزء الماضي مع ريم وطموحها في نيل درجات عاليه في الماده الاخيره حتى تكلل نجاحها هذا الترم بالتفوق وبالفعل راحت بطله قصتنا ريم للامتحان وبعد مضي ساعتين وربع في الامتحان خرجت ريم من القاعه رقم 8 وعلى وجها علامات الرضاء والاستبشار وتوجهت ريم لقسم الطالبات حتى تأخذ اغراضها من الدرج الخاص بها الا وسمعت صوت مألوف لها يناديها من خلفها التفتت ريم مصدر الصوت ولقت انها اعز صديقاتها وفاء
وفاء : ريم ريومه !
ريم : هلا وفاء هلا قلبي حيا الله وفاااااااااء <<تقولها والابتسامه ساطعه على شفاتها
وفاء : وين الناس مايسألون عنا ولا يعطونا وجه ؟؟؟!!
ريم : هههههههه الله يقطع سوالفك وفاء ماتبطلين عادتك!
وفاء : شوفوا البنت شوفوا تضحك كاني اقول لها نكته يابنت انا اتكلم من جد شفيك قطعتيني ماعدتي تذكرين صديقتك وفاء ولا نسيتونا ؟
ريم : لا ياقلبي شدعه انساك روحي انتي (وتغمز لها )
وفاء : أقووووووول طسي بس الحين روحك انا لو روحك تسألين عني والله شكلك شفتي لك شوفه ثانيه ماأقول الا الله لنا بس <<< وتمد لسانها لريم
ريم : وااااااااااافي شفكي علي تعرفيني وقت الامتحانات انعزل عن الكل وانتي مو غريبه عن طبعي لكي اكثر من عشر سنوات صديقتي المفروض انك عارف طبعي الله يقلع شرك !!
وفاء : أقول بسسسس ولا كلمه ياناسينا ياناسينا
ريم : هههههههههه طسي بس الشرهه على اللي معطيكي وجه هههههههههه
وفاء : صدق لاقالوا شين وقوايه عين هههههههههه
ريم : شتقصدين ياطاسه انا شينه ولا خشتك ذي هههههههههه
وفاء: ياجعلني مااخلا من الضحكه اذوب انا ياناس فيها
ريم : هههههههههههههههههههههه ووووووووووافي وربي انك مو صاحيه من جد فكينا بس من مسخرتك علي
وفاء : ايه الله لنا نتغزل فيهم وياخذونها طناز عنهم الله لنا بس
ريم: وربي اني طاسه !
وفاء : طاسه ولا جنط ههههههههه
ريم : هههههههههه حشى صرت اكلم اخوي عبد الله مو وااافي
وفاء ( وتغيرت ملامح وجهها يوم سمعت اسم عبد الله ) " : قولي لي قلبوووووووو وش سويتي بالامتحان اكيد جاوبتي زين لانك مروقه ولا كان مسحتي معالم وجهي بالملزمه لو انك مو مجاوبه ادري فيكي دافوره ههههههههه ؟!
ريم : بسم الله علي أعوذ بالله من عينك هههههههههههه وجيعه قولي ماشاء الله الحمد لله جاوبت اكيد ولا كان على قولك مسحت معالم وجهك هههههههههههه .
وفاء : ياجعله دوم الضحكه قلبي ماشاء الله تبارك الله ياجعلني انخبل لو جاك مني شيء يضرك .
ريم : واااافي يالمجنونه لاتقولين عن حالك كذا صدق انك مب صاحيه.
وفاء : صدق ريومه شخبار شهد ؟
ريم : وربي مادري ماكلمتها من فتره ولا ادري عنها ان شاء الله تكون توفقت بامتحانتها ؟
وفاء : ان شاء الله .
وشوي واثناء كلام ريم ووفاء يسمعوا صوت من وراهم يقول
شهد : هاي شله اخباركم يالخبلات ؟
وفاء قبل تلتف لمصدر الصوت : مافينا في الشله من لسانها طويل الا ام سبعين لسان هذه شهوده ههههههههه هلا بالخبله سبحان الله الهبول على ذكرهم ّ!
شهد : ههههههههههههههه ردتيها لي ها طيب وافي ماعليه ملحوقه شخباركم
وفاء : تمام كيفك قلبوا سبحان الله جبنا سيرت القط جاكم ينط ههههههههه
شهد : ايه شفتوا هذا من طيبي اجي على سيرتي العطره هههههههههه.
وفاء : لايكثر بس ياام لسانين ههههههههه شخبار امتحناتك ؟
شهد : تماموووووووووووووووو الحمد لله اخيررررررررررر خلصنا وبنرتاح والله اشتقت للوناسه والسهرو الضحك وللنت اللي انقطعت عنه فتره طويله .
ريم : أكيد لانك تموتين اذا ماجلستيي باليوم على الاقل ثلاث ساعات على النت وان شهد تغيب عن النت اسبوعين بحالهم هذه معجزه بسجلها بحدث في مثل هذا اليوم هههههههههههههه
شهد (وتمد لسانها على ريم ) : مقهوره مني عادي هذه احد اسباب الشهره مو مثل وحده الله يستر عليها يوم جاءت تسوي ايميل كل شي تصل علي شهد كيف يتسوا هذا وكيف يتسوا هذا (وتغمز لريم )
وفاء( وهي مستغربه ) : مين تقصدين شهد ؟؟؟
ريم : شهد كيف سلوى احم احم ؟
شهد: ههههههههههههههههههههه واحد انكبس دمه انحبس لحمي مر نصحتك لا تتطنزين علي
ريم : ههههههههههه لا والله مع وجهك تنكتي مايحتاج اقول مين اللي جربت الصندل تبي تاخذه وطاحت على وجهها فيه قدام الجميع هههههههه
شهد ( وحمر وجهها ) : ريووووووووومه عن الطناز !!!
ريم + وفاء : هههههههههههههههههههههههههههههههههههههههههههههههههه هههههههه
ومن بعيد جاء العضو الرابع بالشله وهو مكمل لشله الصرقعه بالكليه
هديل : صباح الخير على مجموعات الهندسه والرياضيات .
ريم + وفاء + شهد : صباح النور والسرور
وفاء : والله مروقه اليوم هدوله
هديل : أكيددددددددددد مروقه بالله في احد يخلص من شبح الامتحانات ولا يروق
ريم : صادقه والله قسم بالله اني احس براحه عجيبه
شهد : اكيد خصوصا انك من مجموعه الدافورات ههههههههههههه
ريم : بسم الله علي
هديل : أعوذ بالله شهد لاتطقين بنت عمك بعين بس
شهد : ههههههههههههههه شفيكم علي اعوذ بالله وفاء الحقيني
وفاء: خخخخخخ أي ألحقك انتي وانتي ام لسانين الله لايبلنا بس
شهد ( وتلوي شفاها ) : مالت عليكم كلكم علي قال صديقات قال حتى انتي ريم المثل يقول انا وأخويا على ابن عمي وانا وابن عمي على الغريب.!
ريم : ههههههههههههههه وين الاغراب مااشوفهم .
شهد : اهي اهي مسكينه ياشهوده كلهم عليكي
هديل : أي مسكينه اي خرابيط انتي سكين مو مسكينه هههههههههههه
وفاء : ههههههههههههههه عز الله نشبوا فيكي بنت ابو سطان وبنت أبو صالح
شهد + وفاء + ريم + هديل : ههههههههههههههههههههههههههههههههههه
شهد : ريم اقول انتي بكره فاضيه ؟؟؟
ريم : ان شاء الله مااعتقد وراي شيء ليش ؟؟
شهد : والله قررنا انا والبنات وسلوى نجيكم بكره شرايك تستقبلينا ؟؟
ريم : شوفوا البقره تستأذن ياخبله انتي صاحبت بيت وكلكم الله يحيكم وابركها من ساعه .
شهد : ههههههههههههههه الحمد لله والشكر مخبوله والله ياخبله انا استاذنك يمكن ودك ترتاحي ولا شيء
ريم : راحتي بشوفتكم ياحبايبي
وفا: أجل قولوا تم ههههههههههه
هديل + شهد + ريم : تم ههههههههههههههههههه
ريم : أوكي توصون شيء ؟
وفاء : وين ريومه ؟
ريم : وربي بروح البيت بنام مانمت انا من امس وتعبانه وبعدين وش ابغى بوجوهكم الكشره اللي مقابلتكم اربع وعشرين ساعه يالانترنت او يالبيت هههههههههههههه
هديل : الحين احنا وجوهنا القشره يابومه الشرهه على اللي يصادقكك هههههههههه.
وفاء : عن الغلط على عمري انا عاد عادي تقول كشرات تقول جياكر هي حره
شهد : لا والله انتي وصديقتك شكلنا بنقص لسانكم
ريم : ماعاد الا انتي ياام لسانين ههههههههههههههه
شهد : هههههههههههههه طيب طيب يالفيلسوفه
وفاء : ههههههههههههههههه ياشينكم بس بنات عم وتتناقرون
ريم : هههههههه ايه من كثر كرهي لشهد اناقرها
شهد : لا والله انا اللي اموت فيكي اجل حتى انا اكررررررررررررررررهك
ريم : ههههههههههههههههههههه الحمد لله هذا ماكنا نبغي هههههههههههه
هديل : وربي انكم رايحين فيها بس طسوا
ريم : يلا بنوتات توصون شيء ؟؟ برررررررررررررروووووووووووووح !!!
شهد + وفاء + هديل : الله يحفظك عيوني !!
ريم : احنا على موعدنا اوكي لاتنسون انتظركم
شهد + وفاء + هديل : ان شاء الله
ريم : الله يحفظك لي عيالي الطيبين ههههههههههههه
شهد : هههههههههههههههه طسي بس
وفاء : ماتبي تنقلعي بس
هديل : وجيعه هههههههههه
ريم : طيب هين هين اقووووووووووووول بنااااااااااااااااات
شهد + وفاء + هديل : هلااااااااااااا ؟؟؟؟؟؟؟
ريم : ظفوا يووووووووووووووووور فيييييييييييييسسسس هههههههههههههههههه <<<<<<<وتمد لسانها
راحت ريم واخذت تصريحها وطلعت من الكليه لقت السواق ينتظرها ورجعت للبيت
هديل : وربي البنت هذه عسوووووووووووووووله
شهد : ايه الله يسعدها بنت عمي ويوفقها يارب ويرزقها بالزوج الصالح اللي يطسها من خلقتنا
وفاء : هههههههههههه شهد تبين تعرفينا انها بنت عمك ندري انها بنت عمك ههههههههههههه
شهد : وجعععععععععععععععع وااااااااااااافي ههههههههههههه ياجعله بعريس يطسك انتي بعد
وفاء :كانك تبين اقول لك وانتي بعد يرزقك بعيس ماني قايله <<<<<<وتمد لسانها
هديل : ههههههههههههههههههههه قوووووووووووووووووووووووووووويه والله
شهد: وجععععععععععععععععععععععععععععععععععععععع وافي وربي انك طاسه مثل ريم طسي بس بروح البيت بروح اشوف اخبار ايميلي ابرك لي منكم
هديل : ههههههههههه عصبت بنت ابو ناصر
شهد + وفاء : ههههههههههههههههههههههه
شهد : يلا بنات سي يو جميعا
وفا: وانا بعد اروح
هديل : وانا بروح شكل اخويا ينتظرني من الصباح وانا جالسه اهذر معكم
شهد : اجل شرايكم نطلع مع بعض ؟؟
هديل + وفاء : أوكي
وراحوا البنات كل وحده تأخذ تصريحها وتتجهز للخروج من بوابه الجامعه
وفي هذا الوقت كانت ريم وصلت للبيت ودخلت الصاله وراحت المطبخ لقت امها تجهز الغداء
ريم : السلام عليكم ورحمه الله وبركاته
ام سلطان : هلا ببنيتي وعليكم السلام ورحمه الله وبركاته
ريم ( تمشي لين توصل لأمها وتبوس راسها ) : كيفك يمه عساك بخير ؟
أم سلطان : بخير يمه بشرني عنك يابعدي شسويتي بالأمتحان ؟؟
ريم : أبشرك يمه انا بخير الحمد لله والامتحان تمام بفضل الله وثم بفضل دعائك انت وابوي !!
أم سلطان : الله يوفقك يابنتي يارب ويرزقك الزوج الصالح آمين
ريم : يايمه ادعيلي بالتخرج اول واتوضف وبعدين يصير خير على الزواج
ام سلطان : يابنت انا ان عشت لكم اليوم مارح اعيشش باكر وانا امنيتي اشوفك واخوانك ببيت ازواجكم وزوجاتكم متهنين واوالادكم حولكم
ريم ( تبغى تقفل الموضوع ماتبي تزعل امها ) : الله يعطيكي طولت العمر يمه وتربين اولاد اولادنا
أم سلطان : آمين يارب ويرضى عليك يابنتي
ريم : آمين يمه
ريم : يمه ساره نايمه ولا صاحيه ؟
أم سلطان : لا والله يابعدي نايمه لانها ياقلبي عليها مانامت الا الفجر
ريم : أدري كانت سهرانه وجتني امس الساعه ثلاثه تسألني ان خلصت الماده او لا
أم سلطان : أيه يابنيتي كلنا كنا قلقانين عليك وبنفس الوقت مطمنين لاننا نعرفك ونعرف اجتهادك
ريم : الله يحفظكم لي ولا يحرمني منكم
أم سلطان ؛ آمين يابنيتي
ريم : يمه بقولك شيء
ام سلطان : هلا يابنيتي سمي ؟؟
ريم : امممممممم يمه انا بكره وفاء وهديل تعرفيهم وشهد بنت عمي وسلوى اختها بيجونا باكر وابي اسوي لهم سهره زينه وحفله بسيطه على قدنا بمناسبه اجتماعنا وانتهاء الامتحانات
أم سلطان : طيب يابنيتي الله يحيهم
ريم : تسلمين يمه بس ابي انزل انا وانتي اليوم السوق نشتري اغراض ولوازم زيارتهم
أم سلطان : والله يابنيتي انا مو فاضيه اليوم شرايك تروحي مع عبد الله ؟
ريم : يمه عبد الله مو فاضي لي اما بشغله ولا مع صديقه ماجد يعني مارح يفضى لي ؟؟!!!!
أم سلطان : اساليه يمكن فاضي واذا مافضى يصير خير
ريم ( وهي مو عاجبها راي امها بس ماتبي تعترض ) : طيب يمه هو عبد الله فوق ؟
أم سلطان : ايه بغرفته رجع من شوي وابوك بعد
ريم : زين بروح اسلم على أبوي وبعدين بروح له!
أم سلطان : زين يابنيتي الله يوفقك
ريم : تأمرين شيء يمه تبيني اساعدك بشيء ؟
أم سلطان : لايابنيتي سلامتك توكلي
ريم : أوكي سي يو
أم سلطان : وش ذا ريوم قولي حاضر يمه
ريم : ههههههههههه تأمرين أمر يادهن العود انتي حاضر يمه
أم سلطان : هههههههههه الله يحفظك يلا روحي
وتخرج ريم من المطبخ وتروح لمكتب ابوها وتطق الباب
أبو سلطان : هلا هلا ريم الغلا هلا ببنيتي الغاليه
ريم ( تبوس على راس ابوها ) : هلا يبه هلا تاج راسي كيفك يبه ؟
أبو سلطان : بخير يابنيتي بشرين ؟
ريم : تمام التمام يبه !!
أبو سلطان : عافيه عليكي ياغاليه ترفعين راسنا دوم
ريم : الله لايحرمني منك يبه
أبو سلطان : آمين وانتي بعد يابنيتي
وشوي يدخل عبد الله : هلا هلا بالمزيونه دلوعه البيت الفيلسوفه ههههههه
ريم : هلا هههههههههه هلا ببدر الضواحي هلا عبود وبعدين وش الظلم هذا انت والله اللي مدلع من البيت مو انا ههههههههه.
عبد الله : الحين انا اللي مدلع يالفيلسوفه وربي انك فله
ريم : هههههههههههههه عبود بغيتك بطلب ياخوي ؟
عبد الله : تدفعين كم هههههههههه
ريم : بسم الله مثل المنشار طالع تأكل ونازل تأكل وش ذا ؟؟
عبد الله : هههههههههههههه امزح معك ريومه شفيكي سمي ياوخيتي؟
ريم : بغيتك توصلني اليوم السوق اشتري اغراض بكره البنات جايني وابي اسوي لهم حفله بسيطه ومرتبه
عبد الله : وليه ماتروحين مع السواق انتي وساره ؟؟
ريم : امممممممممم يعني ماتبي توصلني ؟؟
عبد الله : لا والله ياقلبي بس سؤال انتي تأمرين أمر!!!
ريم : هههههههههههههههه وش ذا الغزل لاكون خطيبتك ولا ادري ههههههه؟
عبد الله : ههههههههههههه لا والله بس اختي الغاليه
ريم : ياجعلني مااخلا
أبو سلطان : ههههههههههه الله يحفظكم ياعيالي ولا يحرمني شوفتكم تضحكون
ريم + عبد الله : آمين يبه
ريم : ها وش قلت عبود ؟؟
عبد الله : قلت الله يحفظك ابشري على رقبتي
ريم : الله يحفظك عبود
عبد الله : بس بكلم ماجد وفهد وابلغهم اني باتأخر اليوم
ريم : هههههههههه عيالك ذول لازم تقول لهم
عبد الله : هههههه هين تتطنزين
ريم : هههههههههههههههههههه لا استخف دمي بس هههههههه
عبد الله : لاتخففيه بعدين يصيبك فقر دم ههههههههههههههه
ريم : هههههههههههههههههه
وتدخل ام سلطان عليهم وتقول لهم : يلا الغذاء جهز بعدكم تتناقشون
أبو سلطان : الله يحفظك لي يابعدي ولا يحرمني منك
أم سلطان : ياقليبي انا مين لي بدنيتي سواك انت وعيالك الله لايحرمني
أبو سلطان : أنتي الغلا وعيالي اغليه مبس مو مثل محبتي لك يادنيتي
ريم ( تدق يد عبد الله وتهمس له ) : شوف كيف مو مثلك يالجلف تعلم يمكن تستفيد لاخطبت ههههه
عبد الله : قولي بس الله يتمم عليهم لاتعطيهم عين يالفيلسوفه
أبو سلطان : شنو تقولون تتهامسوا بوشوا ؟
ريم + عبد الله : ولا شيء يبه بس نقول متى بنتغداء
أم سلطان : الحين يلا الغذاء جاهز
ريم : زين يمه انا ببدل ملابسي وبنزل لكم وبصحي سارونه بعد
أم سلطان : زين يابنيتي نحتريك
ريم : أوكي
وطلع ابو سلطان وأم سلطان وعبد الله على غرفه السفره
وطلعت ريم غرفتها تبدل ملابسها وبعدين راحت غرفه ساره ودقت الباب
ساره : ادخل
ريم : هلا سارونه انتي صحيتي ظنيتك نايمه
ساره : لا والله صحيت وخذيت لي شور سريع وكنت بروح روم مالك ابي اسالك شنو سويتي بالامتحان
ريم : ابشرك كله اووووووووووووكي
ساره : دووووووووووووووووووووووم مو يووووووووووووووووووم تمااااااااااااامووووووووووو
ريم : اقول سرونه ترى بنات عمي ابو ناصر بيجوا بكره وبعد هديل ووفاء
ساره ( وحست برجفه يوم انها سمعت اسم ناصر ) : والله زين الله يحيهم والله مشتاقه لوناستهم
ريم : ايه وبروح انا وعبد الله اليوم نسوي شوبينج توصين شيء
ساره : ايه ابيكي تجيبي لي عطر جديد
ريم : سمي شتبين نوعه ؟
ساره : أبي عطر دريم لايف
ريم : أوكي ولايهمك يلا ننزل تراهم يحترونا
ساره : أوكي
وينزلوا ساره وريم ويتغذوا مع العائله وبعد الغذاء تستاذن ريم الاسره انها تروح تنام لانها تعبانه من الامتحان والارهاق وتأكد على عبد الله يمرها بعد العشاء
وبعد الغداء يروح كل واحد لغرفته ويكمل اشغاله
العصر يرن تلفون البيت وترد عليه ام سلطان : الو مين معي ؟
سلطان: هلا يمه السلام عليكم ورحمه الله وبركاته
أم سلطان : هلا هلا ببعدي هلا سلطان وعليكم السلام ورحمه الله وبركاته يمه
سلطان : كيفك يمه أخبارك واخبار الوالد ؟
أم سلطان : كلنا بخير يابعدي كيف العنود ؟
سلطان : والله انها بخير هذي هي بجنبي بعطيها بعد شوي تسلم عليك
ام سلطان : الله يحفظكم ويحميكم ياولدي
سلطان : يمه كيف ابوي والبنات وعبد الله ؟
أم سلطان : والله ياولدي ابوك تغداء ودخل نام وعبد الله بعد وريم رجعت من الامتحان تغدت بعد ونامت وساره في غرفتها وكلنا بخير يمه .
سلطان : الحمد لله الله لايغير عليكم الا للاحسن
أم سلطان : آمين
سلطان : يمه ببشرك ببشاره ؟
أم سلطان : سم ياولدي لبيه ؟هات بشارتك ؟
سلطان : يمه عائله ابو سلطان بتزيد واحد صغينون يشيل اسمها
أم سلطان ( وعيونها تدمع من الفرح ) : صدق ياولدي الله يحفظكم ومبروك عليكم ويارب يتمم عليكم بالخير وينها العنود ببارك لها
سلطان : هه هي خذيها
العنود :: السلام عليكم ورحمه الله وبركاته
أم سلطان : هلا هلا وعليكم السلام ورحمه الله وبركاته حياك يابنت الاجاويد
العنود : الله يحيك خالتي كيفك ياخاله ؟
أم سلطان : بخير يابنيتي دامك بخير ؟ أنتي كيفك ؟
العنود : بخير ياخاله ها خالتي الله الله ابيكي تشدي حيلك وتهتمي بولدي ابيه يطلع صنع مثل ابوه
ام سلطان : ياعيوني انا لبيه يابعدي بيكون صنع مثل ابوه واصيل مثلك ياغناتي
العنود : الله لايحرمني منك ياخالتي صدق انا اني انحرمت من امي لكن يشهد الله اني اعتبرك مثل امي الله لايحرمني منك يارب
ام سلطان : الله يحفظك يابنيتي ويرحم والدينا والديكي
العنود: توصين شي خاله ؟
أم سلطان : ايه يابنيتي انتبهي على عمرك
العنود : الله يسلمك في أمان الكريم هذا سلطان معك
سلطان : هلا يمه ها شرايك ؟
أم سلطان: اصيله بنت الاجاويد الله يديم عليكم حياتكم هنا وسعاده مااوصيك فيها يمه دير بالك عليها
سلطان : انتي وهي بعيوني يمه توصين شيء حبيت افرحك انتي وابوي بالخبر واسلم عليك
ام سلطان : دربك خضر ياولدي الله يحفك انتبه لعمرك
سلطان : باذن الله فامان الكريم يمه
أم سلطان : في أمان الرحمن
وبهذه المكالمه تنتهي احداث الجزء الثاني من قصتنا وترقبوا الجزء القادم..
ملاحظه الاجزاء الاولى قصيره ولكن القصه ستأخذ مجراها بعد ذلك


تحياتي

(يابدايات المحبه يانهايات الوله)
الجزء الثالث

(في بيت أبو ناصر بعد صلاه المغرب)من عاده عائله ابو ناصر يجتمع أو ناصر وام ناصر وأي أحد من البنات وأولادهم فاضين على القهوه والحلى واللي يعتبر الاجتماع الاسري لهم في صاله البيت ام ناصر وابو ناصر وسلوى يتقهوى
أم ناصر : سلوى يابنيتي وين اختك ماعدت اسمع لها صوت من يوم رعت من الجامعه ؟
سلوى : والله يمه مادري لكن أكيد انها على النت اللي ذابحها .
أم ناصر: هذه البنت عيونها بتروح ياعلى المذاكره او على النت مادري وش اسوي لها الله يستر عليها ويرزقها الزوج الصالح وياكي يابنيتي ويجعلني افرح فيكم ان شاء الله.
سلوى : في حياتك يمه أعطني فنجالك يمه بصب لك .
أم ناصر: الله يحرسك يابنيتي تسلمين يابعدي.
أبو ناصر : أم ناصر ها كلمتي ام سلطان على موضوع ناصر وساره ؟
أم ناصر: ايه كلمتها واتفقنا على انه بعد اسبوعين بيتم الموضوع على خير ان شاء الله.
سلوى : اسبوعين مو كثير يمه ؟ تدرين ناصر مستعجل حيل !
أم ناصر: صادقه يابعدي بس تدرين شهد وريم اليوم خلصوا امتحانات وساره ماجهزت شيء للملكه وتدرين اولى فرحت ام سلطان في بناتها وتبي تسوي شيء مرتب.
سلوى : زين يمه رايك اكلم خالتي واسالها ااذ تحتاج مساعده ؟
ام ناصر: اصيله يابنيتي ياجعلني افرح فيك يوم زواجك.
أبو ناصر: آمين يارب ناصر وبعده سلوى وأخر شيء أم سبعين لسان على قول ريم شهد ههههههههه.
أم ناصر : ههههههههههههههه يابو ناصر ياجعل ضحكتك دوم تدري ريم وشهد يعاندون بعض دوم .
وشوي تنزل شهد من غرفتها وهي تبتسم
أبو ناصر: حي الله بعنقود البيت ياهلا ببنيتي
أم ناصر: عاش من شافك بنيتي والله احس كانك ساكنه ببيت ثاني مو بيتنا
شهوده وتجي تبوس راس امها وابوها وهي تضحك : يبه انت وأمي تدرون انه انا لي فتره عن النت وان ابي ارفه عن نفسي بعد قلق الامتحانات يعني لاتلوموني الله يحفظلي راسكم.
سلوى : شهد كلمتي ريم عن زيارتنا(وهي تعطيها فنجان القهوه ) ؟
شهد : ايه كلمتها وهي تنتظرنا بكهر ان شاء الله بعد المغرب .
أم ناصر : أشوف خططتوا للروحه ولا قلتوا لنا ؟
شهد : ياميمتي انتي تدرين انه احنا من زمان عن بيت عمنا ابو سلطان وتدرين مااجتمعنا من زمان مع بنات عمنا وماعاش من يتخطى شوركم يمه .
أبو ناصر: الله يسهلكم يابنيتي بس مين بيوصلكم ؟
سلوى : أكيد ناصر يبه لانه السواق انت تحتاجه بمشاويرك وغير كذا ناصر مارح يفوت شوفت ديار ليلي هههههههه.
أم ناصر + أبو ناصر + شهد : ههههههههههههههههههههههههههههههههههههههههههههههههه
ويدخل عليهم ناصر وهم يضحكون
ناصر : السلام عليكم ورحمه الله وبركاته مساء الخير يالله تديم ضحكتهم وسعادتهم خير ضحكونا معكم ؟
شهد : ياحي الله أخوي العود لا سلامتك ياغالي بس بغيناك انا وشهد بطلب؟
ناصر : سمي شهوده ؟
شهد : نبيك توصلنا انا وسلوى بكره ان شاء الله بعد صلاه المغرب بيت عمي ابو سلطان !
ناصر: ( وهو يبتسم بقوه ) أكيد بوصلكم وليش لا انا لي كم اخت يعني هي كلها اختين الله يحفظكم لي .
سلوى : ياجعلني مااخلى نصور يسلمو يااخويا الغالي .
أم ناصر : يابنتا بتاخذون معكم شيء لهم ؟
سلوى: أكيد يمه لانه من زمان عنهم .
ام ناصر: زين متى بتروحون السوق ؟
سلوى : والله مادري يمه شرايك شهد ؟
شهد : انا لو علي الحين بس الراي لناصر؟
ناصر : والله اللي تبونه !
سلوى : انزين صلي العشاء واحنا بنكون جاهزين اوكي .
ناصر : أوكي تم.
وتقوم شهد وسلوى يتجهزون .
أبو ناصر: هاشخبار عريسنا ؟
ناصر وهو يبتسم : بخير يبه دامك بخير ياجعلني مااخلى منك لا انت ولا ميمتي
أم ناصر: ناصر ياولدي احنا اتفقنا انا وخالتك ام سلطان انه ملكتك تكون بعد اسبوعين.
ناصر( وعلى وجهه ملامح خيبه الامل ) : يمه بسحنا اتفقنا تكون نهايه الاسبوع الجاي قبل الامتحانات تذكرين ؟
أم ناصر: ايه ياولدي اكر بس ام سلطان قالت انها تبي تجهز للملكى والبنات بعد.
ناصر: وش يجهزون يمه هذه ملكه مي زواج يعني ماتبيلها شيء .
أبو سلطان : هههههههههههههه أشوفك مستعجل ان ساره تكون زوجتك.
ناصر ( وبجراءه ) : يبه تدري انت وامي اني من زمان وانا انتظر هذه اللحظه اللي اكون فيها زوج ساره ومسؤول عنها والحين اكتشف ان الموضوع تأجل بعد مامنيت نفسي.
أم ناصر : ياولدي تصبر صبرت كل هذه المده ماتصبر بعد شوي ؟
ناصر ( وهو حاس بالاحباط شوي ) : خير يمه عسى الله يجعل بهذا التأخيره خير زين يمه انا بقوم اتجهز للصلاه وبروح وبلغى البنات اني بنتظرهم ويوم ارد للبيت بكلمه جوال ينزلوا لي .
أم ناصر: زين ياولدي عسى الله يحفظك.
ناصر ويقوم ويحب راس امه وابوه ويروح يتوضى ويطلع السياره وباله مشغول بالكلام اللي قالته امه ماكان مقتنع ابدا بهذا التأجيل لانه ماشاف له داعي حس كانهم بيتعمدون على التاجيل
ناصر: آآآآآآآآآآه يا طولت البال والصبر صبرت عنك ياساره سنين وماني قادر اتحمل بعد اسبوعين حبك تملكني حيل ياساره ليتك تدرين بقدر حبك في قلبي ياسيده قلبي. وأستغفر ربه وراح للمسجد يصلي.
( بيت ابو سلطان )
في الصاله
عبد الله : السلام عليكم ورحمه الله وبركاته ويبوس راس امه وابوه
ام سلطان : ياهلا بولدي ياجعلني ماانحرم من هذه الدخله
أبو سلطان : هلا بولدي ها وش سويت بالمخطط .
عبد الله : والله زين يبه بيكون جاهز عندك .
أم سلطان : تبي تشرب قهوه ؟
عبد الله : تسلمين يمه من يد مااعدمها. يمه وين البنات ؟
أم سلطان : والله مادري انا اللي اعرفه انه انت وهم بتروحوا السوق ولا لا ؟
عبد الله : ايوه صدق بس وينهم ؟
أم سلطان : زين اجل بينزلوا الحين .
وشوي تدخل عليهم ريم
ريم : السلام عليكم ورحمه الله وبركاته والله وجوهكم نور ماشاء الله ياعسى لايفرقنا . وتحب راس امها وابوها
عبد الله : ها جاتكم الفيلسوفه هههههههههههه .
ريم : هههههههههههههههه عبود شفيك علي؟
عبد الله : يابنت انتي متى تبين تروحي السوق انتي واختك ؟
ريم : انا جاهزه قلي قومي وانا بروح .
عبد الله : قطع الله عدوك يابنت انا وانتي مو اتفقنا بعد المغرب اشوفك جالسه تتقهوين ؟
ريم : انزين عبوووووووووووووووووود بروح اتجهز ثواني .
عبد الله : وساره ماتبي تروح .؟
ريم : والله مادري بس ماظنيت انت تخبر ساره كيف ؟
عبد الله : انزين انا انتظراوكي بكلم ماجد .
ريم ( هي وتلوي فمها ) : يعني لازم تكلم اولادك ؟؟
عبد الله : ريومه الله يقطع سوالفك شفيكي على اصدقائي هي كلهم ثنين ماجد وفيصل وانتي تدرين انهم اخوان صديقاتك .
ريم : ادري ادري زين بروح اتجهز لين تخلص.
عبد الله : زين يلا روحي . ويدق على جوال ماجد
ماجد : حي الله هذا الصوت ياهلا عبودي توك لى بالي .
عبد لله : وانت عن باللي ماغبت هين على بالي وانت ماتتصل يادب ؟ هههههههه
ماجد : عبود ياقلبي تدري كيف انا مشغول ومع كذا براضيك اموووووووووووووووووه.
عبد الله : قطع الله هالشفه مالت وجيعه تبوس فيني وش شايفني عندك خطيبتك ؟
ماجد : أغلى وربي انت عبد الله الزين ياجعلني مااخلى عبود طلبتك طلب؟
عبد الله : لبيه سم ؟
ماجد : طلبتك عطني قلبك ؟
عبد الله : ههههههههههههههههههههههههههههههههههههه وجيعه يادب وش فيك انت وجيعه ههههههههه.
ماجد : افااااااااااا انا وجيعهه تقلي هذا وانا اموت فيك ؟
عبد الله : ياولد وربي انك مو عاقل اقول انعدل ليجيك طراق.
ماجد : يابعد حي والله الطراق منك احلى على قلبي من العسل .
عبد الله : زين يادب اسمعني انت بتروح الاستراحه اليوم ؟
ماجد : اكيد عبود بروح اليوم سلمان بيجي من حفر الباطن ونبي نسوي له حفل بسيط بالاستراحه وبعد سالم وناصر ولد عمك .
عبد الله : وفيصل بيجي ولا لا ؟
ماجد : والله مادري عبد الله بس اذا حبيت بكلمه لك ؟
عبد الله : أوكي ابو المجد كلمه انت وانا بروح اخذ الاهل بوديهم السوق اوكي .
ماجد : أوكي ياغالي بحفظ الله .
عبد الله : زين اشوفك يادب اليوم بالاستراحه .
ماجد : عبد الله اقول ؟
عبد الله : هلا ماجد ؟
ماجد : أمووووووووووووووووه عطني بوسه قبل تقفل ؟
عبد الله : ههههههههههههههه زين اسمع بعطيك بوسه بس حط السماعه على اذنك زين ؟
ماجد : يابعد حي زين حطيتها يلا عطيني ؟
عبد الله : ماجد اسمع صوت القطار ههههههههههههههههه.( ويقفل السماعه بوجهه )
(في بيت ابو ماجد )
ماجد : الدبي قفل بوجهي هين ياعبود اذا ماوريتك ههههههههههههه.
وفاء : خير مجود مين كلمك ؟
ماجد : هذا عبد الله ولد أبو سلطان جيرانا ماتعرفينهم ؟
وفاء : الحمد لله والشكر يدب كيف مااعرفهم وريم بنتهم اعز صديقاتي وصديقه الطفوله !!!
ماجد : هههههههههههههه هين يادبيه اقول انتي بغيتيني بشيء قبل يدق ذا الدب ؟
وفاء :ايه بغيتك ابيك بكره توصلني بيتهم !
ماجد : بيت من ؟؟
وفاء: يالله مجود على الذكاء ياخي لاتستهبل بيت خالتي أم سلطان .
ماجد : ياخبلك ووش دراني انا ؟؟؟
وفاء: هي يادب قبل شوي كنت تتكلم عنهم وانا قلت لك بروح بيتهم يعني بالله بيكون بيت من ؟؟؟ هههههههههه
ماجد : اها طيب قولي كذا من اول تدرين اني مو ذكي مثلك ههههههههه.
وفاء : ايه هين انت انت الله يجيرنا بس منك عقلك يوزن بلد ماشاء الله عليك هههههههههههه.
ماجد : افاااااااا يابنت جوهره بتطقينا عين !!!!!
وفاء: مالت قلت ماشاء الله .
ماجد : زين متى تبي تروحي لهم ؟
وفاء : بعد المغرب على طووووووووووووووووووووول .
ماجد : ليه وش عندكم ؟؟
وفاء : ياخي وش دخلك زياره بس .
ماجد : افاااااااااااا يااختي العزيزه شفيكي علي انتي وعبود دوم تحطموني ههههههههههههههه.
وفاء : سلامتك من التحطيم خيو المهم مجود انا بعطيك اسم عطر تجيبه لي .
ماجد : ليش ؟
وفاء: مجود ابي اعطيه لريم هديه بكره.
ماجد : اها اوكي ايش اسمه ؟
وفاء: lyrical
ماجد : اوكي ان شاء الله ماانسى اسمه ان نسيته بتصل عليكي.
وفاء : اوكي يسلموووووووووووووووووووو خيو الله لايحرمني.
ماجد: ولو خيتو ماعندي بهذه الدنيا اخت غيرك الله يحفظك انت وابوي وامي لي .
وفاء : آآآآآآآآآآمـــــــــــــــــــــــين.
أم ماجد : ماشاء الله عليكم الله يحرصكم ويحفظكم ويفرحني فيكم .
ماجد : بحياتك يمه ان شاء الله انتي وابوي.
أم ماجد : لو تسمع كلامي بس ياولدي وتخليني اخطب لك بنت الحلال اللي تريحك.
ماجد : يمممممممممممممه تدرين راي بذا الموضوع انا ماااااااااا بي اتزوج.
أبو ماجد : يعني شنو بتظل طول عمرك كذا اعزب وانا مالي حق اشوف اسمي تحمله احفادي؟؟؟
ماجد : يبه الله يحفظك ويخليك لنا وان شاء الله تشوف احفادك من وفاء اختي.
أبو ماجد : ياولدي انت تدري ان اولاد البنت مايشلون الاسم وانت ولدي الوحيد واذا ماتزوجت معناها تبي تمحي اسمي .
ماجد ( وهو متضايق من كلام ابوه ) : يبه الله يحفظك يصير خير والله يقدم اللي في الخير.
أبو ماجد : يعني متى ؟؟؟
ماجد : لين الله يسهل يبه.
أم ماجد : ياولدي هذه كلمتك دوم وانا وابوك صابرين والله يرزقك بالبنت الصالحه ياولدي حنا نبي نفرح فيك وباختك لاتحرمنا من هذه الفرحه وفرحت الابن غير البنت .
ماجد : الله يحفظكم يمه والله ادري . ويقوم يبوس راس امه وابوه ويستاذنهم.ويروح غرفته ويتصل على فيصل.
فيصل: هلا بمجود الحين كنت بتصل عليك والله .
ماجد: هلا ابو عبد الله اول شيء السلام عليكم ورحمه الله وبركاته.
فيصل: وعليكم السلام ورحمه الله وبركاته شفيك ياطعس صوتك متغير ؟
ماجد : مافي شيء بس كالعاده نقاشي وجدالي مع الوالد والوالده حول مساله الزواج .
فيصل : ياخي وليه انت ماترحهم وتخطب وتتزوج .
ماجد : ياخي وليه اجيب لنفسي وجع الراس انا كذا مرتاح متحمل مسؤوليه نفسي وبس اجيب لي وحده اتحمل مسؤوليتها ومسؤوليه عيالها بعد .
فيصل : بس انت تدري ان الاستقرار زين وبعدين الله يحفظلك ابوك وامك بس بعد عمر طويل انت بتتحمل مسؤوليه اهلك يعني كذا او كذا متحمل مسؤوليتهم .
ماجد : صدق يافيصل والله مادري صراحه خلقي ضايق واعصب يوم يفتحوا معي الموضوع.
فيصل : هين يادب كلها كم شهر ان شاء الله ونسمع خبر ملكتك ههههههههههههههههههه.
ماجد : الله وحددتها بعد مالت عليك هههههههههههههههههههههه.
فيصل : وليش لا ماتدري وش يصير انت ماشا الله شاب ممتاز مأدب ومحترم ولكك وظيفتك ومركزك وراتبك ماشاء الله حلو وماينقصك شيء الاانك تطيح اللي براسك بس.
ماجد : فيصل حشى بالله روح اخطبلي يالخاطبه هههههههههههههههه.
فيصل : ههههههههههههههههههههههههههه مالت عليك ماتنصح ههههههههههههههههههه.
ماجد : زين يالفيلسوف دامك كذا ليه ماتزوجت للان .
فيصل: انت تدري ان ملكتي قريب يعني لاتقارني فيك.
ماجد : اها طيب يادب ههههههههههههههههههههههههه.
فيصل : تحشر ابو الشباب ماعرف وش يقول قال اها هههههههههههههههههههههههههه,
ماجد : هههههههههههههههههههههه الله يرجك بس اوكي فيصل اشوفك اليوم بالاستراحه لان سلمان بيجي.
فيصل : اكيد بس تقاولتوا مع المطبخ علشان المندي ؟
ماجد : أكييييييييييييييييييييد ناصر كلمهم قدامي .
فيصل: زين اوكي اجل تمام اشوفك على خير توصي شيء ياغالي ؟
ماجد : لاسلامتك .
فيصل : الله يسلمك .
ماجد : اوكي يلا مع السلامه
فيصل : مع السلامه .
(بيت أبو سلطان )
عبد الله : الله يرجه الدب وربي مو صاحي.
أم عبد الله : هذا ماجد صديقك ماغيره ؟
عبد الله : ايه يمه ولد خالتي جوهره.
أم عبد الله : يالله والله من زمان عنهم مادري شخبار امه .؟
عبد الله: والله بخير يمه وبنتها مع ريم واعز صديقاتها تدرين .
أم عبد الله : ايه والله وفاء ماشاء الله عليها كامله والكمال لله .
وتزل ريم بهذه اللحظه
ريم : ها عبود مشينا ؟
عبد الله : يلا بس عسى نلحق قبل الصلاه.؟
ريم : حتى لو مالحقنا انت ادخل صلي بمسجد الرجال وانا بالنساء ونكمل تسوق.
عبد الله : زين يالفيلسوفه قدامي يلا.
ريم: اوكي يمه تبين شيء ماشيات من السوق ؟
أم عبد الله : لاتسلمين يابنيتي روحوا الله يحرسكم.
ريم : زين سي يوووووووووووووووو
أم عبد الله : ههههههههههههههه وعليكم مثل ماقلتم هههههههههههههه
وتروح ريم وعبد الله يركبوا السياره
وتبداء ريم تتسوق وتواعد المطاعم وتختار الحلويات والعصائر
وبعدين تمر تشتي لها طقم جديد لها ولساره .
عبد الله : ها ريوم خلاص تبين شيء ثاني ؟
ريم :ايه ابي؟
عبد الله : خير نسينا شيء حنا ؟
ريم : نسينا شيئن ؟
عبد الله : وشو ؟
ريم : اولا ابيك توديني نشتري اشرطه وبعدين تشتري لي باسكن روبنز.
عبد الله : خير يادبيه شكلك مسويه حفله مو سهره بسيطه ؟
ريم : ههههههههههههه قول ماشاء الله وبعدين عبود انا والبنات من زمان مااجتمعنا ونبي نستانس .
عبد الله : يعني ماتستانسون الا بالاكل والاشرطه ؟
ريم: عبووووووووود خلاص لاتتطنز رجعني البيت مابي شيء .
عبد الله : خير يادبيه شفيكي زعلتي امزح معك اوكي بنروح نشتري اشرطه وباسكن روبنز على ذا الخشم .
ريم : ياجعلني مااخلى يارب زين ابيك تشتريلي ( راشد الماجد الحل الصعب – عبد المجيد الحب الجديد- ديانا حداد شريطها الجديد – راشد الفارس حبايب –اصاله اوقات – محمد عبد يادموعه) و.....
عبد الله : هي هي يادبيه هههههههههههههههههههههه حشى وربي حفله على مستوى ممكن احضرها ؟؟؟؟
ريم : هههههههههههههههههههههههههههههههههههههههههههههه لا أكيد مو ممكن يلا بس روح اشتريها لي.
عبد الله : زين تأمرين أمر خيتو.
ريم : مايأمر عليك ظالم ياقلبي.
وينزل عبد الله يشتري الاشرطه ويرجع .
عبد الله : زين هذه الاشرطه تبين شيء ثاني ؟
ريم : اكيد نسيت اني ابي باسكن روبنز؟؟؟
عبد الله : لا مانسيت ماقدر انسى اصلا شيء تبيه اختي الغاليه .ههههههه
ريم : مادري احسن انك تبالغ في رد فعلك هههههههههههههههه.
عبد الله : حرام عليكي وش قصدك اني مصلحجي ههههههههههههههههههههههه.
ريم : ههههههههههههههههههههههههههههههههههه يمكن والله مادري؟؟؟
عبد الله : تهي تهي مسكين ياعبود تهي تهي وينك ياماجد تشوف صديقك يتهزاء .
ريم : ههههههههههههههههههههههههههههههههه الله يرجك بس يلا برعه اشتري لي ولساره .
عبد الله : زين وش تبين انواع ؟
ريم : ثلاث كور حجم كبير توفي وتشيز كيك واوريو وخلي يحط صوص توفي وبدون مكسرات.
عبد الله : اوف يادبيه هههههههههههههههههههههههه انزين وساره ؟
ريم : انا وساره نفس الشيء.
عبد الله : اوكي .
ويشتروا الآيس كريم ويرجعوا البيت....ومع هذه الاحداث البسيط تنتهي احداث قصتنا لهذا الجزء وتابعوا معنا الجزء القادم علشان تعرفوا وش سوا ناصر وهل راح يصبر على الموعد المحدد للملكه ؟؟؟ وريم وش سوت بحفلتها مع صديقتها ؟؟؟ وساره وموقفها من ملكتها ؟؟واستعدادات بيت أبو سلطان وأبو ناصر للأفراح وماجد وهل راح يغير موقفه من الزواج ولا لا تابعوا معنا الجزء القادم المليء بالاحداث المشوقه ان شاء الله...
محبتي لكم

وااااااااااو وناسه جبتوها في اغلى منتدى عندي


المهم مو تسوين زي البنات في المنتديات الثانيه ينزلون الأجزاء بالقطاره

تكفين حبوبه
نزلي الأجزاء انا قريت البدايه في منتدى ثاني بس العضوه هناك ماكملت عاد لا تسوين زيها

اوكيك ان شاء الله اتفقنا وعشانك برجع اقرى الأجزاء عشان اتحمس معك

كل يوميم يتلقين لي رد

اتفقنا

ينور الموضوع بوجودك

بس قولي اي جزى

وصلتي عشان انزلها

بسرعه ولا انزلها بالقطاره

مع تحياتي للمرور يا حياتي