بسم الله الرحمن الرحيم


قرم فقير
**************

منك العذر وعليّ المعذره
لاتحسب حساب هجر ولا هجير ..
كل ذنب بتذنبه باستغفره ..
واحد مايعذرك مافيه خير ..
دوّر بصدري وطن واستعمره ..
عندك من الظلع الاول للأخير ..
عيش فيني ودْمر اللي تدْمره ..
واعتذر لي واعتبر سرّك فبير ..
لاتبشرني بجرح وتذخره ..
لاتعشمني بفرح وتستخير ..
لاتنومني بليل وتسهره ..
ولاتنام الا وانا جفني سهير ..
خلني مثل النجوم مبعثره ..
عيش فيني لاشهيق ولا زفير ..
لاتقول العفو عند المقدره ..
خل قلبك صلب واحسابك عسير ..
المسامح والزعل للمبزره ..
والا انا لاني زعول ولا صغير ..
ودي ادري ليه للحزن اثمره ..
ودي اقطف من قساوتك العبير ..
ودي اجفل من فراقك واحذره ..
ودي اعرف لو زعلت وش يصير ..
لو تقدر خاطري صدق اكسره ..
لو صحيح تحبني لاتستشير ..
ازرع بقلبي سبب يستنفره ..
اثبت انك غير وان الناس غير ..
شاعرك ماكل بنت تجرجره ..
حارت به عقول ناس ماتحير ..
النسا ماحركوا فيه شعره ..
ثار عشق ومالقى شي يثير ..
لو سكت شفت الوقار فمنبره ..
وان تكلم زمهرير بزمهرير ..
مايحضر الا القلوب مجمهره ..
ومايغيب الا وعشاقه كثير ..
ان هجرته تستقر بمحجره ..
وان تبعت رضاه ماعينت خير ..
اعشقه لكن بعد ماتقهره ..
ابتسم له بس لاشفته كسير ..
حن .. لكن حن لاجبت اخبره ..
حب .. لكن خل حبك بالاخير ..
لوعطيته وجهك اعطاك ظهره ..
صد عنه ويتعبك مثل الضرير ..
لاتحاول تكسبه .. ماتخسره ..
صير ثلج يصير لك مثل السعير ..
ماتميل الا الغصون المثمره ..
ومايسيل من الجروح الا الغزير ..
من قبل لاتنقهر منه اقهره ..
قبل لايستحقرك خلك حقير ..
اسكنه .. حرّك جموده .. بعثره ..
اعشق ..اكره .. عاتب .. اشره .. حن .. غير ..
انثره .. لملمه .. لملمه .. انثره ..
صد .. ياخي طير لو تقدر تطير ..
من متى وانا اتحرالي مره ..
تثبت اني لاوقعت اوقع كبير ..
ابك انا مقطوع من غصن شجره ..
لاصديق .. ولارفيق .. ولاعشير ..
ابدوي وشيّب الصبر اشعره ..
ماعرف ريش النعام ولا الحرير ..
ان غفا كن السحاب يدثره ..
وان صحا يفرش من الرمضا حصير ..
ماخذ من قسوة البيد اكثره ..
ومن شموخ البدو شر مستطير ..
جنته صحراه والشوك .. ازهره ..
والسراب بنظرته مثل الغدير ..
ان فزع يامشجعه يامظفره ..
من خلق الله وهو قرم فقير ..
كان ماتقدره قل ماتقدره ..
صير غالي صدق والا لاتصير ..
الغلا اللي ماتزعزعه اهجره ..
دام قلبك لايجار ولا يجير ..
شوف لك رجل بليد استحقره ..
واجد اللي يعشقون بلا ضمير ..
بس انا لوجبت لي مية مَـرَه ..
ماتحرك في شعره لو تطير ..

اتمنى الموضوع ينال اعجابكم

منتديات مدرسة المشاغبين - الشعر و الشعراء منتدى للقصيد و القصائد النبطي و الفصيح البوح بالخافي